+0 به‌ین
+0 به‌ین
یوخو
دوکتور جئری
اؤرت باسدیر ماحالی‌نین مؤعتبر شیخ آغاسی بیر هفته‌دن چوخ ایدی بللی اولمایان سبب‌لره گؤره گئجه‌نی گوندوزه قاتاراق بوتون ایگیرمی دؤرد ساعاتی یاتیر، نامازلاری بئله قضایا قالیردی. حتّی اوچ گون قاباق، ماحالین قوزئی گون‌باتاریندا باش وئرن زلزله اوزوندن ائو-ائشیک‌لرینی الدن وئریب قیشین شاختاسیندا باییردا قالان اهالی، یاردیم آلماق آماجی ایله اونون قاپیسینا گلیب سحردن آخشامادک گؤزله‌سه‌لر ده یوخودا اولدوغونو بیلینجه کور-پئشمان گئری قاییتمیشدیلار. اوزون یاتمالار اوزوندن رنگی سارالان شیخ آغانین وضعیتی یاواش-یاواش اوغوللوغو قلئیچی مورتوضو نیگران ائله‌مگه باشلادی. دونن گون اورتا چاغی شیخ آغا ال سویا یئتیریب تله‌سیک یاتاغینا گیریب یاتماق ایسته‌ینده، قلئیچی مورتوض باشی اوسته دیزه چؤکوب هؤنکور-هؤنکور آغلاماغا باشلادی:
- دددده..دده! نییه بو قدر یاتیرسان؟ نه‌خوشلامیسان!؟ ایسته‌ییرسن بیزی باشسیز قویاسان؟ ایجازه وئر دوکتورا زنگ ووروم گلسین..
شیخ آغا یئرینده دیرسکلندی. سؤنوک گؤزلری ایله قلئیچی مورتوضا باخیب فیسیلدادی:
- قورخما اولما اوغلوم.. بیرشئی‌یم دئییل!
- بیر شئیین دئییلسه، نییه بو قدر یاتیرسان؟-دئیه قلئیچی مورتوض گؤزلری‌نین یاشینی سوزدوردو.
شیخ آغا دولوخساندی:
- گئچن هفته گئجه یوخودا گؤردوم...
قلئیچی مورتوض باشینا تاپدایاراق قیشقیردی:
- بو دونیادان گئده‌جکسن؟!
شیخ آغانین اگری-اگری باخیشی قلئیچی مورتوضو سوسدوردو.
- گئچن هفته گئجه یوخودا گؤردوم، قارداش لیوان ماحالی‌نین ایسلامی موقاویمت جبهه‌سینه منسوب بیر قوروپ، حوضوروما گلیبلر. من ایندییه‌دک اونلاری هئچ گؤرمه‌میشدیم. تأسوفله آد-سانلارینی بئله سوروشمادیم. گلمه‌لری‌نین سببنی سوروشدوم. دئدیلر: موقاویمتی گوجلندیرمک اوچون پولا احتیاج‌لاری وار. دئدیم: قاب گتیرمیسیز؟ بیر یئکه چمدان قاباغیما قویدولار. چمدانی گؤتوروب صاندیق‌خانایا گئچدیم. تپه-تیخلام دولارلا دولدوردوم، چمدانین قاپاغی باغلانمادی. بیر- ایکی دؤنه تاپدادیم، باغلانمادی. سون کره مؤحکم تاپدادیغیمدا بیردن سسیندن یوخودان دیسکیندیم...
قلئیچی مورتوض چاشقین- چاشقین سوروشدو:
- سونرا نه اولدو؟!!
شیخ آغا اوزونتو ایله آرتیردی:
- نه اولاجاق؟! اوگوندن دایم یاتیرام بلکه آدینی بیلمه‌دیگیم او مقاومت قروپو چمدان‌لارینی آلماق اوچون یوخوما گله‌لر!
بؤلوم: حیكایه و گولمه‌جه‌لر
+0 به‌ین
چیلله‌نین پیسلیگی
بوتون گؤزل‌لیکلره یاناشی بو ایلکی چیلله‌نین بؤیوک بیر پیسلیگی ده واردیر:
میانه و سراب‌داکی زلزله‌زده وطنداشلاریمیز ایکی- اوچ دقیقه آرتیقراق گئجه‌نین شاختا -سویوغونو چادیرلاردا چکه‌جکلر!
بؤلوم: آجی گولوش‌لر
+0 به‌ین
یاردیم
دوکتور جئری
اؤلکه والی‌لری ییغینجاغیندا زلزله‌دن سؤز دوشدو.
اردبیل والیسی دئدی:
- بیز ورزقان زلزله‌سینده، ایلک گونو، بیر طیاره دولوسو چادیر تبریزه گؤندردیک.
اورمیه والیسی دئدی:
- بیز ده ایکی طیاره دولوسو یئیه‌جک- ایچه‌جک گؤندردیک.
تهران والیسی دئدی:
- بونلارکی بیر شئی دئییل، بیز اوچ طیاره دولوسو مسئول گؤندردیک.
بؤلوم: حیكایه و گولمه‌جه‌لر
+0 به‌ین
خسته خانا نییه چؤکدو؟
دوکتور جئری
ایران، ژاپون، روس شیرکت‌لری‌نین ایش‌بیرلیگی ایله تیکلن یئنی خسته‌خانا، اؤلکه‌ده باش وئرن زلزله‌ده چؤکونجه، دؤولت طرفیندن بو قونودا سوروملو اولانلار اولای یئرینه چاغیریلدی. تیکینتی‌نین نقشه‌سینی چکن ژاپون مهندیسی ییخیلمیش خسته‌خانایا یئتیشینجه الینی اورگی‌نین اوستونه قویوب، " ائی وای آبیریم گئتدی"دئیه یئره ییخیلیب اؤلدو. خسته‌خانانین تیکیلیش خرجینی عؤهده‌سینه گؤتورن روس مهندیسی ایسه، گؤزو اوچونتویا ساتاشینجا الینی اورگی‌نین اوستونه قویوب،"ائی وای سرمایه‌م الدن گئتدی" دئیه یئره ییخیلیب اؤلدو. سیرا خسته‌خانین تیکیش ایجراچیسی ایران مهندیسینه گلینجه، اللرینی گؤیه قووزاییب دئدی:
- آللاه چوخ شوکور!.. نه یاخشی من خسته‌خانین تیکیشینده سیمان ایشلتمه‌میشدیم، یوخسا ایندی بو مهندیسلر کیمی الیمی اورگیمین اوستونه قویوب، "ائی وای سیمانلاریم الدن گئتدی" دئیه یئره ییخیلیب اؤله‌جکدیم.
بؤلوم: حیكایه و گولمه‌جه‌لر
+0 به‌ین
چیلله
زلزله دادی ایله
دوكتور جئری
بؤیوك بیلگین ابونصر فارابی-دن ساز
چالماسینی ایسته ییرلر، ابونصر سازی آلیب چالا-چالا باشلاییر اویناماغا. ندنینی سوروشاندا،
دئییر:
- بئله لیكله، ساز چالماقلا
یاناشی اویناماق باجاردیغیمی دا ایسته دیم بیلدیرم.
دئییرلر سؤز سؤزی گتیرر آرشین
بئزی.شاختالی چووغونلو چیلله نین گلمه سی ایله، دؤولتین قاراداغ زلزله گؤرموش
اهالیسینه ایكی آیدا ائو تیكه جگی نین لنگیمه سی سؤز دوشدوگونده اوسته كی حیكایه
یادداشیمدا جانلاندی. آنلاشیلان دؤولتده ایسته ییر، زلزله اوچونتولاریندا اینسانلاری
قورتارماقدا باشاریلی اولدوغونو گؤسترمكله یاناشی بو فلاكت گؤرموشلری قار آلتیندان
چیخارماقدا دا باجاریقلی اولدوغونو دونیایا پئش چكسین!...
تانری میللتیمیزی، دؤولتین باشقا باجاریقلاریندان
قوروسون. آمین
بؤلوم: آجی گولوش‌لر
+0 به‌ین
زلزله دن آلدیغیم درس
دوكتور جئری
اهر، هئریس، ورزیقان دئپرَمی (زلزله سی) باش وئرمیشدن اؤنجه، پان توركیست لره اویاراق دؤولتین، آذربایجانین تاریخی بینالارینا سایمازیانا یاناشدیغیندان، بیله رك چؤكونتولرینه ندن اولدوغوندان چوخلو یئرلرده دانیشیب یازمیشدیم. دوغال دیر بوآردا بیلمه دن دؤولتی گؤرمه دیك ایشلره سوچلایاراق جهانی استكبارین دگیرمانینا سو جالاییب ایران دوشمن لرینی سئویندیرمیشدیم ده؛ آنجاق قاراداغین دئپرمی، اسكی دوشونجه لریمین شوملاییب ییخیلماسینا ندن اولدو. دئپرمین ایلك گؤرونتولری تلویزیوندان یاییلینجا، قارا اولای، ایلك قیغیلجیم لارینی بئینیمده قورلاندیردی. دؤولت آذربایجانین كندلرینده، میللت اؤزكؤكوندن قوپماسین دئیه،صفوی، افشار، قاجاركیمی كئچمیش دؤنملردن قالان ائولرده یاشادیرمیش. دؤولت، قیرمیزی كرپیچین آیاغی چاتمامیش كندلری، گؤزونون ببگی كیمی قورویوب ساخلامیش ایندیسه دونیانین گؤزو اؤنونده هر نه ده ایلك اولدوغونو گؤسترمك اوچون سرگی له ییردی...
بو گؤرونتولری گؤرونجه سانكی یاتمیش ایدیم اویاندیم، دؤولت حاققیندا یانلیش دوشوندوگومو بوینوما آلدیم، تانری آستاناسیندا آلین یئره سورتوب تؤوبه ائتدیم.
بؤلوم: ساتیریک یازیلار