دوکتــــور جـئــــــری
ساتاشما ادبیاتی
گؤروشلر : 0
تاريخ : یکشنبه 23 بهمن 1390 | یازار : دوکتور جئری
+0 به‌ین

دانا باش كندی نین فولكلوروندا یارانه لر

یازان : دوكتور جئری

یارانه لرین نقدی اولاراق اؤدنمه سی،  داناباش كندی نین  ایقتیصادیاتینی آلت اوست ائتمكله یاناشی  زنگین بیر یارانه سل  فولكلورون یارانماسینا ندن اولموشدور. عؤمورلرینده نقدی یارانه گؤرمه ین داناباشلی لار، اكینچی لیك و مالدارلیغا باشی سویوقلوقلا یاناشیب یارانه پوللارینی بولون - سولون خرجله یرك واخت لارینی قهوه خانالاردا شفاهی ادبیاتیمیزین گلیشمه سینه حصر ائتمیشلر. بو مئیمون اولایین ایل دؤنومونده، داناباش كندینده گئدیب، خالق یاردیجیلیغیندان بیر چلنگ حاضیرلامیشیق یارانه نین باعث و بانی لری نین بوینونا آسماق اوچون . بیرلیكده اوخویاق:

 

یارانه بایاتی لاری

یارانه نی آلدیلار

دسمالا باغلادیلار

میللت بایرام ائدركن

ائششگی داغلادیلار

 

درمان نه دی؟ یارا  نه؟

من ولخرجم ، یارا نه!

بوگون ، صاباح آلاجام

بیر تلیس پول ، یارانه!

 

یارانه لر ، نه دن دیر؟

نه توزاقدیر ، نه دن دیر

دئییر یوخسول وارلانیب

ائششك سنین دده ن دیر!

 

آمان  یارا  نه گلدی؟

گولوم یارا  نه گلدی؟

موشتولوغوز گؤز اوسته

دئسه ز  یارانه گلدی

 

عزیزینم یاناقلار

كیرپیك آغلار جان آغلار

یارانه سی كسیلن

باهالیقدان قان آغلار

 

یارانه لای لای لاری

لای لای دئییم بالاجام

سنه اسپند سالاجام

آللاه بالامی ساخلا

یارانه سین آلاجام

 

لای لای دؤولتیم مالیم

باشیمدا ایپك شالیم

سن شیرین یوخلا ، منده

گئدیم یارانه ن آلیم

 

لای لای یار آنایه

آتایه  یار  آنایه

سیزلره قوربان كسیم

بیرده كی یارانه یه

 

لای لای بالام شور پوسته

باشین قوی دیزیم اوسته

بویا باشا چاتگینان

اوندا یارانه نن ایسته

 

لای لای داغدا لالام وار

اورگیمده یارام وار

خالقین مالی دؤولتی

منیم ده یارانه م وار

 

لای لای یارانه م لای لای

ماهنیم ترانه م لای لای

فاصیله لر چوخالدی

دوشوك سرانه م لای لای

 

یارانه تاپماجالاری

او ندیر ایرانلییا بیر قاریش عرب لره اون قاریش!

          یانیت : ایران و عرب اؤلكه لرینده وئریلن  یارانه

قیرخ بئش مین بئش یوز تومن اوستونده اللی مین لیك آداما دایاییرلار.

          یانیت: بانك لاردا یارانه سیراسی( صفی)

 

یارانه قارغیش لاری

یارانه ن كسیلسین

یارانی آلیب  گاز- سو- برق فیشینه وئره سن

یارانه سیز قالاسان

الین یارانه گؤرمه سین

یارانه ن داغیلسین بورجلولارا

یارانه آلماغا گئده سن بوش قاییداسان

یارانه دن یاریمایاسان

یارانه آتلی اولسون سن یایا (پییادا)

یارانه اوزونه حسرت قالاسان

 

یارانه آلقیش لاری

یارانه باشیندان تؤكولسون

هر گونون یارانه لی اولسون

تانری یارانه نی بول ائله سین

یارانه دئیه دئیه قالمایاسان

یارانه ن كسیلمه سین

هر زامان  یانیندا یار- آنا جیبینده یارانا اولسون

 

آتالار سؤزونده یارانه

تانری دیلنمگین قاپیسینی باغلاسا یارانه نین قاپیسینی آچار

گاز فیشی هارایا، یارانه اورایا

بانكدان گلن من ، یارانه دن خبر وئرن بو

یارانه ائوین بلاسی دیر هئچ ائو بلاسیز اولماسین

آدام یارانه سینه گؤره دانیشار

یارانه جیب ده قالماز

یوخسولون كؤنلو یارانه ایستَر.

دادانمیسان یارانه یه ، بلكه بیر گون گلمه یه؟

یارانه نی گاز فیشی كسر

بو یارانه نی آلدین گلن یارانه یه یا قیسمت

مین یارانه آزدی بیر گاز فیشی چوخ

 

یارانه اینانج لاری

 

الین ایچی  قاشانسا یارانه آلاجاقسان

یوخودا پینوكیونو گؤرسن یارانه لرین آرتما  شایعه سینی ائشیده جكسن

یارانه ایله بازارا چیخانی سویوق تر باسار

یارانه آینا قاباغینا قویسان بركتی آرتار

یارانه نی سو- برق فیشی یانینا قویمازلار بركتی قاچار

 

 

یارانه یانیلتماج لاری

یارانه نه  نه  قویسالار باشیندان آرتیق دیر

یارانه له نمی یارانه لنمه ینمی؟

 

یارانه گولمجه لری

جین چیراغی

یوخسول بیر كیشی ، پولسوزلوقدان ائوینده ایشلمسیز قالان  بوروش چیراغی  ساتماق ایسته ییر. توزونو سیلركن بیردن چیراغین ایچیندن بیر جین چیخیب باغیر باساراق كیشی دن ایسته ییر نه دیلگی وارسا دئسین. كیشی سئوینجك:

-یارانه لر ایكی قات چوخالسین- دئییر.

جین اوزگونلوكله :

-مجلیس یارانه لرین چوخالماسینا مخالیف دیر. منده بیر دموكرات جین اولاراق مجلیسین رایینه قارشی بیر ایش گؤره بیلمه رم. بیر باشقا دیلگین وارسا  سؤیله.

كیشی بیر آز دوشوندوكدن سونرا :

-بیزیم باشیمیزا نه گلیب یالاندان گلیب سندن ایسته ییرم بیر ایش گؤره سن مسئوللاریمیز میللته یالان دانیشماسین لار.

جین بارماغی ایله باشینی قاشییاراق:

-دئدین یارانه لر نئچه قات چوخالسین؟!

 

زنگین لرین یارانه سی

زنگین بیریسیندن سوروشورلار- بو آیین یارانه سینی آلمیسان؟- دئییر:

- دیردیلنچی الیندن یارانه آلماق اولمور ، هر بانگین قاباغینا بئش یوز آدام ییغیشر مجبورام گئجه لری گئدیب آلام..

بهلول باشقان

محمود بهلولی نژادان سوروشورلار

-نییه زنگین لره  یارانه وئریرسن؟

دئییر:

- آللاهدان چوخ بیلمیرم كی، آللاه دا اونلارا وئریر.

 

 





    بؤلوم: ساتیریك یازیلار
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :