دوکتور جئری
ساتاشما ادبیاتی
گؤروش‌لر : 0
تاريخ : چهارشنبه 26 مرداد 1390 | یازار : دوکتور جئری
+0 به‌ین

دئمقیراسی

یازان : دوكتور جئری

 

آچار سؤزلر : قیرا ،دئمقیراسی ،سولو قیراسی ، دیكتاتور

یازیمیزا گئچمدن اؤنجه سایقیلی اوخوجولار قیفیللاماسینلار دئیه آچار سؤزلری بیر آزجیق آچیریق.

قیرا :‌ قارپیزگیللردندیر ، قووونون اوگئی باجی اوغلوسو ساییلیر.

دئمقیراسی : دئمده اكیلن قیرایا دئییلیر. دئمقیراسی چوخ شیرین اولوب اكمه سینده هئچ قایدا - قانون یوخدور و اؤزباشینا یئتیشر .

سولو قیراسی : سولو یئرلرده  قایدا- قانونلا و مكانیزه اولاراق اكیلیب كیمیوی كودلار گوجونه یئتیش قیرادیر. بو قیرا سولو اولار  آنجاق  شیرین اولماز.

دیكتاتور( دیكده +‌اوتور ) :  دیك ده اوتوران ، باشدا اوتوران دئمكدیر .

 

گیریش :

آرتیق، دئمقیراسی ائپیدئمیسی دونیانی بورویوب. بو اوزدن  یازیمیزدا دئمقیراسینا ، آسیب شوناسلیق  باخیمیندان یانشاماق ایسته ییریك.

دیكتاتور كیمدیر ؟

دیكتاتورلوق نه دئمكدیر؟

دیكتاتور دیكده اؤتورمادان اؤنجه ، دئمقیراسیچی دیر. خالقین دئمقیراسینی نه قدر  سئودیگینی بیلیر.  خالقین آغیزی دئمقیراسینا یئتیشسین دئیه ووروشور. كولانلاردا یاتیر ، بوستانچیلاردان یامان – یوووزو ائشیدیر.  اؤز سوروسوندن یاغیش تانریجاسینا  قوربانلار كسیب یالواریر . دئمقیراسیچی ایللر بویو موباریزه دن سونرا بیر شئیی باشا دوشور :خالقین یاردیمی اولمادان بیر خیرچا بئله یئتیشدیره بیلمه یه جكدیر . خالق دئمقیراسی ایسته ییرسه پوشتك قوروب اونو دیكه چیخارتمالی دیر دئیه  باشلاییر خالقی ایقناع ائتمگه .دئمقیراسی شیرین دیر. خالق دئمقیراسینی سئویر ، ایسته ییر . بئله لیكله خالق دئمقیراسیچینی  دیكه چیخاردیر. دئمقیراسیچی  دیكده اوتورور . دیكتاتور اولور. دیكده ،  كیمسه نین گؤره بیلمه دیگی  یئنی گؤرونتولر سرگی له نیر   دیكتاتورون گؤزلری نین اؤنونه.  دئمقیراسینا یئنی بیر آچیدان باخماغی باشاریر.  دیكتاتور دیكده دئییر : ” قیراسئور خالقیم!  هئچ بیلیردینیزمی سولو قیراسی ، دئمقیراسیندان یاخشی دیر؟”

بو تومجه دیكتاتورلوغون باشلانیش نوقطه سی دیر و سولوقیرانی زور ایله خالقین بوغازینا سوخماغا دیكتاتورلوق دئییلیر.

 دئمقیراسی نئجه قورونا بیلر؟ 

خالقلار، دیكده اوتورانی دیكه چیخارمادان اؤنجه قوللارینی   ایپ ایله  مؤحكم باغلامالی ؛ (بعضی خالقلار دیكده اوتورانین آیاغینی باغلاییرلار آنجاق طرف دیكه چیخینجا اللری ایله  آیاغی نین ایپینی تئز آچیر)  هرزامان آغیزیندان سولو قیرا لافی چیخسا  ایپی چكیب اونو كله – مایاللاق آشاغییا سالمالی دیرلار.

دیكتاتور دئمقیراسیچی  اولابیلرمی؟

دیكتاتور ، دیكه چیخینجا سولوقیراسیچی اولور. یانی هرنه وار دیكین باشیندادیر و دیكتاتورلار دیكدن ائندیریلینجه  یئنی دن دئمقیراسیچی  كیملیكلرینه قاووشموش اولورلار. تاریخده یوزلر اؤرنك سایا بیلریك . اؤرنگین : اعلاحضرت پالانی و… 

 البته بعضی دیكتاتورلاردا وار ، سولو قیراسینی بویاییب دئمقیراسی یئرینه خالقلارین خوردونا وئریرلر.  خالقلار آزاجیق دیققتله دئمقیراسینی ، سولو قیراسیندان آییرد ائده بیلرلر.

ندن دیكتاتورلار دونیادا اولان دئمقیراسی حركتلرینی قیل قولای اولاندا سؤزده دستكله ییرلر؟

حیكایه دئییر :

 خالق ، ” توتون ! توتون ! “‌ دئیه بیر اوغرونو قووالاییردیلار. قاباقدا قاچان زیرنگ اوغرو ،  قارشیدان گلنلری آلداتماق اوچون مالی چالینمشلاردان بتر باغیریردی: ” قویمایین قاچدی ! توتون ! تو…..” 

بیر قولتوقدا نئچه قیرا یئرله شر؟

بیر قولتوقدا بیر قیرا یئرله شر . ایستر دئمقیراسی اولسون ایستر سولو..

دونیادا باشلانان دئمقیراسی حركتلری اولوملو بیر سونوجا واراجاق می؟

خالقلار و میللتلر ایپ و قولتوق قونوسونا اؤزن گؤسترسه لر  كسینلیكله سئودالارینا قووشاجاقلار .

سون

1389/12/4





    بؤلوم: ساتیریک یازی‌لار
آرشیو
سون یازی‌لار
یولداش‌لار
سایغاج
ایندی بلاقدا : نفر
بوگونون گؤروشو : نفر
دونه‌نین گؤروشو : نفر
بوتون گؤروش‌لر : نفر
بو آیین گؤروشو : نفر
باخیش‌لار :
یازی‌لار :
یئنیلنمه چاغی :