اورمو گؤلونده دؤولت- ميللت ايش بيرليگي!

دوكتور جئري

آذربايجان ميللتي اورمو گؤلونون قوروماسي‍ نين قارشيسيني آلماق اوچون،  آرا- سيرا چئشيدلي   گؤستريلر دوزنلـﻪميش، دؤولت ايسه هر دؤنه بو قونويا  ايييمسرليكله ياناشيب چوخ ساييلي سو ماشينلاري گؤندەرەك خالقي دستكلـﻪميش دورومدادير. آنجاق بونلارلا بئله، بو گؤستريلرين گؤزه گلن اولوملو سونوجو اولماميشدير. ندَن؟!

-         ندَني ميللتين، يوردسئورليك گؤرَولريني سونونا قدر يئريه يئتيرمـﻪمـﻪسيندن ايرەلي گلير. ميللت، گؤستريلر بيتيريلديكدن سونرا ائولرينه گئديب گلن ديللنيشـﻪدك اورموگؤلونه "دوزلوجا قال" دئيير؛ائلـﻪجـﻪده دؤولتين سو ماشينلاري گتيرديكلري سولاري آيدينليق اوچون گؤستريجيلرين اوستونه سپـﻪرك ايشلري نين داليسجا گئديب ايشي بيتميش سانير. بئلـﻪجه بو دؤولتي-ميللتي گؤستريلرين هئچ بير سونوجو اولمور!

بئله ايسه نه ائيله مَلي ؟

-         دؤولتين سو ماشينلاري، دؤولتين آداملاري كيمي، اورمو گؤلونون هارادا اولدوغونو بيلميرلر. بو اوزدن يوردداشلار گؤستريلرده، آدي چكيلن ماشينلارين قاباغينا دوشـﻪرك اونلاري سولاريني بوشالتمالاري اوچون اورمو گؤلونه آپارمالي‍‍‍ديرلار. طبيعي دير، آرديجيل و يايغين گؤستريلرله آپاريلان سويون اؤلچوسو آرتيب گؤل  سوسوزلوقدان قورتولاجاقدير.

    بؤلوم لر: ساتيريك يازيلار

بزيرگان ايله طوطوقوشو

يازان: مولانا دوكتور جئري

   بير گون وار ايدي بير گون يوخ ايدي. تئهران شهرينده بير وارلي بزيرگان ياشاييردي. بزيرگانين  شيرين ديللي بير طوطوقوشوسو وار ايدي. طوطوقوشو، اورمونون فارسجا اؤيره ‍ديلميش تورك اوشاقلاري كيمي فارسجاني لهجه‍‍سيز دانيشاردي. او، آتماجا آتماقلا بازيرگاني گولدورب ائيلنديرردي. قارشيليغيندا بزيرگان اونا نوغول وئرردي. طوطوقوشو نوغولو هر شئيدن چوخ سئوردي.

   گونلرين بير گونونده، طوطوقوشونو يامان داريخما باسدي. دار قفسدن يورولدوغونو آنلادي. اوچوب گزمك ايستـﻪ‍‍ييردي. بزيرگان گلنده، اورك آرزوسونو ديله گتيردي. بزيرگان، قوش آلدادارجاسينا، "سئوگيليم، من سني چوخ ايسته ‍ديگيمدن بو گؤزل قفسه سالميشام؛ بورادا گوونده ‍سن؛ باييردا قورد- قوش سني يئيه بيلر!" - دئييب دَن قابيسيني نوغوللا دولدوردو. طوطوقوشو اومماديغيني ائشيدجك آرخاسيني  نوغوللارا چئويريب بير شئي دئمـﻪ‍دي. بزيرگان، " اولمايا چوخ نوغول يئديگيندن، شكر ديلينده قونوشدوغوندان قند مرضي توتوب؟ ياخشسي بودور نوغولونو بئش- اون گون كسه م." دئيه دوشوندو.

   گونلر گئچدي. طوطوقوشو كوسوب آرتيق دانيشميردي. بيرگون بزيرگان اونون اورگيني اله گتيرمك اوچون يانينا گليب دئدي:

-         اوزاق بير يولجولوغا گئده ‍‍جگم، نه سووقات ايسته ييرسن سؤيله سنه گتيريم؟

طوطوقوشو بير آز دوشونوب سونرا دانيشما اوروجونو سينديريب دئدي:

-         من سووقات ايسته ميرم يالنيزهينديستاندا منيم قوشداشلاريمي گؤرنده من ديليمدن اونلارا سؤيلـﻪ،نئجه دؤزورلر من بورادا دار قفسده قاليم اونلار اورادا اؤزگورجه ‍سينه اوچوشسونلار؟

بزيرگان بونو ائشيدينجه اوجادان گولمگه باشلادي. بونا شاشيران طوطوقوشو سوروشدو:

-         نييه گولورسن، بير گولمه ‍لي سؤزمو دئديم ؟

بزيرگان  زورلا گولمـﻪ‍سيني ساخلاييب دئدي:

-         آخي رحمتليگين قوشو، منيم هينديستاندا نه اؤلوم اؤلوب، چينه گئديرم بيرآز قيوير- زيوير گتيرم آنجاق عيبي يوخدور اورادا طوطو گؤرسم سؤزلريني اونلارا چاتديرارام.

   بزيرگان بوخچاسيني باغلاييب قونالغايا يوللاندي. قونالغادا اوچاقچي شاگيردلاري سس سسه وئريب، "تئهران – پئكن فوري، تهئران- پئكن حركت ! "  دئيـﻪ‍‍رك چيغير- باغير سالميشديلار. بزيرگان پاپاغان ائيرين مشتريسي ايدي. اونون يئري هر زامان اؤن سيرادا، اوچاقچي نين يانيندا ساخلي ايدي. بزيرگان اوتورغوجونا يئرلشينجه اوچاقچي فلاكسيندان اونا بير چاي سوزوب اوچاغي چاليشديردي....

   بزيرگان بير ايكي گونون ايچينده آلاجاقلاريني آليب قاييتماق  ايسته ‍‍‍دي آنجاق بيردن طوطوقوشونا وئرديگي سؤز يادينا دوشدو.گئچن كز ، اويونجاق آلديغي توكاندا بير طوطوقوشو گؤردوگونو آنيمسادي. تئز تاكسييا آتلانيب توكانين ايزليگيني وئردي. اويونجاق ساتان بزيرگاني گؤرجك سئوينيب سينيق- سالخاق فارسجا ايله اونا باش چكمه ‍‍‍ديگيندن گيلئيلندي. بزيرگان، اويونجاق بازاري‍نين كاساد اولدوغونو بو اوزدن قبيرداشي ايشينه باخديغيني سؤيله ‍دي سونرا  ايسه طوطوقوشوسونا وئرديگي سؤزدن دانيشدي. توكانچي، بزيرگاني طوطوقوشوسونون يانينا آپاردي. توكانچي ‍نين طوطوسو چينجه قونوشوردو بو اوزدن بزيرگان بيرديلمانج توتاراق قوشونون ساويني چاتديردي. چينلي طوطوقوشو اولايي دويونجا دريندن بير آخ چكيب دئدي:

-         بيز طوطوقوشلاري ديلميزين كؤتگيني يئييريك، بيز گؤزل هيندجه ‍ميزي بوراخيب اؤزگه ‍لرين ديليني يامسيلاماغا باشلاميشيق بواوزدن قفس‍لرين بوجاغي يئريميز اولوبدور. گئت منيم او قوشداشيما دئ : اؤزگورلوك ايسته ‍‍ييرسن سه  يا اؤز ديلينده دانيش يا دا لال اول !

بزيرگان يوكلريني چاتيب اؤلكـﻪ‍يه دؤندو.اوچاق تئهران هاواسيندا چاتجاق، بزيرگان خارچيلتي سسيندن يوخودان ديسكيندي. اسنه ‍يه- اسنه ‍يه اوزونو اوچاقچييا توتوب دئدي:

-         بلدييه بو هاوا يوللاري نين چالا- چوخورونا هئچ باخمير خارچيلتي سسي ائشيتديم سانيرام اوچاغين كؤمكريندن سينميش اولا.

اوچاقچي گولومسه ‍يرك:

-         خارچيلتي،كؤمكلرينكي دئييل  اؤرتيجيلريميزين بئلي نين سينماسي‍نين سسي‍دير من بو سسلره هر پكئكندن دؤندوگومده آليشميشام...- دئدي

بزيرگان اليني ديزينه چاليب بركدن قيققيلدايا- قيققيلدايا :

-         بئله ايسه گلن دؤنه ياديما سال چيندن بئل گتيريم ياخشي بازاري اولا بيلر!- دئييب اوچاقچي ‍نين فلاكسيندان اؤزونه بير چاي سوزدو.

بزيرگان گتيرديكلريني بيره- نئچه بازاردا اريتديكدن سونرا طوطوقوشونون يانينا گئديب چينلي طوطوقوشونون سؤزلريني اونا ايلـَتدي. طوطوقوشو بزيرگاني دينله ‍ديكدن سونرا اؤز- اؤزونه دئدي:

-         چينلي طوطوقوشو غريبه  قوش‍بئيين بير قوش ايميش. فارسي كيتابيندا اوخودوغوم كيمي او گرەك اؤزونو اؤلومه وورماقلا قورتولوش يولونو منه گؤسترردي. هله اوتوروب منه لال اول دئيير. لال اولسون نه كي وارين! ائله ياخشيسي بودور اؤزومو اؤلوم يوخوسونا وورماقلا قفسدن قورتارام..

    طوطوقوشو بو دوشونجه ايله شيپ دئيب قفسين تركينه ييخيلدي. بزيرگان قوشون اؤلدوگونو سانيب باش گؤزونه تاپداياراق اوزون سوره وايسيندي. سونوندا طوطوقوشونو قفسدن چيخارديب پنجرەدن ائشيگه آتماق ايسته ‍دي آنجاق بيرآز سال-چيخ ائدندن سونرا قراريندان واز گئچدي. بزيرگان طوطوقوشونو، قوش قورودانلار بازارينا گؤتوردو.

    بؤلوم لر: حيكايه و گولمَجه لر

حاجي لارين يارانه سي كسيله جك

يازان: دوكتور جئري

خياباندا پروفسور نصرالديني گؤردوم دئيينه- دئيينه گئديردي. سسله ديم:

-         پروفسور، اوووي... پروفسور!

مني گؤرجك قاشلاري نين دويونو بير آز آچيلدي. دئديم:

-         اولان دئيينگه توتموسان نه باشيني آشاغي ساليب اويوده- اويوده گئديردين؟

-         اووووه... دوكتور بيگ! نه ياخشي سني گؤردوم آزقالا دردن پاتلاياجاقديم.

ساتاشديم:

-         نه دردي؟ گئنه كيمين درديني سالميسان قارنينا؟

پروفسور نصرالدين قولومدان ياپيشيب چكدي ديوارين كؤلگه سينه. الي نين دالي ايله آلنينين تريني سيليب دئدي:

-         ايبيش كيمي  ميليون ميليون آليب ايش بيلمز ميللت وكيل لري نين درديني!

-         نئجه مگر؟

-         هئچ، اوچ دؤرد آيدير يارانه لر مسله سيني ساليبلار هَوَنگه، بيلميرلر كيمه يارانه وئرسينلر كيمينكيني كسسينلر... حاجي علي اصنافي تانييرسان؟

-         هه، ياخشي آدامدي، نئجه مگر اولمايا يارانه سيني كسيبلر؟

-         يوووو... حاجي علي نين توكاني نين قاباغيندا قنبرآلي آدلي بير سيگارساتان وار بيزيم قونشودور.دونن گلميشدي بيزه . دئييردي، پروفسور قوربانيم اولوم بير ايش گؤر، ائويم ييخيلدي .

