+0 به‌ین
سیزین تقلیدیز کیمه‌دیر؟
دوکتور جئری
گئنه برق‌لر کسلیب ایشچی‌لر تزگاه‌لارین باشیندا کیمی مورگوله‌ییر، کیمی ایسه موبایل‌لاری ایله دوموک اولماقدا ایدی. بیردن اوستاباشی برکدن اللرینی بیربینه چالیب ایشچی‌لرین دیقتینی اؤزنه چکدی:
- عزیز ایشچی‌لر سیزدن بیر سورغو سوروشاجاغام.
ایشچی‌لر ماراقلا گؤزلرینی اوستاباشی‌نین آغزینا تیکدیلر.
- سیزین تقلیدیز کیمه‌دیر؟!
بو سورغودان ایشچی‌لر چاش-باش قالینجا اوستاباشی قاققاناق چکیب گوله‌رک اسکی بیر خاطیره‌سیندن دانیشماغا باشلادی:
اینقیلابین ایلک گونلرینده، خالق کوچه-بازاردا عومومی یئرلرده قارشیلاشاندا، ”سیزین تقلیدیز کیمه‌دیر؟‘‘ دئیه بیربیرلرینی سورغو-سوالا چکیردیلر. بو آرادا کیمی ایمام، کیمی آیت الله شریتمداری، کیمی ایسه آیت الله خویی دئیه جاواب وئرینجه - یوخ سنین تقلیدین نییه فیلانکسه دیر ده بهمان کسه دئییل- دئیه دارتیشما باشلانیردی.
بیرگون چؤرکخانادا نؤوبتده دایانمیشدیق. چؤرکخانانین صاحیبی پولاد آدلی اخلاقدان کاسیب بیر آغا ایدی. ایکی دنه چؤرک وئرینجه موشتری‌نین دده‌سینی یاندیراردی. گئنه او گون موشتری‌لرین آراسیندا ”سیزین تقلیدیز کیمه‌دیر؟‘‘ دارتیشماسی باشلانیب هره بیر سؤز دئییب هاللا-کوی سالیردی. دارتیشمانین قیزغین چاغیندا بلدیه ایداره‌سیندن امکلی اولان، یئتمیش-سکسن یاشلی اصلان آغا لؤهلویه- لؤهلویه ایچری گیردی. موشتری‌لری یاش احترامی اوچون اونا اوتوراجاقدا یئر وئردیلر. اصلان آغا بیرآز نفسینی آلینجا اوزومو اونا توتوب دئدیم: ”اصلان آغا سیزین تقلیدیز کیمه‌دیر؟‘‘. اصلان آغا دریندن بیر سولوق آلیب گؤز آلتی بیر پولاد آغایا بیر منه باخیب دئدی: ” واللاه منیم تقلیدیم پولاد آغایادیر!‘‘. هامی بو جاوابدان گولوشونجه اصلان آغا آرتیردی:” اگر پولادآغا منه ایکی چؤرک وئرسه آرواد قاپینی اوزومه آچاجاق وئرمه‌سه من کوچه‌ده قالاجاغام‘‘.
اوستاباشی‌نین سؤزلری بورایا یئتینجه گئنه اوزونو ایشچی‌لره توتوب دئدی:
- ایندی سیزدن سورشا بیلرم سیزین تقلیدیز کیمه‌دیر؟!
بؤلوم: حیكایه و گولمه‌جه‌لر