شئیخیمیز بئله دئدی

دوكتور جئری

   بو یازیدان باشلایاراق آرا-سیرا شئیخیمیزین احوالاتیندان یازاجاغیق. شئیخیمیز دئدیكده یانلیش آنلامایین. تانری‌یا شوكورلر اولسون یاشیمیز بو یاشا چاتیب نه شاه قوللوغوندا اولوب شاهیمیز دئمیشیك نه شئیخ دالیسیجا دوشه‌رك شئیخیمیز اولوبدور. شئیخیمیزین آدی شئیخیمیزدیر. رحمتلیك كربلایی خوجاوئردی دللك،بیریجیك اوغلونون آدی خالق‌ آراسیندا سایغی ایله چكیلسین دئیه شئیخیمیز قویموشدو. شئیخیمیز ائل حامامیندا جان‌سورتن دیر. پینتی احمونو شئیخمیزه تاپشیرسانیز گول كیمی قوخان شاماما آلابیلرسینیز! شئیخیمیزین شاه‌اثری بؤیوك باشلاردان بیرینی سورته-سورته یوخا چیخارماسی دیر. بؤیوك باش‌‌‌، شهریمیزدن گؤرش ائدنده اسكی حامامیزین تعریفینی ائشیدیب یویونماق-سورتونمك گئچیر اوره‌گیندن. اونو حاماما گؤتوروب شئیخیمیزه تاپشیریرلار. اوزون سوره بؤیوك باشدان خبر اولمایینجا حاماما گیریرلر. شئیخیمیزی ال-قولتوق اوتورولو  گؤرورلر. بؤیوك باشین سوراغینی توتورلار. شئیخیمیز اوزونتو ایله،" بؤیوك باش چوخ كیفیر-كثافت ایدی سورته-سورته هامیسی كیره گئتدی!" دئیه حامامین گیلیفینی گؤسترمیشدی...

دیل‌بیلمز!

   شئیخمیزین آروادی اؤلموشدو. جنازه تؤره‌نینده، موللا اؤلونو تلقین ائدركن بیردن شئیخمیز بركدن گولمه‌یه باشلاییر. هامی شاشیریر. شئیخیمیزین اؤزونتودن سارسینتی گئچردیگینی سانیرلار. اؤلو باسدیریلاندان سونرا شئیخمیزدن گولمه‌سی‌نین ندنینی سوروشورلار. یئنه گولوب:

-‌ موللایا گولمه‌ییم گلدی...- دئییر-  رحمتلیك آروادیم فارس ایدی. من قیرخ ایلده دیری‌سینه توركو اؤیرده بیلمه‌دیم.... موللا ایسته‌ییردی اوچ-دؤرد دیقه‌ده اؤلوسونه عربی اؤیرتسین!..

شئیخیمیزین ایتی

   شئیخیمیز اللرینی گؤیه قالدیریب تانری‌یا شوكر ائده-ائده ایش باشینا گئدیردی،

-‌ آللاه چوخ شوكور!...‌آللاه مین شوكور!؛ مینلر شوكور!...

قاپی‌-قونشو ماراقلانیب،

-‌  شئیخمیز نولوب؟ اولمایا بانكدان پول-مول چیخیب بیله‌نه؟- دئییرلر.

شئخیمیز آیاق ساخلاییب،

-یوخ!- دئییر-‌ آللاها شوكور ائدیرم نه یاخشی ایتیم یوخدور.

هامی شاشیریر.

شئیخیمیز سؤزلری‌نین آردیندا:

-‌ دونن گئجه تلویزیوندا بیر كیشینی گؤستریردی- دئییر-  كیشی‌نین دئدیگینه گؤره، گونده اللی مین تومن ایتی‌نین خرجی دیر. ایندی من آللاه شوكر ائدیرم نه یاخشی ایتیم یوخدور  چونكو بئش یوز مین آیلیق، ایكی یوز مین یارانه‌ ایله یازیق ایتیم آجیندان اؤله‌جك‌ایدی!

شئیخیمیزین قیزیل دیشلری!

   شئیخیمیز قیزیل دیش قویدورموشدو. ندنینی سوروشورلار. گولوب دئییر:

-‌ یئیه‌جك-ایچه‌جك اوزجوزلشمكدن قیزیل اوجوزله‌شیر. منده بو اوجوزلوكدن یارارلاناراق دیشلریمی یئیه‌جك-ایچه‌جگین اوجوزلشمه‌سینه ایتیلتدیریرم!

روشوت یئدیرمه‌یین تملینی شئیخیمیز قویموشدو!

   شهرین اورتاسیندا شئیخیمیزی آغیر ایش توتور. بیر  دینج یئر تاپیب شالوارینی سیییریر. هارادانسا بیر مامور تاپیلیب شئیخیمیزی سوچ اوستو یاخالاییب پولیس ایداره‌سینه آپارماق ایسته‌ییر. یالوار- یاخار ایشه یارامایینجا شئیخمیز قورتولوش یولونو روشوت وئرمكده گؤرور...

   گون اورتا چاغی شئیخمیز قارنینی دویورماق اوچون كابابخانایا گئدیر. گؤزله‌نیلمه‌‌دن روشوت یئین ماموردا اورادا ایمیش. مامور شئیخیمیزی گؤرجك:

-‌ اولان  دیققتلی اول بیرده خیابانا سیچمایاسان ..ها!-دئییر.

شئخیمیز قانی سویوقلوقلا مامورون سؤزونو قایتاریر:

-‌ اده اوزون دانیشما، من سیچماسایدیم سن هارادان یئیه‌جكدین!

گیریش پولو

   شئیخیمیز زیارت اوچون سوریه‌یه گئتمیشدی. تووالئته گئدنده گیریش پولو ایسته‌ییرلر. اؤفكه‌له‌نیب دئییر:

-‌  سیز گلین بیزیم اؤلكه‌میزه نه قدر سیچیرسیز سیچین سیزدن پول ایسته‌ین چوخ آلچاق آدم دیر!

دو̌ز چؤره‌ك

  شئیخیمیز چؤر‌ه‌ك آلاندا جیزگج(خط كش) قویوب چؤره‌گین قیراقلارینی پیچاقلا كسَرمیش. بیر گون چؤره‌كچی اینجیكلی-اینجیكلی سوروشموش:

-‌ باغیشلایین! چؤره‌كلرین قیراغی خمیرمی گونده كسیب چیخاردیرسیز؟!

شئخیمیز گولومسنمیش:

-‌ یوخ خمیر دئییل آنجاق من آند ایچمیشم  آرواد- اوشاغیمین سوفراسینا دوز چؤره‌ك آپارام؛ بونا گؤره چؤره‌كلرین اَیری-اویروسونو كسیرم...