دوکتور جئری
ساتاشما ادبیاتی
+0 به‌ین


دونیالیق آنادیلی گونو موناسیبتیله آذربایجان نوماینده‌سی‌نین مجلیسده‌کی کسکین دانیشیغی

دوکتور جئری

بیر هفته قاباقدان هر یئرده چاو دوشموشدو؛ آذربایجانین تانینمیش میلّت وکیلی اوستاد دفتری ۲. ایسفند دونیالیق آنادیلی گونو، ایسلامی شورا مجلیسینده تورک دیلی‌نین معروض قالدیغی قیرخ بئش ایللیک قاداغالاردان، باسقی‌لاردان دانیشیب آنایاسانین ۱۵.جی ماده‌سی‌نین تئزلیکله یورولوگه کئچمه‌سینی ایسته‌یه‌جکدیر.

سونوندا ایسفندین ایکیسی گلیب چاتدی. ساعات سککیزده مجلیس راسماً ایشه باشلادی. مجلیس باشقانی ایکی دقیقه‌ ایسرائیلین غزه‌‌ده تورتدیگی یئنی جنایت‌لرینی محکوم ائله‌‌دیکدن سونرا دئدی:

-‌ و اینک آقای اوستاد دفتری به مدت ده دقیقه می‌‌توانند در مورد مشکلات حوزه‌ی انتخابیه خود صحبت کنند.

بو ایجازه ایله، اوستاد دفتری یئرینده دیکلنه‌رک باش بارماغی ایله بیر-ایکی کز میکروفونون باشینا تاپداییب پوفله‌دیکدن سونرا،"رَبِّ اشْرَحْ لِی صَدْرِی وَ یَسِّرْ لِی أَمْرِی وَ احْلُلْ عُقْدَهً مِنْ لِسانِی یَفْقَهُوا قَوْلِی"-‌دئیه سؤزه باشلادی:

-‌ بِسْمِ اللَّهِ الرَّحْمنِ الرَّحِیم.‏ الْحَمْدُ لِلَّهِ رَبِّ الْعالَمِینَ‏ وَ صَلَّی اللَّهُ عَلَی ‏جَمِیعِ الْأَنْبِیَاءِ وَ الْمُرْسَلِین‏ سَیَّمَا خَاتَمِهِم وَ أَفَضَلِهِم مُحَمَّدٍ صَلَّی اللَّهُ عَلَیْهِ وَ آلِهِ وَ سَلَّم وَ أَهْلِ بَیْتِهِ الأطْیَبِینَ الأَنْجَبین ‏سَیَّمَا بَقِیَّةَ اللَّه فِی الْعالَمِین بِهِمْ نَتَوَلَّی‏ وَ مِنْ أَعْدَائِهِم‏ نَتَبَرَّأ إِلَی اللَّه.

بنام پروردگار بخشنده و مهربان

سلام و درود به پیشگاه آن وجود مطلق،آنکه نور آسمان و زمین است . سلام و درود به پیشگاه مقدس منجی عالم بشریت حضرت مهدی(عج) عدالت گستر، برکنارکننده ظلم وضلالت و برقرارکننده قسط وعدالت. رحمت خدا به روح مطهر و ملکوتی بنیانگذار نظام مقدس جمهوری اسلامی حضرت امام راحل (ره) و شهدای صدراسلام، شهدای عزیز هشت سال دفاع مقدس، شهدای مدافع حرم و شهدای غزه و یمن. و با آرزوی طول عمر باعزت وبا برکت برای رهبر فرزانه انقلاب اسلامی دامت برکاته.

با عرض سلام، ادب، احترام حضور یکایک نمایندگان بزرگوار حاضر در مجلس شورای اسلامی که در هر شرایطی شبانه روز در خدمتگذاری به ملت شهیدپرور و غیور ایران مضایقه نکرده با جان و دل در اعتلای نام ایران و اسلام در جهان کوشیده با مجاهدت‌های بی‌دریغ خود همیشه مشت محکم و کوبنده‌ی خود را بر دهان یاوه‌گویان شرق و غرب بلاخص آمریکای جنایتکار و اسرائیل بچه‌کش فرود آورده‌اند.

و با عرض سلام و درود خدمت ملت قهرمان و همیشه در صحنه‌ی ایران و بیند‌گان عزیزی که هم اکنون از طریق گیرنده‌های خود ما را در هر نقطه و گوشه جهان مشاهده می‌‌کنند.

و نیز با تشکر از ریاست محترم مجلس شورای اسلامی که وقت گرانبهای مجلس را در اختیار اینجانب گذاشته‌اند تا در مورد مشکلات حوزه انتخابیه خود صحبت نمایم.

و اما بعد:

پر می زند مرغ دلم با یاد آذربایجان

خوش باد وقت مردم آزاد آذربایجان

دیریست دور از دامن مهرش مرا افسرده دل

باز ای عزیزان زنده‌ام با یاد آذربایجان

تا باشد آذربایجان پیوند ایران است و بس

این گفت با صوتی رسا فریاد آذربایجان

در بیستون انقلاب از شور شیرین وطن

بس تیشه بر سر کوفته فرهاد آذربایجان

در مکتب عشق وطن جان باختن آموخته

یارب که بوده است از ازل استاد آذربایجان

ضحاکیان مرکزی بیرون برند از حد ستم

تا سر بر آرد کاوه حداد از آذربایجان

خون شد دل آزادگان یارب پس از چندین ستم

کام ستمگر میدهی؟ یا داد آذربایجان

جان داده آذربایجان امداد ایران را و نیست

ایران مداران را سر امداد آذربایجان

بوراداجا اوستاد دفتری‌نین میکروفونون سسی کسیلیب مجلیس باشقانی دانیشماغا باشلادی:

-‌ جناب اوستاد دفتری ده دقیقه وقت شما به اتمام رسید. اینک آقای انبارزاده می‌توانند ده دقیقه در مورد مشکلات حوزه‌ی انتخابیه خود صحبت نمایند...




آچار سؤزلر : ایران, آذربایجان, مسئوللار, دیل, آنادیلی, دؤولت, شئونیزیم,

    بؤلوم: ساتیریک یازی‌لار
گؤروش‌لر : 0
تاريخ : شنبه 28 بهمن 1402 | یازار : دوکتور جئری
+0 به‌ین

یالان دانیشماغین یول یؤندمی

دوکتور جئری

جومعه آخشامی گونو خویلوخانیم گئنه قلئیچی مورتوضون گونونو گؤی اسکی‌یه بوکدو. یازیق کیشی آروادین قاپاز- دانلاق‌لاریندان جانینی قورتارسین دئیه اؤزونو ائودن ائشیگه آتمالی اولدو. ساعات‌لارجا کؤچه‌لرده بوشو بوشونا دولانماغا باشلادی...  ‌دالغین ایدی، آرغین ایدی، آیاق‌لاری دالیجا گلمیردی، ائوه قاییتماق دا ایسته‌میردی. بیردن اؤزونو دده‌لیگی شیخ آغانین قاپیسیندا گؤردو. نسه دوشونوب قاپینی چالدی. دده‌لیگی قاپینی آچیب گولر اوزله اونو ایچری‌یه بویور ائتدی. آنجاق اونون آسیق قاش قاباغینی گؤرونجه یوموشاق-یوموشاق، "اوغلوم بیر شئی‌می اولوب؟"-دئیه سوروشدو. قلئیچی مورتوض ایشسیزلیگیندن، الی‌نین دالی اولدوغوندان، گونده-‌گونده آروادی ایله دعوا-دالاش ائتدیگیندن بول-بول دانیشدیقدان سونرا گؤزلرینی دیک دده‌لیگی‌نین گؤزلرینه تیکه‌رک سوروشدو:

-‌ آغا! سنی آند وئریرم او گؤزل آغازاده‌لریوین جانینا. منه دئگینن آخی سن نئجه بو سکسن نئچه میلیونلوق اؤرت باسدیر ماحالی‌نین خالقینی یالان-پالانلا ایداره ائده بیلیرسن آنجاق من کیچیک بیر عایله‌نی ایداره ائتمکده قالمیشام؟!

بو سؤزلردن شیخ آغا برکدن الینی دیزینه چالیب قاققاناق چکه‌رک گولدو:

-‌ اوغلوم! ائله بیل سن یالان دانیشماغین یول-یؤندمینی بیلمیرسن؟

قلئیچی مورتوض چاشیردی:

-‌ مگر یالان دانیشماغین دا یول-‌یؤندمی وار؟!

شیخ‌ آغا باشی ایله "هه" دئیه‌رک آیدینلیق گتیردی:

-‌ قدیم کیشی‌لر دئییبلر: "یالانین عؤمرو قیرخ گون اولار". یعنی قیرخ گوندن سونرا یالانین اوستو آچیلار. یالانین اوستو آچیلسا دا آدام آبیرسیز اولوب داها کیمسه اونون سؤزلرینه اینانماز. دانیشیلان یالانین اوستو قیرخینجی گونده آچیلماماق اوچون گره‌ک آدام اوتوزدوققوزونجو گون اونو یئنی و البته بؤیوک و شیرین بیر یالانلا اؤرت-باسدیر ائله‌سین. بئله‌لیکله قارشی طرف قاباقکی یالانی اونودوب یئنی یالانلا اؤرگینی خوش ائله‌یه‌جکدیر. البته بو آرادا گره‌ک آدام گونده دانیشدیغی یالان‌لارین حسابینی دا الینده ساخلایا بیلسین...

بو آچیقلامادان قلئیچی مورتوض قاش-قاباغی آچیلدی. اگیلیب شیخ آغانین الینی اؤپمک ایسته‌دیگینده او دئدی:

-‌ اوغلوم! ایندی دور گئت ائوینه، آرواد اوشاغینا موشتلوق وئر،" بایرام قاباغی دده‌لیگم حسابیمیزا اللی میلیون تومن پول تؤکه‌جک". 



آچار سؤزلر : یالانچی, دؤولت, یالان, سیاست, ایقتیصاد, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : چهارشنبه 18 بهمن 1402 | یازار : دوکتور جئری
+0 به‌ین

هارانین کولونو باشیمیزا اله‌یک؟!

دوکتور جئری

دونن آخشام چاغی اوستاد دفتری مطبه گلدی. رنگی ساپ- ساری اولموشدو. "دردین ندیر!" دئیه تختین اوستونده اوتوردوب دامارینی توتماق ایسته‌دیگیمده الینی دالی چکیب دئدی:

-‌ دوکتور! منیم دردیم سئچکی‌لر دردی‌دیر!

بو یانیتدان چاش-باش اولدوغومو گؤرونجه آرتیردی:

-‌ دوکتور اؤزون یاخشی بیلیرسن من بوتون سئچکی‌لره قاتیلان بیر آدامام. ایندییه‌دک اولماییب من بیرجه سئچکینی بئله اولسون الدن وئرمیش اولام. آنجاق ایندی گؤرورم بو سئچکی‌لرین بیزیم احوالیمزدا ترس اثری وار. بیز سئچکی‌لره قاتیلدیقجا وضعیتیمیز دوزلمک یئرینه گونو-گوندن خارابلاشماقدادیر، سانکی بیر باتلاغین ایچینه دوشموش بیر آدام کیمی‌ییک. بو اوزدن من بوندان بئله سئچکی‌لرده شیرکت ائتمه‌یه‌جگم.

باشیملا سؤیله‌دیکلرینی دوغرولاییب دئدیم:

-‌ اوستاد من سیزین بو قرارینیزا سایغی دویورام. سیز ایسته‌دیگینیز کیمی ائده بیلرسینیز آنجاق بو سارالیب - سولمانین سببنی آنلایا بیلمه‌دیم دوغروسو..

اوستاد دفتری بو سؤزلریمی ائشیده‌لی تله‌سیک الینی قولتوق جیبینه سوخوب موبایلینی چیخاردیب بیرآز دوگمه‌لرینی اللـه‌دیکدن سونرا اوزومون قاباغینا توتوب آچیقلادی:

-‌ دونن راست‌گله‌ اینترنتده اوخودوم، نئچه ایل بوندان قاباق اؤلکه‌میزین شیخ‌الشیوخی فتوا وئریب، کیمسه سئچکی‌لرده شیرکت ائله‌مه‌سه یئری کسینلیکله جهنم‌ده‌دیر.

من ماتدیم-ماتدیم موبایلا باخاندا اوستاد دفتری اینیلده‌دی:

-‌ دوکتور ایندی دئییرسن هارانین کولونو باشیمیزا اله‌یک؟! سئچکی‌لره قاتیلساق بو دونیامیز جهنم اولاجاق قاتیماساق او دونیامیز؟!



آچار سؤزلر : ایران, سیاست, مسئوللار, سئچکی,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 15 دی 1402 | یازار : دوکتور جئری
+0 به‌ین

ایت ایتلیگین ترگیتمز!

دوکتور جئری

دونن گون اورتا چاغی اوستاد دفتری قوناغیم ایدی. صؤحبتیمیزین شیرین یئرینده کوچه‌دن خیرداناچی سسی گلدی:

-‌ آی‌‌ی‌ی.. خیرداناچی، چؤرک خیرداناسی آلیریق...

اوستاد دفتری سؤزلرینی یاریمچیق قویدو؛ چاشیقینجا:

-‌ بو سس منه چوخ تانیش گلیرائله بیل-‌دئدی.

اوزونتو ایله باشیمی توولاییب دئدیم:

-‌ دوغرو دئییرسن؛ بو سس اوستاد فرهیخته‌نین سسی‌دیر. بیلمیرم بو ائوی ییخیلمیش «فرهنگستان زبان فارسی»-دا نه پوخ چیخارتمیش اورادان بیله‌سینی ائشیگه اؤتوروبلر. هله اوسته‌لیک « از کجا آوردی؟» دئیه بوتون مال- ﺛروتینی الیندن آلیبلار. ایندی یازیق بئش باش کیفلتینی دولاندیرماق اوچون کوچه‌لره دوشوب آرابا ایله خیردانا چؤرک فیلان آلیر...

اوستاد دفتری آجیماسیزجاسینا گولدو:

-‌ حاقی‌دیر، اورادا اولاندا چوخ آتینی اوینادیردی، قوی ییخیلسین دا جزاسینی گؤرسون!

گئنه کوچه‌دن خیرداناچی- اوستاد فرهیخته‌نین سسی گلدی:

--‌ آی‌‌ی‌ی.. خیرداناچی.. چؤرک خیرداناسی آلیریق، گؤل قورودوروق، دیل دگیشدیریریک، آسیمیلاسیون ائدیریک،قوشون چکیریک، یورد تالاییریق، کیتاب یاندیریریق، ائو ییخیریق، آدام دیدرگین ائدیریک... آی‌ی‌ی.. خیرداناچی...

بو سس-هارایدان چاشیب قالدیق. اوستاد دفتری قیزغین-قیزغین دئدی:

-‌ بو ایتی ائشیگه اؤتورسه‌لر بئله، بو ساده‌لیکده ایتلیگینی ترگیتمه‌یه‌جک!



آچار سؤزلر : شئونیزم, شئونیست, سیاست, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 1 دی 1402 | یازار : دوکتور جئری
+0 به‌ین
شرفلی ایختیلاسچی
دوکتور جئری
   
    گئجه یاریسی  آردی کسیلمه‌ین تلفون زنگیندن یوخودان داشلاندیم. آرایان باجاناغیم  قلئیچی مورتوض ایدی. « الیم اتگَن دوکتور! هاراداسان اؤزونو یئتیر؛ دده‌لیگم پاتلایاجاق!»-دئیه  آغلاییب سیزلاماغا باشلادی. تئز جانتامی گؤتوروب اؤزومو شیخ آغانین بئیتینه چاتدیردیم. شیخ آغا ناغارا کیمی شیشمیشدی. نییه بئله دوروما دوشدوگونو سوروشونجا باجاناغیم دیل دوداغینی چئینیه- چئینیه دئدی:
-‌ دده‌لیگیم بیرآز لَلویونلوک ائله‌ییب چیلله‌لیگه ایکی کیلو حالوا، بیرکیلو آجیل،  اوستوندن ده یئکه بیر قارپیز یئدی...
اگیلیب شیخ آغانین آغزینی ایگله‌دیم. آغزیندان متان گازی قوخوسو گلیردی.
 دورومو بئله گؤرونجه باجاناغیما سسلندیم:
-‌ شیخ آغانین قولتوغونا گیر. اونو همن خسته‌خانایا یئتیرملی‌ییک.
باجاناغیم  اوزگونجه قاپینی گؤستریب سیزیلدادی:
-‌ دده‌لیگیم قاپیدان گئچمز!
تزه دورومون نه قدر وخیم اولدوغونو اؤیرندیم.
-‌ آغانی اوزوقویلو چئویریب تومانینی آشاغی چک؛ تنقیه ائله‌ملی‌یم-دئیه قیشقیردیم.
باجاناغیم باشینی آشاغی سالاراق:
-‌ سن گلمه‌میشدن بیر ایکی یول ائله‌دیم! فایداسی یوخدوردوکتور!- دئیه یانیت وئردی.
دوشونجه‌یه دالدیغیمی گؤرن باجاناغیم دئدی:
-‌ اولماز دده‌لیگیمین قارنینی نئشترله‌یه‌سن گازی چیخسین؟!
-‌ اولماز.. مومکوندور پاتلایا منطقه‌نی اودا چکه- دئدیم.
بیردن بیره بیر شئی فیکریمه چاتدی. تلفونومو چیخاردیب دوکتور آغازاده‌نی آرادیم. یاریم ساﻋات سونرا دوکتور آغازاده شیخ آغانین باشی اوسته ایدی. اولان بیتن‌لری قیسجا آغازاده‌یه آنلادینجا بیردن بیره اوتاغین چیراغی سؤندو. یاریم دقیقه ایچینده گئنه چیراغ یاندی. گؤزلریمیزه اینانا بیلمه‌دیک. شیخ آغانین شیشی یاتیب گؤبگی بئلینه یاپیشمیشدی، دوکتور آغازاده ایسه آرادان یوخ اولموشدو!
باجاناغیم قلئیچی مورتوض چاشقین- چاشقین سوروشدو:
-‌ شیش نئجه اولدو؟! دوکتور آغازاده هارایا گئتدی؟!
راحات بیر سولوق آلدیقدان سونرا دئدیم:
-‌ دوکتور آغازاده بیزیم نفت و گاز شیرکتینده چالیشان شرفلی ایشله‌ین‌لردن بیری‌دیر؛ ائله ایختیلاس ائله‌یر سو سودان ترپنمز!



آچار سؤزلر : ایقتیصاد, ایختیلاس, اوغورلوق, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 24 آذر 1402 | یازار : دوکتور جئری
+0 به‌ین
اولماسا بونو دا بیر سؤز ائله‌یین!
دوکتور جئری
آدامین آللاهی وار! بیزیم اؤرت باسدیر ماحالی شیخ آغاسی‌نین سون بئشیک اوغلو چوخ یاخشی و دوزگون بیر اینساندیر. بوتون آغازاده‌لردن فرقلی اولاراق پوللو دؤولتی پوستلاردا چالیشمیر‌ (اینانیلان دئییلن‌لره گؤره یارانه‌سی ایله گئچینیر)؛ رانت ، پارتبازلیق ایله آراسی یوخدور؛ تظاهورات‌لاردا همیشه صفین اوّلینده دوشمن‌لرین آغزینا یومروق وورار؛ جوما نامازلاریندا یئری) ایلک جرگه‌ده‌دیر؛ نامازلارینی جاماﻋاتلا قیلار؛ خئیریه ایشلره قاباقجیلیق ائدر و سایر... 
آنجاق نئجه دئیرلر خالقین آغزینی باغلاماق اولماز. ایشی- پئشه‌سی اولمایان خالق گونده بو یازیغین دالیجا مین بیر سؤز چیخاردیر. بیرگون دئییرلر شهرین گؤبگینده اولان او یئددی قاتلی آپارتیمانین پولونو هارادان گتیریب؟! او بیری گون دئییرلر قند-چای ایختیلاسیندا بونون دا الی وار! و سایر...
گئچن جوما آخشامی، گئجه یاریسی قلئیچی مورتوضون باشچیلیق ائتدیگی جرجیس مچیدی‌نین پایگاهینا راپورت گلدی؛ ترس آوانین یوخاری باشیندا غئیری رسمی ﻋیفاف ائوی چالیشماقدادیر. قلئیچی مورتوض همن امکداش‌لاری ایله بیرگه دئییلن ائوه باسقین ائتدیلر آنجاق ائوین دال قاپیسینی آچیق گؤرونجه کیمی‌لری‌نین قاچدیغینی آنلادیلار. قلئیچی مورتوض قاپیدان ائشیگه بویلانینجا قارانلیقدا بیری‌نین یئهین-یئهین یورودوغونو گؤردو. توواراق اؤزونو اونا چاتدیردی. ال چیراغی‌نین ایشیغینی طرفین اوزونه سالدی. آدام شیخ آغانین سون بئشیگی ایدی. «گئجه‌نین بو واختیندا هارا بئله آغا؟» دئیه قلئیچی مورتوض سوروشدو. سون بئشیک اؤفکه‌ ایله، «کورسان، گؤرمورسن پیاده روی ائله‌ییرم؟» دئدی. بوکز قلئیچی مورتوض ال چیراغی‌نین ایشغینی سون بئشیگین  آلت اگنینه سالدی. سون بئشیک گوللو- گوللو بیر قادین تومانی گئیمیشدی. قلئیچی مورتوض هیرنادی:
-‌ آغا بو نه‌دیر؟!
سون بئشیک آلت اگینه باخیب برکدن هیرسلندی:
-‌‌  نه اولاجاق شالواردیر دا.. اولماسا بونو دا بیر سؤز ائله‌یین!!



آچار سؤزلر : مسئوللار, پول, ایختیلاس, اوغورلوق, یارانه, ایقتیصاد,

    بؤلوم: حیكایه و گولمه‌جه‌لر
گؤروش‌لر : 0
تاريخ : یکشنبه 12 آذر 1402 | یازار : دوکتور جئری
+0 به‌ین
بومبا کیمی
دوکتور جئری
   اؤرت باسدیر ماحالی‌نین مؤعتبر شیخ آغاسی گئچن آی گئنه آروادینی یئنی‌له‌دی. توی گئجه‌سی‌نین ائرته‌سی، سحر یوخودان قالخدیقدا، گرنشیب ساغ-‌سول اوچ-دؤرد یوموروق دؤشونه تاپدادیقدان سونرا باش بارماغی ایله اؤزونو گؤستره‌ک یئنی آروادینا دئدی:
-‌ بو دوخسان کیلولوق بیر دینامیت‌دیر؛ ایسته‌سه اسرائیل سهل‌دیر اورتادوغونو بئله اودا چکه بیلر!
یئنی آرواد آشاغیدان یوخاری‌یا شیخ آغانی سوزه‌رک فیسیلدادی:
-‌ دوخسان کیلولوق بیر دینامیت‌دیر آمما حاییف پیلته‌سی تکجه بئش سانتیم‌دیر!



آچار سؤزلر : مسئوللار, سیاست,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 1 مهر 1402 | یازار : دوکتور جئری
+0 به‌ین

نییه تحریم‌لرین اثری یوخدور؟!

دوکتور جئری

او گئجه اؤرت باسدیر ماحالی  شیخ آغاسی‌نین کئفی ساز ایدی. آخشام اوستو مساژ گلمیشدی؛ مملکندین بولوکه اولموش پوللاری‌نین بیر قیسمی آزاد اولوب. کؤنلو بیرآز آروادی چوپور مصمه ایله دیلخوشلوق ائله‌مک ایسته‌دی. یورغانین آلتیندا الینی اوزادیب مصمه‌نی قیدیقلاماغا باشلادی آنجاق آرواد اؤفکه ایله دالینی شیخ آغایا چئویره‌رک دئیینمگه باشلادی:

-‌ نئچه آیدیر دئییرم؛ منه بیر پالتار یویان ماشینی آل، اللریم پار-پالتارینی یوماقدان قاریدی،آمما سن هردؤنه اؤزونو ائشیمزلیگه وورورسان.

شیخ آغا آروادی یوشوتماق اوچون اونون ساچلارینی تومالایا-‌تومارلایا دئدی:

-‌ اؤزون مندن یاخشی بیلیرسن مملکندیمیز زیرپی دوشمن طرفیندن تحریمده‌دیر. کیمسه بیزیمله آلیش-وئریش ائتمیر، ائتسه ده پولونو آلا بیلمیریک. اینشاالله تحریم‌لر گؤتورولونجه سنه بیر پالتار یویان ماشینی، هله اوسته‌لیک بیردنه ده قاب-قاشیق یویان ماشینی  آلاجاغام.

چوپور مصمه  شیخ آغا طرف دؤندو:

-‌ نییه او تزه آزاد اولموش پوللاردان آلمیرسان؟!

-‌ هانسی پول؟ پول-مولوموز آزاد اولماییب.

-‌ اؤزونو او یولا وورما آغا، بایاق آیاق یولونا گئدنده موبایلینی گؤتوروب اؤزوم مساژی اوخودوم.

شیخ آغا اؤزونو ایتیرمه‌دی:

-‌ هه! او پولو دئییرسن، باخ دده‌مین روحو حاققی اوپولو شیخ نصراللها وئره‌جگم؛ اونا بورجلویام. اینشالله قالسین گلن دفعه‌یه..

بو جاوابدان چوپور مصمه هیرسلنیب  گئنه دالینی شیخ آغایا چئویریب:

-‌ بئله ایسه، پالتار یویان ماشینی آلانا قدر من ده سنی تحریم ائله‌ییرم.

 سونرا الی ایله شاپ-شاپ قاسیغینا تاپدایاراق هده‌له‌دی:‌

-‌ داها بوندان سونرا بوندان خبر یوخدور.

بو سؤزلردن شیخ آغا قاققاناق چکیب بیج-بیج گولدو:

-‌ سنین تحریم‌لری‌نین اثری یوخدور!

چوپور مصمه چاشقینجا- نییه؟!- دئیه سوروشدو.

-‌ چونکو هر طرفه دؤنسن بیر دلیگین منه طرفدیر!




آچار سؤزلر : پول, مسئوللار, تحریم‌, تحریم‌لر, ایقتیصاد, سیاست,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 20 خرداد 1402 | یازار : دوکتور جئری
+0 به‌ین


شیخ آغانین چوروک ایپی

دوکتور جئری

اوچ گنج اوغلان اؤرت باسدیر ماحالی‌ شیخ آغاسینا اهانت سوچوندان اعدام ائدیله‌جک ایدی. اعدام مراسیمینده ، زیندان رئیسی اوزونو اونلارا توتوب دئدی:

-‌  محکمه‌ده آنلاییش گؤستریب سوچلارینیزی راحاتلیقلا بوینونوزا آلیب غوغا چیخارتمادیغینیز اوچون شیخ آغامیز دا لوطف ائدیب سیزی اعدام وسیله‌سی‌نین سئچمه‌سینده سربست بوراخیب.

زیندان رئیسی‌نین سؤزلری بیتر-بیتمز بیرینجی گنج بیر آددیم قاباغا قویوب دئدی:

-‌ من اوشاقلیقدا هاوادا یئللنمکدن خوشوم گلردی، سیزدن ریجا ائدیرم منی دارا چکین!

ایکی مأمور گنج اوغلانین قولتوق‌لارینا گیریب اونو دار آغاجینا آپاردیلار. آنجاق دارا چکلیلنده ایپ قیریلیب اوغلان یئره دوشدو.

اوغلان اینگیلده‌یه-اینگیلده‌یه آیاغا قالخیجا زیندان رئیسی گوله-گوله دئدی:

-‌ ماحالیمیزین یاسالارینا گؤره، دارا چکیلمه سیراسیندا اعدام اولونانین ایپی قیریلسا او آزاد ائدیلمه‌لی‌دیر. بو اوزدن سیز آزادسینیز.

بو خبری ائشیدن ایکینجی گنج سئوینجک قاباغا آتیلدی:

-‌ جناب رئیس منی ده دارا چکین!

ایکینجی گنج ده دارا چکیلنده ایپ قیریلیب  اعدام جزاسیندان قورتولدو. سیرا اوچونجو گنج اوغلانا گلینجه  او درین بیر دوشونجه‌یه دالدیقدان سونرا دئدی:

-‌ مادام‌کی شیخ آغانین ایپلری بوقدر چوروکدور، منی گوللةله‌یین!



آچار سؤزلر : اعدام, مسئوللار, عدالت,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 12 فروردین 1402 | یازار : دوکتور جئری
+0 به‌ین


شیخ آغانین عؤمرو

دوکتور جئری

بایرام قاباغی شیخ آغانین آروادی چوپور مصمه ایکی آیاغینی بیر باشماغا سوخاراق ارینه دئدی:

-‌ بایرام سوفره‌سی اوچون گره‌ک قیرمیزی بالیق آلاسان.

شیخ آغا نه قدر بئله دبلرین خورافات اولدوغونا حدیث-روایت گتیرسه ده چوپور مصمه‌نین بئینیه باتماییب قاش-قاباغینی ساللایاراق اونو تحریمات ائله‌جگی ایله هده‌له‌دی.

چاره‌سیز قالان شیخ آغا آخشام باشی مچیددن قاییداندا خیابان قیراغیندان قیرمیزی بالیقلا یاناشی بیردنه ده بالاجا تیسباغا آلدی.

آروادی تیسباغی گؤردوکده چاشیردی:

-‌ آغا! بو حئیوان نمنه‌دیر آلمیسان سنکی دئییردین بو ایشلر خورافه‌دیر؟!

شیخ آغا فیلوسوفجاسینا باش بارماغی ایله ساققالینی قاشییاراق بیر قاشینی یوخاری آتیب دئدی:

-‌ ائشیمیشم تیسباغالار اوچ یوز ایل عؤمر ائله‌یر؛ ایسته‌ییرم گؤروم بوسؤز دوغرودور یا یالان!



آچار سؤزلر : مسئوللار, سیاست, یالان, میلت, تحریم,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 26 اسفند 1401 | یازار : دوکتور جئری
+0 به‌ین

سن ده موللایا وئرمیسن؟!

دوکتور جئری

باشدان دئملی‌یم اوخودوغونوز بو یازی، کندیمیزده باش وئرن گئرچک بیر اولایدان قایناقلانیب و من بیر شئی آرتیریب-‌اسکیتمه‌دن احوالاتی اولدوغو کیمی قیساجا آنلاتماغا چالیشاجاغام.

بیزیم کندیمیز باغلی-باغاتلی بیر یئردیر و اهالی‌نین باشلیجا گئچینه‌جگی ائله بو باغلاردان تأمین اولور. آللاهین حول و قوه‌سی ایله، بیلدیر بیر یاندان باغلارین یاخشی میوه وئردیگیندن، بیر یاندان دا میوه‌نین یاخشی پولا گئتدیگیندن، اوزون ایللیک سیخینتیدان سونرا کند اهالیسی‌نین اوزو گولوب یاخشی گلیر الده ائده بیلدیلر. کسینلیکله دئیه بیله‌رم ان کیچک باغچیمیز بئله، بیلدیر ایکی-اوچ یوز میلیون تومن میوه ساتا بیلمیشدی. بورایاجان هر شئی یاخشی ایدی. کندین قیافتی یاواش-یاواش دگیشمکده ایدی. کیمی ائو-ائشیگینه خرج قویور، کیمی ائو-اوشاغی‌نین پال-‌پالتارینی تزه‌لیر، کیمی ایسه یئنی موتور-ماشین آلیردی. هر شئی یولوندا گئدیرکن بیر گون کندین موللاسی آخشام چاغی اهالینی مچیده چاغیردی. یاریم ساعات آللاه-یئیغمبردن دانیشاندان سونرا اساس مؤوضویا گئچیب بیلدیردی، قوم شهرینده  بؤیوک بیر شیرکت آچیب و اهالیدن ایسته‌دی بو شیرکتده سرمایه‌گذارلیق ائله‌مکله، هر یوز میلیون تومنه آیدا بئش میلیون تومن خالیص قازانج و یا همان سود آلا بیلرلر. بو وعده ایله جاماعات آراسیندا ولوله دوشدو. کیمی‌لری آیدان-آیا کارمندلر کیمی حوقوق آلاجاقلاری‌نین سئوینجینی یاشادیلار، کیمی‌لری ایسه بیر ایلده پوللاری‌نین نه قدر آرتاجاغینی حسابلادیلار. ائرته‌سی گوندن موللا، کندین مچیدینده دفتر-دستک آچاراق اهالی‌نین پوللارینی چک-سوفته قارشیلیغیندا توپلاماغا باشلادی. گئرچکدن ده موللانین شیرکتینده سرمایه یاتیردان‌لار، اوچ-دؤرد آیاجان وعده وئریلن سودو ‌تام آی باشیندا حساب‌لاریندا گؤروردورلر. بو خوش‌حسابلیق  قونشو کندلرده اولان اهالینی ده موللانین شیرکتینه سرمایه یاتیرماغا تشویق ائدیردی.

اوچ آی اؤنجه، بیردن بیره حساب‌لارا تؤکولن سودلارین قاباغی کسیلدی. بؤلگه‌ده چاو دوشدو مولانین شیرکتی سینقین چیخیب. موللانین آرا-بره‌ده گؤرونمه‌مه‌سی بو شاییعه‌نی بیرجوره تصدیق‌له‌ییردی. کند تالواسا ایچینده ایدی. شیرکتده میلیاردلیق سرمایه یاتیردان‌لاردان بیر نئچه‌سی شهرده وکیل یانینا گئدیب مؤوضو حاقیندا و نئجه شیکایت ائله‌جکلری باره‌ده مشورت ائله‌دیلر. وکیلین فیکرینجه، شیرکت سینقین چیخمیشسا و موللا دؤولتدن سینقینلیق بلگه‌سی آلمیشا دئمک اولار سرمایه یاتیردان‌لارین پوللاری باتمیش ساییلیر! کندلی‌لرین بیری دئدی: بیز شیرکت-میرکت تانیمیریق بیز پوللاریمیزی موللایا وئرمیشیک و پوللاریمیزی اوندان ایسته‌ییریک. وکیل بیرآز دوشونوب آرتیردی: سیز پوللاریزی موللایا وئریب آیدان آیا اوندان سود آلمیشسانیز بو ریبادیر و دؤولتین بوندان خبری اولسا سیزی توتوب ریبالی پول وئرمک سوچو ایله زیندانا باسا بیلر. بو خبر کندده یاییلینجا اهالی‌نین ایکی الی اولدو بیر باشی...

کندیمیزده عوض آدلی بیر قوجا کیشی وار. بیر تصادوف قضاسیندا فلج اولاراق اوتوراق اولوب. اوغلان‌لاری گونونو گئچیرسین دئیه اونو سحر چاغی گتیریب کندین قهوه‌خاناسی‌نین قاباغینا قویوب آخشام گلیب آپارارلار. عوض قهوه‌خانایا گلن‌لرین هانگیسی‌نین قیافه‌سینی پوزغون گؤرورسه یانینا چاغیریب قولاغینا پیچیلداییر:

-‌ سن ده موللایا وئرمیسن؟!



آچار سؤزلر : معیشت, دؤولت, ایقتیصاد, مسئوللار, پول, میلّت,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 19 اسفند 1401 | یازار : دوکتور جئری
+0 به‌ین

نییه بیزیم مسئول‌لاری قونشو اؤلکه لر داها چوخ بگنیرلر؟

دوکتور جئری

ایکی اوشاق صؤحبت‌لشمکده ایدیلر.

بیرینجی اوشاق:

-‌ منیم  مامام سنین ماماندان یاخشی‌دیر.

ایکینجی اوشاق باشی ایله تصدیقله‌دی:

-‌ دوغرو دئییرسن، بونو بابام دا دئییر!



آچار سؤزلر : مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 13 اسفند 1401 | یازار : دوکتور جئری
+0 به‌ین

قان یئره تؤکولمه‌سین دئیه..

دوکتور جئری

اورت باسدیر ماحالی‌نین خاریجه ایشلر وزیری یابانجی خبر آژانس‌لاری‌نین بیری ایله موصاحیبه‌ده دئدی:

-‌ بیز ایش باشینا گلندن بری، اؤلکه‌ده قان تؤکمکله همیشه مخالیفتده اولموشدوق. حتی سیزی آرخایین ائله‌یه بیله‌رم خاریجه قووه‌لرین تحریکی ایله اؤلکه تؤره‌نن اوزون سورون ایغیشاش‌لاردا  کیسمه‌نین بورنوندان بیر دامجی قان بئله تؤکولمه‌دی.

موخبیر دانشیغی کسدی:‌

-‌ آنجاق سیز اؤزونوز اعلان ائتمیشدینیز ایغتیشاش‌لاردا نئچه نفری اعدام ائله‌مسینیز!

خاریجه ایشلر وزیری گولومسوندو:

-‌ بیز اؤلکه‌ده قان یئره تؤکولمه‌سین دئیه اعدامی‌لاری دارا چکیریک!

 



آچار سؤزلر : سیاست, ایستیبداد, آزادلیق, میلت, مسئوللار,

    بؤلوم: آجی گولوش‌لر
گؤروش‌لر : 0
تاريخ : جمعه 5 اسفند 1401 | یازار : دوکتور جئری
+0 به‌ین

آیدین هارادادیر؟

دوکتور جئری

اوزون سورن ایغتیشاش‌لار باسدیریلیقدا، اؤرت باسدیر ماحالی‌نین شیخ آغاسی گنجلرله گؤروشوب یاخیندان فیکیر-دوشونجه‌لری ایله تانیش اولماق آماجی ایله باش کندین یوکسک اوخول‌لاری‌نین  بیرینه گئتدی.  اون ایکینجی کلاسدا بیر روبع ‌یابانجی دوشمن‌لرین مملکند امنیتینی پوزماق اوچون حیاتا گئچیرتدیکلری قورغولاردان دانیشاندان سونرا اؤیرنجی‌لره دؤندو:

-‌ ایندی کیمسه‌نین سورغو-سوالی وارسا سوروشا بیلر.

اؤن سیرادا اوتوران اؤیرنجی‌لردن بیری آیاغا قالخدی:

-‌ آغا‍! منیم بیر سورغوم وار.

شیخ آغا گولومسه‌دی:

-‌ قاباقجا اؤزوزو تانیتدیرین سونرا سوروغوزو سورشون.

اؤیرنجی سایغی ایله باش اگیب دئدی:

-‌ من آیدین دفتری‌یم. سوروشا بیلرم:

دوغرودور، سیزدن تنقیدائله‌ین‌لری یوخا چیخاردیرلار؟

اؤیرنجی‌نین سورغوسو بیتر-بیتمز تنفوس زنگی چالیندی. شیخ آغا اؤیرنجی‌لره:

-‌ تنفوسدن سونرا سورغولاریزی جاوابلاندیراجاغام-دئییب کلاسدان چیخدی.

***

تنفوس بیتیب اؤیرنجی‌لر کلاسا قاییتدیقدان سونرا شیخ آغا گلدی:

-‌ هارادا قالمیشدیق؟ هه! سوروغولاردایدیق. کیمسه‌نین سورغوسو وارمی؟

باشقا بیر اؤیرنجی بارماغین قالدیردی:

-‌ آغا! منیم اوچ دنه سورغوم وار.

-‌ اؤزونو تانیتدیردیقدان سونرا سورغولارینی سوروشا بیلرسن-دئدی شیخ آغا.

-‌ آدیم ضیا دوامچی‌دیر.

سورغولارا گلدیکده:

1-   دوغرودور، سیزدن تنقید ائله‌ین‌لری یوخا چیخاردیرلار؟

2-   نییه تنفوس زنگی ییرمی دقیقه تئز چالیندی؟

3-    آیدین هارادادیر؟

 



آچار سؤزلر : ایستیبداد, مسئوللار, آزادلیق, میلت, دؤولت, سیاست,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 28 بهمن 1401 | یازار : دوکتور جئری
+0 به‌ین

یاشاسین ایستیبداد

دوکتور جئری

بیزی تک-تک، جوت-جوت  گتیریب او دونقوز دامینا باسمیشدیلار. هاواسی روطوبتلی ایدی. هر کس نفس چکمکده چتینلیک چکیردی. هره دینمز- سؤیله‌مز بیر قیراغا چکیلمیشدی. من ده باشیمی دیوارا دایاییب یاواش-یاواش چئوره‌یه گؤز گزدیریردیم. دئمک اولار، توتوقلولارین هامیسی گنج ایدیلر. دینج اوتورسالار دا اوزلرینده بیر چئشید قایغینلیق اوخونوردو. بیردن گنجلرین آراسیندا باخیشلاریم بیری‌نین اوزه‌رینده دوندو. اورتا یاشلی بیر کیشی ایدی. دنیز کیمی چالخالانیردی. اللرینی اؤوکه‌له‌ییر هردن برکدن دیزینه تاپدایییب دوداق آلتی نسه دئییردی. بیری اونا تسکین‌لیک وئرمه‌سه، سکته ائله‌یه‌جک دئیه دوشوندوم. یئریمدن قالخاراق گئدیب قارشیسیندا اوتوردوم. یاواشجا اللریندن توتاراق یوموشاقجا سیخدیم:

-‌ قورخما، بیز هامیمیز بیرلیکده‌ییک!

اللرینی الیمدن چکیب گؤتو-گؤتو گئری چکیله‌رک دیوارا یاپیشدی:

-‌ منی اؤزوزه قاتمایین، من سیزلردن دئییلم،من حؤکومتدن یانایام. منی یانلیشجا توتوب بورایا گتیریبلر.

آرامجا دئدیم:

-‌ تامام..تامام.. بئله ایسه نییه بو قدر تلاشلانیرسان؟ فیشارین قالخار الینه ایش وئرسن ها! هله دئ گؤروم نئجه اولدو یاخالاندین؟

سؤزلریمدن کیشی چالخانتیدان دوشموش کیمی اولدو.اوزونتو ایله سؤزه باشلادی:

-‌ بیلیرسن جناب! دده‌م وصیت ائله‌ییب؛ هر کیم ائششک اولسا سن ده اونون پالانی اول. دوزونو ایسته‌سن بیز ائله آتا-بابادان حؤکومت‌لرین طرفینده اولموشوق. ایغتیشاشدان-میغتیشادان دا خوشوموز گلمز. آخشام اوستو ایشدن قاییردیردیم. اوتوبوسدان یئننده بیردن اؤزومو بیر سورو بوش بئیین گنجین ایچینده گؤردوم. یاشاسین آزادلیق، محو اولسون ایستیبداد کیمی آخماقجا شوعارلار وئریردیلر. تئز اؤزومو  اونلارین آراسیندان چیخارتماغا چالیشدیم آنجاق بیردن یئردن-گؤیدن مأمورلار قارغا-قجیر کیمی تؤکولوشوب  قاباغا گلنی دگنکله ووروب توتوقلاماغا باشلادیلار. بیر تهر قالابالیق ایچیندن چیخیب قاچماغا اوز توتدوم. آنجاق ایکی مأمور دالیمجا دوشدولر. مأمورلارا ایغیشاشچی‌لاردان اولمادیغیمی بیلدیرمک اوچون قاچا-قاچا قیشقیریردیم: یاشاسین ایستیبداد ، محو اولسون آزادلیق، ساغ اولسون دیکتاتور. آنجاق بیلمیرم نییه مأمورلار آردیمی بوراخماییب منی توتونجا آتدیلار کوتگین آلتینا؟!



آچار سؤزلر : سیاست, ایستیبداد, آزادلیق, مسئوللار,

    بؤلوم: حیكایه و گولمه‌جه‌لر
یارپاق‌لار: [1] [2] [3] [4] [5] [6] [..] [8]
آرشیو
سون یازی‌لار
یولداش‌لار
سایغاج
ایندی بلاقدا : نفر
بوگونون گؤروشو : نفر
دونه‌نین گؤروشو : نفر
بوتون گؤروش‌لر : نفر
بو آیین گؤروشو : نفر
باخیش‌لار :
یازی‌لار :
یئنیلنمه چاغی :