دوکتور جئری
ساتاشما ادبیاتی
گؤروش‌لر : 0
تاريخ : جمعه 30 خرداد 1399 | یازار : دوکتور جئری
+0 به‌ین

شیخ آغا نییه ترس‌آوایا گلمیشدی؟

دوکتور جئری

جار دوشدو، شیخ آغا موهوم بیر ایش اوچون تر‌س آوایا گلیب. کندده هره بیر سؤز دئییردی. کیمی‌لری بؤیوک بیر پروژه‌نین آچیلیشیندان خبر وئریر؛ کیمی‌لری ایسه خالقا معیشت یاردیمی وئره‌جگیندن دانیشیردیلار. بللی‌دیر، بو آرادا شیخ آغانی قوناقلاماق بیزیم قلئیچی مورتوضون اوزه‌رینه دوشموشدو...

قلئیچی مورتوض بیر بارداق سرین شربتله اوتاغا گیرنده شیخ آغا پالتارینی سویونوب، جورابینی چیخارتماق ایسته‌ییرکن بیردن زارت بیر سس چیخدی بیله‌سیندن. قلئیچی مورتوض اؤزونو ائشیتمزلیگه ووروب شربتی میزین اوستونه بوراخاراق حیطده آرواد- اوشاغی‌‌نین یانینا قاییتدی. شیخ آغا اوتانجاغیندان یئنه پالتارینی گئیینیب اوتاقدان ائشیگه چیخدی. قلئیچی مورتوض چاشقین‌لیق‌لا سوروشدو:

-‌ آغا هارا گئدیرسن؟!

شیخ آغا گؤزونو بلیرسیز بیر نوقطه‌یه دیکه‌رک دئدی:

-‌ باشکنده دؤنورم.

قلئیچی مورتوض فیلسوفجاسینا باشینی ترپدی:

-‌ باشا دوشدوم، بورایا اوسدورماغا گلمیشدین!



آچار سؤزلر : ایقتیصاد, مسئوللار, قلئیچی مورتوض,

    بؤلوم: حیكایه و گولمه‌جه‌لر
گؤروش‌لر : 0
تاريخ : جمعه 23 خرداد 1399 | یازار : دوکتور جئری
+0 به‌ین

بیز نفس آلیریق!

دوکتور جئری

...

شیخ آغا مندیلینی اوزونه باسیب اؤکوتمه وورا-وورا دئدی:

-‌ تلویزیوندا گؤردونوز، نئجه آمریکالی پولیس آیاغینی او یازیق قارانین بوغازینا قویوب نفسینی کسیردی؟!

هامی‌میز اوزونتو ایله باشیمیزی ترپه‌دنده اوستاد دفتری یئرینده دیکلندی:

-‌ آغا باغیشلایین هاااا.. ترس‌آووادا تزه‌ک باهالاشیب خالق ائشیگه تؤکوله‌شنده  من بو ایکی گؤزومله‌ گؤردوم سیزین بو اوغول‌لوغونوز،[بارماغی ایله قاپی آغزینا، آیاق اوسته‌ دایانان قلئیچی مورتوضو گؤستردی] آمریکا پولیسی کیمی آیاغینی گؤستری‌لردن فیلم چکمگه چالیشان یاس‌ تی‌وی‌ موخبیری‌نین بوغازینا قویموشدو!

شیخ آغا اگری-اگری اوستاد دفتری‌‌یه باخدی:

-‌ یوووخ!.. او آلتدان  نفس آلیردی...



آچار سؤزلر : سیاست, حوقوق, شئونیزم, حاق, مسئوللار, قلئیچی مورتوض,

    بؤلوم: آجی گولوش‌لر
گؤروش‌لر : 0
تاريخ : شنبه 17 خرداد 1399 | یازار : دوکتور جئری
+0 به‌ین

بیزده قارادریلی‌ییک!

دوکتور جئری

جومعه آخشامی ایدی.  شیخ آغانین گؤروشونه گئتمگه حاضیرلاشماقدایدیم ائوین زنگ چالیندی. قاپینی آچدیقدا، یئریمده قورویوب قالدیم. آستانادا بیر قارادریلی کیشی دایانمیشدی. اؤز- اؤزومه دئدیم،" اولمایا بو قارادریلی ترامپ‌ین سویچو سیاست‌لریندن قاچاراق  بیزه سیغیماق ایسته‌ییر؟!". کیشی منیم هوروت-هوروت باخدیغیمی گؤرونجه دیله گلدی:

-‌ تئز اول، یولداشلار کوچه آغزیندا گؤزله‌ییرلر.. گئج قالمیشیق..

کیشی دانیشینجا اونو تانیدیم. بیزیم اوستاد دفتری ایدی. چاشقین- چاشقین سوروشدوم:

-‌ اشی!.. نییه به اوزونو قارا بویامیسان؟!

آجی- آجی گولدو:

-‌مگر ائشیتمه‌میسن آمریکادا یاشانان اولایلارا گؤره دونن شیخ آغا چیخیشیندا ترامپ‌ین راسیستی و شئونیستی سیاست‌لرینی قینایاراق قارادریلی‌لره معنوی دستک وئریب.بو اوزدن بیزده اوزوموز قارا بویامیشیق بلکه آغا بیزی ده قارادریلی سانیب، آنادیلینده بیرجه مکتبی اولمایان قیرخ میلیون تورکون هارایینا چاتا...

تله‌سیک ایچری‌یه دؤنونجه اوستادی دفتری سسلندی:

-‌ به هارا گئدیرسن؟ گئج اولدو..

-‌ بیر دقیقه گؤزله‌، من ده اوزومو قارالاییم...



آچار سؤزلر : شئونیزم, مدرسه, آنادیلی, ایران,

    بؤلوم: آجی گولوش‌لر
گؤروش‌لر : 0
تاريخ : شنبه 10 خرداد 1399 | یازار : دوکتور جئری
+0 به‌ین

ایکی بلا

دوکتور جئری

جومعه آخشامی گونو یئنه یولداشلارلا ییغیشیب شیخ آغانین حوضورونا گئتمک ایسته‌دیک. دوزونو ایسته‌سه‌نیز بیز اؤیرنجکلی اولموشوق سانکی. هفته‌‌نین سونو یئتیشنده اورگیمیز آغانین اؤیود- نصیحت‌لرینه داریخیر. گئتمه‌ینده بیر شئی ایتیرمیش کیمی اولوروق.

کوچه‌نین دؤنگه‌سینی چؤننده بیردن بهلول قاباغیمیزا چیخدی. بهلول محله‌میزین عاغیللیسی‌دیر! چوماغینی باشی اوسته توولادی:

-‌ اولان هارایا گئدیرسیز؟

بیر مینلیک چیخاردیب اووجونا باساراق:

-‌ قبیر اوسته گئدیریک بهلول – دئدیم.

بهلول مینلیگی جیبینه باسا-باسا دئیندی:

-‌ یوخ.. سیز قبیر اوسته گئتمیرسیز، شیخ آغانین گؤروشونه گئدیرسیز. من ده گلیرم!

بهلول هارادانسا بیزیم شیخ آغانین حوضورونا گئتمگیمیزی آنلامیشدی. اونون سؤزونو ایکی ائله‌مک اولمازدی یوخسا چوماغیندان قورتولاجاغیمیز اولمایاجاق ایدی. یوموشاق-یوموشاق دئدیم:

-‌ بهلول عم اوغلو! اولماز گلمه‌یه‌سن.. قورخورام لاپپادان-خاپپادان اورادا بیر سؤز دئیه‌سن آغانین خطیرینه دَیه؟

بهلول الینی ایکی- اوچ کره آغزینا تاپدایاراق دئدی:

-‌ باخ..من لال اولاجاغام!!

علاجیمیز کسیلینجه، شیخ آغانین ائوینه ساری یولا دوشدوک. یاریم ساعات سونرا دیزی اوسته شیخ آغانین ائوینده اگلشمیشدیک. بهلولو یانیمدا اوتورتدورموشدوم. شیخ آغا کورسونون اوستونده بیزی دوز یولا، دوز ایشه چاغیراندان سونرا دوشونو قاباغا وئریب دئدی:

-‌ گؤرورسوز آمریکادا نه‌لر اولور؟! بیر میلیون نفر خورونا توتوب یوز میندن چوخ آدام اؤلوب! اوّل آللاه بیزیم مملکندده بئله خبرلردن یوخدور...

بهلول یئرینده دیکله‌نیجه رنگیم آتدی. قاشی ایله شیخ آغایا ایشاره ائده‌رک دئدی:

-‌ آغا! آللاه ایکی بلانی بیر یئره گؤندرمز کی!



آچار سؤزلر : مسئوللار,

    بؤلوم: حیكایه و گولمه‌جه‌لر
گؤروش‌لر : 0
تاريخ : شنبه 3 خرداد 1399 | یازار : دوکتور جئری
+0 به‌ین

 پول بیریمی "تومن" اولمایاجاق!

دوکتور جئری

آللاهدان گیزلین دئییل سیزدن نه گیزلین، منیم بو قلئیچی مورتوضا بتر پاخیل‌لیغیم گلیر. همیشه مندن بیر آددیم قاباقدادیر...

آخشام چاغی اوروج بایرامینی تبریک دئمک اوچون یولداشلارلا شیخ آغانین حوضورونا یئتیشدیک. نه گؤرسک یاخشی‌دیر؟ قلئیچی مورتوض بیزدن قاباق آغانین یانیندا اگلشمیشدی!! اوروج-نامازلارینیز قبول اولسون دئدیکدن سونرا سؤز- صؤحبت  پول بیریمی‌نین(واحیدی‌نین) دگیشمه‌سینه چکیلدی. 

من فیلسوفجاسینا دئدیم:

-‌ من ریال‌ین تومنه دؤنشمه‌سیله راضی‌یام آنجاق بئله دوشونورم ایندیکی آغیر ایقتیصادی دورومدا بو ایشین نه تکجه فایداسی یوخدور بلکه مومکوندور یئنی توْرومه ده سبب اولا...

اوتورانلار سؤزلریمی باشلاری ایله دوغرولایاندا قلئیچی مورتوض یئرینده دیکلندی:

-‌  من ده پول بیریمی‌نین دگیشمه‌سیله راضی‌یام آمما نه تومنه!.. منیم فیکریمجه  بیز پول بیریمیمیزه یاخشی بیر آد سئچسک، پولوموز دگرینی ایتیرنده ایسه بیز قازانمیش اولاجاغیق! 

بو آنلاشیلماز سؤزلردن هامیمیز چاشدیق. شیخ آغا قاشلارینی چاتدی:

-‌ اوغول آچیقلا گؤروم نه دئییرسن؟! نه یاخشی آدی؟!

قلئیچی مورتوض بیرآز اؤزونو ییغیشدیریب آچیقلادی:

-‌ یاخشی آددان آماجیم بودور؛ مثلا  بیز پول بیریمینه، "الله"، "سبحان الله" یا " الحمدالله" کیمی گؤزل آدلار سئچسک؛ پول سایاندا آللاهین ذیکرینی  دئمیش اولوب اوبیری دونیامیز اوچون ده ثاواب قازانمیش اولاجاغیق. پولوموز دگرینی ایتیردیکجه ده  ثاوابلاریمیز آرتاجاقدیر. 

بو آچیقلامادان شیخ آغانین گؤزلری یاشاردی، قولونو قلئیچی مورتوضون بوینونا سالیب او اوزونو- بو اوزونو اؤپه- اؤپه دئدی:

-‌ آفرین سنه اوغلوم...آفرین سنه... نه گؤزل فیکیردیر!

سونرا جیبیندن موبایلینی چیخاردیب مرکزی بانکین رئیسینه زنگ ووردو...

دیشیم باغیرساغیمی کسیردی. دوداقلاریمی چئینه‌یه-چئینه‌یه اؤز اؤزومه دئدیم:

-‌ نییه بو فیکیر منیم عاغلیما چاتمادی؟



آچار سؤزلر : مسئوللار, باهالیق, پول, ایقتیصاد,

    بؤلوم: حیكایه و گولمه‌جه‌لر
یارپاق‌لار: [1]
آرشیو
سون یازی‌لار
یولداش‌لار
سایغاج
ایندی بلاقدا : نفر
بوگونون گؤروشو : نفر
دونه‌نین گؤروشو : نفر
بوتون گؤروش‌لر : نفر
بو آیین گؤروشو : نفر
باخیش‌لار :
یازی‌لار :
یئنیلنمه چاغی :