قارنیزی "شوربا" ایله دویورمایین...!

دوكتور جئری

    خوروزلانمیشدیلار؛ آز قالا بیربیری‌نین باشینا آتلانجاقدیلار. اوستاد دفتری "مهر" دؤولتینی ساوونوردو، پروفسور نصرالدین ایسه "كلید"-ی.

بیری قیشقیردی؛ او بیری چیغیریردی؛ آرادا میز یومروق یئییردی.

-‌ "مهر" یاخشی ایدی...

-‌ "كلید" گلمه‌سه‌ایدی "مهر" اؤلكه‌نین اورتا گولونه....

بیردن قاپی آچیلیب فاطما ننه گیردی ایچری.

-‌ قارنیزی "شوربا" ایله دویورمایین...

اوستونه قاباردیم:

-‌ سن بورادا نه قاییریرسان فاطما ننه، ناهاری چكدیلر!...

***

    فاطماننه داناباش كندی‌نین آغ بیرچگی‌دیر. تویدا، یاسدا یئری مجلیسن، سوفرانین باشی‌دیر. جوما آخشامی گونو، حاجی بایرامین قیرخی ایدی. فاطماننه یانلارینی باسا-باسا حیطه گیردی. آذان چوخدان دئییلمیشدی. حیطه كیمسه گؤرونموردو. فاطما ننه سسلندی:

-‌ قیزلار!...

حیطین دیبینده‌كی دامدان، حاجی بایرامین تئهراندا اولان قیزی ائشیگه‌ چیخدی.

-‌ فاطما ننه نییه گئجیكمیشسن؟.. گئچ اوتاغا ایندی ناهارینی گتیریرم..-‌ دئدی.

فاطما ننه‌ ایسته‌دی‌  دئیه:" كیریخیب اؤیكونون آیری بیر بؤلومونه گئتمیشدیم" ؛ دئمه‌دی.

-‌ ناهار نمنه‌دیر؟-دئدی.

-‌ "آبگوشت".

فاطما‌ننه‌نین قولاقلاری تاققیلدادی. ایندی‌یه‌دك "آبگوشت" آدینی ائشیتمه‌میشدی."تئهران یئمه‌یی اولمالی‌دیر" دئیه دوشوندو.اوتاغا گئچینجه شاشیردی. قادینلار "شوربا" یئمكده ‌ایدیلر. اؤزونو ساخلایا بیلمه‌دی:

-‌ قیزلار قارنیزی "شوربا" ایله دویورمایین "آبگوشت" گلیر-‌ دئدی.

قادینلار گولوشدولر...