گؤبك آتماق!

دوكتور جئری

اوستاد دفتری نین یازدیغی كیتابی پروفسور نصرالدینه گؤستریب:

- اوستاد دفتری، تاریخ و كولتوروموز حاققیندا  بتر بیر كیتاب یازیب، اوخویوبسان می؟- دئدیم.

پروفسور گؤزونون قیراغییلا كیتابا باخدی.

- گؤبك آتمیش!

- نه؟!...

پروفسورون یئرینده دیكه لیب كؤكسونو آریتلادیغیندان مثل چكه جگینی آنلادیم.

- بیر گون، اوغرولار وارلی بیر كیشی نین ائوینه دوشوب وار یوخونو ییغیب ییغیشدیردیقدان سونرا ائو خانیمیندان ایسته ییرلر قاباقلاریندا اویناسین. قادین دیره نیر آنجاق اوغرولار پیچاغی كیشی نین بوغازینا دایایینجا اویناماق زوروندا قالیر. قادین بیر آز اوینایب آیاغی قیزینجا باشلاییر گؤبك آتماغا. بو دوروم اوغرولاری قیزغینلاشدیریب یومولوب قادینین پالتالارینی اگنیندن چیخاردیرلار...

  ائرته سی گون قاپی – قونشو قادینین چیغیر- باغیر، آغلاما سسیندن كیشی نین ائوینه تؤكولورلر. كیشی  قادینی آتمیشدی دگنگین آلتینا. قونشولار قادینی، كیشی نین الیندن آلیب سوچونو سوروشورلار. كیشی اولانلاری آنلادیر. قونشولار شاشقینلیقلا:

- قادینین نه سوچو وار او سنین جانینی قورتارماق اوچون اویناماق زوروندا قالمیش- دئییرلر.

كیشی یئنه  اؤفكه له نیر:

- اونو اویناماق زوروندا قویموشدولار نه گؤبك آتماق!

كیتابی میزین  اوستونه بوراخیب دئدیم:

- بو مثلین نه دخلی وار اوستاد دفتری نین كیتابینا ؟

پروفسور گولومسوندو:

- هئچ، بیزیم بو اوستاد دفتری ده كیتابی باسیلسین دئیه كولتوروموزو تاپدالایانلاری گؤبك آتارجاسینا اؤگموش!

سؤزلوك:

دیرنمك : مقاومت ائتمك

كؤكس: سینه

زوروندا قالماق: مجبوریتینده قالماق

دوروم: وضعیت

سوچ : گناه

اؤفكه لنمك: حیرس لنمك، قیزماق

اؤگمك: مدح ائتمك