اوردان، بوردان، هر یئردن!

دوكتور جئری

پالتار دئوریمی

پروفسور نصرالدین ایله خیاباندا آددیملایاراق كلاه پهلوی دیزیسی حاققیندا دانیشیردیق؛ بیردن پروفسورون باجی اوغلوسو ایله قارشی قارشییا چیخدیق. پروفسور نصرالدین شاشیردی:

- باجی اوغلو ایندی اوخولدا اولمالی ایدین كوچه - بازاردا نه قاییریرسان!؟

پروفسورون باجی اوغلوسو باشینی آشاغی سالیب میزیلدادی:

- دایی،  "لی"  گئیدیگیم اوچون اوخولدان ائشیگه اؤتوردولر، گئدیرم ائوه شالواریمی دَییشم.

پروفسور نصرالدین اؤفكه لندی:

- گؤرورسن دوكتور! پالتار دئویرمی هله ده اؤلكه ده دوام ائتمكده دیر؛ گئچمیش دؤنمده زورلا خالقین باشینا بؤرك قویوردولار ایندیسه شالوارینی گؤتوندن چیخاردیرلار!

ان بؤیوك سوچ

 قونشوموز موللا فرضعلی نی ایندییه دك كیمسه بونجا اؤفكه لی گؤرمه میشدی. دگنكله اوغلونو دؤیه- دؤیه ائودن ائشیگه اؤتورموشدو. قونشولار آراچیلیق ائتمك اوچون اوغلانین سوچونو سوروشدولار. موللانین دردی یئنی دن  دئشیلدی. سسینی آتدی باشینا:

- آی قونشولار بو كؤپك اوغلو، شُرب خُمر ائله دی دینمه دیم؛ فَحشا و مُنكر دالیجا گئتدی دینمه دیم؛ مواد مُخدره آلیش وئریشینه باخدی دینمه دیم، اختلاس ائله دی دینمه دیم...

سونرا سولوغونو دریب ائكله دی:

- ایندی بیلیرسیز بو كؤپك اوغلو منیم ائویمه نه گتیربدیر؟

قونشولار بیربیرینی اوزونه باخیب هامی بیر سسله :

- یووووخ....- دئدیلر.

موللا فرضعلی ایكی الی ایله باشینا بركدن بامباچا ووردو:

-  ایندی بو كؤپك اوغلو منیم ائویمه ماهواره گتیریب دیر!

حیدر، حیدر تحریم بیزه نه ائدر؟

صفدر ایله حیدر ایكیز قارداش ایدیلار. انقلاب دؤنمینده ، گؤیدن قار یئرینه قورشون یاغان بیر گونده، صفدر الینی حیدرین الیندن دارتیب اؤزونو گارد جاویدین توپ- توفنگی نین قاباغینا آتاراق:

- حیدرر، حیدر، گولـله بیزه نه ائدر؟- دئیه باغیرمیشدی.

یازیق حیدرین ایكی الی اولموشدو بیر باشی. سیتقایاراق:

- هئچ، ننه میزی آغلار قویار- دئمیشدی اؤز- اؤزونه.

رحمتلیك صفدر ایندی دیری اولسایدی بلكه سورمولولارا قوشولوب دئیه جكدی:

- حیدر، حیدر، تحریم بیزه نه ائدر؟!

چاره سینه باخماق!

پروفسور نصرالدین شاه دؤنمینده سرباز ایمیش. او دؤنمده، سربازلارا آیدا بیر كیلو شكر وئررمیشلر. پروفسور نصرالدین ده آمبارچی یاردیمچیسی گؤره وینده چالیشاراق شكرلری سربازلارین آراسیندا پایلارمیش آنجاق آمبارچی نین گؤستریشی ایله سربازلارا بیر كیلو یئرینه دوققوز یوز قیرام شكر وئررمیش. پروفسور نصرالدین بو ایشین ندنینی سوروشدوقدا،  آمبارچی،" یوز قیرام سرگروهبانین پایی دیر."دئیه یانیت وئرمیش ایمیش.ائنینده-سونوندا دؤولت بو اوغورلوقلارین قارشیسینی آلماق اوچون سربازلارا شكر یئرینه بیر كیلولوق قیرچا قند وئرمه قرارینا وارمیش. بو اولایدان خبر توتان آمبارچی پروفسور نصرالدینه دئمیش:

- كؤپك اوغلو دؤولت بیلمیر سرگروهبان بونون دا چاره سینه باخاجاق!

سونرا آمبارچی، پروفسور نصرالدینی قیرچا قندلری بیربیرینه سورته رك سرگروهبانا یوز قیرام اووونتو چیخارماق مجبوریتینده قویموش.

سؤزوم دؤولتین قیمت لری سیندیرماق اوچون اؤلكه ائشگیندن جنس وارید ائتمه سینه گلیر. بیزیم بو سراصنافلار بونون دا بیر تورلو چارسینه باخاجاقلار، بو خط بو دا نیشان.

باهالیق و كورش كبیر

 بو گونلر، باهالیق دالغالاریندان یارارلاناراق اؤزلرینی گنج آداسینا چاتدیرانلار اؤلكه ده آز دئییلر. بیر گئجه ده میلیاردئر اولان بو آداملاردان بیری ائوی نین دئكوراسیونونو دییشدیرمك اوچون عنتیقه چی توكانینا گئدیر. زیرنگ عنتیقه چی میزی نین آلتیندان  بیر داش هئیكل چیخاردیب، "بو تخت جمشید خارابالیقلاریندان تاپیلمیش كورش كبیرین مجسمه سی دیر" دئیه اونو یوكسك فییتله كیشی یه ساتیر. بیر ایكی گون سونرا، كیشی كورش كبیرین داش هئیكلی ایله عنتیقه چی نین یانینا قاییدییب دئییر:

- باغیشلایین آغا، بو مجسمه دئكوروموزا یئرلشمه دی، اولسا بیر كورش صغیرینی وئرین.