دوکتــــور جـئــــــری
ساتاشما ادبیاتی
گؤروشلر : 0
تاريخ : دوشنبه 22 اسفند 1390 | یازار : دوکتور جئری
+0 به‌ین

آدم- ین گونده لیكلری

یازان : مارك تواین

كؤچورن : دوكتور جئری

 

  بیرینجی بؤلوم 

  اویاندیغیمدا یالقیز دئییلدیم آرتیق. اوزون ساچلی بیر یاراتیق تاپیلمیشدی یانیمدا. 

سود گونو

  او درین یوخویا  دالدیغیم سیرادا باشیما بیر اویونلار گلمیش اولمالی. كؤكسومون سول یانینداكی یارا ایزیندن آنلاییرام بونو. آغری – ماغری یوخدور آنجاق یئنی یاراتیغین داها ایلك اورتایا چیخیشییلا بئله  بیر یارا ایزی بوراخماسی، موتلو اولایلاری گؤزله مه جگیمی گؤستریر.

  دوز گونو

  بو اوزون ساچلی یئنی یاراتیق بیر آن بئله اسكیك اولمورچئورمدن. نه یانا دؤنسم قارشیمدا، هارایا گئتسم آردیمدا. خوشوما گئتمیر بو ایش. یانیمدا باشقا بیری نین اولماسینا آلیشیق دئییلیم. كئشكه او بیری حئیوانلارین یانینا گئتسه ده راحاتا قووشسام… هاوا بولودلو بوگون. یئل دوغودان اسیر. بلكه ده بیزی یاخشی بیر یاغیش گؤزله ییر. بیزی می؟ نه دئمك  ” بیزی ” ؟ بو سؤزو ده هارادان اؤیرندیم دوروب دوروركن؟ هاا، دوزدو، یئنی یاراتیق همیشه بئله دئییر قونوشوركن. 

  آرا گونو 

  یئنی یاراتیق آرا وئرمدن  دانیشیر. ان خوشلاندیغی شئی ده هر گؤردوگو نسنه یه بیر آد قویماق. منیم بو چوخ سئودیغیم بؤیوك چاغلایانا نیاگارا آدینی قویدو. ندن بئله دئدی ، بیر تورلو بیلمیرم. سؤزده، نیاگارا آدینا بنزر بیر گؤرونوشو وارمیش بو چاغلایانین. آخماقلیقدان، اركؤیونلوكدن باشقا بیر شئی دئییل بو گؤردوگو ایشلر. 

  من آرتیق هئچ بیر شئیه آد قویا بیلمز اولدوم. یئنی یاراتیق، قارشیما چیخان هر شئیه، آغیزیمی آچماق ایسته دیگیمدن اؤنجه آد قویور. قویدوغو هر آدی دا عئینی ندنله آچیقلاییر: ائله  بیر گؤرونوشو وارمیش او نسنه نین. طوطو قوشونو اؤرنك آلاق. سؤزده اینسان بو یئنی قوشا داها ایلك باخیشدا، اونون طوطودان باشقاسی اولمایاجاغینی همن آنلایا بیلرمیش. طوطو  دئدی، طوطو  قالدی قوشون آدی طبیعی. اؤفكه دن پاتلاییرام آرتیق، آمما منه سنمی دئمیر. طوطو ! گئرچكده، من نه قدر طوطو ایسم او قوش دا او قدر طوطو ! 

اود گونو

  یاغیشا قارشی بیر قوروناق دوزلتدیم اؤزومه ، آمما ایچ راحاتلیغییلا یارالانا بیلمه دیم. یئنی یاراتیق گلدی، زورلا ایچری سوخولدو. ائشیگه  آتماق ایسته دیگیمده، گؤرمه سینی ساغلایان ایكی دلیگیندن داملا داملا سولار آخیتدی اؤنجه، سونرا ایسلانان یاناقلارینی اللری نین ترسی ایله سیلدی، او بیری حئیوانلارین آغری چكركن چیخاردیقلاری سسه بنزر سسلر چیخارتدی. 

  بو دانیشماسی اولماسایدی هئچ اولماسا! دورماق دینجلمك بیلمیر. یازیق یاراتیغی پیس له مك یا دا بوش یئره سوچلاندیرماق ایسته دیگیم سانیلاجاق، آمما هئچ ده بئله بیر نییتیم یوخ. داها اؤنجه هئچ اینسان سسی ائشیتمه دیگیمدن، بوراداكی دوشسل یالنیزلیغیمین او اوجا سسسیزلیگینی پوزان هر یئنی غریبه گورولتو، بیر ایشگنجه اولور قولاقلاریم اوچون. بو یئنی سس چوخ یاخینیمدا اوسته لیك. چیگنیمن اوستونده، قولاغیمین دیبینده، بیر او یانیمدا بیر بو یانیمدا. اویسا من آز چوخ اوزاغیمدا اولان سسلره آلیشمیشام. 

  آینی گون 

  آد قویما ایشی سوروب گئدیر. من نه ائیله سم، نه ائتسم دورومو دگیشدیره بیلمیرم. آمما بو یئنی یاراتیغین، منه ترس دوشن منطیقیندن دولایی، حاقسیز اولدوغو آپ آچیق بیر شئی. 

  یاشادیغیمیز بو یئر اوچون چوخ گوزل بیر آد تاپمیشدیم. موزیك كیمی آخیجی بیر آد؛ جنّت باغچاسی. بو آدی آرتیق آچیقجا دئییل، آنجاق گیزلیدن گیزلییه ایشله دیرم. یئنی یاراتیق، اورمانی، داغلاری، چؤللری ایله بو یئرین هئچ ده بیر باغچایا بنزمه دیگینی سؤیله ییر. پاركا بنزه ییرمیش داها چوخ. سونوندا منه هئچ سورمادان، اؤز بیلدیگیجه یئپ یئنی بیر آد قویدو بو یئره: نیاگارا چاغلایانی پاركی. منجه بو ائتدیگینه زوربالیق دئییرلر. پاركدیر دئیه بئله بیر نشان بئله قویدو: 

  چیمنلری آیاقلاماق یاساقدیر 

  یاشامانین دادی دوزو قالمادی آرتیق. 

  یئللی گون

  یئنی یاراتیق چوخ میوه یئییر. یاخیندا میوه قیتلیغی چكه جه ییك بو گئدیشله، بو آغاجلار بیزه یئتمه یه جك.  ” بیز “  دئدیم یئنه. یئنی یاراتیغین سؤزو. ائشیده ائشیده من ده آلیشدیم بو سؤزه آرتیق. 

  بو سحر قویو بیر سیس واردی. بن سیسلی هاوادا ائشیگه چیخمارام. یئنی یاراتیق سیس دومان دینله مز. هاوانئجه اولورسا اولسون چیخار، دؤنوشده ده چامورلو آیاقلارییلا دالیر ایچری. یئنه دانیشیر، دانیشیر. 

سود گونو

  اسكیدن نه سسسیز، گورولتوسوز بیر یئردی بوراسی. بو سود گونلری ده گئت گئده داها داریخدیریجی اولور. گئچن خزل آیندا یئدیجه نین بو گونونون دیجلمگه آیریلماسی قرارلاشدیریلدی. اویسا داها اؤنجه یئددیجه ده آلتی دینجلمه  گونوم واردی منیم. بو سحر یئنی یاراتیغی، یاساق آغاجین آلمالارینی كسسك آتاراق دوشورمگه چالیشیركن سوچ اوستو یاخالادیم. 

  دوز گونو

  یئنی یاراتیق آدی نین حووا اولدوغونو سؤیله ییر. نه اولورسا اولسون، منی ایلگی لندیرمز، یانیما گلمه سینی ایسته دیگیم زامان بو آدلا چاغیرمالی بیله سینی. هئچ آردیمی بوراخمادیغی اوچون، چاغیرماغین گركسیز بیر شئی اولدوغونو سؤیله دیم. بو  ” گرك سیز “  سؤزوندن سونرا بیردن بیره سایغیسی آرتدی منه قارشی. آنلاشیلان سیخ سیخ ایشلتدیگیم چوخ ائتكیلی، یارارلی بیر سؤز بو. 

  یئنی یاراتیق اؤزونون دیشی اولدوغونو سؤیله ییر. بلكه ده اویدورور. هر نه ایسه، منی هئچ ایلگی لندیرمز. باشیمدان چكیب گئتسه ده بو چنه سیندن قورتولسام تك. 

  آرا گون 

  بوتون یؤره میزی آشاغیلیق نشانلارلا، چیركین بیرتاخیم آدلارلا ***لتدی: 

  موشتری تاپیلسا بو پاركین چوخ گوزل بیر یایلاق دینجلمه یئری اولابیله جگینی سؤیله ییر. یایلاق دینجلمه یئری اونون پارلاق تاپینتیلاریندان بیری داها قوپ قورو، آنلامسیز سؤزلر. نه ایمیش یایلاق دینجلمه یئری؟ آمما ان یاخشیسی سورماماق، اوزون اوزون آچیقلامالاری یورور انسانی چونكو. 

  آینی گون 

  ایندی ده، چاغلایانین اوست یانلاریندا سویا گیرمه مم اوچون بیر یالوارماغا باشلاییب. اونا نه ضرری  وار بونون آنلامیرام. اوره گی آغزینا گلیر قورخودان. آنلامادیغیم شئیلر. 

  من هر زامان سویا گیردیم اوردا. سرین سولارا آتلانماغین جوشقوسونو هر زامان سئودیم. چاغلایانلارین تك یاراری دا بودو منجه. هر شئی كیمی اونلارین دا بیر یاراری اولمالییدی. اونا قالیرسا چاغلایانلار سئیر ائدیلمگه یارارمیش آنجاق؛ عینی گرگدانلار  كیمی. 

  بیر كؤتوك ایچینده اوزدوم چاغلایاندا، ایستمه دی؛ بیر قاییق ایچینه گیردیم، اونو دا ایستمه دی. انجیر یاپراغیندان بیر گئیسی ایله، بورولاغانین  سورعتلی سولاریندا اوزدوم. اینجیر یاپراغی دارماداغین اولدو. او زاماندان بری، آشیری لیقلاریمدان یاخیناراق اوساندیریر منی. هئچ بیر شی ائده بیلمز اولدوم بوردا آرتیق. باشقا یئرلره گئتمك بلكه یاخشی اولاجاق منه. 

  یئللی گون

  گئچن آراگون گئجه سی قاچدیم. ایكی گون یول یورودوكدن سونرا ایسسیز بیر یئرده یئنی بیر قوروناق دوزلتدیم اؤزومه . ایزلریمی ده الیمدن گلدیگینجه اورتادان قالدیرماغا چالیشدیم. آمما یئنی یاراتیق، اؤزونه  آلشدیردیغی قورد آدلی بیر حئیوانلا ، آرایا آرایا گلدی منی بوردا دا تاپدی. منی گؤرونجه، یاناقلارینی دیرناقلایاراق سسلر چیخارتدی یئنه ، گؤرمه دلیكلریندن سولار آخیتدی. سونوندا اونونلا بیرلیكده اسكی یئریمه دؤنمك زوروندا قالدیم. آمما ایلك فورصتده قاچماغی دوشونورم. بیر داها دؤنمه مك اوزره! 

آغیل گؤتورمز شئیلره باش یورور. سؤزگلیشی، آسلان قاپلان دئیه آدلاندیریلان حئیوانلارین، بیربیرلرینی یئمه لرینی گركدیرن توردن بیر دیش یاپیسینا صاحیب اولماقلا بیرلیكده، ندن اوت، چیچك یییه رك یاشادیقلارینی آراشدیریر. لاپ آخماقلیق! بیربیرلرینی یئمه لری، بیربیرلرینی یوخ ائتمه لری دئمك اولوردو. بوندان دا  ” اؤلوم “  دئییلن شئی دوغاردی، منیم بیلدیگیم. اویسا، منه سؤیلندیگینه گؤره اؤلوم داها بو پاركا اوغرامامیشدی. بیر باخیما اوزوجو بیر شئی اوغراماماسی. 

سود گونو

  سیخینتیلی بیر گون داها گئچدی. 

  دوز گونو

  یئددیجه دئییلن شئیین نه یه یارادیغینی آنلادیم ان سونوندا. سود گونونون داریخدیریجی لیغینی اینسانا اونوتدورماغا یارانمیش. 

  یاخشی بیر تاپینتی منجه… 

  بوگون یئنه یاساق آغاجا دیرماشدی. كسسك فیرلاتاراق آشاغی ائندیردیم. دیرماشدیغینی هئچ كیمسه نین گؤرمه دیگینی سؤیله دی. اوستالیقلا، كیمسه نین گؤرمه دیگی سوره جه هر تهلوكه لی شئیی دئنمه سی معذور گؤستریله بیلر.  ” معذور گؤسترمك “  سؤزو منه بؤیوك بیر حئیرانلیق دویماسینا یول آچدی یئنه. ایمره نیر (غبطه ائدیر) منه.  ” معذور “  دا نه سؤز آمما… 

  سونرا بیردن، منیم آغاجا دیرماشماقدا اونون قدر اوستا اولمادیغیمی، بو باخیمدان بیله سینی قیسقاندیغیمی ایره لی  سورمز می! سونوندا ایكیمیز بیردن دیرماشدیق آغاجا، بئله جه اونا اوستالیقدا هئچ ده اوندان گئری قالمایاجاغیمی گؤسترمیش اولدوم. 

  آرا گون 

  مندن آلینان بیر قابیرغادان یارادیلمیش اولدوغونو سؤیله ییر. اینانیلیر شی دئییل. یئنه اویدورور. منیم قابیرغالاریمین اسكیگی یوخ كی… 

  ایندی ده شاهینی بئینینه سالیب. اوتلا بسلنمه سی سؤزده شاهینین یارادیلیشینا آیقیری دیر دئییر. بو گئدیشله چوخ یاشامایاجاغیندان  قورخور. گئرچكده اتله بسلنمه سی گره ***میش بو قوشون. داها نه لر. بورادا نه تاپیرسا اونونلا یئتینمه یه چالیشسین شاهین. ایندی اونون اوچون بوتون دوزه نی آلت اوست مو ائده جه ییك! 

  سو گونو

  دونن، یئنه هر زامانكی كیمی سودا اؤزونه باخاركن ، گؤله دوشدو. آزقالا بوغولاجاقدی. سون درجه سئویمسیز بیر دویغویموش سویا دوشمك. بوندان دولایی، سو ایچینده اولان بالیق آدینی قویدوغو بوتون یاراتیقلارا اوزولمگه باشلادی. آد قویما ایشی سرعتله   سورمكده یئنه. گره گی اولسون اولماسین هر شئیه بیر آد قویور. بیر ایشه ده یارامیر قویدوغو آدلار. هئچ بیری ده او آدلارلا چاغریلینجا اینسانین یانینا گلمیر او شیئلرین. آمما اوموروندا بئله دئییل. نه اولورسا اولسون، او بیلدیگینی اوخویور. 

  دونن آخشام، او بالیق دئدیگی شئیلردن بیرچوخونو سودان چیخاراراق ایستی لن سینلر دئیه گتیردی منیم یاتاغیما دولدوردو. آمما حئیوانلاری اوزون اوزون گؤزتله دیگیمده، بورادا هئچ ده سودا اولدوقلاریندان داها موتلو گؤرونمه دیكلری سونوجونا واردیم. چابالامالاری آزالمیشدی یالنیز. قارانلیق اولونجا گؤتوروب هامیسینی چؤله  آتاجاغام. بیر داها اونلارلا بیرلیكده یاتماغا نییتیم یوخ. 





    بؤلوم: حیكایه و گولمه‌جه‌لر
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :