دوکتــــور جـئــــــری
ساتاشما ادبیاتی
گؤروشلر : 0
تاريخ : جمعه 12 آبان 1396 | یازار : دوکتور جئری
+0 به‌ین

 اللی ایل سونرا اورمو گؤلو یئنیدن دیریله‌جک!

دوکتور جئری

   اوستاد دفتری اورمو گؤلونون سون هاوا شکیل‌لرینی گؤزدن  گئچیردیکدن سونرا میزین اوستونه بوراخدی:

- نیگرانچیلیق یئری یوخدور!

آیدین موعللیم اؤفکه‌لندی:

- نئجه نیگرانچیلیق یئری یوخدور... قورومامیش ال ایچی‌ قدر یئر قالیب اودا بو گون، صاباح قورویاجاق اوندا سن دئییرسن...

- نیگرانچیلیق یئری یوخدور! - دئیه اوستاد دفتری یئنه سؤزلرینی تکرارلادی.

چاش-باش اولموشدوق:

- اوستاد! اولمایا خبریمیز اولمایان خبردن خبرینیز واردیر؟.. گؤی ییرتیلیب یاغیش می یاغاجاق یوخسا دؤولت، خلیج همیشگی فارسین سویونو اورمو گؤلونه بوشالداجاق؟!!

اوستاد درین بیر سولوق آلدیقدان سونرا دئدی:

- یوخ.. یوخ.. هئچ بیری.. بو گئدیشله اورمو گؤلون چؤللشمه‌سی قاچینیلمازدیر آنجاق نیگرانچیلیق یئری یوخدور.. اللی ایل سونرا اورمو گؤلو یئنه دیریله‌جک..

- اللی ایل سونرا اورمو گؤلو یئنه دیریله‌جک می؟!!-دئیه هامیمیز بیردن سسلندیک.

اوستاد دفتری باشی ایله سؤزوموزو دوغرولادی:

- اللی ایل سونرا، گلن نسل‌ اورمو چؤلونه باخاراق بیزی آنیمساییب یئره توپوردوکده گؤل یئنیدن دیریله‌جک..





گؤنده ر 100 درجه کلوب دات کام گؤنده ر     بؤلوم لر: آجی گولوشلر
گؤروشلر : 0
تاريخ : جمعه 6 فروردین 1395 | یازار : دوکتور جئری
+0 به‌ین

اؤلمکده شانس گتیرمک

دوکتور جئری

     شانس، یاشامیمیزدا ائتکین رول اویناماقدادیر . اوْلومدان اؤلومه‌دک، آلین یازیمیزی شانس یازیر دئسک یانیلمامیشیق. شانس اؤلومدن سونرا بئله بیزدن ال چکمیر. شانس گتیرسک اؤلومدن سونرا مزارلیغین یاخشی یئرینده  قبریمیز قازیلاجاق، آدیمیز کوچه- خیابانا تاخیلاجاق، شهرین اورتاسیندا هئیکلیمیز،‌ آبیده‌میز تیکله‌جک. شانس گتیرمه‌سک؛ ستارخان کیمی سردار اولساق غریب دوشه‌جه‌ییک، قاچاق نبی قدر قوچاق اولساق ایتکین. شانس گتیرمه‌سک؛ جیلولوقدا  سلماسدا، سولدوزدا، اورمودا ائرمنی‌لر الینده اؤلدورولن یوز مینلر آذربایجانلی کیمی، اوزه‌ریمیزده ائولر-خیابانلار تیکلیمیش توپلو قبیرلرده سونسوزادک اویویاجاغیق، یاد-بات اولاجاغیق. آدیمیزا بیر آبیده بئله تیکیلمه‌یه‌جک نییه‌کی تیکیلیرسه، قاراباغی ایشغال ائتمیش ائرمنی‌لر، خوجالی فاجیعه‌سینی تؤرتمیش داشناقلار بیزدن کوسه‌جکلر، بیزدن ایشیق- گاز آلمایاجاقلار، اوشاقلاری گئجه‌لری قارانلیقدا، قیشلاری سویوقدا قالاجاقلار. شانس گتیرمه‌سک، کوردلوکده اؤلدورلن اون مینلر آذربایجانلی کیمی اؤرت-باسدیر اولاجاغیق، یادداشلاردن سیله‌نه‌جه‌ییک نییه‌کی، بئله اولمازسا باتی‌ ‌آذربایجانی، قوزئی کوردستان سانان یئنی سیمیتقولار بیزدن اینجییه‌جکلر، تورپاغیمیزی خریطه‌لریندن سیله‌جکلر. شانس گتیرمه‌سک، فیرقه‌لیکده فارس قوشونو الینده اؤلدورولن مین‌لر آذربایجانلی کیمی یئرین ترکینه گیریب خاین آدلاندیریلاجاغیق. آدیمیزین اؤزه‌رینه لکه یاخیلاجاق نییه‌کی عکس تقدیرده اؤلکه‌ده اولوسال دایانیشما زده‌لنمیش اولاجاقدیر.

قارداشلاریم!..

سویداشلاریم!..

یوردداشلاریم!...

گلین تانری‌ قاتیندا آلین یئره سورتوب یالواریب یاخاراق:

تانریم!

بیزی اؤلدورتمک ایسته‌ییرسن، بیزی ائرمنی‌لرین، کورلردین، فارسلارین الینده اؤلدورمه! بیز اونوتولماق ایسته‌میریک...

تانریم!

بیزی اؤلدورتمک ایسته‌ییرسن اؤز الیمیزله، تورک الی ایله اؤلدور. نییه کی یالنیز چالدیران ساواشیندا اؤلن تورکلرین یادینی عزیزله‌مک اوچون،  کیتابلار یازیلیر، فیلم‌لر چکیلر، توپلانتی‌لار گئچیریلیر، هئیکل‌لر تیکیلیر، آبیده‌لر یوکسه‌لیر!

 بیز اونوتولماق ایسته‌‌میریک تانریم! بیزی اؤز الیمیزله اؤلدور...





گؤنده ر 100 درجه کلوب دات کام گؤنده ر     بؤلوم لر: آجی گولوشلر
گؤروشلر : 0
تاريخ : جمعه 18 دی 1394 | یازار : دوکتور جئری
+0 به‌ین

هئچ نیفرینین یئری دیر؟!

دوکتور جئری 

     شئیخیمیز آغ مندیلینی اوزونه باساراق هؤنکور- هؤنکور آغلادی. بورونون چکیشی نئچه کره بلندگودا یانقیلاندی:

- نیفرین اولسون سنه ائی آل سعود..

جاماعات سس سسه وئره‌رک قیشقیردی:

- نیفرین!

شئیخیمیز ایچینی چکدی:

- نیفرین اولسون سنه ائی آل سعود.. نئجه قییدین او بؤیوکلوکلده عالیمی، شئیخلرین شئیخینی اؤلدوره‌سن؟!...

جاماعات یئنه قیشقیردی:

- نیفرین!

- ائی قان تؤکن آل سعود، شئیخین گوناهی اولموش اولسایدی دا، نییه آجیماسیزجاسینا بوینونو ووردون؟... ائله‌یه بیلمزدین ائوینده دوستاق ائده‌سن؟! ائله‌یه بیلمزدین برقینی، سویونو، گازینی، تئلفونونو کسه‌سن، ائوی‌نین قاباغینادا بیر گؤزتچی قویاسان باییرا چیخماسین، اؤز اجلی ایله اؤلسون؟!....

- نیفرین!

قهر شئخیمیزین بوغازینی توتدو:

- ائی آللاهدان خبرسیز آل سعود!.. ایندیکی شئیخی اؤلدوروبسن... نییه جنازه‌سینی تحویل وئرمیرسن؟...

مینبرین قاباغیندا اوتورموش قلئیچی مورتوض دوشونجه‌یه دالدی:

- کئشکه شئیخین جنازه‌سینی بیزه تحویل وئره‌لر!... اوندا بیزیمده  ایمامزادامیز اولار.... اوندا مجبور اولماریق محرملیکده یوخاری ترس‌آوانین ایمامزاداسینا گئده‌ک..آلچاق یوخاریلار ایله اوز- اوزه، گؤز- گؤزه گلک... دیلسیز، آغیزسیز پوللاری اونلارین جیبنه تؤکک... آخخخ.. بیزیمده ایمامزادامیز اولسایدی نه اولاردی؟!... آللاه لعنت ائله‌سین آل سعودا؛ گؤره‌سن شئیخین جنازه‌سی‌نین هاردا قویلاییب؟!..

آل سعودون آدی قلئیچی مورتوضون خیالینا گیرینجه بیردن آیاغا قالخیب اوجا سسله قیشقیردی:

- نیفرین‌!

جاماعات بیر بیری‌نین اوزونه باخدی. کیمیلری‌نین دوداغی قاچدی. قلئیچی مورتوض شیرین خیاللارا دالاندان یاریم ساعات اولاردی شئیخیمیز سئچکیلره گؤره دانیشیردی. شئیخیمیز أیری-  أیری قلئیچی مورتوضا باخیب دئیندی:

- هئچ نیفرینین یئری دیر؟!

 

Heç nifrinin yeridir?!

Dr.Jery

   

    Şeyximiz ağ məndilini üzünə basaraq hönkür- hönkür ağladı. burunun çəkişi neçə kərə büləndquda yanqılandı:

- Nifrin olsun sənə ey Ale-səud..

    Camaat səs səsə verərək qışqırdı:

- Nifrin!

    Şeyximiz içini çəkdi:

- Nifrin olsun sənə ey Ale-səud… necə qıydın o böyüklükdə alimi, şeyxlərin şeyxini öldürəsən?!...

    Camaat yenə qışqırdı:

- Nifrin!

- Ey qantökən Ale-səud, şeyxin günahı olmuş olsaydı da, niyə acımasızcasına boynunu vurdun?... eləyə bilməzdin evində dustaq edəsən?! eləyə bilməzdin bərqini, suyunu, qazını, telfonunu kəsəsən, evinin qabağınada bir gözətçi qoyasan bayıra çıxmasın, öz əcəli ilə ölsün?!....

- Nifrin!

    Qəhr şeximizin buğazını tutdu:

- Ey Allahdan xəbərsiz Ale-səud!.. indiki şeyxi öldürübsən... niyə cənazəsini təhvil vermirsən?...

    Minbərin qabağında oturmuş Qəleyçi murtuz düşüncəyə daldı:

- Keşkə şeyxin cənazəsini bizə təhvil verələr!... onda bizimdə imamzadamız olar.... onda məcbur olmarıq məhərrəmlikdə yuxarı Tərsavanın imamzadasına gedək..alçaq yuxarılar ilə üz- üzə, göz- gözə gələk... dilsiz, ağızsız pulları onların cibinə tökək... axxx.. bizimdə imamzadamız olsaydı nə olardı?!... Allah lənət eləsin Ale-səuda; görəsən şeyxin cənazəsinin harda quylayıb?!..

    Ale-səudun adı Qəleyçi murtuzun xəyalına girincə birdən ayağa qalxıb uca səslə qışqırdı:

- Nifrin!

    Camaat bir birinin üzünə baxdı. Kimilərinin dodağı qaçdı. Qəleyçi murtuz şirin xəyallara dalandan yarım saat olardı şeximiz seçkilərə görə danışırdı. Şeyximiz əyri- əyri Qəleyçi murtuza baxıb deyindi:

- Heç nifrinin yeridir?!





گؤنده ر 100 درجه کلوب دات کام گؤنده ر     بؤلوم لر: آجی گولوشلر
گؤروشلر : 0
تاريخ : سه شنبه 9 تیر 1394 | یازار : دوکتور جئری
+0 به‌ین

لوطفن گولومسه‌یین!

دوکتور جئری

 

اولوسوم!

دیلین دیلیم- دیلیم دوغرانیرسا اوزولمه!

موسیقین تئل-تئل قیریلیرسا اوسانما!

کیتابین یارپاق- یارپاق جیریلیرسا داریلما!

تئاترین پرده- پرده قاپانیرسا هویوخما!

فیلمین فریم- فریم کسیلیرسه داریخما!

تاریخین دؤنم- دؤنم ساپدیریلیرسا چاشیرما!

گؤلون دالغا- دالغا قورویورسا شپه‌لنمه!

تورپاغین  معدن- معدن چاپلیرسا دیکسینمه!

یوردون اویماق- اویماق قاراباغلاشیرسا  قایغیلانما!

چؤرگین اکمک- اکمک کرپیجلشیرسه آجیقلانما!

آبیده‌ن ارک- ارک سؤکولورسه، ییخیلما!

اوغولون سورگون-سورگون کؤچورسه سارسیلما!

قورخما!

قورخما باخ!

بوجاغی گؤسترن بارماغا باخ!

:لوطفن گولومسه‌یین‌!

سیز گیزلی کامئرا (دوربین) قارشیسینداسینیز!

 

Lütfən gülümsəyin!

Dr.Jery

 

Ulusum!

Dilin dilim-dilim doğranırsa üzülmə!

Musiqin tel-tel qırılırsa usanma!

Kitabın yarpaq-yarpaq cırılırsa darılma!

Teatrın pərdə-pərdə qapanırsa huyuxma!

Filmin frim-frim kəsilirsə darıxma!

Tarixin dönəm-dönəm sapdırılırsa çaşırma!

Gölün dalğa-dalğa quruyursa şəpələnmə!

Torpağın mədən-mədən çapılırsa diksinmə!

Yurdun oymaq-oymaq Qarabağlaşırsa qayğılanma!

Çörəyin əkmək-əkmək kərpicləşirsə acıqlanma!

Abidən ərk-ərk sökülürsə yıxılma!

Oğlun sürgün-sürgün köçürsə sarsılma!

Qorxma!

Qorxma bax!

Bucağı göstərən barmağa bax!

: Lütfən gülümsəyin!

Siz gizli kamera qarşısındasınız!

 





گؤنده ر 100 درجه کلوب دات کام گؤنده ر     بؤلوم لر: آجی گولوشلر
گؤروشلر : 0
تاريخ : جمعه 24 مرداد 1393 | یازار : دوکتور جئری
+0 به‌ین

آنادیلیمیزین مودافیعه‌چیسی، دده جواد هئیت عریضه‌میزی تانری‌نین حوضورونا آپاردی..



آچار سؤزلر : دده,

گؤنده ر 100 درجه کلوب دات کام گؤنده ر     بؤلوم لر: آجی گولوشلر
گؤروشلر : 0
تاريخ : جمعه 17 مرداد 1393 | یازار : دوکتور جئری
+0 به‌ین

بیر میللتی نئجه سوْی‌قێرێم ائتمك اوْلار؟

دوكتور جئری

     پادشاه، "پرنس" كیتابێنێ ماسانێن اۆستۆنه بۇراخاراق اۆزۆنۆ ماكیاوئللی‌یه تۇتدۇ:

-‌ اؤلكه‌ده اوْلان اؤزگه میللت‌لری نئجه سوْی‌قێرێم ائتمك اوْلار؟

نیكوْلوْ گۆلۆمسۆندۆ:

-‌ بیر میللتی سوْی‌قێرێم ائتمك اۆچون مین بیر یوْل وار!

پادشاهێن گؤزلری ایشێلدادێ:

-‌   مین بیر یوْل؟!...

-‌ ائله‌دیر قۇربان!

-‌ سای‌سانا؟...

-‌ بیرینجیسی؛ آنا دیللرینی اللریندن آلاسان!

پادشاه یئرینده دیكلندی:

-‌  اوْ بیری یوْللار؟...

- آنا دیللرینی آلسان اوْ بیری یوْللارا گره‌ك قالمایاجاقدیر پادشاهێم!

 

 

آردێندا یازێنی لاتین الیفباسێندا اوْخویا بیلرسینیز

 


آردینی اوخو/Ardını oxu


گؤنده ر 100 درجه کلوب دات کام گؤنده ر     بؤلوم لر: آجی گولوشلر
گؤروشلر : 0
تاريخ : پنجشنبه 10 مرداد 1392 | یازار : دوکتور جئری
+0 به‌ین

قونشویا ایسته!

دوكتور جئری

 

آذربایجانلی‌لار

آلتمیش نئچه ایل دیر

باغیر.. باغیر ..باغیرراق

باغیمسیزلیق ایسته‌ییرلر

اؤزگورلوك ایسته‌ییرلر

اولوسال...

          اؤلكه

دؤولت

مجلیس

دیل

بایراق

اوردو

پارا

دامغا...

ایسته‌ییرلر

فلسطینلی‌لره





گؤنده ر 100 درجه کلوب دات کام گؤنده ر     بؤلوم لر: آجی گولوشلر
گؤروشلر : 0
تاريخ : سه شنبه 15 اسفند 1391 | یازار : دوکتور جئری
+0 به‌ین

چؤرك، آزادلیق و ائرمنی مظالیمی

دوكتور جئری

آذربایجانین اورمو ، سلماس شهرلرینده چؤركدن سؤز دوشنده ، " اوشاغا بوتون چؤرك وئرمزلر"  دئیه بیر مثل چكیلَر. اینانجا دؤنوشموش بو مثلین نئجه تؤرَندیگینی آغ ساققاللارین بیریندن سوروشدوم. درین بیر آخ چك‍‍‍‍‍‍‍یب دئدی:

- جیلولوقدا، ائرمنی قولدورلاری كندلرین بیرینه باسقین ائدیرلر. خالق قورخودان، داها اؤنجه كندین مسجیدینه سیغینمیشدی . كندی بوش سانان ائرمنی لر، ائولری تالاماغا قالخیشیرلار. بو آرادا مسجیدده بیر اوشاق چؤركدن اؤترو آغلاماغا باشلاییر. هارادان یاریم پارچا چؤرك تاپیب اوشاغا وئریرلر آنجاق اوشاق  بوتون چؤرك ایسته یرك داها بركدن آغلاییر. سس باییرا چیخیر.  ائرمنی لر مسجیده آخیشیب  كندلیلری قورشون یاغمورونا توتورلار. بو اولایدان جان قورتاران بیر یارالی، سونرالار بو احوالاتی باشقالارینا دانیشیب مثلین تمل داشینی قویور.

قوجانین سؤزلرینی دینله یه لی دوشونوردوم؛ گؤره سن اوشاقلیقدان یاریم چؤرگه اؤیرشدیگیمیزدن دیر، اوروپالیلار كیمی اقتصادی بونالیملاردا (بحرانلاردا) چومچه نی قابلامایا چالاراق اعتراض و دیلله نیشلریمیزی بیلدیرمیریك یوخسا بیر آیری ندنی وار؟ سونرا فیكریم تاریخ بویو آدی چؤرك ایله قوشا چكیلن آزادلیق قاورامینا گئتدی. دئییرلر،"آزادلیق چؤرك دئییل چؤركدن واجیب دیر"؛بو سؤز دوزدور.آزادلیق چؤرك اولسایدی یاریمینا قانع اولماقلا باشیمیزی دولاندیرا بیلردیك آنجاق آزادلیق چؤرك دئییل و اونون اوچدن بیر، دؤرددن بیر طلبینده بئله جان قورخوسو وار!...





گؤنده ر 100 درجه کلوب دات کام گؤنده ر     بؤلوم لر: آجی گولوشلر
گؤروشلر : 0
تاريخ : دوشنبه 27 آذر 1391 | یازار : دوکتور جئری
+0 به‌ین

چیلله زلزله دادی ایله

دوكتور جئری

بؤیوك بیلگین ابونصر فارابی-دن ساز چالماسینی ایسته ییرلر، ابونصر سازی آلیب چالا-چالا باشلاییر اویناماغا. ندنینی سوروشاندا، دئییر:

- بئله لیكله، ساز چالماقلا یاناشی اویناماق باجاردیغیمی دا ایسته دیم  بیلدیرم.

دئییرلر سؤز سؤزی گتیرر آرشین بئزی.شاختالی چووغونلو چیلله نین گلمه سی ایله، دؤولتین قاراداغ زلزله گؤرموش اهالیسینه ایكی آیدا ائو تیكه جگی نین لنگیمه سی سؤز دوشدوگونده اوسته كی حیكایه یادداشیمدا جانلاندی. آنلاشیلان دؤولتده ایسته ییر، زلزله اوچونتولاریندا اینسانلاری قورتارماقدا باشاریلی اولدوغونو گؤسترمكله یاناشی بو فلاكت گؤرموشلری قار آلتیندان چیخارماقدا دا باجاریقلی اولدوغونو دونیایا پئش چكسین!...

تانری میللتیمیزی، دؤولتین باشقا باجاریقلاریندان قوروسون. آمین



آچار سؤزلر : زلزله, چیلله,

گؤنده ر 100 درجه کلوب دات کام گؤنده ر     بؤلوم لر: آجی گولوشلر
یارپاق لار: [1]
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :