اورمو گؤلو و حاجی لئی لك لر!

دوكتور جئری

قوناقلیق، اورمو گؤلونون قورماسی نین سؤزو صؤحبتی ایله قیزیشمیشدی. ائو یییه سی میللتین آیاغا قالخیب دؤولتی زورلایاراق گؤلونون قورماسی نین قارشیسینی آلماغی ساوونوردو آنجاق قوناقلار، میللتین بو ایشه قاریشماماسیندان یانا ایدیلار. اونلارین فیكرینجه، دؤولت واختیندا بو سورونون چؤزوم یولونو تاپیب خالقی نیگرانچیلیقدان قورتاراجاق ایدی. تارتیشمانین قیزغین یئرینده بیردن بالاجا یاشار دانیشیغی كسیب قوناغا دئدی:

- پرویز عمی سیزدن بیر شئی سوروشا بیلرم؟

قوناق گولومسه یرك:

- گول بالام سوروش گؤروم نه سورشوجاقسان؟!- دئدی.

بالاجا یاشار بیر قوناغا بیر قوناغین ائشینه باخیب دئدی:

- سیزین نییه اوشاغیز یوخدو؟

قوناق یاپماجیق بیر گولوشله یانیتلادی:

- آخی حاجی لئی لك لر هله بیزه اوشاق گتیرمه ییب لر.

بالاجا یاشار بیج-بیج گولدو:

- عمی، حاجی لئی لك لره چوخدا بئل باغلامایین اؤزوزده بیر ایشلر گؤرمه لی سیز!