+0 به‌ین
افساریخ
یازان : دوكتور جئری
۱. ائپیزود
بیر گون وار ایدی بیر گون یوخ ایدی. بیرشاه وار ایدی. آدی كورش ایدی. كورش بیلمیردی آریایی دیر چونكو آریا سؤزو هله دوزلمه میشدی. بیر گون یهودی لردن بیر نئچه سی كوروشون یانینا گلیب، ” بخت النصر بیزی اؤلدورور، دریمیزه سامان تپیر، گل بیزی قورتار” دئیه اونا یالواردیلار. كورش سانكی یاتمیش ایدی اویاندی. نئچه واخت ایدی اؤلكه ده سامان قیتلیغی باش وئریب قوشونون آت – ائششگی آجیندان قیریلیردی. كورش اؤفكه ایله یئریندن قالخیب بابیله سالدیری بویروغو وئردی.بابیل ایشغال اولونوب یهودی لر آزاد ، سامانلار ایسه موصادیره اولوندو.
۲. ائپیزود
بیر گون وار ایدی بیر گون یوخ ایدی. بیر فرانسالی یازیچی وار ایدی. آدی گوبینو ایدی. گوبینو دربار آداملاری ایله گل – گئدی وار ایدی. او بولوشمالاریندا آنلادی دربار آداملاری نین باش- بدن لری قارا میللته گؤره چوخ یئكه و آغ دیر.
گوبینو بیر گون تووالئتده اوتوروب دوشونوردو:
-” دربار آداملاری نین جینسی باشقا بیر جینسدن اولمالی دیر! بو قدر آغ ! بو قدر كؤك! بو قدر یوموشاق!…
یوخ .. یوخ.. اولا بیلمز… سیسقا ، آریق ، گودوك قارا میللت له بونلارین جینسی بیر اولا بیلمز . بونلار موطلق باشقا بیر جینسدن اولمالی دیرلار ..”
سونرا بیردن بیره ، بیر شئی بولموش كیمی تومانینی چكمه دن تووالئتدن دیشارییا فیرلانیب باغیردی: ” تاپدیم! … تاپدیم!…. دربار آداملاری آریا جینسیندن دیر لر…”.
۳. ائپیزود
بیرگون وار ایدی بیر گون یوخ ایدی. بیر بالا بوی هیتلئر وار ایدی بیرده چمبرلن . گوبینونون آریا سؤزونون ایگی چمبرلنین بورنونا دگیمیشدی. چمبرلن ، هیتلئری قاندیردی آریا جینسیندن دیر.هئیتلرین قوشونونون آت – ائششگی ، سامانلا یوخ یاغ ایله ایشله ییردی. هیتلئر ،یهودی لری اؤلدوروب یاغلارینی چیخارتدی.
۴. ائپیزود
بیر گون وار ایدی بیر گون یوخ ایدی. بیریئكه پر كیشی وار ایدی. اؤزو خان اولماسادا آدی رضاخان ایدی. رضاخان قوشوندا ، آت – ائششگه سامان وئره ردی.
اینگیلیس لر تخت جمشید خارابالاری قازینتیسی سیراسیندا بیر جوت چكمه تاپمیشدیلار. دئییلنلره گؤره چكمه لر،كوروشون چكمه لری ایمیش. اینگیلیس لر چكمه لر كیمین آیاغینا گلسه ممالیك محروسه نین شاهی اولاجاق دئیه قرار وئردی لر. اردشیر جی ریپورتر آدلی بیر كرتنكَله چكمه لری گؤتورب اؤلكه نی گزمه یه باشلادی. چكمه لر آیاقلارا گئن گلیردی. اردشیر یورولموشدو . او بیر گون آتینی اصطبل ده باغلایاندا گؤزو رضاخانا ایلیشیر. چكمه لر سانكی رضاخانین آیاغینا تیكیلمیشدی. رضاخان اولور رضاشاه.
گونلرین بیر گونونده هیتلئردن رضاشاها بیر اس ام اس گلدی :
-” سن آریایی ، من آریایی ، گل آلالیم دونیانی”.
بو سؤز رضاشاهین طبعینه بتر یاتدی. اینگلیسه تپیك آتیب آتلاندی هیتلئرین قوجاغینا. آنجاق ایكیسیده ییخیلدیلار یئره (رضا شاهین یئكه پر و هیتلئرین بالا بوی اولدوغونو داها اؤنجه سؤیلمیشدیك).اینگیلیس حیرصله نیب چكمه لری رضا شاهین آیاغیندان چیخاردیب گؤتونون اوستوندن بیر تپیك ووراراق ایراندان ائشیگه آتدی. بیرسوره سونرا حیرصی سویویان اینگیلیس چكمه لری رضاشاهین اوغلو محمدرضایا وئردی . چكمه لر محمدرضانین آیاغینا گئن گلدی آنجاق اینگلیس سسینی چیخارتمادی. آریابازیلیق هیتلئرین اؤلومو ایله دونیادا مودادان دوشموشدو. آنجاق محمد رضا چكمه لری گئییب گئیه لی لاببا- لابلا یئنه آریابازیلیق اویونونا باشلادی . او میللت لردن آسیب كسمكله آریا خالقی دوزلدیردی.
ایللر اؤتدو . بیر گون جانا دویموش خالق محمدرضانی اؤلدورمك اوچون دربارینا تؤكولدولر آنجاق یئر یاش ، اوشاق یوخ ایدی. محمدرضانین تختینده تكجه چكمه لر قالمیشدی . محمدرضا آیاق یالین قاچمیشدی.
۵.ائپیزود
بیر گون وار ایدی بیر گون یوخ ایدی. بیر جوت چكمه وار ایدی . چكمه لر یامان قوخویوردو. آیاق ایگی وئریردی ، سامان ایگی وئریردی ،یاغ ایگی وئریردی ، آریا ایگی وئریردی.
چكمه لری زیبل قابینا آتدیلار، ایگ كسیلمه دی. چیخاردیب موزه یه قویدولار ، ایگ كسیلمه دی. بیر گون چكمه لر ، زیبیل قابی – موزه آراسیندا اولان یولجولوقدا یوخ اولدو. آنجاق ایگی كسیلمه دی . آیاق ایگی ،سامان ایگی ، یاغ ایگی ، آریا ایگی….
1390/3/20
بؤلوم: ساتیریک یازیلار