دوکتور جئری
ساتاشما ادبیاتی
گؤروش‌لر : 0
تاريخ : شنبه 28 بهمن 1402 | یازار : دوکتور جئری
+0 به‌ین

یالان دانیشماغین یول یؤندمی

دوکتور جئری

جومعه آخشامی گونو خویلوخانیم گئنه قلئیچی مورتوضون گونونو گؤی اسکی‌یه بوکدو. یازیق کیشی آروادین قاپاز- دانلاق‌لاریندان جانینی قورتارسین دئیه اؤزونو ائودن ائشیگه آتمالی اولدو. ساعات‌لارجا کؤچه‌لرده بوشو بوشونا دولانماغا باشلادی...  ‌دالغین ایدی، آرغین ایدی، آیاق‌لاری دالیجا گلمیردی، ائوه قاییتماق دا ایسته‌میردی. بیردن اؤزونو دده‌لیگی شیخ آغانین قاپیسیندا گؤردو. نسه دوشونوب قاپینی چالدی. دده‌لیگی قاپینی آچیب گولر اوزله اونو ایچری‌یه بویور ائتدی. آنجاق اونون آسیق قاش قاباغینی گؤرونجه یوموشاق-یوموشاق، "اوغلوم بیر شئی‌می اولوب؟"-دئیه سوروشدو. قلئیچی مورتوض ایشسیزلیگیندن، الی‌نین دالی اولدوغوندان، گونده-‌گونده آروادی ایله دعوا-دالاش ائتدیگیندن بول-بول دانیشدیقدان سونرا گؤزلرینی دیک دده‌لیگی‌نین گؤزلرینه تیکه‌رک سوروشدو:

-‌ آغا! سنی آند وئریرم او گؤزل آغازاده‌لریوین جانینا. منه دئگینن آخی سن نئجه بو سکسن نئچه میلیونلوق اؤرت باسدیر ماحالی‌نین خالقینی یالان-پالانلا ایداره ائده بیلیرسن آنجاق من کیچیک بیر عایله‌نی ایداره ائتمکده قالمیشام؟!

بو سؤزلردن شیخ آغا برکدن الینی دیزینه چالیب قاققاناق چکه‌رک گولدو:

-‌ اوغلوم! ائله بیل سن یالان دانیشماغین یول-یؤندمینی بیلمیرسن؟

قلئیچی مورتوض چاشیردی:

-‌ مگر یالان دانیشماغین دا یول-‌یؤندمی وار؟!

شیخ‌ آغا باشی ایله "هه" دئیه‌رک آیدینلیق گتیردی:

-‌ قدیم کیشی‌لر دئییبلر: "یالانین عؤمرو قیرخ گون اولار". یعنی قیرخ گوندن سونرا یالانین اوستو آچیلار. یالانین اوستو آچیلسا دا آدام آبیرسیز اولوب داها کیمسه اونون سؤزلرینه اینانماز. دانیشیلان یالانین اوستو قیرخینجی گونده آچیلماماق اوچون گره‌ک آدام اوتوزدوققوزونجو گون اونو یئنی و البته بؤیوک و شیرین بیر یالانلا اؤرت-باسدیر ائله‌سین. بئله‌لیکله قارشی طرف قاباقکی یالانی اونودوب یئنی یالانلا اؤرگینی خوش ائله‌یه‌جکدیر. البته بو آرادا گره‌ک آدام گونده دانیشدیغی یالان‌لارین حسابینی دا الینده ساخلایا بیلسین...

بو آچیقلامادان قلئیچی مورتوض قاش-قاباغی آچیلدی. اگیلیب شیخ آغانین الینی اؤپمک ایسته‌دیگینده او دئدی:

-‌ اوغلوم! ایندی دور گئت ائوینه، آرواد اوشاغینا موشتلوق وئر،" بایرام قاباغی دده‌لیگم حسابیمیزا اللی میلیون تومن پول تؤکه‌جک". 



آچار سؤزلر : یالانچی, دؤولت, یالان, سیاست, ایقتیصاد, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 1 دی 1402 | یازار : دوکتور جئری
+0 به‌ین
شرفلی ایختیلاسچی
دوکتور جئری
   
    گئجه یاریسی  آردی کسیلمه‌ین تلفون زنگیندن یوخودان داشلاندیم. آرایان باجاناغیم  قلئیچی مورتوض ایدی. « الیم اتگَن دوکتور! هاراداسان اؤزونو یئتیر؛ دده‌لیگم پاتلایاجاق!»-دئیه  آغلاییب سیزلاماغا باشلادی. تئز جانتامی گؤتوروب اؤزومو شیخ آغانین بئیتینه چاتدیردیم. شیخ آغا ناغارا کیمی شیشمیشدی. نییه بئله دوروما دوشدوگونو سوروشونجا باجاناغیم دیل دوداغینی چئینیه- چئینیه دئدی:
-‌ دده‌لیگیم بیرآز لَلویونلوک ائله‌ییب چیلله‌لیگه ایکی کیلو حالوا، بیرکیلو آجیل،  اوستوندن ده یئکه بیر قارپیز یئدی...
اگیلیب شیخ آغانین آغزینی ایگله‌دیم. آغزیندان متان گازی قوخوسو گلیردی.
 دورومو بئله گؤرونجه باجاناغیما سسلندیم:
-‌ شیخ آغانین قولتوغونا گیر. اونو همن خسته‌خانایا یئتیرملی‌ییک.
باجاناغیم  اوزگونجه قاپینی گؤستریب سیزیلدادی:
-‌ دده‌لیگیم قاپیدان گئچمز!
تزه دورومون نه قدر وخیم اولدوغونو اؤیرندیم.
-‌ آغانی اوزوقویلو چئویریب تومانینی آشاغی چک؛ تنقیه ائله‌ملی‌یم-دئیه قیشقیردیم.
باجاناغیم باشینی آشاغی سالاراق:
-‌ سن گلمه‌میشدن بیر ایکی یول ائله‌دیم! فایداسی یوخدوردوکتور!- دئیه یانیت وئردی.
دوشونجه‌یه دالدیغیمی گؤرن باجاناغیم دئدی:
-‌ اولماز دده‌لیگیمین قارنینی نئشترله‌یه‌سن گازی چیخسین؟!
-‌ اولماز.. مومکوندور پاتلایا منطقه‌نی اودا چکه- دئدیم.
بیردن بیره بیر شئی فیکریمه چاتدی. تلفونومو چیخاردیب دوکتور آغازاده‌نی آرادیم. یاریم ساﻋات سونرا دوکتور آغازاده شیخ آغانین باشی اوسته ایدی. اولان بیتن‌لری قیسجا آغازاده‌یه آنلادینجا بیردن بیره اوتاغین چیراغی سؤندو. یاریم دقیقه ایچینده گئنه چیراغ یاندی. گؤزلریمیزه اینانا بیلمه‌دیک. شیخ آغانین شیشی یاتیب گؤبگی بئلینه یاپیشمیشدی، دوکتور آغازاده ایسه آرادان یوخ اولموشدو!
باجاناغیم قلئیچی مورتوض چاشقین- چاشقین سوروشدو:
-‌ شیش نئجه اولدو؟! دوکتور آغازاده هارایا گئتدی؟!
راحات بیر سولوق آلدیقدان سونرا دئدیم:
-‌ دوکتور آغازاده بیزیم نفت و گاز شیرکتینده چالیشان شرفلی ایشله‌ین‌لردن بیری‌دیر؛ ائله ایختیلاس ائله‌یر سو سودان ترپنمز!



آچار سؤزلر : ایقتیصاد, ایختیلاس, اوغورلوق, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 24 آذر 1402 | یازار : دوکتور جئری
+0 به‌ین
اولماسا بونو دا بیر سؤز ائله‌یین!
دوکتور جئری
آدامین آللاهی وار! بیزیم اؤرت باسدیر ماحالی شیخ آغاسی‌نین سون بئشیک اوغلو چوخ یاخشی و دوزگون بیر اینساندیر. بوتون آغازاده‌لردن فرقلی اولاراق پوللو دؤولتی پوستلاردا چالیشمیر‌ (اینانیلان دئییلن‌لره گؤره یارانه‌سی ایله گئچینیر)؛ رانت ، پارتبازلیق ایله آراسی یوخدور؛ تظاهورات‌لاردا همیشه صفین اوّلینده دوشمن‌لرین آغزینا یومروق وورار؛ جوما نامازلاریندا یئری) ایلک جرگه‌ده‌دیر؛ نامازلارینی جاماﻋاتلا قیلار؛ خئیریه ایشلره قاباقجیلیق ائدر و سایر... 
آنجاق نئجه دئیرلر خالقین آغزینی باغلاماق اولماز. ایشی- پئشه‌سی اولمایان خالق گونده بو یازیغین دالیجا مین بیر سؤز چیخاردیر. بیرگون دئییرلر شهرین گؤبگینده اولان او یئددی قاتلی آپارتیمانین پولونو هارادان گتیریب؟! او بیری گون دئییرلر قند-چای ایختیلاسیندا بونون دا الی وار! و سایر...
گئچن جوما آخشامی، گئجه یاریسی قلئیچی مورتوضون باشچیلیق ائتدیگی جرجیس مچیدی‌نین پایگاهینا راپورت گلدی؛ ترس آوانین یوخاری باشیندا غئیری رسمی ﻋیفاف ائوی چالیشماقدادیر. قلئیچی مورتوض همن امکداش‌لاری ایله بیرگه دئییلن ائوه باسقین ائتدیلر آنجاق ائوین دال قاپیسینی آچیق گؤرونجه کیمی‌لری‌نین قاچدیغینی آنلادیلار. قلئیچی مورتوض قاپیدان ائشیگه بویلانینجا قارانلیقدا بیری‌نین یئهین-یئهین یورودوغونو گؤردو. توواراق اؤزونو اونا چاتدیردی. ال چیراغی‌نین ایشیغینی طرفین اوزونه سالدی. آدام شیخ آغانین سون بئشیگی ایدی. «گئجه‌نین بو واختیندا هارا بئله آغا؟» دئیه قلئیچی مورتوض سوروشدو. سون بئشیک اؤفکه‌ ایله، «کورسان، گؤرمورسن پیاده روی ائله‌ییرم؟» دئدی. بوکز قلئیچی مورتوض ال چیراغی‌نین ایشغینی سون بئشیگین  آلت اگنینه سالدی. سون بئشیک گوللو- گوللو بیر قادین تومانی گئیمیشدی. قلئیچی مورتوض هیرنادی:
-‌ آغا بو نه‌دیر؟!
سون بئشیک آلت اگینه باخیب برکدن هیرسلندی:
-‌‌  نه اولاجاق شالواردیر دا.. اولماسا بونو دا بیر سؤز ائله‌یین!!



آچار سؤزلر : مسئوللار, پول, ایختیلاس, اوغورلوق, یارانه, ایقتیصاد,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 1 مهر 1402 | یازار : دوکتور جئری
+0 به‌ین

نییه تحریم‌لرین اثری یوخدور؟!

دوکتور جئری

او گئجه اؤرت باسدیر ماحالی  شیخ آغاسی‌نین کئفی ساز ایدی. آخشام اوستو مساژ گلمیشدی؛ مملکندین بولوکه اولموش پوللاری‌نین بیر قیسمی آزاد اولوب. کؤنلو بیرآز آروادی چوپور مصمه ایله دیلخوشلوق ائله‌مک ایسته‌دی. یورغانین آلتیندا الینی اوزادیب مصمه‌نی قیدیقلاماغا باشلادی آنجاق آرواد اؤفکه ایله دالینی شیخ آغایا چئویره‌رک دئیینمگه باشلادی:

-‌ نئچه آیدیر دئییرم؛ منه بیر پالتار یویان ماشینی آل، اللریم پار-پالتارینی یوماقدان قاریدی،آمما سن هردؤنه اؤزونو ائشیمزلیگه وورورسان.

شیخ آغا آروادی یوشوتماق اوچون اونون ساچلارینی تومالایا-‌تومارلایا دئدی:

-‌ اؤزون مندن یاخشی بیلیرسن مملکندیمیز زیرپی دوشمن طرفیندن تحریمده‌دیر. کیمسه بیزیمله آلیش-وئریش ائتمیر، ائتسه ده پولونو آلا بیلمیریک. اینشاالله تحریم‌لر گؤتورولونجه سنه بیر پالتار یویان ماشینی، هله اوسته‌لیک بیردنه ده قاب-قاشیق یویان ماشینی  آلاجاغام.

چوپور مصمه  شیخ آغا طرف دؤندو:

-‌ نییه او تزه آزاد اولموش پوللاردان آلمیرسان؟!

-‌ هانسی پول؟ پول-مولوموز آزاد اولماییب.

-‌ اؤزونو او یولا وورما آغا، بایاق آیاق یولونا گئدنده موبایلینی گؤتوروب اؤزوم مساژی اوخودوم.

شیخ آغا اؤزونو ایتیرمه‌دی:

-‌ هه! او پولو دئییرسن، باخ دده‌مین روحو حاققی اوپولو شیخ نصراللها وئره‌جگم؛ اونا بورجلویام. اینشالله قالسین گلن دفعه‌یه..

بو جاوابدان چوپور مصمه هیرسلنیب  گئنه دالینی شیخ آغایا چئویریب:

-‌ بئله ایسه، پالتار یویان ماشینی آلانا قدر من ده سنی تحریم ائله‌ییرم.

 سونرا الی ایله شاپ-شاپ قاسیغینا تاپدایاراق هده‌له‌دی:‌

-‌ داها بوندان سونرا بوندان خبر یوخدور.

بو سؤزلردن شیخ آغا قاققاناق چکیب بیج-بیج گولدو:

-‌ سنین تحریم‌لری‌نین اثری یوخدور!

چوپور مصمه چاشقینجا- نییه؟!- دئیه سوروشدو.

-‌ چونکو هر طرفه دؤنسن بیر دلیگین منه طرفدیر!




آچار سؤزلر : پول, مسئوللار, تحریم‌, تحریم‌لر, ایقتیصاد, سیاست,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 26 اسفند 1401 | یازار : دوکتور جئری
+0 به‌ین

سن ده موللایا وئرمیسن؟!

دوکتور جئری

باشدان دئملی‌یم اوخودوغونوز بو یازی، کندیمیزده باش وئرن گئرچک بیر اولایدان قایناقلانیب و من بیر شئی آرتیریب-‌اسکیتمه‌دن احوالاتی اولدوغو کیمی قیساجا آنلاتماغا چالیشاجاغام.

بیزیم کندیمیز باغلی-باغاتلی بیر یئردیر و اهالی‌نین باشلیجا گئچینه‌جگی ائله بو باغلاردان تأمین اولور. آللاهین حول و قوه‌سی ایله، بیلدیر بیر یاندان باغلارین یاخشی میوه وئردیگیندن، بیر یاندان دا میوه‌نین یاخشی پولا گئتدیگیندن، اوزون ایللیک سیخینتیدان سونرا کند اهالیسی‌نین اوزو گولوب یاخشی گلیر الده ائده بیلدیلر. کسینلیکله دئیه بیله‌رم ان کیچک باغچیمیز بئله، بیلدیر ایکی-اوچ یوز میلیون تومن میوه ساتا بیلمیشدی. بورایاجان هر شئی یاخشی ایدی. کندین قیافتی یاواش-یاواش دگیشمکده ایدی. کیمی ائو-ائشیگینه خرج قویور، کیمی ائو-اوشاغی‌نین پال-‌پالتارینی تزه‌لیر، کیمی ایسه یئنی موتور-ماشین آلیردی. هر شئی یولوندا گئدیرکن بیر گون کندین موللاسی آخشام چاغی اهالینی مچیده چاغیردی. یاریم ساعات آللاه-یئیغمبردن دانیشاندان سونرا اساس مؤوضویا گئچیب بیلدیردی، قوم شهرینده  بؤیوک بیر شیرکت آچیب و اهالیدن ایسته‌دی بو شیرکتده سرمایه‌گذارلیق ائله‌مکله، هر یوز میلیون تومنه آیدا بئش میلیون تومن خالیص قازانج و یا همان سود آلا بیلرلر. بو وعده ایله جاماعات آراسیندا ولوله دوشدو. کیمی‌لری آیدان-آیا کارمندلر کیمی حوقوق آلاجاقلاری‌نین سئوینجینی یاشادیلار، کیمی‌لری ایسه بیر ایلده پوللاری‌نین نه قدر آرتاجاغینی حسابلادیلار. ائرته‌سی گوندن موللا، کندین مچیدینده دفتر-دستک آچاراق اهالی‌نین پوللارینی چک-سوفته قارشیلیغیندا توپلاماغا باشلادی. گئرچکدن ده موللانین شیرکتینده سرمایه یاتیردان‌لار، اوچ-دؤرد آیاجان وعده وئریلن سودو ‌تام آی باشیندا حساب‌لاریندا گؤروردورلر. بو خوش‌حسابلیق  قونشو کندلرده اولان اهالینی ده موللانین شیرکتینه سرمایه یاتیرماغا تشویق ائدیردی.

اوچ آی اؤنجه، بیردن بیره حساب‌لارا تؤکولن سودلارین قاباغی کسیلدی. بؤلگه‌ده چاو دوشدو مولانین شیرکتی سینقین چیخیب. موللانین آرا-بره‌ده گؤرونمه‌مه‌سی بو شاییعه‌نی بیرجوره تصدیق‌له‌ییردی. کند تالواسا ایچینده ایدی. شیرکتده میلیاردلیق سرمایه یاتیردان‌لاردان بیر نئچه‌سی شهرده وکیل یانینا گئدیب مؤوضو حاقیندا و نئجه شیکایت ائله‌جکلری باره‌ده مشورت ائله‌دیلر. وکیلین فیکرینجه، شیرکت سینقین چیخمیشسا و موللا دؤولتدن سینقینلیق بلگه‌سی آلمیشا دئمک اولار سرمایه یاتیردان‌لارین پوللاری باتمیش ساییلیر! کندلی‌لرین بیری دئدی: بیز شیرکت-میرکت تانیمیریق بیز پوللاریمیزی موللایا وئرمیشیک و پوللاریمیزی اوندان ایسته‌ییریک. وکیل بیرآز دوشونوب آرتیردی: سیز پوللاریزی موللایا وئریب آیدان آیا اوندان سود آلمیشسانیز بو ریبادیر و دؤولتین بوندان خبری اولسا سیزی توتوب ریبالی پول وئرمک سوچو ایله زیندانا باسا بیلر. بو خبر کندده یاییلینجا اهالی‌نین ایکی الی اولدو بیر باشی...

کندیمیزده عوض آدلی بیر قوجا کیشی وار. بیر تصادوف قضاسیندا فلج اولاراق اوتوراق اولوب. اوغلان‌لاری گونونو گئچیرسین دئیه اونو سحر چاغی گتیریب کندین قهوه‌خاناسی‌نین قاباغینا قویوب آخشام گلیب آپارارلار. عوض قهوه‌خانایا گلن‌لرین هانگیسی‌نین قیافه‌سینی پوزغون گؤرورسه یانینا چاغیریب قولاغینا پیچیلداییر:

-‌ سن ده موللایا وئرمیسن؟!



آچار سؤزلر : معیشت, دؤولت, ایقتیصاد, مسئوللار, پول, میلّت,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 14 بهمن 1401 | یازار : دوکتور جئری
+0 به‌ین

یوخو

دوکتور جئری

اؤرت باسدیر ماحالی‌نین مؤعتبر شیخ آغاسی بیر هفته‌دن چوخ ایدی بللی اولمایان  سبب‌لره  گؤره گئجه‌نی گوندوزه قاتاراق بوتون ایگیرمی دؤرد ساعاتی یاتیر،  نامازلاری بئله قضایا قالیردی. حتّی اوچ گون قاباق، ماحالین قوزئی گون‌باتاریندا باش وئرن زلزله اوزوندن ائو-ائشیک‌لرینی الدن وئریب قیشین شاختاسیندا باییردا قالان اهالی، یاردیم آلماق آماجی ایله اونون قاپیسینا گلیب سحردن آخشامادک گؤزله‌سه‌لر ده یوخودا اولدوغونو بیلینجه کور-پئشمان گئری قاییتمیشدیلار. اوزون یاتمالار اوزوندن رنگی سارالان شیخ آغانین وضعیتی یاواش-یاواش اوغوللوغو قلئیچی مورتوضو نیگران ائله‌مگه باشلادی. دونن گون اورتا چاغی شیخ آغا ال سویا یئتیریب تله‌سیک یاتاغینا گیریب یاتماق ایسته‌ینده، قلئیچی مورتوض باشی اوسته دیزه چؤکوب هؤنکور-هؤنکور آغلاماغا باشلادی:

-‌ دددده..دده! نییه بو قدر یاتیرسان؟ نه‌خوشلامیسان!؟ ایسته‌ییرسن بیزی باشسیز قویاسان؟ ایجازه وئر دوکتورا زنگ ووروم گلسین..

شیخ آغا یئرینده دیرسکلندی. سؤنوک گؤزلری ایله قلئیچی مورتوضا باخیب فیسیلدادی:

-‌ قورخما اولما اوغلوم.. بیرشئی‌یم دئییل!

-‌ بیر شئیین دئییلسه، نییه بو قدر یاتیرسان؟-دئیه قلئیچی مورتوض گؤزلری‌نین یاشینی سوزدوردو.

شیخ آغا دولوخساندی:

-‌ گئچن هفته گئجه یوخودا گؤردوم...

قلئیچی مورتوض باشینا تاپدایاراق قیشقیردی:

-‌ بو دونیادان گئده‌جکسن؟!

شیخ آغانین اگری-اگری باخیشی قلئیچی مورتوضو سوسدوردو.

-‌ گئچن هفته گئجه یوخودا گؤردوم، قارداش لیوان ماحالی‌نین ایسلامی موقاویمت جبهه‌سینه منسوب بیر قوروپ، حوضوروما گلیبلر. من ایندییه‌دک اونلاری هئچ گؤرمه‌میشدیم. تأسوفله آد-سانلارینی بئله سوروشمادیم. گلمه‌لری‌نین سببنی سوروشدوم. دئدیلر‌: موقاویمتی گوجلندیرمک اوچون پولا احتیاج‌لاری وار. دئدیم: قاب گتیرمیسیز؟ بیر یئکه چمدان قاباغیما قویدولار. چمدانی گؤتوروب صاندیق‌خانایا گئچدیم. تپه-تیخلام  دولارلا دولدوردوم، چمدانین قاپاغی باغلانمادی. بیر- ایکی دؤنه تاپدادیم، باغلانمادی. سون کره مؤحکم تاپدادیغیمدا بیردن سسیندن یوخودان دیسکیندیم...

قلئیچی مورتوض چاشقین- چاشقین سوروشدو:

-‌ سونرا نه اولدو؟!!

شیخ آغا اوزونتو ایله آرتیردی:

-‌ نه اولاجاق؟!  اوگوندن دایم یاتیرام بلکه آدینی بیلمه‌دیگیم او مقاومت قروپو چمدان‌لارینی آلماق اوچون یوخوما گله‌لر!



آچار سؤزلر : سیاست, ایقتیصاد, پول, مسئوللار, زلزله,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 23 مهر 1401 | یازار : دوکتور جئری
+0 به‌ین

چیغیر-باغیرین زیانی

دوکتور جئری

ارشدین دوکانی‌نین قاباغی قالابالیق ایدی. جاماعات باساباس ائله‌ییب هرکس دیگرینی ایته‌له‌یرک قاباغا گئچمگه تله‌سیردی. چیغیر-باغیر، یامان-یوووز سسی عرشه دایانمیشدی. هارادانسا قلئیچی مورتوض تاپلیب گلدی. نیگران-نیگران جاماعاتا باخدی. کیمسه‌نی آختاریر کیمی ایدی. قالابالیغین ایچینده اوستاد دفترینی گؤرونجه اونا یاناشیب سسی چاتسین دئیه قیشقیردی:

-‌ نه خبردیر؟ جاماعات نییه چیغیر-باغیر سالیب؟

اوستاد دفتری جاوابدا هارای تپدی:

-‌ ارشد قیرخ سککیز مین تومنه تعاوونی تویوق وئریر. بازاردا کیلوسو آلتمیش مین تومن‌دیر. بونا گؤره میلّت چیغیر-باغیر سالیب.

قلئیچی مورتوض یئنه سوروشدو:

-‌ بو چیغیر-باغیرلارین، یامان-یوووزلارین دده‌لیگیم شیخ‌آغانین تزگاهینا زیانی یوخدور کی؟!

اوستاد دفتری سسلندی:

-‌ یو.. هئچ زیانی یوخدور!

قلئیجی مورتوضون نیگرانلیغی گئتدی:

-‌ بئله ایسه قوی نه قدر چیغیر-باغیر سالیرلار سالسینلار.



آچار سؤزلر : مسئوللار, ایقتیصاد, باهالیق, قلئیچی مورتوض, دؤولت, میلت,

    بؤلوم: حیكایه و گولمه‌جه‌لر
گؤروش‌لر : 0
تاريخ : یکشنبه 20 شهریور 1401 | یازار : دوکتور جئری
+0 به‌ین

مسئول‌لار چوْر یئییرلر!

دوکتور جئری

بیری وار ایدی بیر یوخ ایدی.اسکی زامان‌لاردا یوخسول بیر ار-آرواد یاشایاردی. کیشی قارا فهله ایدی، اؤلمه-دیری بیر یاشاییش اوچون سحردن آخشامادک باییردا قان-‌تر ایچینده چالیشاردی. او،  آخشام آرغین-یورغون ائوه قاییداندا، آرواد تئز سوفره‌نی آچیب پیشیردیغی یاغ شورباسینی اورتایا قویاردی. یاغ شورباسی دئدیکده، سویا آتیلمیش ایکی قاشیق یاغ، ایکی بالاجا یئرآلما، اوچ-دؤرد نوخود یا ماش، بیرآزجیق دا ساری‌کؤک ایله دوز ایدی. ار-آرواد یاغ شورباسی‌نین سویونو تیلیت ائله‌ییب یئدیکدن سونرا آرواد قاپلامانین  بوتون محتویاتینی چاناغا بوشالدیب کیشی‌نین قاباغینا ایته‌له‌یرک ایندیکی میلّته اورک‌یاندیران مسئول‌لار کیمی دئیردی:

-‌ کیشی من یئمیرم؛  سن یئ آیاقدان دوشمه‌‌یه‌سن!

کیشی دولوخسانیب دئیردی:

-‌ آرواد آخی بئله‌کی اولماز، سن نه یئیه‌جکسن؟!

آرواد دئیردی:

-‌ فاطی یئسین، چوْر یئسین. قاپلامانین دیبینی یئسین!

سونرا سوفره‌دن بیر پارچا چؤرک گؤتوره‌رک آرتیراردی:

-‌ ائله من قاپلامانین دیبینی سیییرسم گؤرَر.

گونلردن بیر گون، کیشی آروادی‌نین هرگون قاپلامانین دیبنی سییرمه حرکتیندن شوبهه‌لنیب قادین چاناغی اونون قاباغینا ایته‌له‌ینده قابی گئری قایتاراراق:

-‌ بو گون من چوخ آج دئییلم بونلاری سن یئی، ائله من قاپلامانین دیبینی سیییرسم گؤرَر-‌دئیه جلد قاپلامانی آروادین الیندن قاپار.

کیشی قاپلامانین دیبینه باخاندا گؤزلرینه اینانا بیلمز؛ ایکی‌ساریلی بیر یومورتا قاپلامانین دیبینه یاپیشمیشدی!

------------------

آچیقلاما

چوْر درد، مرض ویا زهرمار دئمکدیر.



آچار سؤزلر : سیاست, ایقتیصاد, عدالت, ایش, پول, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 28 مرداد 1401 | یازار : دوکتور جئری
+0 به‌ین

شیخ‌ آغانین حئیوان‌سئورلیگی

دوکتور جئری

من دونَنه‌دک اؤرت‌باسدیر ماحالی شیخ آغاسی‌نین تکجه موسلمان نؤوعوندن اولان اؤلکه و دونیا اینسان‌لاری‌نین قایغی‌سینی چکمکده اولدوغونو دوشونمکده ایدیم. ‌سن دئمه اوحضرت اینسان‌لارلا یاناشی بوتون دونیا حئیوان‌لاری‌نین آشیری مودافیعه‌چی‌سی‌دیر ده بو ایندی‌یه‌دک گؤزلردن یایینمیش دورومدا قالیب.

جومعه آخشامی شیخ آغا بیزی شاما قوناق چاغیرمیشدی.خالقین معیشت، ایش و مسکن مسئله‌لری‌ اوستونده چوخلو موباحیثه‌لر گئدندن سونرا نهایت سوفره‌لر آچیلیب چئشیدلی-چئشیدلی یئمک‌لر اورتایا قویولدو. هامی یئمگه باشلاماق اوچون شیخ آغانین ایجازه‌سینی گؤزله‌ییرکن، او، بیر بوشقاب گؤتوروب بیر شیش کاباب، بیر تویوق بودو، بیردنه ده بالیق چکه‌رک آیاغا قالخیب ائشیگه چیخدی. ایشین غریبه طرفی بو، او ائشیگه چیخارکن قاپی دالیندا اولان چوماغی دا یانیجا گؤتوردو. هامیمیز چاش-باش شیخ آغانین اوغول‌لوغو قلئیچی مورتورضا ساری دؤندوک. او گولومسه‌یرَک مسئله‌یه‌ آیدینلیق گتیردی:

-‌ یئددی آی قاباق قاراباسدی ماحالی‌نین شیخ آغاسی دده‌لیگیمه بیر موستضعف پیشیک هدیه وئردی. اوگوندن دده‌لیگیم پیشیگین یئمگینی اؤز الی ایله قاباغینا قویمادان اؤزغذاسینی یئمز.

سؤزلر بورایا چاتینجا بیردن ائشیکدن آجیناجاقلی پیشیک چیغیرتی‌لاری ائشیدیلدی. چاشقینلیق ایچینده گئنه قلئیچی مورتوضا دؤندوکده آچیقلادی.

-‌ پیشیگین غذاسینی قاباغینا قویاندا قاپی-قونشونون آج-اوج پیشیک‌لری اونون یئمگینه شریک چیخماسینلار دئیه دده‌لیگیم چوماق ایله اونلاری قوووالاییر!



آچار سؤزلر : دؤولت, میلت, معیشت, عدالت, مسئوللار, ایش, قلئیچی مورتوض, عدالت, آجلیق, ایقتیصاد,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 22 مرداد 1401 | یازار : دوکتور جئری
+0 به‌ین

بهیشته گئتمک ایسته‌ییرم!

دوکتور جئری

یاشاییشین تام شیرین چاغیندا، بیر اوزو قیز، بیر اوزو گلین اولان فاطوشون اری بیر ایش قضاسیندا اؤلوب اونو ایکی صغیر اوشاقلا یالقیز بوراخدی. کیمسه‌سیز قادین بیر مودّت بالالاری‌نین قارنینی دویورماق اوچون او قاپی بو قاپینی چالاراق ایش آختارماغا باشلادی آنجاق ایکی یئتیم اوشاقلا کیم اونا ایش وئرردی؟ ایش‌‌وئرن‌لر تاپیلاندا ایسه، ایشدن چوخ اوندان باشقا ایش گؤزله‌ییردیلر!

الی هر یئردن اوزولن یازیق فاطوش ائنینده-سونوندا اؤزونو ساتماق فیکرینه دوشدو آنجاق بیریاندان دا آللاهدان، جهنم عذابیندان قورخوردو. چوخلو دوشونوب داشیندیقدان سونرا بیردن بئینینه ووردو گئدیب کندلری‌نین موللاسی شیخ‌آغا ایله ‌بو مؤوضو حاقیندا دانیشیب ایجازه آلسین. چادیراسینی باشینا سالیب شیخ‌آغانین خیدمتینه یئتیشه‌رک احوالاتی اولدوغو کیمی اونا دانیشدیقدان سونرا سوروشدو:

-‌ آغا باغیشلایین ها! اؤزوم قارا، اوشاق‌لاریمین قارنینی دویورماق اوچون من ترس‌آوانین جاندارما باشچیسی قوچو نیظاما وئرسم آللاه منی جهنم اودوندا یاندیرار؟

شیخ آغا استغفرالله دئییب یئره باخدی:

‌-‌ قیزیم! آللاه سنی قیرخ گون جهنم اودوندا جاییر-جاییر یاندیرار!

-‌ ترس آوانین کندخوداسی مشه ایسلام وئرسم نئجه؟-دئیه گئنه سوروشدو فاطوش.

-‌ اوندا ایکی آی جهنم اودوندا یاناجاقسان-‌دئدی شیخ آغا.

-‌ ترس آوانین موعلیمینه؟

-‌ اوچ آی!

الی هریئردن اوزولن فاطوش فیکیرلشیب-فیکیرلشیب سون شخصین آدینی یاواشجادان آپاردی:

-‌ ترس آوانین موللاسینا وئرسم نئجه؟!

شیخ آغانین قاش-قاباغی آچیلیب گولومسوندو:

-‌ قیز نییه یاواشدان دانیشیرسان؟ دئنن بهیشته گئتمک ایسته‌ییرم دا!!



آچار سؤزلر : قادین‌لار, یوخسوللوق, ایشسیزلیک, یالانچی, یالان, ایقتیصاد, ایش, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 14 مرداد 1401 | یازار : دوکتور جئری
+0 به‌ین

میلّته گوج دوشمه‌سین دئیه...

دوکتور جئری

دونن آخشام چاغی شیخ آغا ائششگی ایله شهردن قاییداندا دوستلارلا ترس‌آوانین قهوه‌خاناسیندا اوتوروب اونون اؤرت‌باسدیر ماحالیندا، میلتین ریفاهی اوچون تطبیق ائتدیگی یئنی ایقتصادی برنامه‌لریندن دانیشماقدا ایدیک. شیخ آغا ایکی گؤزو دولو اولان خورجونو چیگنینه آشیراراق ائششگه مینمیشدی.هامی‌میز چاش-باش بو صحنه‌نی سئیر ائدرکن اوستاد دفتری اؤزونو ساخلایا بیلمه‌ییب سسلندی:

-‌ شیخ آغا باغیشلایاسان ها.. نییه خورجونو ائششگین بئلینه چاتمیرسیز؟!

شیخ آغا آلچاق‌کؤنولولوکله جاواب وئردی:

-‌ دئییرم حئیوان یازیقدیر منله خورجونو بیرگه داشییا بیلمز یاخشیسی بودور خورجونو دا من گؤتورم.



آچار سؤزلر : سیاست, ایقتیصاد, مسئوللار, میلت, دؤولت,

    بؤلوم: حیكایه و گولمه‌جه‌لر
گؤروش‌لر : 0
تاريخ : یکشنبه 26 تیر 1401 | یازار : دوکتور جئری
+0 به‌ین

دؤولتی شکر

دوکتور جئری

  دؤولت باشچیسی شیخ آغا، تعمیر ائله‌مک مقصدی ایله اؤلکه ایقتیصادیاتی‌نین موتورونو یئره قویاندان بری، عوموم خالق کیمی  قلئیچی مورتوض دا  گونده‌لیک یاوان چؤرگین پولونو چیخارتماقدا چتینلیک چکیرکن  اگین-‌باشینا دا یئتیشه بیلمه‌ییب همیشه جیر-جیندیر پالتارلار ایچینده گزیردی.

یایین ایستی گونلری‌نین بیرینده، قلئیچی مورتوضون پوللو دوستو دوکتور جئری اونو خزر ساحیلینه دعوت ائله‌ییر. قلئیچی مورتوضون شورتو اولمادیغیندان آروادیندان ایسته‌ییر اونا بیر شورت تیکسین. خویلو خانیم دا شکر چووالیندان  اونا چوخ گؤزل بیر شورت تیکیر.

قلئیچی مورتوض دوستو ایله پلاژا گئدنده شورتونو گئییر آنجاق هر کیمسه اونو گؤردوکده باشلاییر گولمگه. سونوندا قلئیچی مورتوض دایانا بیلمه‌ییب دوستوندان سوروشور:

-‌ خالق منیم نه‌ییمه گولور؟!

دوستو گوجلوکله گولمگی‌نین قارشی‌سینی آلیب دئییر:

-‌ شورتون  دالیندا تعاوونی دؤولتی شکر، قاباغیندا 50 کیلو‌قرام یازیلیب.



آچار سؤزلر : عدالت, میلت, باهالیق, دؤولت, پول, ایقتیصاد, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 10 تیر 1401 | یازار : دوکتور جئری
+0 به‌ین

یوز میلیاردلیق وامی نئجه وئرمیشلر؟

دوکتور جئری

گئچن‌لرده “آرمان امروز” قزئتی “گئری قایتاریلمایان قیرخ ایللیک یوز میلیارد وام”ی تیتر ائله‌میشدی.  بو خبر اوخودوقدا اؤز-اؤزومه دئدیم: “ بئله بیر ایش اولا بیلمز، حتماً  بو وامی وئرنده ایلگیلی مسئول بو شخصدن آلینان عکس‌لره دیقّت ائله‌مه‌میش؟!”

*

ایران ایسلام اینقیلابی‌‌نین ایلک ایللرینده، وعده وئریلمیش ربا‌سیز بانکچی‌لیق اساسی اوزه‌رینده، قرار اولموشدو احتیاجی اولان هر کسه قئیدسیز-شرط‌سیز ایسته‌دیگی قدر وام وئریلسین. موفته پول قوخوسو بورنونا دَین بیزیم قلئیچی مورتوض بو خبری ائشیتجک تئز اؤزونو ان یاخین بانکا یئتیریب رئیسینه:

-‌ من وام آلماق ایسته‌ییرم-دئمیشدی.

بانکین رئیسی گولومسه‌یه‌رک:

-‌ بلی عزیز قارداش! نه قدر وام ایسته‌ییرسیز؟-دئیه سوروشموشدو.

قلئیچی مورتوض اینقیلابی ساققالینی بیر-ایکی یول تومارلادیقدان سونرا:

-‌ بیر میلیارد اولسا گؤرر!- دئمیشدی.

بانکین رئیسی “باش اوسته” دئیه‌رک قاسادان پولو چیخاردیب چووالا دولدورموشدو. قلئیچی مورتوض تام چووالی آلارکن بانکین رئیسی:

-‌ آنجاق بو وامی آلماق اوچون بیزیم بیرجه شرطیمیز وار!- دئمیشدی.

قلئیچی مورتوض:

-‌ آمما سیز قئیدسیز- شرط‌سیز وام وئرمگینیزی سؤیله‌میشدینیز- دئیه اعتیراض ائله‌میشدی.

بانکین رئیسی:

-‌ دوغرودور، بیز نه ضامین، نه سند، نه گیروو، نه ده سوفته ایسته‌ییریک، ساده‌جه بانک اساسنامه‌سینه گؤره سیزدن ایکی قطعه یاخیندان سالینمیش گؤزونوزون عکسی و ایکی قطعه‌ ده یاخیندان سالینمیش لوت یانینیزین عکسینی ایسته‌ییریک.-دئیه آیدینلیق گتیرمیشدی.

قلئیچی مورتوض بو شرطدن چاش-باش اولسا دا وامین عشقینه تئز گئدیب عکس‌لر سالدیریب گلمیشدی.

بانک رئیسی عکس‌لری اینجه‌له‌دیکدن سونرا اوزونو قلئیچی مورتوضا توتوب دئمیشدی:

-‌ باغیشلایین قارداش! بیز بو وامی سیزه وئره بیلمه‌ریک.

قلئیچی مورتوض اوزولوب:

-‌ نییه؟! – دئیه سوروشموشدو.

بانکینن رئیسی  آچیقلامیشدی:

-‌ بو عکس‌لردن گؤرونور، سیزده بو پولو آلاجاق گؤز وار آنجاق اونو گئری قایتاراجاق گ.ؤت یوخدور!



آچار سؤزلر : ایقتیصاد, اوغرو, سیاست, اوغورلوق, پول, ایختیلاس, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 3 تیر 1401 | یازار : دوکتور جئری
+0 به‌ین

دئمه‌دیم کسرسن؟!

دوکتور جئری

بوتون ایقتیصاد موتخصیص‌لری اؤرت باسدیر ماحالی‌ ایقتیصادیاتی‌نین خسته بیر ایقتیصاد اولدوغو اوزه‌رینده فیکیربیرلیگینده‌دیرلر. قیرخ ایلدن چوخدور آدلاری‌ قاباغیندا دوکتور لقبینی یئدک چکن جمهورباشقان‌لاری اؤلکه ایقتیصادیاتیندا ایصلاحات آپارماقدان قورخوب چکینسه‌لر ده مکتب‌خانادا درس اوخوموش سون جومهور‌باشقانی شیخ الاسلام اولگوج اله آلیب مملکند ایقتیصادیاتیندا ایصلاحات ائله‌مک فیکرینه دوشوب...

اولگوج دئدیم، بیر حکایه یادیما دوشدو:

دئییرلر؛ قدیم زامان باش‌کند ترس‌آوادا بیر عومومی حامام وار ایدی. حامام قادین‌لارین و کیشی‌لرین ایستیقاده‌سی اوچون بیر آرا‌کسمه دیوارلا اورتادان ایکی‌یه بؤلونموشدو.

بیرگون بیر کیشی طوطی‌سی ایله بیرگه حاماما گلیر. طوطی اوچوب اورتا دیوارا قونور. کیشی اؤزونو ایسلاتدیقدان سونرا جانتاسیندان اولگوجو چیخاردیب تشکیلاتینی ایصلاحات ائله‌مگه باشلاییر. بو صحنه‌نی ایلک دفعه اولاراق گؤرن طوطی دیوار اوستوندن قیشقیریر:

-‌ کسرسن هااااا!

کیشی طوطی‌نین سؤزونو سایماییب ایصلاحاتی سوردورونجه طوطی گئنه قیشقیریر:

-‌ کسرسن هاااا!

کیشی بو کز حیرصلنیب یانینداکی صابونو گؤتورب طوطی‌یا طرف تولازلاییر. صابون طوطی‌یا دَییر. طوطی اوچ-دؤرد یول اؤز باشینا فیرلاندیقدان سونرا اوزو قادین‌لار بؤلومونه دؤنور. دئمه، قادین‌لار بؤلمه‌سینده ده بیر قادین ایصلاحات ایشی ایله مشغول ایمیش. طوطی گیج-گیج بو صحنه‌نی گؤرونجه دئییر:

-‌ دئمه‌دیم کسرسن!!



آچار سؤزلر : باهالیق, ایقتیصاد, مسئوللار, سیاست, عدالت,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 20 خرداد 1401 | یازار : دوکتور جئری
+0 به‌ین

 دؤولتین پاخیل‌لیغی

دوکتور جئری

ایندی‌لیکده، عوموم خالقین دانیشدیغی اساس مسله‌لردن بیری دؤولتین باشارات‌سیزلیغی‌دیر. کیمی دیندیریرسن، ایشه‌یاراماز مسئول‌لاری اؤلکه‌ده یارانمیش یولسوزلوق‌لارین و ایقتیصادی- سیاسی بؤحران‌لارین باشلیجا سببکاری کیمی گؤستره‌رک ایش‌بیلن و موتخصیص اینسان‌لارین زینداندا ویا دؤولتین ائشیگینده اولدوغوندان گیلئی‌لنیر.

دونن بازاردا بو مؤوضویا فیکیرلشه- فیکیرلشه گزرکن، بیردن دوستوم مهندیس آقا‌زاده ایله قارشیلاشدیم. اؤپوش-گؤروشدن سونرا سوروشدوم:

-‌ مهندیس! چوخدان ایدی گؤرونموردون خاریجه‌یه گئتمیشدین؟!

اوزونتو ایله باشینی تؤولاییب دئدی:

-‌ یوخ بابا! زینداندا ایدیم.

شاشیردیم:

-‌ زینداندا؟!! اولمایا اویان-بویاندا سؤز-مؤز دانیشمیشدین؟!

آجی- آجی گولومسوندو:

-‌ یوخ.. دؤولت منیم پاخیل‌لیغیمی ائله‌ییب منی باسمیشدی زینداندا.

داها بتر چاش-باش اولدوم:

-‌ آخی دؤولت سنین نه‌یی‌نین پاخیل‌لیغینی ائده‌جک ایدی؟!

چوخ جیددی دئدی:

-‌ من ائوین یئرآلتی قاتیندا  دگر، گؤزل‌لیک و ضریب‌امنیت باخیمیندان حؤکومتین اسکیناس‌لاریندان قات-قات یاخشی‌سینی باسیب بازارا وئریردیم، دؤولتین‌ ده منیم پول‌لاریمین کئیفیتینه  پاخیل‌لیغی گلیب منی توتوب باسدی زیندانا!



آچار سؤزلر : مسئوللار, ایقتیصاد, پول, دؤولت, میلت, اوغورلوق, یولسوزلوق, سیاست, ایختیلاس,

    بؤلوم: حیكایه و گولمه‌جه‌لر
یارپاق‌لار: [1] [2] [3] [4] [5] [6] [7]
آرشیو
سون یازی‌لار
یولداش‌لار
سایغاج
ایندی بلاقدا : نفر
بوگونون گؤروشو : نفر
دونه‌نین گؤروشو : نفر
بوتون گؤروش‌لر : نفر
بو آیین گؤروشو : نفر
باخیش‌لار :
یازی‌لار :
یئنیلنمه چاغی :