+0 به‌ین
گولمه‌جه‌لر تكرار اولور!
تكجه تاریخ دئییل،گولمه‌جه‌لرده تكرار اولور.
دوكتور جئری
آدی یوخدور اؤزو وار !
جومهور باشقانی سایین دوكتور روحانی دانیشیقلاری‌نین بیرینده دئدی:
- ایراندا فارس دؤولتی آدلی بیر شئییمیز یوخدور...
گولمه‌جه
نصرالدین شاه بادیمجان یئمه‌یینی چوخ سئورمیش آنجاق هر یئدیگینده خسته‌له‌نرمیش. بیر گون یئنه شاهین كؤنلونه بادیمجان دوشور. قوللوقچولاری ال-آیاغا دوشوب؛
- قوربان! اونوتدوندونوز مو؟ بادیمجان سیزین اوچون ضررلی دیر - دئییرلر.
نصرالدین شاه بوغونو تومارلایا-تومارلایا:
- آدینی گتیرمه‌یین، اؤزونو گتیرین!- دئییر.
یئنه نوودان هوسی!
موللانصرالدینین داملاریندان حیطینه اوزون بیر نوودان وار ایدی. موللا همیشه بونو گؤرنده هوس ائدردی اونون اوستونه مینسین.
بیر گون آروادی ائوده اولمایاندا موللا اؤز- اؤزونه دئدی:
- چوخ یاخشی فورصت‌دیر گئدیم مینیم نوودانا.
چیخدی داما. نوودانا مینجك دوشدو حیطه قول- قیچی سیندی. باشلادی زاریلداماغا. هاندان-گئجدن آرواد تاپیلیب گلدی. اولانلاری اؤیرنیجه باشلادی موللانی دانلاماغا. موللا دئدی:
-چوخ اوزولمه آرواد! قول- قیچیم سیندی آمما نوودانا مینمه هوسی باشیمدان چیخدی..بوندان بئله نوودانا مینمه‌یه‌جه‌یم!
ائك سؤز:
ائی موللانصرالدینین اولو روحو! بیر كره سیناماقلا نوودانا مینمه هوسی باشیندان چیخمیشدیسا، ایذین وئر بیز ایكینجی كره اولاراق ایصلاحاتچیلارین نوودانینا مینَك.. چوخ یاخشی فورصت دیر...
یئنه دامدان دوشمه!
یای گئجه‌لری موللانصرالدین آروادی ایله دامدا یاتاردی. بیر گون نئجه اولوردا موللا دیغیرلانیب دامدان دوشور. قونشولار ییغیلیب گلیرلر:
- موللا نه اولدو؟
موللا بئل- بوخونونو اووكه‌له‌یه-اووكه‌له‌یه:
- اونو دامدان دوشن بیلیر!- دئیه یانیت وئریر.
ائك سؤز:
سوروشورلار:
- ایصلاحاتین گله‌جه‌ینی نئجه گؤرورسن؟
دئییرم:
- نییه مندن سوروشورسونوز.. موللانصرالدین دن سوروشون ...
یئنه پاییز .. یئنه آنا دیلی
آذربایجاندا مدرسه‌لرین گیریش قاپیسینا یازیلمامیش بیر بیلدیری یاپیشدیریلیب:
لطفا هنگام ورود به مدرسه گوشی همراه و زبان مادری خود را خاموش فرمایید.
بؤلوم: حیكایه و گولمه‌جه‌لر
+0 به‌ین
دیشلنمیش ساندویچ
دوكتور جئری
قاش قارالمیشدی. آجیقمیشدیم. یول اوسته بیر ساندویچ توكانینا اوغرادیم. اوزون‌سوو توكانین دیبینده آیری بیر موشتری ساندویجینی دیشینه چكمكده ایدی. آغیزیم سولاندی. ماسانین اوستونده، بوشقاب ایچینده دیشلنمیش بیر ساندویج گؤروكوردو. اوتورونجا شاگیرد بوشقابی گؤتوروب سویودوجونون اوستونه قویدو. چوخ چكمه‌دی بوشقاب ایچینده ساندویچ ایله بیر بارداق آیران قارشیما قونولدو. ساندویجین كاغیذینی سیییریب یئمگه باشلایینجا توكانین پنجره‌سینده رنگسیز-سسسیز بیر فیلم ائكرانا باشلادی سانكی. بیر قادین توكانین شوشه‌سینی تیققیلداتدی. ساندویچچی سویودوجون آرخاسیندان چیخیب قاپی‌یا ساری قوشدو. قاپی ائشیگینده ساندویچچی اؤفكه ایله قادینا نمنه‌‌لر دئییردی. قادین یالواردیردی. قادین نئجه‌ده چارلی‌چاپلینین فیلمینده‌كی چیچكچی قیزا اوخشاییردی. ایندیجه چارلی‌نین چلیگینی توولایا- توولایا گلیب اورتالیغی بیربیرینه قاتاجاغینی دوشونوردوم. قادینین یالوار- یاخارلاری سونوندا ساندویچچینی یوموشالتدی. او توكانا گیریب سویودوجون اوستوندن دیشلنمیش ساندویجی گؤتوروب قادینا وئره‌رك شاگیرده:
- من گئدیرم، موشتریلری یولا سالاندان سونرا باغلا گئت- دئدی.
- دیشلنمیش بیر ساندویج‌له قادینی قاندیردی!...
گؤزومو ائكراندان آییردیم. هر شئی رنگلی‌لشدی. قونوشان یانیمداكی موشتری ایدی. ماتدیم-ماتدیم اوزونه باخینجا سؤزلرینی تومانچاق سؤزجوكلرله آچیقلاماغا چالیشدی.چؤره‌ك بوغازیما تیخیلدی. بیر- ایكی قورتوم آیراندان ایچمك ایسته‌دیم؛ اؤسكورك توتدو. ایشتاهیم كورالمیشدی آرتیق. ساندویجی بوشقابین ایچینه بوراخاراق توكاندان چیخی وئردیكده رنگسیز فیلمین ایچینه دوشموش كیمی دویدوم اؤزومو...
بؤلوم: حیكایه و گولمه‌جه‌لر
+0 به‌ین
بیر عؤمرون تجروبه‌سی
دوكتور جئری
بیر آیاغی پولیس ایداره‌سینده، بیر آیاغی دادیگاهدا، بیرآیاغی دادسرادا، بیر آیاغی! ایسه زینداندا اولان قره دایی، بیر عؤمور شرفلی یاشامدان سونرا، اؤلوم یاتاغینا دوشوب سون وصیتلرینی اوغلانلارینا ائتمكده‌ایدی:
- گؤزومون ایشیقلاری!...
مملكتده آلنی آچیق، باشی اوجا یاشاماق ایسته‌ییرسیزسه بیلمه‌لی‌سیز هانسی جورملری(سوچلاری) ایشله‌یه‌سیز... هانسیلاری ایشله‌مه‌یه‌سیز...
آدام اؤلدورسَز، قورخمایین! اوچ-دؤرد آیین ایچینده بئش اون تومن دییه وئرمكله زینداندان چیخا بیلرسیز!....
.. قاچاقچیلیغین قورخوسو یوخدو...باشی-دیبی بئش-اوچ قیران جریمه‌دیر..جیبدن یوخ!.. قاچاق مالدان وئرجكسیز...
ایداره-میداره‌ده ایشله‌سز ایختیلاسدان، پول‌آشیرماقدان قورخمایین..اوستو آچیلسا چایچی‌نین بوینونا آتابیلرسیز....
اوزوم دیوارا، فحشا-محشا ایشینده یاخالانساز اؤزوزو ایتیرمه‌یین، تؤوبه یولو هامی‌یا آچیقدیر...یولا گلمیش آزغینلارا جایزه‌ده وئریرلر!....
زمین‌خوارلیقدان قورخمایین ... دیبی بودور شهرین شورا رئیسی یا شهرداری اولاجاقسیز...
روشوت آلیش وئریشیندن قورخمایین ...دایی‌لارین داییسی دئمیشلی: روشوتی هانسی الدن وئرسز اوبیری الدن نئچه قاتینی گئری آلاجاقسیز... بیرده‌كی... روشوتچینی آسمازلار-كسمزلر تكجه بازنیشسته ائدرلر...
اوغورلوقدان دام-دیوار دلمكدن قورخمایین، توتولساز اوچ آی تكمیلی اؤرگه‌نیم آلماق اوچون دانیشدانلارین(دانیشگاه-زیندانلارین) بیرینه گؤندریله‌جكسیز...
شهرین سدمعبر رئیسی یا پولیسی محله‌سی اولماق ایسته‌ییرسیزسه ارازیل-اوباش اولماقدان قورخمایین...
بؤرك گؤتوروب قویماقدان............
دایی‌نین سؤزلری اوزانینجا، اوشاقلاری داریخما باسدی:
- آتا بونلارین هامیسی یاخشی بیلیریك، دئیه بیلرسن هانی جورملری ایشله‌مه‌یك؟
دایی دریندن بیر سولوق آلیب دئدی:
- هه! .. گؤزومون ایشیقلاری!....
سون كز زینداندا اولاندا... بیر نئچه گنج گتیرمیشدیلر... هره‌سینه اون- اون‌بئش ایل باغیشلانماز زیندان وئرمیشدیلر... ایندییه‌جن ائشیدمه‌دیگیم.. غریبه بیر جورم(سوچ) ایشله‌میشدیلر... سیز بو جورمی ایشله‌مه‌یین نولور.....
اوشاقلار شاشیردیلار هامیسی بیر دن:
- نه جورمی آتاجان؟ - دئدیلر.
قره دایی جورمون آدینی خاطیرلاماق اوچون اؤزونو بیر سوره زورا باسدی سونوندا:
- فعال مدنی! - دئیه یانیت وئردی.
بؤیوك اوغول هویوخموش اویان بویانا باخاراق قارداشلارینا:
- آتام ائله بیل ساییر- باییر ائله‌ییر... تئز چَنه‌سینی چكین!- دئدی.
بؤلوم: حیكایه و گولمه‌جه‌لر