دئديم: زاريما دئ گؤروم نه اولوبدو؟

دئدي: حاجي علي اصنافين پوخونا يانديم.

دئديم: نئجه ؟

دئدي: بيلديگين كيمي من حاجي علي نين توكاني نين قاباغيندا سيگار ساتيرام، سحر چاغي يارانه لر ايداره سي نين ائس ائم ائسي كاريخيب حاجي علي نين عوضينه منيم موبايليما گليب.

سونرا چيخارديب موبايليندا منه گؤستردي: آغايي قنبرآلي، " تمكُن مالي"- نيز اولدوغو اوچون يارانه نيز كسيله جك ، اعتراضي نيز وارسا يارانه سايتينا موراجيعت ائدين.

دئديم : قورخما گئديب سايتدا اعتراض وئره رم .

دئدي: پروفسور، آتان رحمتده ، منده ائله بونا گؤره موزاحيم اولدوم آز قالير باغيريم چاتلايا....

گوله گوله دئديم:

-         هر ايشده يانليشليق اولار يازيق ميللت وكيل لري نئيله سينلر؟ ايراندا كيسمه -منيم واريم وار- دئمز، كيمدن سورشسان دئيه جك من ديله نيرم.

پروفسور يئنه قاشلاريني چاتدي.

-         ائله منده بونا گؤره دئيرم مجليسده اوتورانلار هئچ نه دن باش چيخارتميرلار. آللاه قويسا ايچلرينده نئچه دنه ده دين آدامي وار!

دوغروسو لاپ شاشيرديم.

-         پروفسور من لاپ قاتديم بونلارين بير بير ايله نه ايليشكيسي وار بيلميرم.

پروفسورون دوداغي قاچدي.

-         باخ دؤولت دوشوب اونون بونون دالينا ، يئتنه :- سنين تمكن مالين وار گل بو يارانه آلماقدان واز گئچ– دئيير. حال بوكي ، تمكن مالي اولانلارين آدي اوستونده دير!

-         كيمي دئييرسن ؟ آقازاده لري، رئيس رؤساني ؟...

-         يوخ دئديگين كيمي اونلار تمكن مالي لري اولدوقلاريني بويونلارينا آلماياجاقلار، دئديم كي، آدلاري اوستونده دير!

-         واللاه منيم ده ميللت وكيل لري كيمي عاغليم بير شئيه چاتمير، اؤزون دئ.

پروفسور كؤكسونو آريتلاييب شست ايله دئدي:

-         حاجي لار

-         حاجي لار؟!!...

-         هه، حاجي لار. بيلديگيميز كيمي، دين و شرعيميزده تكجه تمكن مالي لري اولانلار آللاهين ائوينه گئده بيلرلر. بو اوزدن اؤلكه ده اولان ميليونلار حاجي نين سورغو- سوال سيز يارانه لري كسيله بيلر. بونا گؤره ياخشي دئييل ائس ائم ائس گؤندرمكله خالقي راحات سيز ائتسينلر.

پروفسور نصرالدينين عاغلينا چپيك چالاراق  ائكله ديم:

-         دوز دئييرسن پروفسور، ائشيتديگيمه گؤره ايندي نئچه ميليون تمكن مالي اولان آللاه ائوينه گئتمك اوچون آد يازديراراق نؤبته ده دير. اگر بو نؤبته ده كيلرين و قاباقكي حاجي لارين يارانه لريني  كسيب بيزه وئرسه لر  بيزده آللاه ائوينه مشرف اولا بيله ريك!

پروفسور باشي ايله اونايلادي. بو قونو اوزه رينده بيرآز دوشوندوكدن سونرا دئديم:

-         پروفسور، بو ايشين آمما بير بؤيوك عيبي وار.

-         نه عيبي؟!

-         عيبي بودور كي، فيليم لرده " حاجي، بيا كه  سيدو كشتند" دئينده كيمسه سئيييدين يارديمينا قوشماييب اؤلوسو يئرده قالاجاق!...

    بؤلوم لر: حيكايه و گولمَجه لر

اورديبئهئشتين اونو، اولوسال خيلج فارس گونودور. بو  گونو بير سربستله قوتلاييريق.

خليج هامي ايشييَكِ فارس

دوكتورجئري

منيم ديرليگيم بير سويا باغلي

سنين كيمليگين بير سويا باغلي

گؤلوم قورودو

چيچگيم سولدو

بير دوست ساناراق توتمادين ياسين

گؤلون قوروسا

 آخ، نه اولاجاق؟!...

ايشيييم خليجه آدين باتماسين

منيم اليمدن بو گلير آنجاق.

    بؤلوم لر: ساتيريك شئعيرلر

فهله گونو احوالاتي

يازان : دوكتور جئري

مايرام!

بيلديگينيز كيمي، 1.ماي دونياليق فهله گونو، بايرامي دير. زحمت چكن فهله لر! ساغ، سولا اويماييب باشينيز ايشينيزده اولسا گلن ايلده  بوگونه تاي،  ال- آياغينيزدان اؤپوب دئيه جه ييك:

مايرامينيز قوتلو اولسون!

فهله نين آلنينين تري

حاق وئرمز بير حاجي يا دئديلر:

-دينيميزده فهله نين آلنينين تري سويومادان حاققيني وئر، دئمه ييب لرمي؟

- نييه دئييب لر!

- اوندايسا، نييه ايشلتديگين فهله لرين حاققيني وئرميرسن؟

-  فهله لرين آلنينين تري سويوماييب كي!  ايشده تر ايچينده ، بازارا چيخاندا تر ايچينده ، ائو-اوشاغي نين يانيندا تر ايچينده، حيط صاحابي نين يانيندا تر ايچينده؛ بو تئزليكده ده بو ترلر سويوماياجاق من حاققلاريني وئريم!...

فهله گونو چاغيريشي

فهله گونو چاغيريش سيز (شوعارسيز) اولماز . ايشده بو ايلين چاغيريشي :

دونيا فهله لري گرنه شين!

بيلديريش

فهله گونو موناسيبتينه گؤره ، اون مين دنه فيل نيشان بئل، دؤولتي قيمت له ، ايش آختارانلارين آراسيندا پايلاشاجاق. دوكتورا،  فوق ليسانس و ليسانس مدرك لري اولانلارين  باشقالارينا اوستونلوگو واردير.  تبريز بلديه سي

    بؤلوم لر: حيكايه و گولمَجه لر

دوشونمك ياساق!

دوكتور جئري

 كاغيذدا دوشوندوم

كيتابلاري  يانديرديلار

تئاتردا دوشوندوم

پرده چكديلر

فيلم لرده دوشوندوم

سينمالاري قاپاتديلار

نوت لاردا دوشوندوم

ماهني لاري  بوغدولار

رسيم لرده دوشوندوم

قارا ياخديلار

هئيكل لرده دوشوندوم

بوت سينديرديلار

بينالاردا دوشوندوم

موصللا اكديلر، پاساژ ياپديلار

اينتئرنت ده دوشوندوم

فيلتئر ائتديلر

خياباندا دوشوندوم

دوربين قويدولار...

ايندي

 توالئت لرده دوشونورم

باغلاسانيز

عوصيان ائده جه يم شهرين مركزينده

    بؤلوم لر: ساتيريك شئعيرلر

دوكتور جئري (داما زيلله) - نين قيسير سؤزلري

ميللت خورافه لر ايچينده چابالاماقدا، دوعا يازديرمالي ييق.

اؤزگورلوگون قازانماسي قولاي (راحات)، ساخلاماسي چتين دير؛ زينجيره چكمك گرَك.

اويغار اينسانلار آرتيق قيزلاريني قويلاميرلار، سالديريرلار.

اؤزلريني اوستون سايانلار آلتين ديرلار.

اوچونجو دونيا اؤلكه لرينده، باشچيلارين اؤنجه رسيم لرينه سونرا ايسه اؤزلرينه آغاج تاخيب گؤيه قالديرارلار.

اوچونجو دونيا اؤلكه لرينده، آناياسالارين پوزماسي يازماسيندان چتين دير.

باشچيني باشا چيخاردان ميللت لر، يئنمه سيني تانريدان ايسته يرلر.

گؤزتله يين شهوت سيزي سيكينه سريمه سين.

اوتانميرسان، سو ايچ.

شهريميزي تميز ساخلامايانلارين قاپيسينا سيچمالي ييق.

ايچكي ساغليغا ضررلي ديرسه  دوستلارين يوخ، دوشمن لرين ساغليغينا قالديرمالي ييق.

يالانا اينانان ايله دئيه نين ايلگيسي، ائششك ايله اوغلو كيمي دير.

سويو بولاشديرمايين، ايلده بيركره يويونماق يئتر.

يالان دانيشمايان باشچي، آغ يالان دير.

پالانسيز توربا اولماز يئيه سن.

آزاد ائله يه نين قولويام.

ائشيت! قادين، كيشي ائشيت!...ائشيدن يوخدورسا دئميرم.

يامان دانيشانين دده سي نين سوموگونو سـ...

چوخلاريني آنالاري دوغماميشلار، سيچميشلار.

يوردونو كـَو يئره (كويره) چئويرنلري باغيشلاسان، تانري جنتده سنه اوتلو سولو باغلار باغيشلاياجاق،اوتلاياسان!

    بؤلوم لر: ساتيريك يازيلار

اورمو گؤلونون جاني قورتولدو!

دوكتور جئري

مجلسده ، ميللت وكيل لري ، اورمو گؤلونون قورماسي نين قارشيسيني آلماق اوچون يوللار آراماقداديرلار.

بيرينجي ميللت وكيلي: منجه ، تانكئرلرله ، آراز چاييندان اورمو گؤلونه سو آپارمالي ييق.

مجليس باشقاني : اوزگونم قارداش! تانكئرلريميز گئجه- گوندوز نفت داشيماقداديرلار بونا گؤره بو ايش اولاسي دئييل، هله اوسته ليك بودجه ميزده يوخدور.

ايكينجي ميللت وكيلي: تانكئرله آرازدان  اورمو گؤلونه سو آپارماق  چتينديرسه، اورمو گؤلونو آرازين يانينا  آپاراق .

مجليس باشقاني شاشقينليقلا: نئجه؟

ايكينجي ميللت وكيلي: اؤنجه اورمو گؤلونو تورپاقلا دولدوراق سونرا گئديب آراز چايي نين قيراغيندا بير آيري اورمو گؤلو قازاق، بونونلا تانكئره گره گيميز اولماياجاق!

مجليس باشقاني : قارداش اؤنرينيزه سؤز اولا بيلمز آنجاق اؤلكه نين مركزي بؤلگه لرينده گئدن آوادانليق ايشلري اوجوندان لودئر- بولدئزئريميز يوخدور هله اوسته ليك بودجه ميزده يوخدور.

اوچونجو ميللت وكيلي: دؤولت آذربايجاندا، بودجه و تجهيزات باخيميندان سيخينتي دا ديرسا اورمو گؤلونون سورونونو، ائكوسيستئمي بيربيرينه وورمادان، خريطه اوزرينده چؤزه بيله ريك!

مجليس باشقاني ماراقلا: بير آز آچيقلايا بيلرسينيز؟

اوچونجو ميللت وكيلي: بو ايش اوچون جغرافيا قورومو خريطه ده ، اورمو گؤلو ايله لوت كويري آدلاريني تاي دئييشيك ائله ملي دير سونرا خزر دنيزيندن  راحاتليقلا اورمو گؤلونه سو آپارماق اولار.

ميللت وكيل لري هاميسي آياغا قالخيب چپيك چاليرلار، مجليس باشقاني دا چپيك چالير سونرا اگيليب ميزين آلتيندان قيرميزي روبانلي بير كولونگ چيخارديب اوچونجو ميللت وكيلينه اوزداراق دئيير:

    بؤلوم لر: حيكايه و گولمَجه لر

حامام سويوندان فردوسي يه دك!

آي مَشَدي غضنفر، بونلار هاميسي سنين حامامي نين سويونون تاثيريندن دير!- مَشَدي عباد

   سايغي دگر جومهورباشقاني، تاجيكيستاندا ايرانلي لار ييغينجاغيندا،  فردوسي نين اسلام دينينه اولان درين تاثيريندن دانيشاراق، "فردوسي اسلام مكتبيني قورتاراق بو آغير يوكو، يوك گؤتورمزلرين سيرتيندان گؤتوروب ايرانلي لارين بئلينه يوكله ميش، بو ميللت ايسه اولدوقجا ياخشي بو يوكوملولوگون عؤهده سيندن گله بيلميش دير" دئميش .

 بو سؤزلر سرت تپكي لرله قارشيلاشسادا دئمه لي ييك: ائورنده فردوسي نين تاثيريندن آماندا اولان بير شئي تاپماماق مومكون دئييل . آشاغيدا گتيرديگيميز بير نئچه اؤرنك بونون آيدين قانيتي دير. ياخشيسي بودور، تپكي چيلر جومهور باشقانيني قيناماق يئرينه گئديب بو قونودا اوزمانلارلا فيكير آليش وئريشي ائتسينلر!

ايشده، فردوسي نين تاثيراتيندان اؤرنكلر:

 بير تيكه حلال يارانه ائو اوشاغينيزين سوفراسينا آپاريرسيزسا فردوسي نين تاثيريندن دير يوخسا ايشسيزليك بوناليمي دونياني چولقالاييب هامي آجيندان اؤلمكده دير.

قار- ياغيش ياغيرسا؛ فردوسي نين تاثيريندن دير يوخسا آفريقادا ايللر بويودور ياغينتي يوخدور.

اؤلكه دوشمن لري، سينيرلاريميزا گؤز تيكمكدن چكينيرلرسه، فردوسي نين تاثيريندن دير، آرش كمانگيري بيز تانيميرساقدا اونلار تانيييرلار.

دونيادا، هامي  بيزي بارماغي ايله گؤستريب پيچي- پيچي دانيشيرسا، فردوسي نين تاثيريندن دير؛ اونون ياشاتديغي عجم دن شاشقيليق دويورلار.

دونيادا بوقدر دوستوموز وارسا، فردوسي نين تاثيريندن دير؛ شاهنامه اولان يئرده كيمدير نفت- گازين اوزونه باخان.

دوشاب آليريق موراببا چيخيرسا  فردوسي نين تاثيريندن دير؛ فرانسادا كونسئرو آليرلار ايچيندن قورباغا چيخير.

رسمي ديليميز فارسي سا، فردوسي نين تاثيريندن دير يوخسا بيربيريميزله گؤروشنده لال اويون گتيره جك ايديك.

اؤلكه ده هئيكل تراش ليق و سيمينت صنعتي گؤنو گوندن گليشيرسه ، فردوسي نين تاثيريندن دير؛ فردوسي نين هئيكلي كند- شهرلرين ميئدانلاريني فتح ائتمكده دير.

هامي گئري له ييركن، ايره لي له ييريك سه، فردوسي نين تاثيريندن دير؛ رخشه مينميشيك؟

آمريكا اؤلكه ميزه سالديرماقدان قورخورسا فردوسي نين تاثيريندن دير؛ اسفنديارين سيرري كيمي، سيرريني بيليريك.

كندلرده سامانليق لار دانيشگاه آزاد ائديليب زبان و ادبيات فارسي ليسانس- دوكتوراسي وئريليرسه، فردوسي نين تاثيريندن دير؛ بو گونلر مدرك سيز آدامي توالئته بوراخميرلار هارادا قالسين بعضي- بعضي يئرلره.

دوكتور جئري يازيرسا ، فردوسي نين تاثيريندن دير يوخسا او گئديب قاز اوتارمالي دير هله هله!

    بؤلوم لر: ساتيريك يازيلار

گوله گوله دوكتور!

اَت باهاديرمي ؟

 يئمه يين !

بيلين!   اَت، خرچنگ(سرطان) خسته ليك لري نين باشليجا ندني دير.

تويوق باهاديرمي؟

يئمه يين!

بيلين !  تويوقلارين هورمونو اولدوغوندان بدنيزده چئشيدلي چاتيشمازليقلار اؤزونو گؤستره جك .

گؤي گؤيرنتي باهاديرمي؟

يئمه يين!

بيلين! گؤي گؤيرنتيلر، شهرلرين آياق سولاري (فاضلاب) ايله يئتيشديريلير بونا گؤره قيرلاغان (وبا) قورخوسو وار.

يئر- يئميش باهاديرمي؟

يئمه يين!

بيلين ! يئر-يئميشي كسيب  سوياركن بارماغينيزي كسسه نيز  قاقشال (كزاز) دان اؤله بيلرسينيز.

نور- نوخود باهاديرمي؟

يئمه يين!

بيلين!  بو اؤلدوروجو دنه لر گؤنده بوغازا ديغيرلاناراق يوزلر كيشيني بوغورلار.

دويو باهاديرمي؟

يئمه يين!

بيلين!  دويوده اولان آغي (سم) قارين- قورساغينيزي قيسسا سوره ده دارما داغين ائده جكدير.

سود اورونلري باهاديرمي؟

يئمه يين!

بيلين! آغارانتي (لبنيات) اوره تيجيلري(توليد ائدنلري) اورونلرينه(محصوللارينه) واجيب اولمايان واجيبي لري قاتماقلا ساغليغينيزي هده له ييرلر.

چؤره ك باهاديرمي؟

يئمه يين!

بيلين!  چؤره كچيلر خميره قابارتما توزو (شيرين جوش) قاتماقلا آش قازانيزي (معده) دليك دئشيك ائديب اوزون سوره ده سيزي اؤلدوره جكلر.

اوياريلاريميزا اويسانيز...

بيلين ! 

 ساغ - سلامت اؤله بيلرسينيز.

اونوتمايين!

دؤولت، گئجه گوندوز سيزين ساغليغينيزي دوشونور؛  باهاليقلار ندن سيز دئييل!

دوكتورونوز :  دوكتورجئري

سيز ساغ من سلامت

17/1/1391

    بؤلوم لر: ساتيريك يازيلار

مش اسماعيل نئجه پان توركيست اولدو؟

دوكتور جئري

مش اسماعيلي محلله ده هامي تانير. سحر آلا قارانليقدان ائودن چيخيب آخشام قاش  قارالاندا ائوينه قاييدار. اوزون ايللردير، اسكيميش يوك ماشينيلا بيرگه روزگارين ايستي- سويوغونو، چؤل - باييردا چكمكده دير. ايندي اونو يالنيز تويلاردا توي بيگي ، ياسلاردا ايسه چاي-سماور تزگاهي نين دولانديريجيسي كيمي  گؤرمك اولور آنجاق كئچميشده، يايي بير نئچه سفر قاپي قونشونو ماشينينا دولدوروب اورمو گؤلونه آپاراردي. اورمو گؤلو مش اسماعيلين هر شئي ايدي. اوزمكدن دويمازدي . يورولاندا ايسه زيغ- چامورا قويلانيب شيرين خاطيره لريندن دانيشيب گولدورردي؛ هردنسه اوخويوب هاميني شنلنديره ردي.

مش اسماعيل بؤيوك-كيچيگين سئويمليسي دير محلله ده . بونا گؤره اونون توتولما خبري هاميني  سارسيتدي. محلله يه ولوله دوشدو. دئييلنلره گؤره، مش اسماعيل  پان توركيست ليك اتيهامينا گؤره ياخالانيب آدي يوخ ايداره سينه آپاريلميشدي. مش اسماعيلي ائشيگه چيخارتماق اوچون آغ ساققاللار سفربر اولدو. اولمايان- قالمايان يئرلره باش وورولدو. بو چابالامالار بير آي سونرا سونوجلانيب مش اسماعيل    يوز الي ميليونلوق وثيقه ايله آزاد اولدو. بير قوطو شيريني باغلاييب شامدان سونرا آتاملا  گؤروشنه گئتديك. ماراقدان ايچيم ايچيمي يئييردي. گؤره سن مش اسماعيلي نه اوچون توتموشدولار؟  بيلديري مي داغيديب ؟ كيتاب- درگي مي ياييب ؟ يووو..خ ، مش اسماعيل آديني زورلا يازير ! بو اولا بيلمز. كاميونچولوغودا تراختورچولوغونون گونوسودور! اولمايا اورمو گؤلونه گؤره بير شئي دانيشيبدا الينه ايش وئريب؟ هه! بئله اولمالي دير. آناسي نين قيرخيندا سؤز اورمو گؤلونون قوروماسيندا دوشنده او ، "اورمو گؤلونون قورماسي آنامين اؤلوموندن  منه آغير گلير " دئميشدي. بو فيكرلره  مش اسماعيل ائوينه يئتيشديك. اوتاق قوهوم- قونشو ايله دولو ايدي. ايچري گئچديكده ، مش اسماعيل آياغا قالخيب بيزايله اؤپوشوب گؤروشدو. ساتاشاراق:- مش اسماعيل، ماشاآللاه بتر كؤكلميسشن!- دئديم.

 قيققيلدايا- قيققيلدايا:- "يوخ بابا ، كؤكه لن يئرين آدي زيندان دير؛ من گئدن يئرده آدام آريقلار، گؤمورسن تومان اگنيمدن دوشور!" دئدي. هامي گولوشدو.

شيرنيلر يئييلدي. چايلار ايچيلدي.  قوناقلارين بيري، " مش اسماعيل نئجه اولدو توتولدوز؟" دئينجه مش اسماعيلين آلني قيريشلاندي. سيگاري نين كؤتويونو كول قابينا باساراق ،"هاميني برق توتاندا بيزيده جين چيراغي توتدو" دئيه سؤزه باشلادي مش اسماعيل: - او گون ناهار چاغي آريغين-يورغون ائوه گليرديم خياباندا آغير تيخاج وار ايدي. ماشينلار ياواش- ياواش گئديرديلر. قاباغيمداكي پرشيا ماشيني بيردن تورموزا باسينجا دالدان اونا توخوندوم. آشاغي آتلانديم. ائله بير شئي اولماميشدي. پرشياداكي لاردا ائنديلر. دؤرد گنج اوغلان ايديلار. ساغ اليمي دوشومه قويوب بير آز اگيله رك:- باغيشلايين تقصير منده ايدي، خسارتيز نئچه اولسا حاضيرام وئريم- دئديم. كئچي ساققاللي پرشيانين سوروجوسو حيرصلي – حيرصلي قيشقيردي:

-         اي بر پدرت لعنت افراسياب!

" ائله بيل ،مني بير آيريسي ايله يانليش توتموش " دئديم  اؤز- اؤزومه سونرا:

ببخشيد آغا من افراسياب نيستم  ايسمي من مش اسماعيل است.

 گئچي ساققال اوغلان سايمازيانا :

-         تورو نمي گم جد اعلايتونو مي گم – دئدي سونرا دا بير ايكي دنه كيفير سؤز افراسيابين بؤيرونه دوگونله دي.

چاش- باش قالميشديم. اوغلانين نه دئديگيني ايچ ائله يه بيلميرديم. بيرآز دوشوندوم . بيردن هيندي فيليم لرده كي كيمي قاييتديم اوتوز- اوتوزبئش ايل قاباغا. شاه زاماني، اورمو راديوسوندا شاكري آدلي بيريسي  هر آخشام شاهنامه نين ناغيللاريني دئيردي. بو ناغيللاري چوخ خوشلاديغيمدان هر گون اونلارا قولاق آسارديم. بيردن سانكي ياتميش ايديم ، اويانديم. بو ناغيللاردا افراسياب توركلرين شاهي، بؤيوگو  ايدي. بونو خاطيرلايينجا قانيم بئنيمه داشلاندي. گؤزلريمي يوموب آغزيمي آچديم:

-         اولان روستمين آغزيني...

اونون آرواديني  ...

اونون دده سي نين سومويونو....

سهرابين قانينا ايشيييم، اونون نوشداروسونا سيچيم...

گنجلر يامانلاري ائشيدجك اوستومه يومولدولار.فيرلانان يومورق اولدو آتيلان تپيك. مامورلار اوزومه بيبرلي اسپري فيشقيراندا اؤزومه گلديم. يولدان گئچنلر، دؤرد فارسين بير ياشلي توركله ووروشدوغونوگؤرونجه ساواشا قاتيشاراق گنج لري دؤيوب پرشياني دارما- داغين ائتميشديلر. بيزي پوليس ايداره سينه آپارديلار.گتيرمزليك دن پوليس ايداره سي نين رئيسي، روستم و گنج لرله همشهري چيخدي! نه باشيزي آغريديم. پوليس ايداره سينده حلل اولا بيلن پرونده ني، "بو موضويا يئتيشمك بيزيم صلاحيبتيميزده دئييل" دئيه آدي يوخ ايداره سينه گؤندرديلر....

مش اسماعيل  يئنه سيگار آليشديردي. قوناقلارين بيري دؤزمه ييب، " اورادا نه اولدو؟" دئيه سوروشدو. مش اسماعيل توستونو بورنون دليكلريندن ائيشيگه بورولاياراق سؤزونون آرديني توتدو:

-         هئچ اورادا پوخو قويدوق سبده. مملكتده، توركلرله فارسلارين آراسيني وورماق ، ايغتيشاش سالماق گوناهيني، بيلديگيز كيمي بوينوما قويدولار، خولاصه پان توركيست دئييلن شئيين كوت - شالواريني اگنيمه بيچديلر. يولداشلار ساغ اولسونلار اونلارين كؤمگي ايله ضامينه بوراخيلديم. پرونده ني داديگاها گؤنده ره جكلر. گؤره ك داديگاه نه حوكم وئرير. هله هله گؤزله ملي ييك...

واخت گئچميشدي. قوناقلار آياغا قالخيب ديل-آغيز ائده رك مش اسماعيل لا ساغ اوللاشديلار. هاميدان سونرا من چيخديم . قاپي آغزيندا مش اسماعيل دان سوروشدوم:

-         مش اسماعيل بو آرادا گوناهلي كيمدير؛ نييه باشيميزا بو اويونلار گلير؟

مش اسماعيل اليني چيگنيمه قويوب گولومسه يرك دئدي:

-         گوناهلارين هاميسي سازماني ميللين بوينونا دير! چومچه قازانا دگنده بو كؤپك اوغلولار تئز بير قطعنامه چيخارديرلار آنجاق نئچه مين ايلليك ايران - توران ساواشينا بيرجه دنه  بئله اولسون قطعنامه صادير ائله مه ييب لر هم بيزيم جانيميز قورتولسون هم بو فارسلارين!

1391/1/14

    بؤلوم لر: حيكايه و گولمَجه لر

 بايرام  قوناقلاري

دوكتور جئري

دؤولتي پورتاغال!

اوشاقلاري نين هئچ يامان اؤيرنمه سيني ايسته مه ين بير آنا، اوغلونو بازارا گؤندرميش. بو سيرادا، بلديه مامورلاري ايله ال آراباسي اوستونده آيين- اويون ساتانلارين آراسيندا توققوشما چيخيب رنگلي- رنگلي يامانلار آليش وئريش اولموش.اوغول ائوه دؤنونجه آناسيندان سوروشموش:

-         آنا ...يك  نه دئمك دير؟

آناسي :- پورتاغال اوغلوم پورتاغال !  - دئميش.

بايرام اولموش.قوناقلارين باشي آچيلميش. آنا اوغلونا :- اوغلوم دور قوناقلاريميزا ميوه توت – دئميش. اوغلان ، ميوه قابيني قوناقلارين قاباغيندا توتاراق:

-         دؤولتي ...يك لردن يئين ، همي شيرين همي  سولودورلار!

اخلاقي سونوج: بو  ايل "دؤولت قيمت لره نظارت ائده جك" وعده سيله ميللته ياخشي پورتاغال ووردو!  

شور گؤز قوناق!

بايرام قوناغي گئدندن سونرا، آرواد حيرصله اريندن سوروشموش:

-         بو گلن كيم ايدي؟ آز قاليردي گؤزلري ايله آنامي يئسين؟

كيشي گولومسه يرك:

-         عتيقه چي دوستوم ايدي!- دئميش

قيمت لره نظارت

بايرام قوناغي پوسته لره ال اوزادينجا، ائو يييه سي:

-         پوسته اوتوز مين اولدو، آللاه دؤولتدن راضي اولسون نظارتي اولماسايدي قيرخ مينه ده آلا بيلمزديم- دئميش.

قوناق پوسته لردن بير سيخيم گؤتوره رك اونايلاميش:

-         هه ! آللاه دؤولتدن راضي اولسون ، اون مين وئرديم تاكسي منه بورايا گتيردي. نظارتي اولماسايدي اون بئش مينه ده گله بيلمزديم.

امكلي وئرن بايرامليغين صيفرلريني سايمازلار!

7 ياشلي نوه ، بايرامليق آلاركن بير پولا بير77 ياشلي بؤيوك باباسينا باخيب دئميش:

-         بؤيوك بابا ، ائله بيل تورم دن خبريز يوخدور!

بؤيوك بابا  نوه سي نين باشيني تومارلاياراق :

-         اوغلوم، منيم خبريم وار ائله بيل دؤولتين خبري يوخدور!

ايبيشين بايرام گؤروشو

ميللت وكيلي ايبيش بايرام گؤروشو اوچون داناباش كندينه گئديب گئجه ني يولداشي قيبيش گيلده قالمالي اولور. گئجه ياريسي توالئته گئدملي اولان ايبيش، قاپي آغزينداكي كؤپكي گؤرونجه اوتاغا دؤنوب گولو تورپاغي ايله چيخارداراق گولدانين تركينه  سيچير .

اون بئش گون سونرا ايبيش تهراندان قيبيشا تئلفون آچاراق حاليني سورشماق ايسته يير. قيبيش حيرصلي-حيرصلي :

-         كئف احوالي بوراخ، دئ گؤروم هارا سيچميسان،سن گئدندن، گونده ائوين بوتون اثاثلاريني ايئشيگه تؤكوب يويوب آرتيلاييريق گئنه پوخون ايگي كسيلمير!

يئني مودئل ار

ايبيشين باجيسي، هر ايل باشي ائوي نين بوتون اثاثلاريني دگيشديريب يئني موداسيني آلاردي. بايرامدان بايراما باجي گؤروشونه گئدن ايبيش بو كره يانيليب قونشونون زنگيني باسير. قاپي آچيليب كوركن لري نين يئرينه غريبه بير كيشي ائشيگه چيخير. ايبيش بارماغيني ديشله يرك دئيير:

-         آمان آللاهيم ، باجيم بو ايل اريني ده دگيشيب!  

بايرام قوناقلاري

اوشاق بايرام قوناغيندان سوروشور:

-         باغيشلايين سيز هاچان گئده جك سيز؟

-         نئجه مگر؟!

-         هئچ،  آنام دئيير قوناق گئدندن سونرا شاميميزي يئيه جه ييك .

    بؤلوم لر: حيكايه و گولمَجه لر

كال ياز

دوكتور جئري

دام ديواري يام ياشيل بوياتديرمالي يام

قوندارا ياز گولونو حيطين باغچاسينا اكمه لي يم

قوخو فيسقيرسام نه دوغال!

چيلتيك چالالي اوخويان بولبول لر وار

بيريني آلمالي يام

بير آغاج

بير گونش

بير حوووض

ديوارين اگينه سالمالي يام

باليغي قيرميزي..

 بيليرم

توپ گوجونه ياز گله جك

بايرامي قارالتي لارلا قوجاقلاشمالي يام

داريخما سنده منيم اورمو گؤلوم!

گؤروشونه گؤزلوكله گله جگم

گؤيونو آلمالي يام...

    بؤلوم لر: ساتيريك شئعيرلر

بايرامليق

جيزما-قاراچي : دوكتور جئري

بايرام گلير ياز گلير

گئدير چوخدور آز گلير

فيشلر ائوده قالانيب

برق گئتمه ميش گاز گلير.

بايرام گلير ياز گلير

نغمه گلير ساز گلير

من تئلليني گؤزلورم

كئچل گئدير داز گلير.

قووالادي ياز قيشي

بيتدي سويوق قار  ايشي

گؤردوك بيزده بايرامي

اوزو قارا گاز فيشي

بايرام گلير عار گلير

سازلار سوسور تار گلير

ايمداد دونو گئنديرسه

دونيا منه دار گلير

بايرام گلير  يالاندي

بورج بوغازا داياندي

آلديغيم يئر- يئميشلر

اوچ ساييدا تالاندي

تدبيرلي اولاجاغام

بير چانتا آلاجاغام

مشه بايرام گلمه دن

مشده قاچاجاغام

ياشي گؤزدن ساچام من

دردي كيمه آچام من

بو بايرامين اليندن

هارالارا قاچام  من

ياز گلدي گؤروشه ليم

دردلري بؤلوشه ليم

توركون  ديلي كسيليب

گل يالنيز اؤپوشه ليم

1389/12/26

    بؤلوم لر: ساتيريك شئعيرلر

آدم- ين گونده ليكلري

يازان : مارك تواين

كؤچورن : دوكتور جئري

  بيرينجي بؤلوم 

  اويانديغيمدا يالقيز دئييلديم آرتيق. اوزون ساچلي بير ياراتيق تاپيلميشدي يانيمدا. 

سود گونو

  او درين يوخويا  دالديغيم سيرادا باشيما بير اويونلار گلميش اولمالي. كؤكسومون سول يانينداكي يارا ايزيندن آنلاييرام بونو. آغري – ماغري يوخدور آنجاق يئني ياراتيغين داها ايلك اورتايا چيخيشييلا بئله  بير يارا ايزي بوراخماسي، موتلو اولايلاري گؤزله مه جگيمي گؤسترير.

  دوز گونو

.............

آرديندا اوخويون

    بؤلوم لر: حيكايه و گولمَجه لر