+0 به‌ین
کسکین دیل
دوکتور جئری
اوغلانی اون بیرینجی صینیفه یازدیردیقدان ایکی-
اوچ گون سونرا مدرسه‌دن زنگ ووروب آتالارین گرکلی بیر تعهدنامه‌نی ایمضالایاجاقلارینی
سؤیلهدیلر.
مدرسه‌یه گئتدیکده مودیر تعهدنامه‌نی بیلمه
اوزاداراق اوخویوب ایمضالامامی ایسته‌دی. تعهد‌نامه‌ده اؤیرنجی‌لرین اویغون پالتار
گئیمه‌لری، یاخشی داورانمالاری،باشی آشاغی اولمالاری، یاخشی درس اوخومالاری
و واختیندا گلیب گئتمه‌لری تؤوصیه اولوندوقدان
سونرا مدرسه‌یه پیچاق، آنادیلی وموبایل گتیرمه‌لرینه ده قاداغا قویولموشدور! آنادیلی‌نین آدی پیچاقلا
برابر چکیلدیگینده تزه آنلادیم نییه
آنادیلیمیزه دئییرلر: کسکین دیل!
بؤلوم: حیكایه و گولمه‌جه‌لر
+0 به‌ین
مرگ بر اوستورالیا
دوکتور جئری
بیز اسکیدن بری بئش واخت نامازیمیزی شیخ آغانین پئشنامازلیغی ایله کندیمیز- ترس آوانین جامع مچیدینده قیلاریق. شرق-غربده آد-شؤهرت قازانمیش مؤعتبر شیخ آغامیز عادت اولاراق نامازلارین سونوندا دویونلمیش یوموروغونو گؤیه قالدیراراق، "مرگ بر آمریکا" ، "مرگ بر ایسرائیل"، مرگ بر اینگلیس" دئیه جهانی ایستیکبارین دا پایینی وئرمیش اولار.
ایندی نئچه گوندور؛ شیخ آغا "مرگ بر" دئدیگی اؤلکه‌لرین سیراسینا بیر یئنی‌سینی ده آرتیریب نامازین سونوندا نیفرتله "مرگ بر اوستورالیا" دئیه قیشقیریر. دونن ناماز بیتدیکدن سونرا، دیرسگیمله یانیمدا اوتوران شیخ آغانین اوغوللوغو- قلئیچی مورتوضو دورتدوم:
- آغا مورتوض! آمریکا، ایسرائیل، اینگلیسه مرگ بر دئمکلرین سببینی آنلاماق چتین دئییل آنجاق بیلمیرم بو اوستورالیا نه سوچ ایشله‌ییب دده‌لیگین شیخ آغا نئچه گوندور اونو دا قاتیب قاریشدیریر؟!
قلئیچی مورتوض دریندن بیر آخ چکیب دئدی:
- دده‌لیگیم آنلاشیلماز بیر توطئه نتیجه‌سینده نئچه واختدیر سویوقلوق ائله‌ییب دستمازینی ساخلایا بیلمیر. اونون ظنینجه بیر ایشده اوستورالیانین الی وار!
بؤلوم: حیكایه و گولمه‌جه‌لر
+0 به‌ین
ائی وای میلّت!
دوکتور جئری
ترس آوانین شیخ آغاسی، داغلیق داناباش کندیندن
قاییداندا ائششکدن دوشوب دونیاسینی دگیشمیشدی. کند ماتمه بورونموشدو. قبیریستانلیق
قیم-قیم جاماعاتدان قیمیلدیردی. شیخ آغا لوت غسالخانا داشی اوستونه اوزادیلمیش
تکجه بیر آغ پارچا تشکیلاتی اوزرینه چکیلمیشدی. یئددی اوغلو جنازه‌نین قیراغیندا
ال-قولتوق دایانیب آستا-آستا گؤز یاشی آخیدیردیلار. اؤلو یویان سایغی ایله ایجازه آلیب اؤلونو یوماغا باشلادیقدا اوغلان‌لار
سس سسه وئریب :
- ائی وای دده... ائی وای دده... - دئیه آغلاشماغا باشلادیلار.
اؤلو یویان احتراملا اؤلونو یویوب سون مرحله‌ده
آغ پارچانی گؤتوروب آغانین تشکیلاتینا دا
بیر لیف چکمک ایسته‌دیگینده، اوشاق‌لار اؤنجه حیرتله دده‌لری‌‌نین تشکیلاتینا
سونرا بیربیری اوزونه باخاراق سس سسه وئریب داها بتر آغلاشدیلار:
- ائی وای ننه... ائی وای ننه!
..
بؤلوم: حیكایه و گولمه‌جه‌لر
+0 به‌ین
اؤل – بؤل
دوکتور جئری
حاجی میرزآغا کندیمیزین ان وارلی – کارلی آدام‌لاریندان
بیری ایدی. سون واختلاردا قوجالیق و چئشیدلی خسته‌لیک‌لر اوزوندن اؤلوم یاتاغینا
دوشوب سون نفس‌لرینی چکمکده ایدی. کندین آغ ساققال‌لاریندان بیر نئچه‌سی ییغیشب
گؤروشونه گئتدیلر. حال-احوالینی سوراغلاشدیقدان سونرا آغ ساققال‌لارینی بیری سؤز
باشلادی:
- حاجی آللاه سنه اوزون عؤمور وئرسین آنجاق
اؤلوم ده حاقدیر. ماشاالله سنین یئددی-سککیز اؤولادین وار. یاخشیسی بودور الین بو
دونیادان اوزلمه‌میش مال-مولکونو آراییش ائله‌ییب هره‌‌نین پای-سهمینی آییرد ائله‌ییب
وئره‌سن؛ آللاه ائله‌میش صاباح آرالاریندا دونیا مالی اوچون دعوا-دالاش چیخماسین.
بو سؤزلردن حاجی میرزآغانین دوداغی قاچیب
اینجارسیز بیر سسله دئدی:
- مشه بایرام! جناب حاق منه اؤل گل دئییب، بؤل
گل دئمه‌ییب!
بؤلوم: حیكایه و گولمه‌جه‌لر
+0 به‌ین
پول آدامی جاوان ساخلار!
دوکتور جئری
یاغیشدان تئیمورآغانین قهوه‌خاناسینا
سیغینمیشدیق. سؤز-صؤحبت پولدان دوشدو. آغ ساققال‌لاردان بیری دئدی:
- پول آدامی جاوان ساخلار!
من دئدیم:
- من بو سؤزه قاتیلیرام، بوگون پول و بیلیمین (علمین) کؤلگه‌سینده گؤزل‌لیک عملیات‌لاری ایله اینسان‌لاری ییرمی
اوتوز ایل جاوانلاشدیرماق مومکوندور.
بو آچیقلامادان هامی گولوشورکن، جناب تهرانچی
شهرین ان وارلی-کارلی تاجیری صؤحبته قاریشیب اطرفداکی‌لاردان سوروشدو:
-سیزجه منیم نئچه یاشیم وار؟!
هامی فیکیر بیرلیگی ایله جاوابدا:
- سیزین قیرخ ایله قیرخ بئش آراسیندا یاشینیز
اولا بیلر-دئدیلر.
جناب تهرانچی قاققاناق چکیب گوله‌رک دئدی:
- یانیلدیز، منیم آلتمیش یاشیم وار.
قهوه‌خانانین او باشیندان شیخ آغانین
پوللو-پارالی اورتانجی اوغلو جماعته اوز توتاراق:
- سیزجه منیم نئچه یاشیم وار؟-دئیه سوروشدو
قهوه خانانین چوخلوغو آغازاده‌نین اوتوز بئش
یاشیندا اولدوغونو سؤیلهدیلر.
شیخ آغانین اوغلو گوله-گوله:
- باخ گئنه یانیلدیز. منیم یئتمیش یاشیم وار!- دئدی.
هامی چاش-باش بیربیری‌نین اوزونه باخیشیرکن،
یانیمدا اوتوران اوستاد دفتری قهوه خاناداکی‌لارا اوز توتدو:
- منجه پول آدامی جاوان ساخلاماز. من اؤزوم امکلی موعلیمم. دؤولتین وئردیگی
اؤلمه-دیری حوقوقلا گئچینیرم. سیزجه منیم نئچه یاشیم اولا بیلر؟!
اورداکی‌لار سکسن-دوخسان آراسیندا اوستاد دفتری‌یه
یاش کسدیلر.
اوستاد دفتری گولومسوندو:
- یوخ.. منیم اللی بئش یاشیم وار!
بؤلوم: حیكایه و گولمه‌جه‌لر
+0 به‌ین
زحمت دئییل..
دوکتور جئری
نئچه واخت ایدی هارادانسا بیر دجل پیشیک تاپلیب خویلو خانیمین ائوینی بیربیرینه وورموشدو. سونوندا قادین جانا گلیب پیشیگی توتوب بیر پاکته قویاراق اونون آزدیرماسی حاقیندا اری قلئیچی مورتوضا گؤستریش وئردی. قلئیچی مورتوض پاکتی گؤتوروب پیشیگی چؤله بوراخماغا چیخدیقدا بیردن اورگیندن گئچدی شهرین باییریندا حلبی‌آباددا یاشایان خالاسینا دا بیر باش چکسین. ائو کرایه‌لری‌نین آشیری یوکسلمه‌سی اوزوندن نئچه آی ایدی خالاسی‌گیل شهرین قیراغینداکی نیسبتاً اوجوزلو حلبی ائوه داشینمیشدیلار.
اؤپوش-گؤروشدن سونرا خالا، قلئیچی مورتوضون الینده‌کی پاکته باخیب گؤزلری‌نین ایچی گوله-گوله دئدی:
- بالا نییه زحمت چکمیسن؟!
بو سؤزدن قلئیچی مورتوض توموب دیل-دوداغینی چئینه‌یه-چئینه‌یه دئدی:
- خالا زحمت دئییل پیشیک دیر!
بؤلوم: حیكایه و گولمه‌جه‌لر
+0 به‌ین
یالان دانیشماغین یول یؤندمی
دوکتور جئری
جومعه آخشامی گونو خویلوخانیم گئنه قلئیچی مورتوضون گونونو گؤی اسکی‌یه بوکدو. یازیق کیشی آروادین قاپاز- دانلاق‌لاریندان جانینی قورتارسین دئیه اؤزونو ائودن ائشیگه آتمالی اولدو. ساعات‌لارجا کؤچه‌لرده بوشو بوشونا دولانماغا باشلادی... دالغین ایدی، آرغین ایدی، آیاق‌لاری دالیجا گلمیردی، ائوه قاییتماق دا ایسته‌میردی. بیردن اؤزونو دده‌لیگی شیخ آغانین قاپیسیندا گؤردو. نسه دوشونوب قاپینی چالدی. دده‌لیگی قاپینی آچیب گولر اوزله اونو ایچری‌یه بویور ائتدی. آنجاق اونون آسیق قاش قاباغینی گؤرونجه یوموشاق-یوموشاق، "اوغلوم بیر شئی‌می اولوب؟"-دئیه سوروشدو. قلئیچی مورتوض ایشسیزلیگیندن، الی‌نین دالی اولدوغوندان، گونده-گونده آروادی ایله دعوا-دالاش ائتدیگیندن بول-بول دانیشدیقدان سونرا گؤزلرینی دیک دده‌لیگی‌نین گؤزلرینه تیکه‌رک سوروشدو:
- آغا! سنی آند وئریرم او گؤزل آغازاده‌لریوین جانینا. منه دئگینن آخی سن نئجه بو سکسن نئچه میلیونلوق اؤرت باسدیر ماحالی‌نین خالقینی یالان-پالانلا ایداره ائده بیلیرسن آنجاق من کیچیک بیر عایله‌نی ایداره ائتمکده قالمیشام؟!
بو سؤزلردن شیخ آغا برکدن الینی دیزینه چالیب قاققاناق چکه‌رک گولدو:
- اوغلوم! ائله بیل سن یالان دانیشماغین یول-یؤندمینی بیلمیرسن؟
قلئیچی مورتوض چاشیردی:
- مگر یالان دانیشماغین دا یول-یؤندمی وار؟!
شیخ آغا باشی ایله "هه" دئیه‌رک آیدینلیق گتیردی:
- قدیم کیشی‌لر دئییبلر: "یالانین عؤمرو قیرخ گون اولار". یعنی قیرخ گوندن سونرا یالانین اوستو آچیلار. یالانین اوستو آچیلسا دا آدام آبیرسیز اولوب داها کیمسه اونون سؤزلرینه اینانماز. دانیشیلان یالانین اوستو قیرخینجی گونده آچیلماماق اوچون گره‌ک آدام اوتوزدوققوزونجو گون اونو یئنی و البته بؤیوک و شیرین بیر یالانلا اؤرت-باسدیر ائله‌سین. بئله‌لیکله قارشی طرف قاباقکی یالانی اونودوب یئنی یالانلا اؤرگینی خوش ائله‌یه‌جکدیر. البته بو آرادا گره‌ک آدام گونده دانیشدیغی یالان‌لارین حسابینی دا الینده ساخلایا بیلسین...
بو آچیقلامادان قلئیچی مورتوض قاش-قاباغی آچیلدی. اگیلیب شیخ آغانین الینی اؤپمک ایسته‌دیگینده او دئدی:
- اوغلوم! ایندی دور گئت ائوینه، آرواد اوشاغینا موشتلوق وئر،" بایرام قاباغی دده‌لیگم حسابیمیزا اللی میلیون تومن پول تؤکه‌جک".
بؤلوم: حیكایه و گولمه‌جه‌لر
+0 به‌ین
هارانین کولونو باشیمیزا اله‌یک؟!
دوکتور جئری
دونن آخشام چاغی اوستاد دفتری مطبه گلدی. رنگی ساپ- ساری اولموشدو. "دردین ندیر!" دئیه تختین اوستونده اوتوردوب دامارینی توتماق ایسته‌دیگیمده الینی دالی چکیب دئدی:
- دوکتور! منیم دردیم سئچکی‌لر دردی‌دیر!
بو یانیتدان چاش-باش اولدوغومو گؤرونجه آرتیردی:
- دوکتور اؤزون یاخشی بیلیرسن من بوتون سئچکی‌لره قاتیلان بیر آدامام. ایندییه‌دک اولماییب من بیرجه سئچکینی بئله اولسون الدن وئرمیش اولام. آنجاق ایندی گؤرورم بو سئچکی‌لرین بیزیم احوالیمزدا ترس اثری وار. بیز سئچکی‌لره قاتیلدیقجا وضعیتیمیز دوزلمک یئرینه گونو-گوندن خارابلاشماقدادیر، سانکی بیر باتلاغین ایچینه دوشموش بیر آدام کیمی‌ییک. بو اوزدن من بوندان بئله سئچکی‌لرده شیرکت ائتمه‌یه‌جگم.
باشیملا سؤیله‌دیکلرینی دوغرولاییب دئدیم:
- اوستاد من سیزین بو قرارینیزا سایغی دویورام. سیز ایسته‌دیگینیز کیمی ائده بیلرسینیز آنجاق بو سارالیب - سولمانین سببنی آنلایا بیلمه‌دیم دوغروسو..
اوستاد دفتری بو سؤزلریمی ائشیده‌لی تله‌سیک الینی قولتوق جیبینه سوخوب موبایلینی چیخاردیب بیرآز دوگمه‌لرینی اللـه‌دیکدن سونرا اوزومون قاباغینا توتوب آچیقلادی:
- دونن راست‌گله اینترنتده اوخودوم، نئچه ایل بوندان قاباق اؤلکه‌میزین شیخ‌الشیوخی فتوا وئریب، کیمسه سئچکی‌لرده شیرکت ائله‌مه‌سه یئری کسینلیکله جهنم‌ده‌دیر.
من ماتدیم-ماتدیم موبایلا باخاندا اوستاد دفتری اینیلده‌دی:
- دوکتور ایندی دئییرسن هارانین کولونو باشیمیزا اله‌یک؟! سئچکی‌لره قاتیلساق بو دونیامیز جهنم اولاجاق قاتیماساق او دونیامیز؟!
بؤلوم: حیكایه و گولمه‌جه‌لر
+0 به‌ین
ایت ایتلیگین ترگیتمز!
دوکتور جئری
دونن گون اورتا چاغی اوستاد دفتری قوناغیم ایدی. صؤحبتیمیزین شیرین یئرینده کوچه‌دن خیرداناچی سسی گلدی:
- آییی.. خیرداناچی، چؤرک خیرداناسی آلیریق...
اوستاد دفتری سؤزلرینی یاریمچیق قویدو؛ چاشیقینجا:
- بو سس منه چوخ تانیش گلیرائله بیل-دئدی.
اوزونتو ایله باشیمی توولاییب دئدیم:
- دوغرو دئییرسن؛ بو سس اوستاد فرهیخته‌نین سسی‌دیر. بیلمیرم بو ائوی ییخیلمیش «فرهنگستان زبان فارسی»-دا نه پوخ چیخارتمیش اورادان بیله‌سینی ائشیگه اؤتوروبلر. هله اوسته‌لیک « از کجا آوردی؟» دئیه بوتون مال- ﺛروتینی الیندن آلیبلار. ایندی یازیق بئش باش کیفلتینی دولاندیرماق اوچون کوچه‌لره دوشوب آرابا ایله خیردانا چؤرک فیلان آلیر...
اوستاد دفتری آجیماسیزجاسینا گولدو:
- حاقی‌دیر، اورادا اولاندا چوخ آتینی اوینادیردی، قوی ییخیلسین دا جزاسینی گؤرسون!
گئنه کوچه‌دن خیرداناچی- اوستاد فرهیخته‌نین سسی گلدی:
-- آییی.. خیرداناچی.. چؤرک خیرداناسی آلیریق، گؤل قورودوروق، دیل دگیشدیریریک، آسیمیلاسیون ائدیریک،قوشون چکیریک، یورد تالاییریق، کیتاب یاندیریریق، ائو ییخیریق، آدام دیدرگین ائدیریک... آییی.. خیرداناچی...
بو سس-هارایدان چاشیب قالدیق. اوستاد دفتری قیزغین-قیزغین دئدی:
- بو ایتی ائشیگه اؤتورسه‌لر بئله، بو ساده‌لیکده ایتلیگینی ترگیتمه‌یه‌جک!
بؤلوم: حیكایه و گولمه‌جه‌لر
+0 به‌ین
بؤلوم: حیكایه و گولمه‌جه‌لر
+0 به‌ین
بؤلوم: حیكایه و گولمه‌جه‌لر
+0 به‌ین
بؤلوم: حیكایه و گولمه‌جه‌لر
+0 به‌ین
بؤلوم: حیكایه و گولمه‌جه‌لر
+0 به‌ین
نییه تحریم‌لرین اثری یوخدور؟!
دوکتور جئری
او گئجه اؤرت باسدیر ماحالی شیخ آغاسی‌نین کئفی ساز ایدی. آخشام اوستو مساژ
گلمیشدی؛ مملکندین بولوکه اولموش پوللاری‌نین بیر قیسمی آزاد اولوب. کؤنلو بیرآز
آروادی چوپور مصمه ایله دیلخوشلوق ائله‌مک ایسته‌دی. یورغانین آلتیندا الینی
اوزادیب مصمه‌نی قیدیقلاماغا باشلادی آنجاق آرواد اؤفکه ایله دالینی شیخ آغایا
چئویره‌رک دئیینمگه باشلادی:
- نئچه آیدیر دئییرم؛ منه بیر پالتار یویان
ماشینی آل، اللریم پار-پالتارینی یوماقدان قاریدی،آمما سن هردؤنه اؤزونو
ائشیمزلیگه وورورسان.
شیخ آغا آروادی یوشوتماق اوچون اونون ساچلارینی
تومالایا-تومارلایا دئدی:
- اؤزون مندن یاخشی بیلیرسن مملکندیمیز زیرپی
دوشمن طرفیندن تحریمده‌دیر. کیمسه بیزیمله آلیش-وئریش ائتمیر، ائتسه ده پولونو
آلا بیلمیریک. اینشاالله تحریم‌لر گؤتورولونجه سنه بیر پالتار یویان ماشینی، هله
اوسته‌لیک بیردنه ده قاب-قاشیق یویان ماشینی
آلاجاغام.
چوپور مصمه شیخ آغا طرف دؤندو:
- نییه او تزه آزاد اولموش پوللاردان
آلمیرسان؟!
- هانسی پول؟ پول-مولوموز آزاد اولماییب.
- اؤزونو او یولا وورما آغا، بایاق آیاق یولونا گئدنده موبایلینی گؤتوروب
اؤزوم مساژی اوخودوم.
شیخ آغا اؤزونو ایتیرمه‌دی:
- هه! او پولو دئییرسن، باخ دده‌مین روحو حاققی اوپولو شیخ نصراللها وئره‌جگم؛
اونا بورجلویام. اینشالله قالسین گلن دفعه‌یه..
بو جاوابدان چوپور مصمه هیرسلنیب گئنه
دالینی شیخ آغایا چئویریب:
- بئله ایسه، پالتار یویان ماشینی آلانا قدر من ده سنی تحریم ائله‌ییرم.
سونرا الی ایله شاپ-شاپ قاسیغینا
تاپدایاراق هده‌له‌دی:
- داها بوندان سونرا بوندان خبر یوخدور.
بو سؤزلردن شیخ آغا قاققاناق چکیب بیج-بیج گولدو:
- سنین تحریم‌لری‌نین اثری یوخدور!
چوپور مصمه چاشقینجا- نییه؟!- دئیه سوروشدو.
- چونکو هر طرفه دؤنسن بیر دلیگین منه طرفدیر!
بؤلوم: حیكایه و گولمه‌جه‌لر
+0 به‌ین
فارسی حساب
دوکتور جئری
فارس دیلی قورومونون باشقان یاردیمچیسی اوستاد فرهیخته
امکلی اولدوقدان سونرا ایکی ایلدیر محله‌میزده زینجیر کوروش باققال دوکانی آچیب. کئچن
گون یولداش‌لارلا گزه-گزه اونون ماغازاسی‌نین
قارشیسیندان گئچرکن بیزی ایچری‌یه چاغیریب هره‌میزه بیر میوه سویو ایکرام ائتدیکدن
سونرا اوزونو اوستاد دفتری‌یه توتوب دئدی:
- بئله اولماز کی یولداش! بئش آیدیر نیسیه ارزاق آپاریب هله حسابینی اؤده‌مه‌میسن!
یانیمیزدا بورجونون اوستو آچیلدیغیندان اوستاد
دفتری بیرآز قیزاریب-بوزاردی:
- بورجومو دوستلاریمین یانیندا دیله گتیردیگین
یاخشی دئییلدیر ها اوستاد!! نه ایسه، بورجوم نئچه‌دیر دئ وئریم. آنجاق دئ گؤروم
حسابینی فارسی چؤرودوم یوخسا تورکو؟
اوستاد فرهیخته‌نین دوداغی‌نین بوجاغینا اوفاجیق بیر گولوش قاچدی:
- دوزونو ایسته‌سز من تورکونو یاخشی بیلمیرم، فارسی
حسابلاساز یاخشی اولار.
اوستاد دفتری باشینی بیرآزجیق اگیب «اولسون!
فارسی حسابلاریق»-دئیه سایماغا باشلادی:
- اوستاد! بئش کیلو قند آپارمیشام کیلوسو اوتوز
بئش مین تومندن ائله‌یر یوز یئتمیش بئش مین تومن؛ ائله‌دیر؟
اوستاد فرهیخته نیسیه دفترینی قاباغینا آچاراق
باشی و دیلی ایله تصدیقله‌دی:
- ائله‌دیر.
- بیر چللک یاغ آپارمیشام ائله‌یر دؤرد یوز مین
تومن؛ ائله‌دیر؟
- ائله‌دیر.
- بیر پاکت چای آپارمیشام ائله‌یر یوز اللی مین
تومن؛ ائله‌دیر؟
- ائله‌دیر.
- بیر تای هیند دویوسو آپارمیشام ائله‌یر آلتی‌یوز
مین تومن؛ ائله‌دیر؟
- ائله‌دیر.
- اوچ کیلو دا نوخود آپارمیشام کیلوسو یئتمیش
مین تومندن ائله‌یر ایکی‌یوز اون مین تومن؛ ائله‌دیر؟
- ائله‌دیر.
- ایندی بونلاری بیر یئره ییغساق نئچه ائله‌ر؟
اوستاد فرهیخته چؤرتکه‌نین گؤتوروب شاققاشاق
چئویردیکدن سونرا دئدی:
- ائله‌یر بیر میلیون بئش یوز اوتوز بئش مین
تومن.
اوستاد دفتری فیلسوفجاسینا باشینی ترپتیب دئدی:
- ایندی سن او دخیلدن دؤرد یوز آلتمیش بئش مین
تومن منه وئر حسابیمیز سرراست ایکی میلیون تومن ائله‌ییب بیز پاک اولاق!
بو حسابدان اوستاد فرهیخته کیمی بیز ده بتر چاشیردیق. اوستاد فرهیخته قیزغین- قیزغین
قیشقیردی:
- اولان بو نه حسابی‌دیر؟! هله بیر شئی ده بیز
بورجلو اولدوق؟!
اوستاد دفتری گوله- گوله:
- نه حسابی اولاجاق، فارسی حساب! – دئدییب سؤزلرینه
آیدینلیق گتیردی:
- تورکلر مین ایل ایراندا حاکیم اولدوقلاری
سیرادا، فارس خالقینا اولمایان قالمایان خیدمت‌لر ائله‌دیلر. اونلاری اؤنملی وظیفه‌لرده
چالیشدیردیلار؛ دیللرینی شرقدن غربه قدر یاییدیلار. دیللرینده یوزلرجه کیتاب یازدیلار،
فارس شاعیرلرینی دربارلاریندا باریندیردیلار و ...
آنجاق سونوندا نه اولدو؟ گئچن یوز ایلده فارسلار
حاکیمیته گلدیکده نه ائله‌دیلر؟ بوتون بو گؤرولن ایشلره باخمایاراق تورکلری بیر
چوخ دا بورجلو چیخارتدیلار. تورک دیلینی قاداغان ائتدیلر، تورک یئر آدلارینی دگیشدیردیلر،
تورک میلتینی چئشیدلی سیخینتی‌لار معروض قویدولار....
بؤلوم: حیكایه و گولمه‌جه‌لر