باجارمایاندا..

دوکتور جئری

کئچن‌لرده تئیمورآغانین قهوه خاناسیندا اویان- بویاندان دانیشاندا سؤز- صؤحبت خالقی فلاکته سوروکله‌ین بعضی سؤزده میلت طرفیندن سئچیلمیش ایش‌بیلن مسئول‌لاردان دوشدو. سکسن یاشلاریندا اولان مشدی عباد ایلگینج بیر خاطیره‌سیندن دانیشماغا باشلادی:

تزه سربازچیلیقدان قایتمیشدیم. سئودیگیم قیز ایله ائولنمک اوچون ایشه یاپیشب سحردن آخشاماجان چؤلده- باییردا چالیشیردیم. بیرگون ناهار واختی ائوه قاییداندا آنام تاپشیردی: آخشام تئز ائوه گل، گئجه باجین ملاحته ائلچی گله‌جک. بو خبردن اولدوقجا چاشیردیم. اؤز-اؤزومه دئدیم: گؤره‌سن بو بدبخت کیمدیر ملاحته ائلچی گلیر؟! ملاحت جامالدان چیرکین، اخلاقدان دا بیرآز کاسیب ایدی! هله اوسته‌لیک بیزیم ده ائله وار-کاریمیز یوخ ایدی، بیری مال-دؤولت اوچون اونونلا ائولنمک ایسته‌یه! ماراقلا آنامدان سوروشدوم: هله بو بختور کیمدیر؟!! آنام گوله-گوله دئدی: سربازچیلیق یولداشین خیراله! اؤز-اؤزومه دئدیم: یقین بو گده‌نی ایت قاپیب باجیما ائلچی گلیر! آخشام اولدو. ائلچی‌لر گلیب قیسا بیر دانیشیقدان سونرا ملاحتی خیراله‌نین بئلینه یوکله‌دیک! کبین کسمه‌دن بئش-اون گون سونرا آنام منی بیر یانا چکیب دئدی: اوغلوم عباد! بو جامال - کامال کی باجیندا وار قورخورام اوچ-دؤرد آیین ایچینده قاپیمیزا گئری قاییدا. دئدیم: بس دئییرسن نئیله‌ملی‌ییک؟ آنام دئدی: بیز گره‌ک بو ائولیلیگین  تملینی برکیدک (بو گونکو دئییشله یعنی گره‌ک موقاویم سازی ائله‌یک). دئدیم: بو نه جور اولا بیلر؟. آنام دئدی: آهااا.. یعنی بیز ده گره‌ک خیراله‌نین باجیسینی سنه آلاق. ائله بیل بیر قازان ایستی سو تپه‌مه تؤکدولر. خیراله‌نین باجیسی مارال جامالادا، کامالدا باجیم ملاحتدن هئچ بیر اسکیکلیگی یوخ ایدی! اؤکوتمه وورا-وورا دئدیم: آمما من حاجی عوضین قیزی جئیرانی ایسته‌ییرم! آنام اوز-گؤزونو تورشادیب باغیردی: پوخون یئ اوتور یئرینده. من کیمی دئییرسم او اولاجاق. ایکی گون سونرا آنام اؤز باشینا بئش-اون نفر قوهوم-قارداشدان گؤتوروب مارالا ائلچی گئتدی. بو دوگون ده چوخ تئز باش توتوب مارالی دا منیم بویوما بیچدیلر. بو ائولیلیک‌لردن ایللر گئچدی آنجاق حیاتدا نه من خوشبخت اولدوم نه ده خیراله. یئددی ایل سونرا، چوخلو دعوا-دالاش‌‌لار نتیجه‌سینده خیراله باجیم ملاحتی بوشادی. بوشانما دفتریندن ائشیگه چیخاندا خیراله‌نی بیر قیراغا چکیب اوستونه قیشقیردیم: آخی کؤپک اوغلو کؤپک! سنکی ائولنمگین باجارمیردین منی نییه بدبخت ائله‌دین؟!