دوکتور جئری
ساتاشما ادبیاتی
گؤروش‌لر : 0
تاريخ : شنبه 5 آذر 1401 | یازار : دوکتور جئری
+0 به‌ین

هارادان گتیرمیسن؟

دوکتور جئری

شیخ آغانین اوغوللوغو قلئیچی مورتوض ترس آوانین ان وارلی و سرمایه‌دار آدام‌لاریندان بیری‌ ساییلیر. سانمایین او وار-دؤولتینی دیگر آغازاده‌لر کیمی رانت یولو ویا ایختیلاس ایله الده ائدیب. یوخ.. یوخ او اصلاً بئله آدام دئییل. حتی مومکوندور اینانمایاسیز او ایندییه‌دک  دؤولتی اورقان‌لارلا هئچ چئشید علاقه‌ده اولماییب. سوروشورسوز: بئله ایسه اونون ثروتی‌نین منشایی نمنه‌دیر؟ عرض ائله‌ییم خیدمتیزه بیزیم بو قلئیچی مورتوض ایش دونیاسینا قالایچی‌‌لیقلا گیریب سونرا میس قاب-قاشیق سیردان چیخینجا موختلیف  مسلک-پئشه‌لری بیر-بیر سیناماغا باشلاییب. اؤرنک اوچون: خیابان‌لاردان آشغال توپلاییب، یئرآلما سوغان ساتیب، اوزرلیک سالیب، تاناکورا پالتاری ایدخال ائله‌ییب ، عفاف ائوی آچیب، آمریکانین آغزینا یومروق ووروب، ترمینال و پاساژلارین قاباغیندا چیغیریب و سایر. آنجاق او بو وار-دؤولتینی بو سایدیغیمیز قوللوق‌لارلا الده ائتمه‌ییب. او ثروتینی ایکی- اوچ ایلدیر باشلایان تیجارتله قازانیب. مومکوندور یئنه اینانمایاسیز او بو نئچه ایلده بوتون آل-وئرلرینده قازانجلی چیخیب حتی مین تومن بئله اولسون زیان ائله‌مه‌ییب...

 گئچن‌لرده بیر قوناقلیقدا اونا یاناشیب اویان-بویاندان بیرآز دانیشاندان سونرا بیله‌سیندن سوروشدوم:

-‌ مورتوض قارداش! دئیه بیلرسن سیرری-رمزی نمنه‌دیر سن بو تیجارتده همیشه کارلی چیخیب هئچ واخت زیان ائله‌میرسن؟!

گولومسه‌ییب دئدی:

-‌ چوخ ساده‌دیر! من هر کیم ایله آلیش-وئریش ائله‌ییرم پولونو گئری قایتارمیرام.



آچار سؤزلر : قلئیچی مورتوض, ایش, پول, ایختیلاس, مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 28 آبان 1401 | یازار : دوکتور جئری
+0 به‌ین

یئل

دوکتور جئری

اؤرت باسدیر ماحالی‌نین شیخ آغاسی سحر اویاندیقدا ائشیکدن بورنونا هیس قوخوسو گلیردی. اوغوللوغو قلئیچی مورتوضو یانینا چاغیریب قوخونون منشأینی سوروشدو. قلئیچی مورتوض بیرآز دیل-دوداغینی چئینه‌دیکدن سونرا دئدی:

-‌ بو قوخو سیراغا گون اسن یئل اوزوندن‌دیر..

شیخ آغا چاشیردی:

-‌ بوگونون قوخوسو نه علاقه‌سی وار سیراغا گونون یئلی ایله؟!

قلئیچی مورتوض آلتدان-آلتدان باخدی:

-‌ سیراغا گونو بازاردا دولانیردیم. برکدن یئل اسیردی. بیردن گؤردوم بیر خانیم  کشف-‌حیجاب ائله‌ییب باشی آچیق دولانیر. ایسلام خطره دوشمه‌سین دئیه تئز گئدیب اونو امر به معروف ائله‌مک ایسته‌دیم. آنجاق خانیم اوتانمازجاسینا دئدی اسن یئل یایلیغیمی آپاردی.

شیخ آغا تلسدی:

-‌ سن نئیله‌دین؟

قلئیچی مورتوض دوداق‌لارینی بوزوشدوردو:

-‌ هئچ.. من یالاشدان باتوملا باشیندان ووردوم آنجاق او دوغوشدان دوشوب سکته ائله‌دی.

شیخ آغا تدیرگین اولدو:

-‌ سونرا نه اولدو؟

-‌ هئچ زاد اولمادی. خالق ییغیشیب جنازه‌نی آمبولانسا قویدوقدان سونرا چوخ آرام داغیلیشدیلار.

شیخ آغا راحات بیر نفس چکیب یئنه سوروشدو:

-‌ هله دئمه‌دین بو قوخونون نه علاقه‌سی وار او یئل ایله؟!

قلئیچی مورتوض باشینی آشاغی سالیب فیسیلدادی:

-‌ او یئلین اوزوندن بوگون خالق قاپیمیزی یاندیریب ایچری گیرمک ایسته‌ییر..



آچار سؤزلر : مسئوللار, قادین, قلئیچی مورتوض,

    بؤلوم: آجی گولوش‌لر
گؤروش‌لر : 0
تاريخ : شنبه 23 مهر 1401 | یازار : دوکتور جئری
+0 به‌ین

چیغیر-باغیرین زیانی

دوکتور جئری

ارشدین دوکانی‌نین قاباغی قالابالیق ایدی. جاماعات باساباس ائله‌ییب هرکس دیگرینی ایته‌له‌یرک قاباغا گئچمگه تله‌سیردی. چیغیر-باغیر، یامان-یوووز سسی عرشه دایانمیشدی. هارادانسا قلئیچی مورتوض تاپلیب گلدی. نیگران-نیگران جاماعاتا باخدی. کیمسه‌نی آختاریر کیمی ایدی. قالابالیغین ایچینده اوستاد دفترینی گؤرونجه اونا یاناشیب سسی چاتسین دئیه قیشقیردی:

-‌ نه خبردیر؟ جاماعات نییه چیغیر-باغیر سالیب؟

اوستاد دفتری جاوابدا هارای تپدی:

-‌ ارشد قیرخ سککیز مین تومنه تعاوونی تویوق وئریر. بازاردا کیلوسو آلتمیش مین تومن‌دیر. بونا گؤره میلّت چیغیر-باغیر سالیب.

قلئیچی مورتوض یئنه سوروشدو:

-‌ بو چیغیر-باغیرلارین، یامان-یوووزلارین دده‌لیگیم شیخ‌آغانین تزگاهینا زیانی یوخدور کی؟!

اوستاد دفتری سسلندی:

-‌ یو.. هئچ زیانی یوخدور!

قلئیجی مورتوضون نیگرانلیغی گئتدی:

-‌ بئله ایسه قوی نه قدر چیغیر-باغیر سالیرلار سالسینلار.



آچار سؤزلر : مسئوللار, ایقتیصاد, باهالیق, قلئیچی مورتوض, دؤولت, میلت,

    بؤلوم: حیكایه و گولمه‌جه‌لر
گؤروش‌لر : 0
تاريخ : یکشنبه 3 مهر 1401 | یازار : دوکتور جئری
+0 به‌ین

ایسلامی یاشماق

دوکتور جئری

قلئیچی مورتوضون خوُیسوز خانیم آدلی بیر بالدیزی وار. ننه‌م- باجیم اولسون او چوخ گؤزل و یاخشی بیر قادیندیر. آنجاق هر گؤزلین بیر عیبی اولدوغو کیمی اونون دا بیرجه عیبی‌ بودورکی، بازارا چیخاندا بزه‌نیب-دوزه‌نیر، ککیل‌لرینی ائشیگه قویور و بیرآز دا دار و رنگلی پالتارلار گئییر.  ائشیتدیگیمه گؤره قلئیچی مورتوض دفعه‌لرجه اونون بو گئیینیش-گئدیشاتیندان تنقید ائده‌رک، « بیز مؤعتبر دده‌لیگیم شیخ آغانین یاخین فامئل‌لری ساییلیریق یاخشی دئییل سن بو قیافتله اونو و بیزیم آبیریمیزی تهلوکه‌یه سالاسان»  دئسه ده خوُیسوز خانیمین بئینیه باتماییب کی باتماییب.

کئچن گون بازاردا دولاناندا شانسدان خوُیسوز خانیملا قارشی‌لاشدیم. اؤنجه اونو تانیمادیم. ککیل‌لرینی ایچری قویموش، گئن-‌بول بیر قارا مانتو گئیمیشدی. اوز-گؤزونو ده هئچ بزه‌مه‌ییب کلاسیک فیلم‌لر کیمی سیاه-سفید ایدی. اؤز-اؤزومه دئدیم، ˝یقین قلئیچی مورتوضون بونجا ایل اؤیود-نصحیت‌لری اؤز تأثیرینی باغیشلاییب خوُیسوز خانیم ایسلامی یاشماغی اویغون گؤروبدور˝. آخشامی کوچه باشیندا قلئیچی مورتوض چؤرک‌خیرداناسی ییغیناندا گؤردوم. احوالاتی اولدوغو کیمی آنلاتدیقدان سونرا قیس-قیس گولوب دئدی:

-‌ یوخ جانیم منیم اؤیود-نصحیمه قولاق آسان کیمدیر؟! بالدیزیم پیلله‌لری چیخاندا بیرآز اورگی دؤیونور. او اوزدن بو گونلر ایسلامی یاشماغی ترجیح ائدیر!

چاشیردیم:

-‌ اورک دؤیونتوسونون نه ربطی وار ایسلامی یاشماغا؟!

یئنه گولوب جاواب وئردی:

-‌ نئجه ربطی یوخدور؟! ˝گشت ایرشاد˝ آدامی توتاندا  سکته ائله‌مه‌سی اوچون بو بیر ˝بیماری زمینه‌ای˝ ساییلا بیلر.

 



آچار سؤزلر : آزادلیق, مسئوللار, یاشماق, ایسلام, ایران, قادین, سیاست, قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 28 مرداد 1401 | یازار : دوکتور جئری
+0 به‌ین

شیخ‌ آغانین حئیوان‌سئورلیگی

دوکتور جئری

من دونَنه‌دک اؤرت‌باسدیر ماحالی شیخ آغاسی‌نین تکجه موسلمان نؤوعوندن اولان اؤلکه و دونیا اینسان‌لاری‌نین قایغی‌سینی چکمکده اولدوغونو دوشونمکده ایدیم. ‌سن دئمه اوحضرت اینسان‌لارلا یاناشی بوتون دونیا حئیوان‌لاری‌نین آشیری مودافیعه‌چی‌سی‌دیر ده بو ایندی‌یه‌دک گؤزلردن یایینمیش دورومدا قالیب.

جومعه آخشامی شیخ آغا بیزی شاما قوناق چاغیرمیشدی.خالقین معیشت، ایش و مسکن مسئله‌لری‌ اوستونده چوخلو موباحیثه‌لر گئدندن سونرا نهایت سوفره‌لر آچیلیب چئشیدلی-چئشیدلی یئمک‌لر اورتایا قویولدو. هامی یئمگه باشلاماق اوچون شیخ آغانین ایجازه‌سینی گؤزله‌ییرکن، او، بیر بوشقاب گؤتوروب بیر شیش کاباب، بیر تویوق بودو، بیردنه ده بالیق چکه‌رک آیاغا قالخیب ائشیگه چیخدی. ایشین غریبه طرفی بو، او ائشیگه چیخارکن قاپی دالیندا اولان چوماغی دا یانیجا گؤتوردو. هامیمیز چاش-باش شیخ آغانین اوغول‌لوغو قلئیچی مورتورضا ساری دؤندوک. او گولومسه‌یرَک مسئله‌یه‌ آیدینلیق گتیردی:

-‌ یئددی آی قاباق قاراباسدی ماحالی‌نین شیخ آغاسی دده‌لیگیمه بیر موستضعف پیشیک هدیه وئردی. اوگوندن دده‌لیگیم پیشیگین یئمگینی اؤز الی ایله قاباغینا قویمادان اؤزغذاسینی یئمز.

سؤزلر بورایا چاتینجا بیردن ائشیکدن آجیناجاقلی پیشیک چیغیرتی‌لاری ائشیدیلدی. چاشقینلیق ایچینده گئنه قلئیچی مورتوضا دؤندوکده آچیقلادی.

-‌ پیشیگین غذاسینی قاباغینا قویاندا قاپی-قونشونون آج-اوج پیشیک‌لری اونون یئمگینه شریک چیخماسینلار دئیه دده‌لیگیم چوماق ایله اونلاری قوووالاییر!



آچار سؤزلر : دؤولت, میلت, معیشت, عدالت, مسئوللار, ایش, قلئیچی مورتوض, عدالت, آجلیق, ایقتیصاد,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 1 مرداد 1401 | یازار : دوکتور جئری
+0 به‌ین

سن دیندیردین؟

دوکتور جئری

قلئیچی مورتوض ایله خوُیلو خانیم یئنیجه ائولنمیشدیلر. گردک اوتاغینا گیردیکلرینده اوتانجاقدان بیر ساعات  اوز-اوزه اوتورب دینمز-سؤیله‌مز بیر-بیری‌نین اوزونه باخدیلار. هاندان-‌هانا قلئیچی مورتوض دیله گلدی:

-‌ خویلو خانیم دینمیرسن؟

خویلو خانیمین یاناق‌لاری قیزاردی:

-‌ سن دیندیردین من دینمه‌دیم؟!



آچار سؤزلر : قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 17 اردیبهشت 1401 | یازار : دوکتور جئری
+0 به‌ین

بورج

دوکتور جئری

بیلدیر، قدیم قونشوموز قلئیچی مورتوض  «اوچ گون سونرا قایتاراجاغام»-دئیه مندن بئش میلیون تومن بورج آلدی. اونون اوچ گونو اولدو بیرهفته، بیر‌آی، بیر ایل، بورجو گئری قایتارماقدان خبر اولمادی. اونو هر گؤردوگومده بیر بهانه گتیریب بورجونو اؤده‌مکدن بویون قاچیردیردی؛ بیرگون دئییردی آروادی خسته‌خانادا یاتیرتمیشام الیم بوشدور، بیرگون دئیردی، ائو یییه‌سی اثاث‌لاریمی ائشیگه تؤکوردو مجبور اولدوم رهنی آرتیرام، بیرگون دئییردی نئچه واختدیر ایشمی الدن وئرمیشم، بیر گون دئیردی ایش صاﺣابی پولومو وئرمیر، بیرگون دئیردی...

اوزون سؤزون قیساسی، آرتیق اونون یالان‌لاریندان جانا گلمیشدیم، اؤز-اؤزومه دئدیم بو کز یاخاسی الیمه گئچسه داها بوراخمایاجاغام. گئچن جومعه آخشامی گونو بازاردا گزرکن بیردن اونو گؤردوم، تله‌سیک هارایاسا گئدیردی. آرخادان بیر-ایکی یول سسله‌دیم، اؤزونو ائشیتمزلیگه ووردو. یئیینله‌شیب دالدان الیمی چیگنینه قویدوم. دؤنوب منی گؤرونجه گولومسه‌ییب دیلینی ایشه سالدی:

-‌ ﺣلال‌زاده‌سن یولداش! ائله ایندی سنین بورجون اوچون داواخانایا گئدیردیم...

بازار ایچینده قلئیچی مورتوضون  باجاناغی‌نین داواخاناسی وار. اؤز-اؤزومه دئدیم، یقین کیشی گئدیر اوندان بورج آلیب منیم بورجومو وئره!

سئوینه-سئوینه سوروشدوم:

-‌ گئدیرسن اوندان پول آلاسان

قاشلارینی یوخاری آتدی:

-‌ یووو.. گئدیرم اوندان دورقوزاق داواسی آلام

بو جاوابدان اولدوقجا  قیزدیم:

-‌ آغ‌ساققال کیشی اوتانیب خجالت چکمیرسن من بورجومو ایسته‌ییرم سن...

سؤزومو کسدی:

‌-‌ آند اولسون دده‌لیگیم عزیز جانینا ائله سنین بورجونا گؤره گئدیرم دورقوزاق آلام.

چاشقینلیغیمی گؤرونجه آیدینلیق گتیردی:

-‌ قادان آلیم! ائله بیل سنین خبرلردن خبرین یوخدور، ایسلامی ﺣؤکومتیمیز بوندان بئله دونیایا گلن هر اوشاغا ایگیرمی میلیون تومن وام وئره‌جک، دوعا ائله بیزیمکی جمیک اولسون اوندا سنین بورجونو اوسته‌لیگی ایله برابر قایتاراجاغام.

حیرصدن قاققاناق چکیب گولنده  قلئیچی مورتوض آرتیردی:

‌‌- گول .. گول.. ایندیکی طلبین دورولدو نییه گولمه‌یه‌سن!؟



آچار سؤزلر : قلئیچی مورتوض, مسئوللار, پول, ایش, دؤولت, میلت, عدالت, یالان,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 26 فروردین 1401 | یازار : دوکتور جئری
+0 به‌ین

 


گمی‌لرین باتیب؟!

دوکتور جئری

قلئیچی مورتوض دئییردی؛ دونن شیخ آغانین گؤروشونه گئتمیشدیم. باشینی قینینا چکیب دالغین-دالغین اوتورموشدو. منیم گلدیگیمی ‌آنلامادی. الیمی چیگنینه قویدوقدا دیسکیندی. شوخلوقجا دئدیم:

-‌ دده  نه فیکیره دالمیسان، گمی‌لرین‌‌می باتیب؟!

دولوخساناراق جاواب وئردی:

-‌ منیم یوخ! قارداش پوتین‌-ین گمی‌لری باتیب!



آچار سؤزلر : قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 6 فروردین 1401 | یازار : دوکتور جئری
+0 به‌ین

ناموس

دوکتور جئری

قلئیچی مورتوض آغیر ناخوشلاییب خسته‌خانادا یاتیردی. یانیندا  یاخین یولداشی اوستاد دفتری قالیردی. قلئیچی مورتوض گؤروشونه گلن هر کسه "ایدز" توتموشام دئیه باشلاییب "ایدز"خسته‌لیگینی آچیقلاییردی. سونوندا اوستاد دفتری دایانا بیلمه‌ییب سوروشور:

-‌ أشی سنین خسته‌لیگن "قارین کؤپو"دور نییه هرکسه "ایدز"یم وار دئییرسن؟!

قلئیچی مورتوض آجی-آجی گولوب دئییر:

-‌ وضعیتیم خوش دئییل اوستاد! دئییرم بیردن آللاه ائله‌میش دوشوب اؤلسم مندن سونرا کیمسه آروادیم- خوُیلوخانیمی آلماسین!



آچار سؤزلر : قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 30 بهمن 1400 | یازار : دوکتور جئری
+0 به‌ین

شیخ آغانی‌نین...

دوکتور جئری

قلئیچی مورتوض تعریف‌له‌ییردی:

دده‌لیگیم شیخ آغا گنجلیکده یوخاری ترس‌آوا‌ کندی‌نین آغاسی-حاجی پاشانین گؤزل قیزی ایرانه خانیما وورلموشدو. بونون آردینجا آتاسی-شیخ‌ الاسلام طایفانین آغ ساققال‌لارینی ییغیب ائلچی‌لیگه گئدیر. دده‌لیگیمین کله-کؤتور اولدوغونا گؤره حاجی پاشا قیزینی اونا وئرمک ایسته‌میردی آنجاق شیخ‌الاسلامین اوزوندن ده اوتانیردی بو ائولی‌لیگه "یوخ" دئسین. بو اوزدن باشلاییر اورتایا داش دیغیرلاماغا:

-‌  یوز قیزیل ایسته‌ییرم!

شیخ الاسلام دا یوخسول بیریسی دئییلدی؛ دئییر:

-‌ وئردیم!

-‌ اون باش اینک ایسته‌ییرم!

- وئردیم!

-‌ یوز باش قویون ایسته‌ییرم!

-  وئردیم!

- کندین قیراغینداکی باغی دا ایسته‌ییرم!

-‌ وئردیم!

-‌ باشکندده بیر حیط ایکی دوکان ایسته‌ییرم!

-‌ وئردیم!

حاجی پاشا چتین-چتین شرط‌لری ایره‌لی سوروب "یوخ" جاوابی آلمایینجا علاجی کسیلیب سون داشینی اورتایا دیغیرلاییر:

-‌ حاج آغا باغیشلایین.. اوتانیرام دئییم.. آنجاق منیم دامادیمین شئیی گره‌ک یاریم متیر اولسون!

بو سؤزدن شیخ الاسلام بیر سوره قیزاریب بوزاردیقدان سونرا درین بیر نفس آلیب دئییر:

-‌ اولسون کسدیره‌ریک!



آچار سؤزلر : قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 8 بهمن 1400 | یازار : دوکتور جئری
+0 به‌ین

اینقیلاب خاطیره‌لریندن: قیرمیزی شورت

دوکتور جئری

"‌ اینقیلابچی اولماق آسان‌دیر؛ اینقلابچی قالماق چتین"

کؤهنه اینقیلابچی خورخه لوئیس اؤرت‌باسدیریوس

 

   1357 بهمن اینقیلابیندا اؤلکه‌نین دیگر شهرلر‌ی‌له بیرگه ترس‌آوا خالقی دا کوچه‌لره تؤکولوشوب شاه و شاهلیق علئیهینه تظاهورات ائله‌مگه باشلادیلار. تظاهورات‌لاردا جاماعات اللرینده اینقیلاب باشچی‌لاری‌نین شکیل‌لرینی، یازیلی پارچالار و پلاکاردلار داشیییرکن بیزیم قلئیچی‌ مورتوض باشقالاریندان فرقلی اولاراق اوزون بیر چوبوغون باشینا قیرمیزی بیر شورت گئچیردیب گؤستریجی‌لرین قاباغیندا آیاق‌لارینی برکدن یئره تاپدایاراق شوعار وئریردی:

ات آلمیشیق شهره چیخیبدیر

 فرح‌ده قحبه‌ چیخیبدیر!

***

   اینقیلابین ظفر چالماسیندان ایکی-اوچ آی سونرا بعضی وعده‌وی و ایقتصادی سبب‌لره گؤره، ائوسیز-ائشیک‌سیز موستضعف جاماعات شهرلرین قیراغیندا اؤزل‌لیکه شاهچی‌لارین موصادیره اولونموش اراضی‌سینده اؤزلرینه ائو تیکمگه باشلادیلار. بو خبرلر پایتاختا چاتینجا همن شهرلرین بلدیه‌لرینه دستور وئریلدی؛ اؤزباشینالیغین قارشی‌سینی آلماق اوچون درحال بو  ائولر ییخیلسین. ترس آوادا ییخیلان ایلک ائولردن بیری ده بیزیم قلئیچی مورتوضون ائوی ایدی. لودر چؤمچه‌سینی دیوارا دایاییب ائوی یاواش-یاواش شوملاداندا او، ایکی الینی برکدن باشینا تاپداییب قیشقیردی:

پوخ یئمیشم ائی فرح

ایفتیرا دئمیشم ائی فرح!

 

 



آچار سؤزلر : مسئوللار, عدالت, ایران, ایقتیصاد, خاطیره, قلئیچی مورتوض,

    بؤلوم: ساتیریک یازی‌لار
گؤروش‌لر : 0
تاريخ : جمعه 1 بهمن 1400 | یازار : دوکتور جئری
+0 به‌ین


نییه اولمور؟!

دوکتور جئری

خاطیرینیزدا اولسا آلتی آی بوندان قاباق، جومهور باشقانی سئچکی‌لری‌نین عرفه‌سینده "آی نه اولار" باشلیقلی یازیمیزدا یازمیشدیق:

جومهور باشقانی آدای‌لاریندان:

 بیرینجیسی دئییر: ائوسیزلر اوچون دؤرد میلیون ائو تیکدیره‌جگم.

ایکینجیسی دئییر: آیدا هر نفره دؤرد یوز اللی مین تومن یارانه وئره‌جگم.

اوچونجوسو دئییر: من بوتون ایش‌سیز‌لری ایش باشینا قویاجاغام .

دؤردونجوسو دئییر: ائولنمک ایسته‌ین جوتلرین هره‌سینه  500 میلیون تومن وام وئره‌جگم.

بئشینجی دئییر: من ائله بیر ایش گوره‌جگم، آمریکا گله پوتونوموزو یالایا.

آلتینجیسی دئییر: من اؤلکه ایقتیصادیاتینی اوچ گونون ایچینده چیچکلندیره‌جگم.

یئددینجیسی دئییر: من آزادلیق گتیره‌جگم.

......

دونن آخشام چاغی یولداش‌لارلا بو قونودا دانیشیرکن دئدیم:

-‌ او زامان جومهور باشقانی آدای‌لاری‌نین تبلیغات‌لارینی گؤرنده  آرزو ائله‌دیم کئشکه بوآدای‌لارین بیری جومهور باشقانی اولا، بیری بیرینجی موعاوین، بیری ایکینجی موعاوین، بیری ایش وزیری، بیری یارانه وزیری بیری...

اوستاد دفتری سؤزومو کسدی:

- هه دوز دئییرسن یادیمدادیر من ده دئدیم: اولسا،  آی نه اولار!  آنجاق هئچ نه اولمادی!

باشیملا اوستاد دفتری‌نین  سؤزلرینی‌ دوغرولایاراق آرتیردیم:

- او زامان بیلسیدیم آللاه منیم آرزومو یئرینه یئتیریب بو آدای‌لارین بئشی بیردن  آرزولادیغیم  کیمی مملکندین باشینا گئچه‌جکلر؛ آرزو سهمیه‌می یاندیرماییب باشقا آرزو ائدردیم!

قلئیچی مورتوض بیج-بیج گولدو:

-‌ دوست‌لار تلسمه‌یین! بیرآز بو عزیز مسئول‌لار برکدن زور وئرسه‌لر، بیرآز دا میلت تحمّول ائله‌سه اولار نئجه اولماز!



آچار سؤزلر : عدالت, مسئوللار, ایقتیصاد, قلئیچی مورتوض,

    بؤلوم: ساتیریک یازی‌لار
گؤروش‌لر : 0
تاريخ : شنبه 25 دی 1400 | یازار : دوکتور جئری
+0 به‌ین

شیخ آغانین خورونا توتما حکایه‌سی

دوکتور جئری

تانری بیر ده او قارا‌ گونلری گتیرمه‌سین. خورونا خسته‌لیگی‌‌نین آت اویناتدیغی، گونده بئش-آلتی یوز اینسانین جانینی آلدیغی گونلر ایدی. بیرگون آرغین-یورغون خسته‌خانادان ائوه گلیب اؤلومو تختین اوستونه سالمیشدیم. گئجه‌نین بیرواختی بیردن گؤردوم قاپی گوروپ-گوروپ دؤیولور. "آللاه خئییر ائله‌سین" دئیه یئریمدن قالخیب قاپینی آچدیم. قلئیچی مورتوض ایدی. منی گؤرجک ایکی الی ایله باشینا تاپداییب آغلاماغا باشلادی:

-‌ دوکتور! فریادیما چات.. ائویمیز ییخیلدی..

نیگران اولدوم:

-‌ نولوب خویلوخانیما بیر شئی‌می اولوب؟!

اؤکوتمه وورا- وورا:

-‌ کئشگه خویلوخانیما بیر شئی اولاردی!.. دده‌لیگم..دده‌لیگم شیخ آغا اؤلور.. خورونا توتوب... ائویمیز ییخیلدی.. اؤرت باسدیر ماحالی باشسیز قالدی...

پالتارلاریمی گئییب یولا دوشدوک. یاریم ساعات سونرا شیخ آغانین ائوینده ایدیک. شیخ آغا اوتاغین اورتاسیندا اوزانیب خیریلداییردی.‌ قلئیچی مورتوضو گؤرونجه قیشقیردی:

-‌ هانسی جهنمه‌ده‌سن؟ اؤلورم.. اؤلورم‌م‌‌‌‌م.. ترس آوانین دوکتورلاری ایشه یارامادی.. دئمه‌دیم؛ گئت منه اینگیلیسدن دوکتور گتیر...

قلئیچی مورتوض دئدی:

-‌ دده‌! تحریم‌لره گؤره اینگیلیسدن دوکتور گتیرمک اولمور.

سونرا بارماغی ایله منی گؤستردی:

- آمما باخ من موشابهینی تاپمشام آدی دا خاریجی دیر!

شیخ آغانین طیب پرونده‌سینی آلیب تست‌لری گؤزدن گئچیردیم. خورونا ویروسی آغ جیگرلری‌نین یوزده دوخسان دوققوزونو بوروموشدو.

قلئیچی مورتوض نیگران-نیگران پیچیلدادی:

-‌ بیر اومود وار؟!

یاواشجا دئدیم:

-‌ بو یوزده (درصد)  ایله هر کیمسه‌ اولاسایدی چوخدان اؤلموشدو! آنجاق  چوخ اوزولمه من چاراسینا باخاجاغام!

سونرا گئدیب "اؤلورم..اؤلورم" دئین شیخ آغانین قولاغینا بیر ایکی کلمه سؤز پیچیلدادیم.

شیخ آغا سؤزلریمی ائشیدینجه سؤنوک گؤزلری‌نین ایچی پارلادی...

***

ائرته‌سی گونو قلئیچی مورتوض بیر قوطو شیرنی ایله ایشله‌دیگیم خسته‌خانایا گلمیشدی. برکدن الیمی سیخیب دئدی:

-‌ آللاه سیزدن راضی اولسون دوکتور. دده‌لیگیم ساغالیب. بوگون هم یئییر، هم ایچیر، هم ده یاتیر. دوغرودان سیز مؤعجیزه ائله‌میش‌سیز. باشقا دوکتورلارین باهالی-باهالی ایگنه-داواسی ایشه یارامایان یئرده،  سیز ایکی کلمه  سؤز ایله دده‌لیگیمی موعالیجه ائله‌دیز.

دوغروسو قلئیچی مورتوضون یئرسیز اؤوگولری (مدح‌لری) اورگیمه یاتمادی:

-‌ آی قارداش! مؤوضونو چوخ شیشیرتمه! نه مؤعجیزه‌سی؟ من تکجه شیخ آغانین  قولاغینا دئدیم: قورخما پیس آداما هئچ  زاد اولماز!



آچار سؤزلر : مسئوللار, قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 18 دی 1400 | یازار : دوکتور جئری
+0 به‌ین

یئنی آغالار

دوکتور جئری

دونن آخشام قلئیچی مورتوضون گؤروشونه گئتمیشدیک. باشی پانسیمانلی یاتاقدا اوزانیب زاریلداییردی. دئدیکلریندن  آنلاشیلدی او آلتی آیدیر کندلری‌نین قیزیل معدنینده مرکزلی بیر آغا‌یا ایشله‌ییر. نئچه گون قاباق ایسه دیگر معدنچی‌لرله دالی قالمیش آیلیق‌لارینی ایسته‌مگه گئتدیکده آغانین قولوچوماقلی‌لاری تؤکولوشوب اونلاری دویونجایا قدر دؤیموشلر.

بو احوالاتی ائشیتدیکده گوله-گوله دئدیم:

گئنه رحمت ترس آوانین قدیمکی آغاسینا!

 دئییرلر؛ قدیم‌لر ترس آوانین بیر آغاسی وارایمیش. بیر گون اوغلو اونون یانینا گئدیب دئدی: آتاجان! بیر ایشچی تاپمیشام اؤزوندن یئییر، اؤزوندن ایچیر، بیزه ایشله‌ییر. بو سؤزلره  آغا باشینی توولاییب دئدی:اوغول! ائله بیر ایشچی تاپاردین بیز ده اوندان یئییب- ایچردیک!

قلئیچی قارداش!  ایندی سؤزوم گلیر بو مرکزلی آغا. سیزدن یئییر، سیزدن ایچیر، هله اوسته‌لیک سیزی ده دؤیور!!

...



آچار سؤزلر : قلئیچی مورتوض, مسئوللار, ایشچی, عدالت,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 6 آذر 1400 | یازار : دوکتور جئری
+0 به‌ین

 


سوزمه اوشاق

دوکتور جئری

دونن ترس آوادا اوشاق‌لارا قیزیلجا واکسنی ووراجاق ایدیک.  اهالی سحر تئزدن ساغلیق ائوی‌نین ائشیگینده صف باغلامیشدی. پنجره‌دن باخاندا قلئیچی مورتوضو جمعیتینن آراسیندا گؤردوم. بارماغیملا ایشاره ائله‌ییب هامیدان قاباق اونو ایچری‌یه چاغیردیم. قوجاغیندا عؤمرومده گؤرمه‌دیگیم گؤزل-گؤیچک بیر کؤرپه وار ایدی. کئف-احوالدان سونرا سوروشدوم:

-‌ مورتوض بگ! بو گؤزل بالا نوه‌ندیرمی؟

دیلینی چئینه‌دی:

-‌ یوووخ جانیم، اؤز اوشاغیمدیر!

بتر شاشیردیم:

-‌ اشی سن آلتمیشی آشیرماقداسان، بو یاشدا اوشاغی نئیله‌ییردین؟!

باشینی آشاغی سالدی:

ایسلامی شورا مجلیسی‌نین "جمعیتی جاوان‌لاشدیرما پلانی"نین تصویبی آردینجا دواخانالاردان حامیله‌لیگی اؤنله‌یین وسایل ییغیشدیریلدی، بیز ده  جاره‌سیزلیکدن کاندوم یئرینه جوراب ایشلتدیک...



آچار سؤزلر : مسئوللار, قلئیچی مورتوض, سیاست,

    بؤلوم: حیكایه و گولمه‌جه‌لر
یارپاق‌لار: [1] [2] [3] [4] [5] [6] [..] [8]
آرشیو
سون یازی‌لار
یولداش‌لار
سایغاج
ایندی بلاقدا : نفر
بوگونون گؤروشو : نفر
دونه‌نین گؤروشو : نفر
بوتون گؤروش‌لر : نفر
بو آیین گؤروشو : نفر
باخیش‌لار :
یازی‌لار :
یئنیلنمه چاغی :