+0 به‌ین
ائششک اوْغروسو
دوکتور جئری
قلئیچی مورتوضو داما باسمیشدیلار. زیندانیلار باشینا ییغیشاراق:
- قارداش ندن اؤترو زیندانا دوشوب‌سن؟- دئیه سوروشدولار.
قلئیچی مورتوض اوزونتو ایله باشینی توْولادی:
- یامسیلاماقدان اؤترو..
زیندانیلار قاققاناق چکیب گولدولر. بیری سوْروشدو:
- یامسیلاماقدان اؤترو آدامی داما باسسایدیلار گره‌ک زیندانلار رادیو-تئلئویزیون اوْیونچولاری ایله دوْلو اوْلاردی؟!!
قئلیچی مورتوض دارغین-دارغین دئیندی:
- من رادیو-تئلئویزیون اوْیونچولاری کیمی خالقی یامسیلامامیشام کی!!
- هن بس نه؟!!- دئیه هامی بیر آغیزدان سوْروشدو.
- من آغازاده‌لری یامسیلاییب اونلار کیمی اوْغورلاماق ایسته‌دیم!
زیندانیلار بیر-بیری‌نین اوزونه باخیب سوُسدولار. یئنه بیری دیله گلدی:
- هله نه قدر اوْغورلاییب ایختیلاس ائله‌ییب‌سن؟!
قلئیچی مورتوض باشینی آشاغی سالدی:
- من بئلیمده مئشه‌دن اوْدون گتیریب ساتماقلا اهل-عیالیمی گئچیدیریرم. دونن گؤردوم داها دیزلریمده گوج قالماییب او یئکه‌لیکده اوْدون شله‌سینی بازارا داشییام؛ بئینیمدن گئچدی قوْنشو کنددن بیر ائششک اوْغورلاریام......
بؤلوم: حیكایه و گولمه‌جه‌لر
+0 به‌ین
بیزیم دلی خانا...
دوکتور جئری
موفتّیش دلی‌خانادان گؤروش ائتمکده ایدی. بیرینجی اوتاغا گئچدیلر. بیر دلی ماسانین دالیندا اوتورب نسه یازماقدا ایدی.
- بونون نه‌یی دیر؟-دئیه موفتّیش سوروشدو.
دلی‌خانین باشقانی گولومسوندو:
- قوربان بو اؤزونو احمد کسروی سانیر؛ آذری دیلی نظریه‌سی‌نین اوستونده ایشله‌ییر، یازیر- یازیر سونرا جیریب تؤکور یئره؛ یئنه تزه‌دن باشلاییر یازماغا...
ایکینجی اوتاغا گئچدیلر. بیر دلی اوتاقدا وار-گل ائده‌رک ویر-ویر تؤکوردو:
- رایانه، زایانه، خایانه، پازانه، چایانه، وایانه، یارانه، هایانه، لایانه....
موفتّیش یئنه سوروشدو:
- بونون نه‌یی دیر؟!
دلی خانانین باشقانی یئنه گولومسوندو:
- قوربان بو دا اؤزونو "فرهنگستان زبان فارسی" قورومونون رئیسی سانیر، گون چیخاندان گون باتانادک یورولمادان سؤزوجوک دوزلدیر.
اوچونجو اوتاغا گئچدیلر. دلیلرین بیری تاواندان آسلمیش پنکه‌دن یاپیشیب فیرلاناراق، "تا..تا..تا..تاتا..تاتاتا..تات" دئیه آفتومات(مسلسل) سسی چیخاردیردی.
موفتّیش شاشیردی:
- بونون نه‌یی دیر؟!
دلی خانین باشقانی یئنه گولومسوندو:
- قوربان، بو اؤزونو اؤلکه قورجوسو ساناراق فارس دیلی‌نین دوشمنلرینی قورشونلاییر.
موفتّیش ال-آیاغا دوشدو:
- تئز اولون بونو یئندیرین آشاغی.. ایندی دوشوب قول-قیچی سینار..
گولوش دلی‌خانا باشقانی‌نین دوداغیندان قاچدی. الینی قووزایب وار گوجو ایله موفتّیشین قولاغی‌نین دیبینی قیزیشدیردی:
- آخماغین بیری آخماق!!.. ایسته‌ییرسن پان‌تورکیست‌لر ایرانی پارام-پارچا ائله‌یه‌لر؟...
بؤلوم: حیكایه و گولمه‌جه‌لر
+0 به‌ین
پیشیک یئمه‌میشم
دوکتور جئری
شیخ آغا جوما آخشامی قلئیچی مورتوض‌گیله قوناق گئتمیشدی. اؤپوش- گؤروشدن سونرا قلئیچی‌مورتوض، دده‌لیگی‌نین سارالمیش اوزونه سای سالدی:
- قوربانین اولوم دده! رنگین-روفون نییه قاچیب؟!.. خسته-مسته دئییلسن؟!...
شیخ آغا الینی اورگی‌نین اوستونه باسدی:
- اورگیم آغرییر!
قلئیچی مورتوض نیگران اولدو:
- زنگ وورادین، گلردیم آپاراردیم دوکتورا!!
- گئتدیم.. سحر دوکتور جئری‌نین مطبینده ایدیم..
- یاخشی!.. نه دئدی؟..
- دئدی: اورگیمین دامارلاری دارالیب...
- داوا-درمان نه یازدی؟
شیخ آغا باشینی آشاغی سالدی:
- دوزونو ایسته‌سن بو گون چوخراق داوا-درمانا گؤره بورا گلمیشم!..دوکتور دئدی، اورگیمین دامارلارینی آچماق اوچون گره‌ک ویسکی ایچم. اؤزون بیلیرسن من آبیرلی-ناموسلی بیریسی‌یم، من کیمه دئییم منه ویسکی تاپسین...
قلئیچی مورتوض دده‌لیگی‌نین سؤزونو کسه‌رک:
- دده به‌یم من اؤلموشم؟!..- دئییب، تئز جیب تئلفونونو چیخاردیب خالاسی اری کئفلی ایسکندر زنگ ووراراق احوالاتی اولدوغو کیمی آنلاتدی.
یاریم ساعات سونرا کئفلی ایسکندر بیر قاب عاراق، اوچ-دؤرد پورس کاباب ایله قلئیچی مورتوض گیلده حاضیر ایدی.
شیخ آغا عاراغی گؤزدن گئچیره-گئچیره دیللندی:
- دوکتور منه دئییب ویسکی ایچیم بو کی آچیق عاراقدیر؟!!
کئفلی ایسکندر گوله-گوله:
- آغا! ویسکی اولمایان یئرده آچیق عاراق، ویسکی ثاوابی وئرر..-دئدی.
قلئیچی مورتوض سوفره‌نی آچینجا شیخ آغا ایله کئفلی ایسکندر ییئیب ایچمگه باشلادیلار. کئفلی ایسکندر آرا وئرمه‌دن بارداقلاری آرد-آردا دولدورودو. بیردن شیخ آغانین حالی یامان قاریشدی. الینی آغزینا باسیب ائشیگه قاچدی. آردیجا کئفلی ایسکندر ایله قلئیچی مورتوض دا ائشیگه قاچدیلار. شیخ آغا کردی‌نین قیراغیندا اوتوروب قوسوردو. قئلیچی مورتوض اگری- اگری کئفلی ایسکندره باخدی:
- سنه کیم دئدی، آچیق عاراق گتیره‌سن؟!.. به‌یم بیلمیرسن بونا هرنه پوخدان قاریشدیریرلار؟!..
شیخ آغانین هوشو باشیندان چیخدی.
- ایندی من نئیله‌ییم؟!
قلئیچی مورتوض باش-گؤزونه تاپداماقدا ایکن، پیشیکلری-مخمر- گلیب آغانین قوسونتولاردان ییئیب-یئییب اؤلدو.
قئلیچی مورتوضون دردی بیر ایدی اولدو ایکی:
- ائی وای دده‌م ائی وای.. ائی وای پیشیگیم ائی وای!!...
کئفلی ایسکندر آفتافا ایله شیخ آغانین اوزونه سو سپیردی. هاندان-گئجدن شیخ آغا آییلدی:
- اوغلوم مورتوض بونلار نمنه‌دیر؟
قلئیچی مورتوض زایلدادی:
- دده حالیز خاراب اولوب یئدیکلریزی قایتاردیز.
شیخ آغا ساییقلایا-ساییقلایا قایتاردیقلارینی سایماغا باشلادی:
- اوغلوم دوزدور؛ من کاباب یئمیشم، خییار یئمیشم، بامادور یئمیشم، دکل یئمیشم، پول یئمیشم، یئر یئمیشم...
سونرا پیشک اؤلوسونو گؤستره‌رک آرتیردی:
- آنجاق نه قدر فیکر ائله‌ییرم یادیما گلمیر نه زامان پیشیک یئمیشم؟!!
بؤلوم: حیكایه و گولمه‌جه‌لر
+0 به‌ین
اوغروباشی
دوکتور جئری
حاجی روستم شهرین وارلی-کارلی آداملاریندان بیری ساییلسادا سون اوچ-دؤرد ایلین ایچینده بللی اولمایان ندنلره گؤره الی داریشلیغا دوشموشدو. حاجی روستم قاباقلار، دوست-تانیشا اوز سالیب بورج ائله‌یه‌یرک ائوینی بیر تورلو گئچیندیردی آنجاق بورج وئرنلرین سایی گئت-گئده آزالینجا معیشیتی چتینلیگه دوشدو. هر یاندان الی اوزولن حاجی روستم سونوندا علاجسیز قالاراق اوغلو کابلا زؤهرابا ایلیشدی. البته،کابلا زؤهراب اؤنجه‌لری آز-چوخ دده‌سی‌نین الیندن یاپیشیب یاردیم ائدیردی آنجاق نه یازیق اونوندا دورمو قولایلاشیب خیرتدگه‌جن بورجا باتمیشدی.
بیر گون کوچه‌ده بؤیوک بیر قیامت قوپدو. حاجی روستم،کابلا زؤهرابین ائوینی باسیب ور-وسایلینی ائشیگه تؤکمک ایسته‌ییردی. ایش، پولیسه، محکمه‌یه چکدی. محکمه‌ده، حاجی روستم بیر حیط قابالاسینی قاضی‌نین قاباغینا قویاراق مدعی اولدو؛ ییرمی ایل بوندان قاباق حیطینی اوغلونا کرایه وئریب ایندیسه احتیاجی اولدوغو اوچون بوشاتماسینی ایسته‌ییر! قارشیدا، کابلا زؤهرابدا جیبیندن اپریمیش بیر قولنامه چیخاردیب مدعی اولدو، ییرمی ایل بوندان قاباق دده‌سی حیطی ایکی یوزمین تومنه اونا ساتیب‌دیر. قاضی قابالایا ایله قولنامه‌نی اوخویاندان سونرا دئدی؛ دعوا طرفلری، ایدعالارینی ثابیت ائله‌مک اوچون شاهید گتیرملی‌دیرلر.
ائرته‌سی گونو، حاجی روستم، قارداشی اوغلو، کئفلی ایسکندرین یانینا گئدیب اوندان شاهید گئچمه‌سینی ایسته‌دی. بو گؤرشدن ساعات یاریم اؤتمه‌میش کابلا زؤهراب کئفلی ایسکندرین یانیندا ایدی. کئفلی ایسکندر الینی گؤزونه باساراق ایکیسینه ده شاهید گئچه‌جگینی سؤیله‌دی.
بو اولایدان ایکی آی سونرا، حاجی روستم ایله زؤهراب یئنه محکمه‌ده ایدیلر. قاضی پرونده‌نی اوخویوب دده-بالادان اوچ-دؤرد سورغو سوروشوندان سونرا کئفلی ایسکندری شاهید عونوانیندا یئرلشگه‌یه چاغیریب دوغرونو سؤیله‌یه‌جگینه آند ایچدیردی.
قاضی سوروشدو:
- بو حیط حاجی روستمین دیر؟!
کئفلی ایسکندر عمیسی‌نین اوزونه باخا- باخا میزیلدادی:
- یوخ! حیط حاجی روستمینکی دئییل!
حاجی روستم قیزغین-قیزغین یئریندن قالخماق ایسته‌دیگینده قاضی گؤزونو بره‌لتدی؛ کابلا زؤهرابین دوداغی قاچدی.
قاضی یئنه سوروشدو:
- بئله ایسه حیط کابلا زؤهرابین دیر؟
کئفلی ایسکندر بو کز عم اوغلوسون اوزونه باخا- باخا میزیلدادی:
- یوخ! حیط کابلا زؤهرابینکی دا دئییل!
گولوش کابلا زؤهرابین دوداغیندان قاچدی. قاضی شاشیردی:
- بئله ایسه حیط کیمینکی دیر؟!!
- حیط نه حاجی رستمینکی دیر، نه کابلا زؤهرابین!... اوتوز ایل بوندان قاباق بو حیط، ائل چیمنلیگی ایدی. حاجی روستم، کاتدا ایسلاما بیر چالخام کره، بیر پتک بال، بیرده بئش یوز مین تومن پول وئره‌رک چیمنی قاپسادی. البته کاتدا ایسلام تک باشینا بو ایشی گؤرمه‌دی،فرماندارین الی ایله گؤردو. فرماندار باجی اوغلوسو شهردارا بویوروق وئردی: ائل چیمنلیگی شهر محدوده‌سینه داخیل ائدیلیسن. البته بو آرادا فرماندارین بئلی داییسی اوستاندارا برک ایدی. اوستاندار بو کیمی ایشلرده ، خالا اوغلوسو شهرچی‌لیک وزیریندن گره‌کن ایجازه‌لری آلا بیلیردی ، وزیر ......
قاضی توخماغینی میز اوستونه تاپدایاراق کئفلی ایسکندرین سؤزونو کسیب قاپی آغزیندا دایانان گؤزتچیینی چاغیریب قولاغینا پیچیلدادی :
- بو کئفلینی تئز ائشیگه اؤتور یوخسا اؤلکه‌ده هامینی اوغرو چیخارداجاق!!...
بؤلوم: حیكایه و گولمه‌جه‌لر