دوکتــــور جـئــــــری
ساتاشما ادبیاتی
گؤروشلر : 0
تاريخ : پنجشنبه 4 دی 1393 | یازار : دوکتور جئری
+0 به‌ین

آدام اولماق ایسته‌میرم!

دوکتور جئری

     شئخیمیزین اوغلو شهرام  اوچ ایل ایدی أیری- بوروق ایداره‌سینه سوخولموشدو؛ (داها دوغروسو سوخدورولموشدو) هله آدام اولمامیشدی.

    شئخیمیز اوتاقدا وار- گل ائده‌رک دئیینیردی:

- میرزه حبیبین اوغلو آدام اولدو!..شیخ آغانین اوغلو آدام اولدو!..حاجی ایسلامین اوغلونون آدی نه‌دیر؟!..

شهرام میزیلدادی:

-‌ حوججت!..

- هه.. حوججت!.. بورنونو چکمه‌یی باجارمیردی.. ایندی باخ!.. بیر ایل اولماز ایداره‌یه  سوخولوب آیاغی‌نین آلتیندا اوچ یوز میلیونلوق ماشین وار ، شهرین باشیندا بیر میلیاردلیق ائو آلیب... بؤیوک بیر آدام اولوب.. بیلمیرم سن اورادا نه غلط دارتیرسان؟!..

شهرام باشینی آشاغی سالدی:

- آتا.. واللاه بیللاه  ایداره‌ده، ایت الیندن سوموک گمیرمک اولمور!..

شئخیمیز بو  یانیتدان کؤپوردو:

- دئگینن چیخاریم یوخدور!.. دئگینن الیمدن  گلمیر!.. دئگینن...

شهرام یئریندن داشلاندی، اوتاقدان چیخا-چیخا:

- آتا.. من آدام اولماق ایسته‌میرم..ال چکین! - دئییب قاپینی چیرپدی.

 

 

Adam olmaq istəmirəm!

Dr. Jery

 

    Şeyximizin oğlu Şəhram üç il idi Əyri- buruq idarəsinə soxulmuşdu; (daha doğrusu soxdurulmuşdu) hələ adam olmamışdı.

    Şeximiz otaqda var- gəl edərək deyinirdi:

- Mirzə Həbibin oğlu adam oldu!..Şıx Ağanın oğlu adam oldu!..hacı İslamın oğlunun adı nədir?!..

   Şəhram mızıldadı:

- Hüccət!..

- Hə.. Hüccət!.. burnunu çəkməyi bacarmırdı.. indi bax!.. bir il olmaz idarəyə soxulub ayağının altında üç yüz milyonluq maşın var , şəhərin başında bir milyardlıq ev alıb... böyük bir adam olub.. bilmirəm sən orada nə qələt dartırsan?!..

   Şəhram başını aşağı saldı:

- Ata.. vallah billaə idarədə, it əlindən sümük gəmirmək olmur..

   Şeximiz bu yanıtdan köpürdü:

- Deginən çıxarım yoxdur!.. deginən əlimdən gəlmir!.. deginən...

   Şəhram yerindən daşlandı, otaqdan çıxa-çıxa:

- Ata.. mən adam olmaq istəmirəm..əl çəkin! - Deyib qapını çırpdı.





    بؤلوم: حیكایه و گولمه‌جه‌لر
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :