مسئول‌لار یالانچی دئییللر!

دوکتور جئری

دونن اوستاد دفترینی ائل باغیندا گؤردوم. اوتوراجاقدا أیلشمیش هردن اللرینی گؤیه قالدیریب اؤز-اؤزونه نسه دئییر، هردنسه ده یاخاسینی ایکی بارماغی ایله آرالاییب دؤشونه توپوروردو. یاواش- یاواش بیله‌سینه یاخینلاشدیقدا ائشیتدیم دئیینیر‎:

-‌ استغفرالله... استغفرالله...‌آللاه منی باغیشلا... تؤوبه... تؤوبه... توف توف..

اهمالجا الیمی آرخادان چیگنینه قویدوم. دیسکینن کیمی اولدو.

- اشی نولوب؟ نییه اؤز-اؤزونه دانیشیرسان؟!

آیاغا قالخیب اؤپوش-گؤروشدن سونرا دئدی:

-‌ آا بگ بیلمیرسنکی نه بؤیوک گوناها باتمیشام؟

چاشقینلیقلا،’’ نه گوناهی؟!‘‘ دئیه سوروشدوم.

اوستاد بیر ایکی کره یاخاسینا توف توف ائله‌یندن سونرا آچیقلادی:

-‌ من ایندییه‌دک بئله دوشونوردوم؛ مسئول‌لارین هامیسی یالانچی‌دیرلار و اؤلکه‌نی یالان-پالان، فیریلداقلا ایداره ائدیرلر. آنجاق نئچه گوندور اؤیرنمیشم بتر یانیلمیشام..

دوداقلاریمی بوزدوم:

-‌ هله یانیلدیغینی هارادان آنلادین؟

ماییل- ماییل گؤزومون ایچینه باخدی:

-‌ آنلاماغی چتین بیر ایش دئییل. گؤرمورسنمی؛ مسئول‌لار دئینده فیلان ساعاتدا برق‌لر کسیله‌جک تام واختیندا برق‌لر کسیلیر. دئیینده فیلان ساعاتدا سولار کسیله‌جک دیقه‌سی کئچمه‌دن سولار کسیلیر. دئینده اینترنت کسیله‌جک....

داها اوستاد دفتری‌نین سسینی ائشیتمیردیم اللریمی گؤیه قالدیریب دئدیم:

-‌ آللاه منی‌ ده باغیشلا!!