دوکتــــور جـئــــــری
ساتاشما ادبیاتی
گؤروشلر : 0
تاريخ : دوشنبه 24 مرداد 1390 | یازار : دوکتور جئری
+0 به‌ین

یئتیم قالمیش اورمو گؤلو

یازان: دوكتورجئری

دوننین حیكایه سی :

بیر یئتیم اوشاق دیوارین دیبینده اوتوروب آغلاییردی.قولتوغوندا  بیر بوخچا تزه چؤرك اولان بیر كیشی اونا یاخینلاشیب:” بـــــالا نییه آغـــلاییرسان؟” دئیه سوروشور.اوشـاق ایچینی چـــكه رك: ” آجام ” دئییر. كیشی اوشاغین یانیندا چؤمبه لیب آغلاماغا باشلاییر. اوچونجو كیشی گلیب اولانلاری اؤیرندیكدن سونرا ایكینجی كیشییه اوزونو توتوب:” بونون آغلاماغی یوخدوركی چؤركلردن بیردنه وئر اوشاغا ، آغلاماسین ” دئییر. ایكینجی كیشی الی نین دالی ایله گؤزلری نین یاشینی سیله رك  :  ” چؤرك – مؤرك وئرنمه رم آنجاق نه قدر ایسته سه نیز اونون حالینا آغلایا بیلرم!” دئییر.

بوگونون حیكایه سی:

ائی یئتیم قالمیش اورمو گؤلو! ایشده  آغلا. بیزده  آغلاییریق. اونلارجا سد كوزه سینی چیینیمیزده توتوب حالینا آغلاییریق. بیر دامجی سو وئرمه ریك سنه البت ، آنجاق  نـــــه قـــــــــــــــدر ایسته سن آغلاریق. یئتیم قالمیش اورمو گؤلو ! او قدر آغلا لاپ گؤزون یاشی قوروسون. دوزلاغا دؤن . قوی یئل- كولك دوزونو دولدورسون گؤزلریمیزه ،  گؤزلریمیز گؤرن اولسون. دوست دوشمانی سئچن اولسون. دوزلارینی سپه له اكینه جكلریمیزین اوزه رینه. باغلاریمیزین ، بوستانلاریمیزین اوزه رینه .. قورخما هر یانی قوروت . آخی دئییرلر یئتیم پاخیل اولار!… پاخیل اول یئتیم قالمیش اورمو گؤلو! پاخیل اول . پاخیل اولسان نئیله یه جكسن!؟ هر یانی دوزلاغا ، كویئره (كویره)  دؤندردیكدن سونرا  بیلیرسنمی  نه اولاجاق سنین آجیغینا!؟  بؤلگه میز توریستی اولاجاق. هه ! دوز ائشیتدین؛ توریسیتی اولاجاق!!.. تهراندان ، كرماندان اصفهاندان ، تؤكولوب گله جكلر كویئر گزمه یه!  البته بیزیم كویئرین اؤزونه اؤزگو اؤزللیگی اولاجاق باشقا كویئرلردن . بیزیم كویئرین یانیندا سدلر وار! توریستلر اوردا قـــایق سوروب، بالیق توتوب ، اوزه بیلرلر بئله. سن بیلمیرسن كویئرین گئجه لری نه قدر گؤزل اولور. اولدوزلاری نه قدر پارلاق اولور . بونو اسكی كویئرلی لر سؤیله ییرلر.

ایندیسه  آغلا!  آغلا! یئتیم قالمیش اورمو گؤلو! بیزده آغلاییریق! سنی گؤز یاشیمیزلا دولدورا بیلمه سك بئله ، سنی اوتانج تری ایله دولدورا بیلمه سك بئله، سنی 2500 ایللیك  آغ یالانلارلا دولدوراجاقلار. آغلا! آغلا! بیزده آغلاییریق….



آچار سؤزلر : اورمو,

    بؤلوم: ساتیریك یازیلار
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :