گؤروش‌لر : 0
تاريخ : چهارشنبه 24 آبان 1402 | یازار : دوکتور جئری
+0 به‌ین
دده‌سی‌نین کؤهنه بورجو
دوکتور جئری
باشیم ایشلریمه قاریشدیغیندان اوچ-دؤرد آی اولاردی قلئیچی مورتوضو گؤرمه‌میشدیم. گئچن گون هارادانسا بیر بوش واخت تاپیب گؤروشونه گئتدیم.آنجاق اونو گؤردوگومده گؤزلریمه اینانا بیلمه‌دیم. آیاق‌لاری قیریلمیش، قولونو بوینونا آسمیش، بورنو سینمیش، دوداق‌لاری چاپیلمیش، گؤزلری‌نین دؤوره‌سی قاپ-قارا قارارمیش، باشینی یئکه بیر تنظیفله باغلامیش وضعیتده کالافاسی‌نین قاباغیندا، ویلچر اوزه‌رینده گونه‌ورلنیردی. چاشقین-چاشقین سوروشدوم:
- مورتوض بیگ آللاه یامانلیق وئرمه‌سین نییه‌به بئله؟!
سورغومون جاوابیندا آجی-آجی گولدو. گولدوکده سینمیش دیشلری گؤروکدو. یانیندا چومبلدیکده اؤزو احوالاتی خیسیلتیلی سس ایله آنلاتلاماغا چالیشدی:
- ایکی آی قاباق دده‌لیگیم شیخ آغانین یانینا گئتمیشدیم. ایچری گئچدیگیمده دده‌لیگیم قاققاناق چکیب گوله‌رک، " آی بالا! قاینانان سنی چوخ ایسته‌ییر، تام واختیندا گلمیسن"-دئدی. سیم - سانجاق بساطی‌نین باشیندا اؤتوروب آرمودی ایستکانا ایرنگلی چایی سؤزه‌رک فیض‌یاب اولماغا باشلادیم. گؤزلجه نئشه‌لندیکده بیردن دیلیمه بیر سورغو گلدی:
- دده‌لیک! نییه داناباش کندی‌نین اراضیسی بیزیم کندیمیز ترس آوادان قات- قات بؤیوکدور؟!
دده‌لیگیم شیخ آغا دریندن بیر آخ چکه‌رک یانیتلادی:
- اوغلوم مورتوض! گؤردوگون بو داناباش کندی اوّل‌لر بو گئنیشلیکده دئییلدی. حاجی اسرافیلین دده‌سی بو تورپاق‌لاری زورلا منیم دده‌مدن آلیب داناباش کندینه قاتمیشدی.
دده‌لیگیمین سؤزونو کسدیم:
- دده‌زدن سونرا سیز نییه تورپاق‌لارین گئری آلماسینا چالیشمادیز؟
دده‌لیگیم اوزونتو ایله باشینی توولادی:
- او زامان‌لار منیم آرخام یوخ ایدی الی یالین ایدیم آنجاق ایندی آللاها شوکورلر اولسون سنین کیمی ایگید اوغوللوغوم وار. سن ایسته‌سن گئدیب او قیزیل تورپاق‌لاری یئنیدن گئری آلا بیلریک!
یئریمده دیکلنیب:
- بیز نئجه او تورپاق‌لاری گئری آلا بیلریک؟!- دئدیم.
دده‌لیگیم گولومسه‌ییب دئدی:
- چوخ ساده‌دیر؛ بیر گئجه قارانلیقدان یارالانیب داناباش کندینه گئدیب حاجی اسرافیلین ایکی دنه تایالاریندان یاندیراجاقسان. سونرا پئیغام گؤندره‌جکسن اگر غصب ائتدیگیز تورپاق‌لاری گئری وئرمه‌سه‌ز بوتون کندیزی اودا چکه‌جگم. بئله‌لیکله اونلار دا قورخوب تورپاق‌لاریمیزی گئری قایتارارلار.
دده‌لیگیم شیخ آغانین سؤزلری عاغلیما باتدی. ائرته‌سی گئجه زوپامین باشینا بیر جیندیر سارییب نفته باتیراراق داناباش کندینه یوللاندیم. کندین خرمنلیگینده حاجی اسرافیلین یئکه بیر تایاسی وار ایدی. اونا یاناشیب جیبیمدن چاخماغی چیخاردیب مشعلیمی یاندیرماق ایسته‌دیگیمده بیردن هارادانسا حاجی اسرافیل، عزائیل کیمی باشیم اوستونده پئیدا اولدو. "گده بورادا نه قایییریرسان؟" دئیه باشیما چیغیردی. ایسته‌دیگیمی قیساجا آنلاتدیقدا بیردن حاجی اسرافیل چیلغینجا باغیرماغا باشلادی: آااهای.. مکائیل، جبرائیل، شموئیل هارادسیز گلین.
هیجاندان قلئیچی مورتوضون دانیشیغینا آتلاندیم:
- هه! سونرا نه اولدو؟!
قلئیچی مورتوضون گؤزلری یاشلا دولدو:
- نه اولاجاق؛ شیخ آغانین دده‌سی‌نین کؤهنه بورجونا گئتدیم، یئردن گؤیدن آدام تؤکولوشوب منی شیل-کوت ائله‌دیلر!
اوزگونجه سوروشدوم:
- به شیخ آغا نئیله‌دی؟!
قلئیچی مورتوض آجی- آجی گولدو:
- شیخ آغا بیر هفته سونرا بو سینیق ویلچری منیم اوچون گؤندردی!
بؤلوم: حیكایه و گولمه‌جه‌لر
یارپاق‌لار:
[1]