دوکتــــور جـئــــــری
ساتاشما ادبیاتی
گؤروشلر : 0
تاريخ : جمعه 28 مرداد 1390 | یازار : دوکتور جئری
+0 به‌ین

دؤولت خانیمین ایگنه سی

جیزما-قاراچی : دوكتور جئری

 بالانصرالدین بیر قوتو خورما ایله مئیمون اوینادان یولداشی گیله  قوناق گئدیر. یولداشی نین مئیمونو خورمالاردان بیرینی گؤتوروب   قویروغونون آلتینا آپاردیقدان سونرا آغیزینا قویور. بالانصرالدین مئیمونون بو حركتیندن برك اوزولور . یولداشی گولومسه یرك :

-” مئیمونون بو داورانیشیندان اینجیمه یه سن یولداش!  كئچنلرده دوستلارین بیری باغیندان شفتالی پای گتیرمیشدی. بو یاراماز شفتالینی دنه سی ایله  بیرگه یئدیگیندن چگیردك گؤتونده قالیب عملیات ایله چیخارتمالی اولدوق. او گوندن بری یئمه لی یئینده اؤنجه گؤتوندن چیخاجاغینا امین اولور” دئییر.

گولمه ییمی ساخلایا بیلمیردیم . پروفسور نصرالدین (دانیشگاهلار آزاد اولالی بیزیم بو موللا نصرالدینده ائششگی نین آرپاسیندان ووراراق گئدیب آزاد دانیشگاهدان پروفسورلوق عونوانی آلیبدیر) قهقهه می كسیب دئدی:

ـ” گول دوكتور  گول ! نییه گولمورسن.  ائل بیل  ایستی هله سنین جانینا گئچمه ییب .آتالاریمیز دوز دئمیشلر: اولونون سؤزونه باخمایان اولایا – اولایا قالار. كئچنلرده سیزه دئمه دیمی دؤولت خانیمین ایگنه سینی یئین چووالدیز سیچار ؟ سیزه دئمه دیمی  یارانه دئییلن بئش- اون قیرانا آلدانیب آغریماز باشینیزا دسمال باغلامایین ؟! هله كی بیر شئی اولماییب . تكجه بیر ایكی گاز - برق فیشی  گلیب. نه تئز زیرتا – زیرتا دوشموشسوز… یارانه نی ایچرییه اؤتورمه دن اؤنجه بیر ….”.

-” پروفسور ! واللاه من زیرتا- زیرتا دوشمه میشم. دؤولت خانیمدان دا چوخ راضییام. وئردیگی یارانه لر بانكدا جاغ به جاغ مؤوجودور . قیرانینا بئله ال دَیمه میشم. سو ، برق و گاز سایقاجی نین نومره لری ده اؤز یئرینده دایانیب ایشله میر .” دئیه پروفسور نصرالدینین سؤزونو قاریمچیلیق قویدوم .

پروفسور نصرالدین گئچی ساققالینی تومارلاییب قوشقولو- قوشقولو :

ـ  ” اولمایا سایقاجلاری قوردالاییب دوردورموسان؟” دئیه میزیلدادی.

-” یوخ ، سن اؤله سن!”

-” آخی بس بو نئجه اولا بیلر؟”

گؤزومو یئره تیكه رك دئدیم :

ـ”‌ دوزونو ایسته پروفسور ! آیدا – قیرخ گونده بیر حاماما گئدیرم . اونودا چوخراق قوهوم قونشو ائوینه سالیرام  . آرا- سیرا  یاغیش یاغاندا  ایسه یویونماغیم ایكی - اوچ آیا بئله ائرته له نه بیلیر. بو سو فیشیندن. قالدی گاز فیشی. تانری  سندن راضی اولسون . وئردیگین پئرشیانین  تس لرینی یاندیراراق  گاز نئعمتیندن ده  جانیمی قورتارمیشام. (مولانصرالدین پروفسورلوق عونوانینی آلاندان بری ائششگینه پئرشیا دئییر). برقه گلینجه ، من ائله لاپ اسكی لردن قاش قارالاندا یاتارام؛ قاش آغرینجا ایسه اویانارام بو اوزدن برق -مرقه موفته پول وئرمه رم..”.

پروفسور نصرالدین بیر ایكی آددیم گئری چكیلیب بورنونو چكه رك :

-” بو قدر اؤزونه كورلوق وئریب یارانه لری ییغماقدان آماجین ندیر؟ “  سوروشدو.

ایكی آددیم ایره لی له ییب بورنومو پروفسورون بورنونا دایایاییب:

ـ ” پروفسور ! تصمیم توتموشام بیر ایللیك یارانه لریمی ییغدیقدان سونرا گئدیب قونشو اؤلكه لرین بیرینده  بیر هفته  آدام كیمی یاشایام “  دئدیم.

1390/1/26





    بؤلوم: حیكایه و گولمه‌جه‌لر
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :