دوکتــــور جـئــــــری
ساتاشما ادبیاتی
گؤروشلر : 0
تاريخ : چهارشنبه 26 مرداد 1390 | یازار : دوکتور جئری
+0 به‌ین

من دیلنچی دئییلم!

یازان : دوكتور جئری

من دیلنچی دئییلم ، اوشاغیم خسته خانادادیر ، پولوم یوخدو چیخاردام ،اولسا منه  یاردیم ائده سه نیز.

من دیلنچی دئییلم، پولوم قورتولوب یولدا قالمیشام ، اولسا منه…

من دیلنچی دئییلم، آیلیغیم دالییا دوشوب ، كیرایه نی وئرمه سم ائو یئیه سی اثاثلاریمی ائشیگه تؤكه جك ، اولسا منه …

من دیلنچی دئییلم، خسته یم داوا آلماغا پولو قالماییب، اولسا منه…

من دیلنچی دئییلم، برقی كسیبلر اوشاقلاریم قارانلیقدا قالیب اولسا منه…

من دیلنچی دئییلم، قیزمین بیلم یوردو شهریه سی دالی دوشوب اونو ائشیگه اؤتورورلر اولسا منه…

من دیلنچی دئییلم، ائوه یاوان چؤرك آلاجاق ایدیم پولوم آزدی اولسا منه…

من دیلنچی دئییلم، شئعیر كیتابیم باسین ائوینده قالیب چیخاردانمیرام اولسا منه…

من دیلنچی دئییلم، ایشیمدن اؤتورولموشم اولسا منه…

من دیلنچی دئییلم پولوم یوخدو آرواد ائوه قویمور اولسا منه…

من دیلنچی دئییلم….

- اشی سنه نه اولوب بئله اؤز- اؤزونه اویودورسن . گؤرن دئیر آللاه ائله مه میش آغیلینی قاچیرمیسان…

دوكتور جئری گؤزلوگونو بورنون اوستونه ائندیریب اوستوندن گؤزلرینی تیكدی گؤزومه .  بیردن قاش – قاباغی آچیلدی :

- اولان موللانصرالدین كیشی سنسن ! سنی گؤیده آختاریردیم یئرده تاپدیم. اشی سن هارالارداسان ؟ یوخسان!!…داریخمیشدیم سنه ..

- واللاه اوغلوم بیر گئجه ده  میلیونئر اولوب. گئتمیشدیم اونو گؤروم.

-  اولمایا بانك – مانكدان پول-پله  بیله سینه چیخیب ، چوخ شوكور ! چوخ شوكور ! دئمك سیزده یوخسوللوغون داشینی آتدینیز هه …

-  یوخ اشی ! اوغلومون خانیمی اوچوز (3 قلو) دوغوب.

دوكتورون گؤزلری آز قالدی ائشیگه پیرتلایا . شاشقینلیقلا سوروشدو:

- بونون نه دخلی وار میلیونئر اولماغا؟

گولمسه یرك ائكله دیم :

- چوخدا دخلی وار! دؤولت هر كؤرپه نین حئسابینا اون میلیون ریال پول یاتیردیر. سگگیزیوزسكسن مین ریالدا چؤرك و سوبسید پولو وئریر.بونلاری توپلاییب اوچه چارپسان    ائله یر: اوتوزایكی میلیون آلتمیش دؤرد مین ریال. هله بو پول گونو گوندن دوغوب چوخالاجاق بئله.

دوكتور گولدو. بایاقكی دئینگن آدام دئییلدی سانكی.

- بایاق اؤز- اؤزن نه  آچیب قوشوردون – دئیه سوروشدوم.

دوكتور مندیله گؤزلوگونون آلتیندان گؤزلری نین یاشینی سیله - سیله میزیلدادی:

-  موللا قارداش ! آدام آیاغینی ائودن ائشیگه قویا بیلمیر. آددیم باشی تانیمادیق آداملار ، آدامین قاباغینی كسیب ” من دیلنچی دئییلم ..” دئیه آدامدان پول ایسته ییرلر. وئریرسن اولمور ؛ وئرمیرسن هئچ اولمور! آدام لاپ بئله معطل قالیر بو ایشه . شهریمیزه دیلنچی سیز شهر دئییرلر بیلمیرم بلكه بو اوزدندیر . بو دوروملا سونوموز هارا چاتاجاق یئنه بیلمیرم. آللاه هامییا سنین اوغلون كیمی بیر قاپی آچسین…

بؤركومو قاشیمین اوستونه یئندیریب باشیمی قاشییاراق سوروشدوم( دیلیم لال اولایدی سوروشمایایدیم ):

- چوخداندیر یوخسان ، هارالارادا گزیرسن دوكتور! اولمایا اؤزون دئمیشلی ائودن ائشیگه چیخمیرسان؟!

- هه موللا !  دوغرو دئییرسن، ائودن ائشیگه چیخمیرام. نئچه واختدیر بازار كاساد اولوب مطب ایشله میر. مطبه خسته دن چوخ بورجلو گلیر. بیر آیدیر تئلفونومو كسیبلر اینتئرنتده گئده بیلمیرم . بوگون ، بیریندن بورج آلیب تئلفونومو آچدیریم دئیه ائشیگه چیخدیم  شانسدان سنین گول اؤزونله گؤزلریم ایشیقلاندی. اولسا منه بئش- اون تومن بورج وئر. بیلیرسن من دیلنچی – میلنچی دئییلم . سنین پولونو بئش – اون گونون ایچینده قایتارارام .

الیمله آلنیمین ترینی سیلیب گؤزلریمی یئره تیكه رك:

-  دوكتور بئی دوزونو ایسته سن من اؤزوم  دیله نیرم . ائششگیمین آرپا- سامانی قورتولوب آجیندان اؤلمك اؤزه ره دیر. سنین یانینادا پول آلماق اوچون گلمیشدیم آنجاق بللی اولان سن دیلنچی اولمایا – اولمایا مندن بتر دیلنچی سن.- دئیه دوكتوردان اوزاقلاشدیم.

1389/10/25

 





    بؤلوم: حیكایه و گولمه‌جه‌لر
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :