دوکتور جئری
ساتاشما ادبیاتی
گؤروش‌لر : 0
تاريخ : یکشنبه 12 بهمن 1399 | یازار : دوکتور جئری
+0 به‌ین
کئفلی ایسکندر
ساتیریک ادبیات


ساوادی اولانین آخیری اولمور!

بو حکایه نی ،دوستوم محمدرضا بئی لری منه دئییب. اوننان سوروشاندا کی هاردان ائشیدمیسن ؟دئدی:منده ائله بیر نفردن ائشیدمیشم .بیلنمه دیم بونون کوکو هارداندی.

ساوادی اولانین آخیری اولمور!

بیر گون بیر تولکو بیرده قورد آج -سوسوز دولانیردیلار .اونلار بیر تپه نی آشاندا، گوردولر بیر آت اؤزونه گوزلجه اوتلانیر .هانسی اوتدان یئییر، اؤزونه گوزلجه آغنیر.تولکیله قورد بیر -بیرلرینین اوزونه باخیب ،یعنی کی نئجه ائیله یک؟ بو آتا بیز یاخینلاشیب ،توتوب ،کمنده سالیب ییه بیلریک؟خیلاصه تولکو بیر فند ایشله دیب،قورد قبول ائدننن سونرا آتا یاخینلاشیب، تولکو قارداش ،دئدی:آت عمی اوغلو ماشااللاه یاشیزا گوره، گوزل قالمیسیز. باغیشلییاسیز سیننیز نئچه اولار؟آت حس ائتدی کی بوردا بیر قورقو -کلک وار ،باشین قوزاییب، دئدی:واللاه آتام یاشیمی دالی دیرناغیمین اوجوندا یازیب، اؤزومده هردن ایسترم بیلم، اوخویابیلمه رم .قورد فرصتدن ایستفاده ائدیب یاخینا دیرماشیب، گئده- گئده، دئدی: ایندی من اوخویارام بیر یالاننان ساوادیم وار.قورد ائله آتین دالیدان ساهمان یئرینه دوشنده ،آت بیر تپیک ووراراق، قورد قوزانیب، باشی بیر سالا دئییب، اوردا جانی چیخدی.تولکو بونو گورن آن،فاچاراق، اؤز- اؤزونه بیر سوزلری، دئییردی.یوخاریدان قارغا تولکویه باخاراق ،سوروشدو :تولکو قارداش نه اولوب؟ هارا قاچیرسان؟تولکو نفس-نفس وورا- وورا ،دئدی:گئدیرم قبریستانا، دده مه بیر فاتحه -رحمت اوخویام!یاخشی اولوب منه ساواد اورگتمه ییب!یوخسام ایندی منده اولموشدوم!!

گرگرلی آراز

+ نوشته شده در جمعه بیست و دوم اسفند ۱۳۹۹ ساعت 15:31 توسط محمد علی برزگر(گرگرلی آراز)  | یک نظر

بیر کتابدان تانیشلیق

کتابین آدی:

حقوق رشته سینده اصطلاح لار آذربایجان تورکجه سینده

یازار:م.ع.ب.(گرگرلی آراز)

بو ورده من اؤز نوبتیمده نقدر اوستادلاردان اورگندیکلریمی قلمه آلیب نئچه جیلد اوشاق ادبیاتی  یازاننان سونرا بو دونه ،نوبت ایله حقوق ساحه سینده ایشله نن اصطلاح لاری ساده شعر  دیلینده توپلاییب سیز حورمتلی وطنداشلاریما ایتحاف ائله مک ایسته ییرم .

بونودا دئمه لییه م بو کتابا باخیش گئچید مه یینه گوره ائلچی بئی جنابلاریننان ،چاپ اوچون یاس بخشایش انتشاراتیننان نهایت درجه ده ممنونام

کتابین قاتیننان بیر اورنک:

ص 90

قوروق(حرز)-پناهگاه،حصارلی،او یئرکی ائو صاحابی نین اجازه سی اولمادان اورا گیرمک اولماز،اورنک اوچون :آتا ننه مین صاندیقخاناسی تک!!

ائوده اؤزونه چوخدان،

حاجی حیدر یاتمیشدی.

چوخ سوزلری اؤزون نن،

یوخوسونا قاتمیشدی.


یاری گئجه سس گلدی،

یاتان ائودن او اوزدن.

صاندیقخانادا سس لر،

گئدیر قازانچا سوزدن.


تاققا، تاققی سالمیشدی،

ناشی اوغرو آیاقدان.

حاجی یاتان زامانی،

یاری گئجه بایاقدان.


حاجی اوغرونو توتدو،

ال-آیاغین باغلادی.

ماشانی قویدو داغا،

پیس یئرینی داغلادی.


دئدی اوغرویا:اوغرو!

سن منیم حرزیمده سن.

دینیب ،دانیشما،گورمه،

تیکی لی درزیمده سن.


گرگرلی آراز

+ نوشته شده در پنجشنبه سی ام بهمن ۱۳۹۹ ساعت 16:35 توسط محمد علی برزگر(گرگرلی آراز)  | یک نظر

بیزیم یومورتالاریمیز ین سسی قونشولاردان گلیر!

اون بیر اخباری

شهروند خبرنگار بخشی......ائل سوزو

توکذبان:الو ،اون بیر اخباریدی؟

ایسکندر:بلی ،سوزوزو دئیین.

توکذبان:منیم سوزوم اودورکی ،تزه لیکده بیزیم تویوقلار ،قونشو اسمر گیله گئدیب، یومودلایللار. اووللر بیر -ایکی سی اورا گئدیب، راحاتلاشیردیلار، آمما بو گونلر آللاه بلالرین وئرسینلر، یاریسیننان چوخو گئدیب ،اوردا قوناق قالیرلار .گلیب مننن یئییب، گئدیب اوردا یومورتالارین بوشالدیللار، آخ !جانیم بئله ده ایش اولار!

ایسکندر:توکذبان خالا ایندی بیزیم الیمیزدن نه گلر؟

توکذبان:گئنه سیزین سوزوز گئچر ،بو تویوقلارین اسمر گیله گئتمه لرین یولون کسه سیز.

ایسکندر تیلویزییایا دونوب دینله ییجیله ره دئیر:ایندی بو قونودا پخش اولان پراگلامیله، بولگه نین اکینچیلیک ایداره سینین مدیریله تیلفون خطی آچمیشیق .

ایسکندر:ائلچی موعللیم؟ توکذبان خالانین سوزلرین اشیتدیزمی؟

ائلچی بئی(گوله- گوله):بلی! بلی!

ایسکندر:بی زحمت بو ایشین چاره سین دییه سیز؟

ائلچی بئی:وآللاه اوجور کی من قونشولاردان سوراغلاشمیشام ،توکذبان اؤزو ماشااللاه وارلی- کارلیدی .الی آغزینا یئتیشن آدامدی .بیرده کی هئچ دوزگون یئمز- ایچمه ز،چوخ قیتمیر بیر بشردی. آمما قونشوسو اسمر فقیر فقرادندی ،بیر بولوک کیفلتی وار، هئچ بیر یئردنده ماآشی یوخدو .آللاها قوربان اولوم نه اولار یئتیریردا !دئیبلر: کور قوشونکون آللاه لوواسیندا یئتیرر !بیرده قالدی مال یئمه زین مالین ییه ر بیر جللاد! 

گرگرلی آراز

+ نوشته شده در دوشنبه سیزدهم بهمن ۱۳۹۹ ساعت 0:17 توسط محمد علی برزگر(گرگرلی آراز)  | یک نظر

هر زادی ایچری اوتورورلر!

هر زادی ایچری اوتورورلر!*

گئچن هفته انزلی لیمانیندا ،ائلچی بئی یه قوناغیدیم .بیلمه دیم شامدا بالیقدانیدی یادا ندن؟ بتر قارنیم سانجیلاماقا باشلادی .ائله اولدو کی ایکی الیم قارنیمدا اؤزومو او دیوارا بو دیوارا چالیردیم. چارا کسیلدی، ائلچی بئی منی یاخینلیقدا دوکتور جئرینین آزمایشگاهینا آپاردی .خسته لییم تحجیلی بیرده تانیش اولماقدا، دوکتور جئری اؤزو دفتریننن دوروب گلیب ،حالیمی سوروشاننان سونرا بیر یول ایشله دن لیوانلاردان وئریب ،دئدی: ایسکندر گئچ آیاق یولونا بیر آز آغیر ایشه گیننن لیوانا اوتور گتیر گورک نه ییندی؟ بو ایشله رین هامیسین گورندن سونرا دوکتور جئری تانیش اولماقدا منه بیر آز داوا درماندا وئریب ،آزجا ساتیتلشدیم. سونرا دوکتور جئری، دئدی :صاباح آخشام آنالیزین جوابین گلین آپارین. دوروب تشککور ائیله یب گئدنده، ائلچی بئی اوز توتوب دوکتور جئرییه، دئدی:دوکتور بی زحمت ایسکندرین لیوانیننان برک موغایات اولون! برک یئره قویون !دوکتور جئر تعجبله ،دئدی :نئجه کی؟ائلچی بئی جواب وئردی :آخی ایندی مملکتده هر زادی ایچری اوتورورلر !قورخورام مونادا تاماح سالالار!!

گرگرلی آراز

*-بو آجی گولمه نی بویوک قارداشیم پورقاسم جنابلاریننان ائشیتمیشم آمما بیر آز آزادیب چوخاتمیشام.

+ نوشته شده در چهارشنبه هشتم بهمن ۱۳۹۹ ساعت 12:54 توسط محمد علی برزگر(گرگرلی آراز)  | یک نظر


غلبه...........

قره باغ آذربایجاندیر!

غلبه بیزه چوخ یاراشیر!

ایره لی عسگر ظفر چالماغا..................

+ نوشته شده در پنجشنبه بیست و چهارم مهر ۱۳۹۹ ساعت 19:44 توسط محمد علی برزگر(گرگرلی آراز)  | 3 نظر


گوره سن جامعه میزده بئله دی؟!

بیر -ایکی ایل استخدامیننان گئچمه میشدی، بو اوچ یولداشین اخراج نامه سی ایداره لرینه، گلدی کی بونلار داها بیر مقاملاری ایداره لرینده یوخدو .کور - پئشمان دوکتر جئری،  ایسکندر ،قالایچی مورتوض ترساوا کندلرینه قایتمالی اولدولار .دوکتور جئرینی یاخاسینی دویمه مکلینه ، ایسکندرین جیبینده مهر اولماماغینا ،قالایچی مورتوضی باباسی فرقه چی اولماغینا خاطیر، اخراج اولموشدولار .

دوکتور جئرینین یئرینه یاخاسینی دویمه لیین حاجی رجبی،  ایسکندرین یئرینه آلنی مهر نقشی سالان مشهدی بهرامی، قالایچی مورتوضون یئرینه ساواکی محررمین نوه سی مجیدی، ایشه گوتورموشدولر.

آلتی آی بو ایشدن گئچمیشدی، قرار قویولدو بو اوچ یولداش بیر یوز داوار آلیب ،بیر چوبانیله داغدا اوتارسینلار.

ایلک گونودو شالی آچیب ایسته دیلر یئمه گه باشلاسینلار ،چوبان حصاردا بیر ایکی تیکه چورکدن شوربایا باتیریب، بیر ایته بیرده پیشیگه تولازلادی. ایسکندر خبر آلدی بو نه ایشدی؟! چوبان، دئدی: بالا بو رسمدی ،یئمکده، ایلک ایتیله ،پیشیکدی!!

گرگرلی آراز

+ نوشته شده در یکشنبه دوم شهریور ۱۳۹۹ ساعت 22:14 توسط محمد علی برزگر(گرگرلی آراز)  | 5 نظر


هله چوخ آداملار خورونا ویروسو جیددی توتمورلار!

هله چوخ آداملار خورونا ویروسو جیددی توتمورلار!

دوکتور جئرینین بو گونلر ایشی چوخ آغیردی. گونو اییرمی دورد ساعات ائله خسته خانادا ،خسته لرایله گونون گئچیردیردی. آللاه تعالا اونو اکیب دوغانا شیخ میرزه سیفعلی آغایا بیرده قیزیللی مصمه خانیمی ساخلاسین کی بوجور نوجوان- رعنا- گوزل ساوادلی انسان، جامعه میزه تحویل وئریبلر .

دوکتور جئری یوررغون -آرغین ایشدن خسته خانادان ائوه یئتیشنده،گوردو ،آتاسی شیخ میرزه سیفعلی یوخدو .آناسیننان خبر آلدی، آتام هاردا؟آناسی قایدیب، دئدی:بالا آتان داریخیردی ، ایندی سنین قاباغین ائشیگه چیخدی. ائله او آن آتاسی قاپینی آچیب، ایچری گیردی. دوکتور جئری آتاسی ایله اوز -اوزه ساتاشاندا

دوکتور جئری- آتا دئمیشدیم آخی ائشیگه چیخما ،خسته لیک وار؟

شیخ میرزه سیفعلی- داریخدیم ،اون دیقه اولماز دوستوم بقال مشهدی احمده بیر باش ووردوم ،تئز گلدیم.

دوکتور جئری - آتا بس ماکسین هانی؟

شیخ میرزه سیفعلی- (گوله گوله)ها زامان منیم شورتوم اوسدورماغیم قاباغین آلسا سنین ماسکین خورونا ویروسون قاباغین آلار!!

گرگرلی آراز

+ نوشته شده در چهارشنبه پانزدهم مرداد ۱۳۹۹ ساعت 11:47 توسط محمد علی برزگر(گرگرلی آراز)  | 3 نظر


پان تورکیسم!

آللاه تعالا باشیزا گتیرمه سین ،گئچن هفته ،بیر یونگول سکته منه گلمیشدی. بیر چوخلو داوا -درمان اولاندان سونرا دئدیلر:دوکتور جئری بو ایشده مهارتی چوخدو.بو جهتدن، ائله ایکی ساعات اولاردی، مطبینده اوتورموشدوم.داریقدیقیما گوره، آداملارا ،دام -دیوارلارا ،باخیردیم ،تاکی نوبتیم یئتیشه.

بیردن ساعادا باخاندا ،گوردوم یازیب: با ساعت پارس زمان را به جلو ببرید.پنکه یه اوزومو دوندردیم گوردوم پارس خزر یازیب.ائله بوجورسونا باشیمی هارا فیرلاداندا ،گوروردوم ،تلویزییا پارس،تلویزییا استولو تخت جمیشید -پارس،دفتر پارس ،قلم پارس.حتتا پرده نی قوزاییب انبارلارینا باخاندا، گوردوم اوردا بیر فورغون وار، اوستونده یازیبلار پارس.

بیردن آدیمی سسله دیلر،گئچیب نومره آلاندا پولون پارسییان ،بیرده پاسارگاد بانکینا کارت چکیب، دوکتور جئرینین اوتاقینا وارید اولدوم.

ایسکندر- سسسلام آآآدوکتتتور.

دوکتورجئری- سلام جانم،عمو ،حالت چطور است؟راحت باشید.

ایسکندر-سسسکتته اائله مممیشششم،ااوووز ددیلللیممده دانیشششامممیررررام.

دوکتور جئری- عیب نداره ،الان نسخه تو برات می نویسم.

دوردو آیاقا منی بیر ماینادان گئچیددی. دوکتور ماینا ائدنده ،منده ائله گوزلریم دیوارلاری گزیردی.

اوردادا ائله هر بیر شئی بخاریدان تا زیلویاجان اوستونده پارس موهرو وورولموشدو.

دوکتور جئری-عمو هیچی نیست ،گذرا ،ساده سکته کردید .با کمی دوا- درمان خوب می شوی،خطر رفع شده.

ایسکندر- دودوکتتتور بوبوبو دادادا نیشماماغیماما نننئیلللله یم؟

دوکتورجئر-اونم درست میشه اگر نمیتونی تورکی حرف بزنی پارسی حرف بزن!

ایسکندر- مممممن پاپاپارسی دادادانیشانمممیرام.

دوکتورجئری نسخه می الیمه وئره -وئره گوله گوله ،دئدی:شما هم پان تورکیسم؟!!!

گرگرلی آراز

+ نوشته شده در چهارشنبه یکم مرداد ۱۳۹۹ ساعت 11:47 توسط محمد علی برزگر(گرگرلی آراز)  | 5 نظر


نذری یاری بول!

تامین اجتماعی سازمانی تقایتچولارینا سککیز یوز عوضینه دوردیوز ایضافه ائیله دی!

ائلچی بئی شیخ آغا دده لی گین کی بو گونلر ایسالا دوشموشدو ،دوکتور جئری نین مطبینه آپاریردی. دوکتورون مطبی اوچ مرتبه لی بینادا یئرلشیردی ،بیرده کی لیفت خارابیدی ،مجبور اولدو اونو دالینا آلسین ،او اوزون پیلله لری یوخاری چکسین.

او آخیر پیلله لرده بیردن شیخ آغا دده لیگیندن بیر اسه مس دالیدان قورتولدو .ائلچی بئی کیریخدیقیندان ایسته دی بیر دالییا دونسون ،دئسین: نه خبریندی؟ او واقتا بیردن الی زوودی، شیخ آغا پیلکانلاردان اوز یئنیشه آشاغا گلدی. ائلچی بئی ایکی الین باشینا چالیب، چاره سیز حالدا اوجا سسله ،دئدی: آللاه ائله اولسون  دده لیگیمه بیر شئی اولماسین ،سککیز یوز ایمامزادامیزا نذیر دئییرم. ائلچی بئی نذیر دییه -دییه دده لیی آشاغا پیلله یه یئتیشیب، اوردا اوزانمیشدی .

شیخ آغا سسی گلر گلمه ز ائلچی بئیی سسله یب، دئدی: بالا بیر شئی اولمادی! سینیق -مینیقیم یوخدو نذری یاری بول! دورد یوز نذیر وئررسن!!

گرگرلی آراز

+ نوشته شده در دوشنبه بیست و سوم تیر ۱۳۹۹ ساعت 22:35 توسط محمد علی برزگر(گرگرلی آراز)  | 4 نظر


اختلاس!

دوری بریزه باخاندا، چوخ بیر شئی لر اؤز قیمتینه گوره چکیسی آزالیب .اورنک اوچون:ائله توتاق بو ساختا پئندیرلری، بیلدییز ه گوره هم قیمتی یوخاری گئدیب، همده چکی لاهازیندان آزالیب.

ائله بو سایاقدا گئدسک ،پوفک نمکی،پوفیلا،چیپس،شیرنییات بیرده بوجورلارین آغزین آچاندا ،یاریسیندان چوخو شنقیلیله -منقیلینی ییه ن قوردون، قارنین یئلیله دولوب کی آدامیم اوزونه چیرپیر. بیرده فییاتینا گوره چکیسی چوخ آزالیب .

آمما آللاها چوخ شوکور ،بیر شئی گوزل، سئویندیریجی حالدا چوخالیب، اودا اختلاس بویوک -بویوک میقداردادی!!

گرگرلی آراز

+ نوشته شده در سه شنبه هفدهم تیر ۱۳۹۹ ساعت 22:7 توسط محمد علی برزگر(گرگرلی آراز)  | 4 نظر


باسدیرماق

او مدیرلر کی اختلاس ائدیرلر تقدیم اولونور!

باسدیرماق!

توحید دوستوم دئییردی:قدیمنن ائله رحمتلیک آتام، پامبیق اکیب ،چوخلو چاناقچی محلله قادینلاردان توتوب ،سحری کووشنه ایشلمگه یولا ،سالاردی.بیرگون ائششگه مینیب، ایسته دیم قادینلار ایشله ین یئره گئدیب گورم، نئجه ایشله ییرلر ؟زمییه یئتیشنده گوردوم ،هئچ بیر نفر یوخدو .اویان -بویانا باخاندا ،بیر طرفدن توستو گلیردی. اورا یاخینلاشاندا گوردوم ،قادینلار دسته توتوب، اورتادا فاطما خالا ، اوینایا -اوینایا اوخویوردو:

بیز گلمیشیک یوغورت چالاق باسدیراق!

گلمه میشیک آلاق ووراق اوسسوراق!!

گرگرلی آراز

+ نوشته شده در دوشنبه نهم تیر ۱۳۹۹ ساعت 23:40 توسط محمد علی برزگر(گرگرلی آراز)  | 3 نظر


رد اولون کافیرلر!

شیخ آغا ترساوا کندیده، ائله ایلک بینادان بیر نفر اونو اوزده تعریفله ینده ،چوخ خوشونا گلیب ،چولده -بایردا ،مجلیسده -چایخانادا، طرف مقابیلینه هئچ بیر اولماسا بیر قوهون -شوربا یاخوت بیر پول اونا حتمی وئرردی.

هامیدان بتر اونو تعریف ائدنلر، اوغوللوغو ائلچی بئی، دوکتور جئری، بیرده حیاتیندا مفلوس اولان ،کئفلی ایسکندریمیش .بیر عمر بونلار یالاندان هر گون،هفته، آی شیخ آغانی تعریفله ییب اوندان بیر شئی لر قوپاردیب، اؤزلرین عاراق بیرده یئمک پوللارین آلارمیشلار.

ندن بیر گون اوچ یولداش ائلچی بئی ،دوکتور جئری بیرده کئفلی ایسکندر ،کئفلی- کئفلی یوخاریدان یئنیشه اوخویا- اوخویا تشریف گتیریردیلر کی شیخ آغانانان اوز به اوز چیخدیلار. ائلچی بئی چتینلیکله آیاق اوسته دورا -دورا الین اوزادیب شیخ آغایا طرف، یولداشلارینا، دئدی:بو گلن فلان -فلان شدنی گورورسوز ؟دوکتور جئری دئدی:بو اوران گوتان میمونو دئییرسن؟کئفلی ایسکندر دالیسین توتوب، ییخیلا -ییخیلا دئدی:نییه میمونا توهین ائدیرسیز یازیق دئییل او حیوان؟هر دفعه بونلاری دییه- دییه شیخ آغا یاخینلاشیب، اشیدیب، ناراحات اولماغا باشلایردی .

او واقت اولدوکی اوچوده شیخ آغانان اوزله شیب، ایسته دیلر بیر اییلیب- دوزه لیب بیر سلام وئرسینلر .سلاملاری قورتولا- قورتولدا شیخ آغا سوزلرین کسیب، اتکلرین اوجونو ییغیب، اوجا سسله دئدی:رد اولون کافیرلر !!

اوچ یولداش بیر عمور یالان دئدیلر ،شیخ آغانین خوشونا گلدی! بیر دفعه دوز دئدیلر ،شیخ آغانین آجیغینا گلدی!!

گرگرلی آراز

+ نوشته شده در سه شنبه سوم تیر ۱۳۹۹ ساعت 23:36 توسط محمد علی برزگر(گرگرلی آراز)  | 3 نظر


فهله لرین کرونا واقتی ماآشلاری!

بیزیم کندیده ائله دوکتور جئری اؤزو ایلک بینادان دوکتورودو .دیش چکمک ،چیبان دئشمکدن ،کوپه قویما، بوغاز باسماقدان ،ختنه ائله مک ،خئیر- احساندا آداملاری چاغیرماقدا ،گوزل رولو اولاردی .آمما بو دوکتورون اصلی ایشی، ائله باش- گوز وورماغیدی .او گونو دئییرم کی ایل باشینا خیرمان اوستو باش-گوز کی دوکتور جئری وورموشدو ،طلبین ائلچی بئیین دده لیگی حاجی شیخ آغادان کی تزه زییارتدن گلمیشدی ایسته ییردی.حاجی شیخ آغا حسابلاییب دوکتور جئری نین پولون وئردی. دوکتور جئری پولا بیر باخیب، تعجبله دئدی: حاجی شیخ آغا ایکی نوبت نییه آز وئرمیسیز؟حاجی شیخ آغا حیرصلا دئدی:سعود عربده ایکی سفر باش وورموشام اونودا سنه گرک حسابلایام!!

گرگرلی آراز

+ نوشته شده در جمعه سی ام خرداد ۱۳۹۹ ساعت 22:48 توسط محمد علی برزگر(گرگرلی آراز)  | 4 نظر


خمیر چوخ سو آپارار!

بیر ایکی گون اونجه، آبوشدا تکزاس بولکه سینده ،جورح فلویددو توپراغا تاپیشیراجایدیلار .بیزده اؤزوموزه وظیفه بیلدیک بیر دسته یله اورا گئدیب،اؤز کدریمیزی آبوشون بو جنایت ایشیندن بیلدیرک. بو جهتدن تیلفونو گوتوروب ،ایلک ائلچی بئیی ییغدیم، چوخ گوزل قارشیلاییب قبول ائله دی .سونرا دوکتور جئرینی ییغیب، اودا بیر آز یالواراندان سونرا گئدمه گه بیزیم دسته یه قوشولدو. کرونا اولماقدا چوخ آداملارا دئمه دیم ،ائله اوچ نفریمیز بس ائیلر.

بویون ناهاردان سونرا قبریستاندایدیق، گوردوم اوزاقدان جورجون قارداشی آغلییا-آغلییا الین توولاتدی ،یعنی بیزی اؤز یانینا چاغیریردی .ادب حکم ائیه یردی اونون یانینا تشریف آپاراق .یئتیشیب بیر قوجاقلاشیب تسلییت دئدیک ،اؤز مسلکیمیزه گوره الیمیزی قبرین اوستونه قویوب، بیر فاتحه اوخودوق.

بو واقتا بیردن قاتیلین عایله سی حیات یولداشی باشدا اولماقدا، آغلییا -آغلییا ایرحمتلیک جورجون قارداشی طرفینه گلیردیلر. هله گلیب جورجون عایله سینین اطرافیندا حلقه ووروب، یالواراندا،اورتادا هردن دوکتور جئری ترجمه ائتمه سیندن بئله باشا دوشدوق کی دئییردیلر: قاتیله رضایت لیق وئرین. جورجون قارداشی قاتیلین حیات یولداشین قوزاییب ،دئدی :واللاه بیزیم الیمیزدن داها بو جریان چیخیب، ایندی (بارماقیله اوزاقی کورستدی)ائلچی بئی جنابلارینین ده ده لیگی شیخ آغا قویسا بیزیم سوزوموز یوخدو.

جورجون قارداشی بارماغیله ایشاره ائیله ین یئره اوچوموزده گوز دوندردیک نه گورسک یاخجیدی؟  ائلچی بئی ین ده ده لیی ترساوا کندیدن بیر شاغسی دسته سی توتوب هامینی اؤز باشینا ییغیب، بو دئییر اونلار باشلارینا  چالاندا ،تریبونو آلیر الینه کسگین شوعارلار وئریر .بولمه دیم دوکتور جئری نه او قاتیلین حیات یولداشینا دئدی کی او آن او قادین جورجون قارداشین بوشلاییب ،ائلچی بئیین یاخاسین توتدو!امما ائله بیل بو آبوشدا چوخ قالمالییق!چونکو ائلچی بئی جنابلاری سوز وئریب  کی بو تزلیکده ده ده لیگین رضایتین آلماسین!

گرگرلی آراز

+ نوشته شده در پنجشنبه بیست و دوم خرداد ۱۳۹۹ ساعت 18:59 توسط محمد علی برزگر(گرگرلی آراز)  | 2 نظر


بو زامان هنر هارا چاتیب......هنر صاحبی اولان قبریستانیمیز!

هنر صاحبی اولان قبریستانیمیز!(کهنه یازیلاردان)

گئچن ایل بیزیم آراز انجمن یمیزین زحمت لرینه گوره، بویوک ایداره لریمیزین - آغساققاللارین یاردیم ائتمه لری، گوستریش کورستمه لرینه خاطیر،شهریمیزین  قبریستانیندان بیر مین مئتیر آیریب، او اولن شاعیر-یازیچی-هنرمند شخصلر کی دونیاسین دئیشیرلر، اوردا توپراقا تاپیشیرسینلار. بویون ساعات بشده ائله قیرمیزی لنتی –یالمانی قئیچیله بویکلریمیزین، کسمه ییله ایشه باشلاندی، حاضیردی کی اؤز تاپیشیقلارین یئرینه یئتیرسین .بو ایش-مسئولییت ،هامیمیزین بویوگی آغساققالی حوسینعلی موعللیمه وئریلدی. اوگون بیر بهانه یله اؤزومو محممدین توکانیندا اونون یانینا وئردیم، دئدیم: حوسینعلی قارداش منیم بویوک آتا ننه م خسته دیر، ائله اوگونده ،دئییردی: یوخو گورموشه م !داها بو آی باشینا چیخمارام ،منیم خلعتی می حاضیرلایین .حتتا ،دئییردی: قبیریمینده فیکرینده اولون. حوسینعلی موعللیم بیر تس- تس اوزومه باخیب، دئدی: منه نییه دئییرسن؟ او سن ،او آتا ننه ن، اودا عرزاییل ،منه نه دخلی وار؟یاواشجا، دئدیم: نئجه دخلی یوخدی؟ منیم آتا ننه م ائله اؤزو بویوک بیر هنر صاحبی دیر کی ایندییه جان یعنی دوغسان ایل یاشایب! بیرده قالدی او بو کندین ماماسیدی، الینده ایندییه جان بیر اوشاق اولمه یب ،هنرمند شخص لردن ساییلیر.بیر اوزومه باخیب بیر آز یوموشاندی ،اوندا سوزومون دالیسین توتوب ،دئدیم :اولنده شامادا گلرسیز بیزه! بیر باشین سالمیشدی آشاغا ،بیردن قوزادی ،ایسته دی منه بیر یامان آتسین، یاخجی اولدی کی جیب تیلفونو زنگ آتدی.بیر الین چینیمه قویوب  قوزاندی ،توکانین قاپیسینا طرف گئدیب، ائله چشم دییه- دییه تیلفونو خاموشلادی ،سونرا منی چاغیریب، دئدی: تیلفون ائیله ین اتحاییه رئیسیدی ،دئیردی: قبریستانیزدا بیر یئر حاضیرلایین، بیزیم شهرین  عککاسی وفات ائدیب .بونو دییه ندن سونرا حوسینعلی موعللیم منه ده بیر تاپیشیریقلار وئردی: ایسکندر چونکی اتحادییه رئیسی دئیب ،اوشاقلارهاردادی بیر یئره توپلا،  اوردا گره ک چوخ گوزل قاباقلارینا چیخماق لازیمدی.

 آخشامی هنر صاحبی اولان قبریستاندایدیق، چوخ گوزل بیر یئرده عککاس قارداشیمیزی توپراقا وئردیک. آمما بیر شئی منی برک تعجبلندیردی ،ایکی آی بو قبریستاندان گئچمه ییب، قبریستان یاپ دول ها دولدایدی! اوخویا -اوخویا قبیرلرین اوستون بئله دولانیردیم ،بیرینده گوردوم  یازیب: آرامیگاه شادروان محممد ابدالی گوزل سویودوجو(بستنی) دوزلدن، آرامیگاه شادروان شوجه لی غلام فرهنگی چوخ ساکیت، ایشله ره قاریشمایان، ساواشمایان، باریشدیرماق هنرینه صاحیب اولان ،آرامیگاه شادروان محممدعلی برزگر گوزلجه  چورک پیشیریب خالقا یئتیره ن،آرامیگاه شادروان توکذبان قیزیمیز، باجاریقلا ،اؤز هنریله قدیم توز باسمیش شعیرلری تاپیب، اؤز هنریله اؤز آدینا بیزیم قارنیمیزا توکنلرین روحو قرین رحمت اولسون.

 بئله کی گئدیردیم گوزل -گوزل هنرصاحبی اولانلار ردیفله اوردا یاتمیشدیلار کی دیریلیقلاریندا قویمازدیلار اوستله رینه توز قونسون، هممشه اینگلیس پارچاسیلا اوزله رینه خوت –شالوار، ایندییا پارچاسیندان اؤزلرینه شال گردن ،اوچ یوز مین تومنلیق لاک دیرناقلارینا هنریله مصرف ائدردیلر! قاسیم میوه ساتان ،قصصاب جبیشده اوردا قویلانمیشدی ،اونلارین اوردا قویلانمالارینا بیر یئره فیکریم ایشله مه دی.

 ائله بو سایاقدا اوخویا- اوخویا گئدیردیم ،دالیدان حوسینعلی موعللیم ،دئدی: آی ایسکندر او آتا ننه ن اولسه ده، اولمه سه ده گتیر صاباح بوردا قویلایاق، گئتسین! بیر یئر قالیر اودا قوتارسین !بو قاپینی باغلایاق جهنم اولسون گئدسین!!

گرگرلی آراز

+ نوشته شده در دوشنبه نوزدهم خرداد ۱۳۹۹ ساعت 15:53 توسط محمد علی برزگر(گرگرلی آراز)  | 3 نظر


کورونا ویروسونا غلبه چالاجاییق

عزیز قلمداش،اوخوجو، دوست -تانیشلار سلاملار

بایرامیز موبارکلر

اینشااللاه بو قارانلیق گونلر توپراغیمیزین ائلیمیزین اوزوندن  سیلینر

گوزل گونلر یئنه اوزوموزه گوله جک .

بو نئچه آیدا اولماماقیم بیر نئچه عللتی واریدی بیر اویودی کی درسلریمده چتین مرحله سینده یدیم ایکی نجی بو کی بیر کیتاب ائلیم وطنیم آدیندا چاپدان چیخارتماغیمیدی

یئنه بیرلیکده گونلریمیز اولاجاق ......او گونه

+ نوشته شده در پنجشنبه هفتم فروردین ۱۳۹۹ ساعت 22:33 توسط محمد علی برزگر(گرگرلی آراز)  | یک نظر





    بؤلوم:
آرشیو
سون یازی‌لار
یولداش‌لار
سایغاج
ایندی بلاقدا : نفر
بوگونون گؤروشو : نفر
دونه‌نین گؤروشو : نفر
بوتون گؤروش‌لر : نفر
بو آیین گؤروشو : نفر
باخیش‌لار :
یازی‌لار :
یئنیلنمه چاغی :