+0 به‌ین
اورمو گؤلونون قوروماسی نین فایدالاری...
یازان : دوكتور جئری
بو گونلر چئشیدلی سایتلاردا اورمو گؤلونون قوروماسیندان تؤرنه جك ضررلره گؤره یوزلرجه یازی یاییلماقدادیر. آنجاق یولداشلار! قلمداشلار! بیر آز ایگیمسر (نیك بین) اولون! نئجه دئییرلر تانری ایكی یومروغو بیر باشا وورماز . تانری دمیرقاپینی باغلایاندا آغاج قاپینی آچار. نه اولور، ائولرینیزده اوتوروب رنگلی چایی آرمودی ایستكاندا ایچنده باشیمیزی پامبیقلا كسمك ایسته ین دوشمانلارلا آغیزآغیزا وئرمه یین. سیزدن ریجا ائدیرم كؤتومسرلیك(بدبینلیك) گؤزلوگونو گؤزلرینیزدن گؤتورون . یاخشی باخین . سیز ندن اورمو گؤلونون قورماسی نین فایدالارینی گؤرمك ایسته میرسینیز؟ اولمایا دیش اوغوزدان پارا آلیرسینیز؟ ائله ائتمه یین گلیب دولارلاری جیبینیزدن چكیم ائشیگه ائل- عالمه رذیل ائدیم سیزی. دونیادا گؤلمجلری ، دنیزلری قورداراق اكین یئری دوزلدیرلر. سیز بورادا ، اوَل آللاه ایكینجی گؤره ولیلریمیزین امگی ایله قوروماقدا اولان اورمو گؤلو ایشی نین قاباغینا داش آتماق می ایسته ییرسینیز؟! سیز داش آتان اولسایدینیز ندن گؤلون اورتاسیندان یول چكیب داش دولدوراندا گلیب داش آتمادینیز بو ایش تئز بیتسین. ییرمی- اوتوز ایل چكمه سین...
هه! دنیز قوروتماغا گؤره دانیشیردیم . سیز بیلیردینیزمی اورمو گؤلونون قورماسی ایله بیزیم یوزلر كیلومئتر اكینه بیله جك یئرلریمیز اولاجاق؟ سیز بیلیردینیزمی بو یئرلرین شوراكت اولدوغونا گؤره خییارشور اكمَگه چوخ ال وئریشلی اولاجاقدیر؟ سیز بیلیردینیزمی بیز بو یئرلرده خییارشور اكمكله دونیانین بیرینجی خییارشور ایخراج ائدن اؤلكه سینه دؤنوشه جه ییك؟ بیزه توختایاجاق میلیاردلار دولار گلیردن خبرینیز وارمیدیر؟
اورمو گؤلونون قورماسییله بؤلگه میز كویئرله شیب هاواسی ایستی له شینجه میللتیمیز دوه بئجرمكله هم یاخشی پارا الده ائده بیلیب همده بوحئیوانلاردان داشیت و یوكلت آرابالاری یئرینه فایدالاناراق یاخیتین(سوخت) باهالیغیندان قورتولا بیله جكلر. (یاخیتدان سوبسیدین قالدیراجاغینی اونوتمایین).كویئرین اؤزلیلكریندن بیری ده دؤولت یاتیریمی نین بو یئرلرده یوكسك اولدوغودور؛ بیز بؤلگه میزی دوزلاغا دونوشدورمكله بو آیریجالیقدان اولدوقجا یارارلاناجاغیق.
بؤلگه میزین دوزلاغا دؤنوشمه سی نین فایدالاریندان تكجه بیز یوخ، گله جك قوشاقلاریمیزدا یارارلاناجاقلار. مینلر ایل سونرا ، تؤره مه لریمیز چورومه میش اؤلولریمیزی دوزلاقلاردان چیخاردیب دونیا موزئیلرینه ساتاراق یاخشی پارا قازانیب دوزلو روحوموزا رحمت اوخویاجاقلار.
یازیمین سونوندا بیر موشتلوغومدا وار سارساقلارا، آخماقلارا و مانقورتلارا. ایللر بویو ایدی سیزسایقیلی شوراكتداشلاریمیزی شوردریایا تؤكمكله قورخودوردولار ،آنجاق ایندی الینیزی اورگینیزه قویوب راحات اویویون، شوردریا قورویور....
1389/8/19
بؤلوم: ساتیریک یازیلار