دوکتــــور جـئــــــری
ساتاشما ادبیاتی
گؤروشلر : 0
تاريخ : جمعه 28 مرداد 1390 | یازار : دوکتور جئری
+0 به‌ین

ایرانین یئنی پول بیریمی : قارا

یازان : دوكتور جئری

سوبسیدلرین هدفلی لندیرمه سیله باشلادیلان ایقتیصادی ایصلاحاتین اولوملو سونوجلاری اؤزونو گؤسترینجه ، دؤولت بو پروسه نین سون آشاماسینا كئچمكده دیر.

دوزلدی هر جور یاراغی

بیر قالدی ساققال داراغی

توكانینی بانكایا دؤنوشدورن محله نین اسكی باققالی مشدی غضنفرین وئردیگی خبره گؤره دؤولت، كاغیذین باهالاشدیغینا گؤره ،اؤلكه نین پول بیریمینی دییشدیره جكدیر. یئنی بیریم حاققیندا چئشیدلی اؤنریلر ایره لی سورولمكده دیر. فارس لار: پارسی ، تورك لر : تومن، عرب لر : دینار، لورلار : لوریك ،‌كورد لر : كورون و… بیریمینی اؤلكه پولونا اویغون گؤرورلر.

 یئنی بیریمین اویغولاماسیندا اولان باشلیجا سورون  اؤنریلن بیریملرین بوتون ایران خالقلارینی تمثیل ائتمه مه سی دیر. بو اوزدن ،  سئچیلن بیریم ،بوتون  خالقلارین آراسیندا كؤكلو و یئرلی اولماسی گركلی لیگی بللی دیر . بو دوغرولتودا  بیز  ایران تاریخ و كولتور قایناقلاریندا چوخلو آراشدیرما آپاردیقدان سونرا هامی نین بگنه جگی بیر سویلو – كؤكلو سؤزه توش گلدیك . پارا بیریمینه سئچیله جك بو اویغون آد  ” قارا ” سؤزو دور. “قارا” ایندییه دك بیر پول بیریمی اولاراق ایشلنمه سه ده  مین لر ایلدیر پول سؤزونون آیریلماز بیر بؤلومو اولاراق  بوتون  ایران خالقلارینین دیلینده ایشلنمكده دیر. اؤرنك اوچون :

مثللرده :

كیشی نین قارا پولونو دئییرلر.

قارا گون اوچون قارا پول ساخلا.

در این دونیای درویشی         قارا پول گؤره ر هر ایشی

قارا پول اولدوم.

قارا پولا دگمز.

شئعیرلرده :

  ائی اولان حؤكمو روان، حاكیمه حؤرمت، قارا پول! 

  وئی قیلان پیری جاوان، بیكسه عیززت، قارا پول! 

  سن دئییلسنمی آچان جنّتی-علا قاپیسین؟! 

  سن دئییلسنمی وئرن ناریده  زحمت، قارا پول؟! 

  سن دئییلسنمی اولان بعضینه لعنت سببی؟! 

  ائتدیرن بعضینه گؤروندا دا رحمت، قارا پول! 

  سن دئییلسنمی مگر بانیی و-بئیتول-فاحیش؟! 

  سن دئییلسنمی وئرن قاتیله جورأت، قارا پول! 

  سن دئییلسنمی توتان عاجیزی-میسگین الینی؟! 

  یوخلوغوندور او فقیره غم و-نیكبت، قارا پول! 

  حئیف سندن قارا پول، كیم جوهلا یولداشیسان. 

  عوقلالار هامی سنسیز چكو ذیللت، قارا پول! 

  من پول اولسایدیم اگر سعی قیلاردیم كی، مودام 

  عوقلالارلا قیلیم اولفت و صؤحبت قارا پول! 

  سهوسن اهلی-كمال ایله اولوبسان دوشمن، 

  فانی دونیایه باخیب بیر ائله عیبرت، قارا پول! 

  اولسان ار اهلی-همیتله مووافیق، همراه، 

  سندن آثار قالار علم ایله حیكمت، قارا پول! 

  ور گئدیب اهلی-شقاوتله مووافیق اولاسان، 

  قالاجاقدیر اثرین عئینی-مذللت، قارا پول! 

  راضییا بسدی مذمت ائله دین قارا پولو! 

  عورفالن كسیب…، ائتمز دخی اولفت قارا پول. 

محمد امین رسول زاده

 سؤزلرده  :

خر پول :  فارس دیلینده پوللو و زنگین یئرینه ایشله نیلن ” خر پول ” سؤزو ” قارا پول ” –ون فارسلاشمیش فورماسی دیر.

ندن ایران پولونا “‌قارا ” بیریمی اویغون گلیر؟

ایران پولونون قایناغی قارا نفت اولدوغو اوچون پولونون بیریمی ده قارا اولسا داها اویوملو اولاجاقدیر.

“قارا”-نین آنلاملاریندان بیری دگرسیزدیر. ” قارا ” بیریمی بیزیم اوچون  ایكی باشلی قیلینج اولا بیلر. پولوموز دگری دولار- یورودان اسكیك اولسا كیمسه بیزی قینایا بیلمه یه جك ترسینه یوخاری اولسا دوشمانلاریمیز روسوای اولاجاق…

“قارا ” – نین بیر باشقا آنلامی كیفیر دیر. بیلدیگینیز كیمی ، اؤلكه ده چوخلاری پوللارینی قارا یوللارلا اؤرنگین : قاچاقچیلق ، اوغورلوق و… اله گتیریرلر. بو پوللارا قارا پول دئییلیر. بو پوللاری یئنی دن دؤره یه سالماق اوچون آغارتماق گره كدیر. ” قارا ” بیریمینی سئچمكله پول آغارتماغا گره ك قالمایاجاق چونكو پوللارین هامیسی ” قارا ” اولدوغوندان بو ” قارا پوللار” اونلارین آراسیندا ایتیب بو آغیر گؤره و بو  عزیزلرین اوزه ریندن گؤتورله جك دیر.

” قارا ” نین آیری آنلامی  تریاك دیر.  ” قارا ” بیریمنی سئچمكله “قارا” یا دوشمه گین قارشیسی آلینا بیلر چون مومكوندور قارایادوشنلر ” قارا” – نی “قارا ” ایله دییشمكدن یورولوب قارادان ال چكه لر .

گولمه جه :

مؤحتاد : ” قارا ” اولاندا ” قارا ” اله دوشمور ” قارا” اولاندا دا ” قارا “.

 ”قارا ” ، ائلجه ده  چوخ ، بؤیوك و زنگین دئمكدیر. ” قارا ” بیریمینی سئچمكله ، یوخاریدا دئدیگیمیز كیمی خالقیمیزین هامیسی ” قارا پول” لو و یا فارسلار دئمیشلی “خرپول “‌اولوب یوخسوللوغون داشینی بیر یوللوق آتاجاقلار.

” قارا ” ایله گؤزلرینیز آیدین اولانادك خوشجا قالین

1390/4/31



آچار سؤزلر : پول,

    بؤلوم: ساتیریك یازیلار
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :