دوکتــــور جـئــــــری
ساتاشما ادبیاتی
گؤروشلر : 0
تاريخ : چهارشنبه 8 شهریور 1391 | یازار : دوکتور جئری
+0 به‌ین

تكه لی كندینده هامی دؤولتدن راضی ایدی!

دوكتور جئری

میللتین دؤولتدن راضی اولوب اولمادیغیندان صؤحبت دوشموشدو. دئدیم:

- بو میراتا قالمیش میكروفونو كیمین آغزینا توتورسان، باشلاییر دؤولتی تعریف له مگه، عؤمرومده بیر كره بئله اولسون گؤرمه دیم كیمسه دؤولتین تزگینه دَیه!

پروفسور نصرالدین گولدو:

- سنده عجب ساده ایمیشن دوكتور! رادیو تلویزیون موخبیرلری سورغولارینی اؤز ایسته دیكلری آداملاردان سوروشورلار...

اوستاد دفتری سؤزه قاتیشدی:

- پروفسور دوز دئییر؛ گئچنلرده قولاغیم آغریییردی. الیمی قولاغیما باسیب اووا- اووا دوكتورا گئتمك اوچون ائودن چیخدیم، بیردن اؤزومو خیاباندا بیر قالابالیغین ایچینده گؤردوم، دئمه تلویزیون موخبیری جاماعاتدان گوزاریش توتورموش. موخبیر او بویدا جاماعاتین ایچینده هامی اؤتوروب دوز گلیب منیم قاباغیمدا دایاناراق شهرداری نین ایشلرینه گؤره نظریمی سوروشدو. منده قولاغیمین آغریسینی اونودوب باشلادیم شهردارینی تنقید ائله مگه. ترس سؤزلریمی ائشیدن موخبیر حیرسله میكروفونو آغزیمین قاباغیندان قیراغا چكه رك میزیلدادی:- قولاق قاشادیغین نه دیر، چیرتاپیرت دانیشدیغین نه؟

 موخبیرین نه دئدیگینی، اونو  آیری بیر قولاق قاشییانین قاباغیندا دایاندیغیندا آنلادیم. دئمه، قولاق قاشیماق بیر علامت ایمیش موخبیر كیم ایله موصاحیبه آپارسین و بو آرادا او منی یانلیش توتموشدو.

چاشقین- چاشقین سوروشدوم:

-  یانی سیز دئییرسیز سوروشدورولان آداملارین هامیسی اؤز آداملاری دیر؟

 اوستاد دفتری باشی ایله اونایلادی. دوروم بئله ایسه، میللتین دؤولتدن راضی اولوب اولمادیغینی نئجه آنلاماق اولار دئیه دوشوندوم. پروفسور نصرالدین سانكی فیكیرلریمی اوخوموشدو الینی چیگنیمه قویاراق:

- دوكتور میللتین دؤولتدن راضی اولوب اولمادیغینی بیلمك ایسته ییرسن سه ندن بیر موخبیر كیمی جاماعاتین آراسینا گئدیب فیكیرلرینی سوروشمورسان؟- دئدی.

- اولمایا ایسته ییرسن منی قوندارما موخبیر آدی ایله دده نین كؤهنه بورجونا وئرسن – دئدیم پروفسورا.

گولدو:

- یوخ بابا نه بورجو، لازیم دئییل شهرده خیابانلارا دوشوب میللتین نظرینی سوروشاسان. گئدیب اوزاق دوشموش بیر كندده میللتین نظرینی سوروش. ایسترسن منده سنینله گله رم.

پروفسورون اؤنریسی یامان بئینیمه باتدی آنجاق هانسی كندده گئتمه لی ایدیك. اوستاد دفتری قولتوق جیبیندن بیر ایل سایار چیخاردیب شهرین خریطه سی اولان بیر صحیفه نی گؤستردی. خریطه نی چوخلو گؤزدن گئچیریندن سونرا ایسته دیگیمیز كندی تاپدیق؛ شهرین ان اوجقار بوجاغیندا اولان بیركند؛ تكه لی كندی.

تكه لی كندینه نئجه گئده جگیمیزی سوروشاندا اوستاد دفتری بو كز یان جیبیندن موتورونون آناختارینی چیخاردیب بیزه اوزاتدی.

*

آخشام،  توز- تورپاغین ایچینده تكه لی كندینه چاتدیق. اوستو باشیمیزی سیلكه له دیك. ایشیمیزی اؤنملی گؤسترمك اوچون گتیردیگیمیز دفتر- دستك لری الیمیزه آلدیق. تكه لی كندی گئرچكدن دؤولتین آیاغی دَیمه میش بیر كندی ایدی. برق، تلفن، گاز كیمی ایمكانلاردان یوخسون، ییرمی اوتوز ائولی بیر كند. ائولر هامیسی مؤهره دیواردان تیكیلمیشدی.كندده كیمسه گؤروكموردو. سانكی ایشله مك اوچون چؤل- باییرا گئتمیشدیلر.بیرآز گزدیكدن سونرا ایلك گؤردوگوموز آدام بیر قوجا كیشی اولدو. قاپیسی نین قاباغیندا دیوار سؤیكنیب تسبیح چئویردی. یاخینلاشیب سالام وئردیك. علیك السلام دئدی.

- عمی آدین نمنه دیر؟- دئیه سوروشدوق.

- عین اله..- دئدی.

سؤزو اوزاتمادان ایسته دیگیمیز قونویا گئچدیك.

- عمی دؤولتدن راضی سان؟

- هه اوغلوم آللاه سیزدن راضی اولسون چوخ راضیام.

- عمی بو دؤولت یاخشی دیر یوخسا قاباقكی دؤولت ؟

- یوخ اوغلوم اینصاف دان گئچمه یَك بو دؤولت چوخ یاخشی دیر، گونده ایكی كیلو سود وئریر!

باشیمین اشاره سیله پروفسوردان، بو نه دئییر دئیه سوروشدوم اودا دوداقلارینی بوزدو، یانی بیلمیرم. قوجا ایله ساغ اوللاشیب كندین اورتاسینا گئچدیك. قهوه خانانین قاباغیندا اوچ دؤرد كیشی اؤتوروب دانیشیردیلار.بیرآز قیراقدا ایسه بیر ایكی قیز اوشاغی یئرده بئش- داش اویناییردیلار. كیشی لر بیزی گؤرجك آیاغا قالخیب بیزه اوتورقا (صندلی) گؤستردیلر. اَیلشدیك، خوش بئشدن سونرا دؤولتدن راضی اولوب اولمادیقلارینی سوروشدوق هامیسی اوركدن دؤولتدن راضی اولدوقلارینی بیلدیردیلر. آسلان آدلی كیشی، كندلی لرین سؤزلرینی یئكونلاشدیردی:

- بیزیم نه سویوموز نه ده اكینه جك یئریمیز وار تكجه گئچینه جگیمیز دؤولت  دیر....

فیكیریم دؤولتین وئردیگی یارانه لره گئتدی. دؤولت وئردیگی بئش اوچ تومنله تكه لی لرین راضی لیغینی قازانا بیلمیشدی. بو اوزدن تكه لی لر آجیناجاقلی دوروملارینا باخمایاراق دؤولته اؤوگولر یاغدیریردیلار...

بیردن بَریلتی سسیندن اؤزومه گلدیم. گنج بیر اوغلان بیر گئچی نین ساققالیندان یاپیشاراق چكه – چكه گتیردی. آسلان، گنج اوغلانین اوستونه قیشقیردی:

- هوووی مشدلی، گوناه دیر، آدام دؤولتین ساققالیندان چكمز...

یئریمدن سیچرادیم، پروفسوردا آیاغا قالخدی.

- دؤولت! سیزه گئچی یه دؤولت دئییرسیز؟!- دئیه سوروشدوم

آسلان دیكلَـنرك:

- هه.. بوردا گئچی یه دؤولت دئیرلر.. بیر نئچه گئچیسی اولاندا دؤولت لی ساییلار اوغلوم!- دئدی سونرا

 بیرمنه بیر پروفسور نصرالدینه باخیب سوروشدو:

- آیاغا قالخدیز بو تئزلیكله گئتمك ایسته ییرسیز؟

پروفسور یاپماجیق بیر گولوشله یانینتلادی:

- ایجازه وئرسز گون باتیر بیز گئدك.

آسلان بیزیم قوناق قالماغیمیز اوچون چوخلو آندا- ماند وئردی آنجاق گتمكده قرارلی اولدوغوموزو گؤرونجه بئش داش اوینایان قیزجیغازلارین بیرینی چاغیریب قولاغینا بیر شئی پیچیلدادی. قیز قاچا- قاچا اوزاقلاشیب آز سونرا بیر دببه سود ایله گئری قاییتدی. آسلان سود دببه سینی آلیب بیزه ساری اوزاتاراق:

- دؤولت سودو، یئددی دردین درمانی دیر... - دئدی

تكه لی لر بیزی اوغورلاماق اوچون موتورون یانینادك گلدیلر. اونلار اؤپوش- گؤرش ائتدیكدن سونرا موتورو چالیشدیردیق. كنددن بیر آز اوزاقلاشدیقدان سونرا دئدیم:

- پروفسور، تكه لی كندینده هامی دؤولتدن راضی دیر؟!

پروفسور نصرالدین سود دببه سینی یوخاری قالدیردیب دئدی:

- دوكتور، بئله دؤولتدن  واللاه منده راضییام!.





    بؤلوم: حیكایه و گولمه‌جه‌لر
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :