گولمَجه لر پنجره سیندن

یازان : دوكتور جئری

گیریش :

 رادیو ، تلویزیون  و  قزئت لرده ، یوكوملولر (مسئوللار)   گون بویو  گولمَجه  سؤیله دیكلریندن  آدامین  الی  ساتیرا  یازماغا گئتمیر.  بو  اوزدن تلویزیون پراگراملاری كیمی ، قاپانمیش وئبلاقیمدان  بیر نئچه گولمَجه نی  سئویملی  یولداشلارا  تكرارلاییرام.

شاهنامه و سئچكی لر

اوغول   آتاسینا دئییر:

- ” آتا ! منده سیزین كیمی میللت وكیلی اولماق ایسته ییرم سیزجه نه ائتمه لی یم؟”

آتا گولومسه یرك دئییر :

-” اوغلوم ! سیاست دونیاسی یالان ، فیریلداق دونیاسی دیر . بونا گؤره یالان-پالان دانیشماق اؤیرنملی سن . بو اوزدن سنه سیفاریش ائدیریم شاهنامه یی فیردوسی  بیر كره اوخویوب اؤیره نه سن ”.

اوغول بئش- اون گون سونرا سئوینجك آتاسی نین یانینا گلیب  دئییر :

-” آتا !  شاهنامه نی بیر كره یئرینه اون كره اوخودوم . سیزجه ایره لی ده كی مجلیس سئچكی لرینده آدای اولا بیله رم می؟ “.

آتا الینی اوغولونون چیگنیه قویوب دئییر:

-” یوخ اوغلوم !  سنه  شاهنامه نی  بیر كره اوخو دئمیشدیم .  اون كره اوخویاندان یاخشی رئیس جمهور چیخار. بونا گؤره بیر ایكی ایل دوزمه لی سن”.

هخامنشی كتیبه سی

  بیرمیللت وكیلی  تبلیغات آپاریردی:

- ” بیلدیگینیز كیمی ، گئجه گوندوزلو چالیشمالاریم سونوجوندا ، كندینیز شهر اولدو . شهرینیزه گؤزل آد سئچیلدی؛ كوچه خیابانلارینیزا بؤیوكلرین آدی وئریلدی؛ تئلفونلارینیزین اؤن نومره سی قیسالدی؛ شهرین خسته خاناسی نین كولونگو یئره وورولدو…..”.

میللت وكیلی  نفسینی دریب یئنه ائكله ییر:

ـ حؤرمتلی وطنداشلار ! من بورادا  سیزه سؤز وئریرم . بو كز ده لوطفونوز شامیلی حال بنده اولوب منی یئنه اؤز گؤزل شهرینیزه وكیل سئچسه نیز، شهرین گیریشینده كی داغ اوزه رینده بیر دنه هخامنیشی كتیبه سی قازدیردیب توریست لرینده  آیاغینی بورایا آچام….”

رضاشاه و ایت

بیر گون ، رضا شاه كندلرین بیرینده گئچنده سورجوسو بیر تویوق باسیر. رضا شاه  سورجویه :

-” دایان گئدیم تویوق یییه سیندن عؤذور دیله ییم “- دئییب كندلی نین ائوینه گئدیر .  او، آز سونرا باش گؤزو تیلیت قان ایچینده   قاچا-قاچا گلیب ماشینا آتلاناراق  : - ” تئز اول چیخ آرادان “- دئیه قیشقیریر. 

سورجو چاش-باش  سوروشور:

- ” قوربان بو نه حالدی؟”

رضاشاه اینگیلده ییر :

-” هئچ! كندلی یه، من رضاشاهام تویوغونوزو باسدیم دئیینجه  ال- آغاجا یومولدو اوستومه ” .

سوروجو ماشینی تلسیك سوردوگوندن بو كز بیر ایت باسیر. او ، رضاشاها -” قوربان سیز بورادا اولون من اؤزوم گئدیب ایت  یییه سیندن عؤذور دیله رم “- دئییر.

 سوروجو گئدیب یاریم ساعات سونرا بیر سبد یئر- یئمیشله گوله – گوله گئری دؤنور. رضاشاه شاشقینلیقلا :

-” نه اولدو؟ بو یئر – یئمیش ندیر؟- دئیه سوروشور.

سورجو  دئییر:

ـ ” قوربان بیلمیرم ؛ كندیلی یه دئدیم من رضاشاهین سورجوسویم ایت اؤلدو . اودا بونلاری منه وئردی. “

آریایی بئینی

بیرینه بئیین جالاغی (پیوند) وراجاق ایدیلار . دوكتور بئینلری خسته گؤستریب قیمت لردن دانیشیر:

ـ آمریكالی بئینی ۱۰۰۰ دولار ، آوروپالی بئینی ۱۵۰۰ دولار ، آسیالی بئینی ۲۰۰۰ دولار و سونوندا  آریایی بئینی ۱۰۰۰۰ دولار “.

خسته شاشقینلیقلا سوروشور :

- “دوكتور بئی ، آریایی بئینی ندن بو قدر باهالی؟”

دوكتور گولومسه یرك : “‌ او بیری لر ایشلنمیشدیلر  آنجاق آریایی بئیینلری آكبند دیر ”- دئییر.

بختور شاعیر

فیردوسی شاعیرلرین ان بختوری دیر. باشقا شاعیرلرین شئعیرلرینی اوغورلاییرلار آنجاق  فیردوسی نین آدینا شئعیر قوشوب باسیرلار شاهنامه نین ایچینه….

دوزگون قادین

فردوسی شاهنامه سینده قادین لارین اگری وكؤتو اولمالارینا حؤكم وئریب. بیز بوردا بیر میثال نقض گتیرمكله اونون حؤكمونه قیرمیزی چارپاز چكیریك.

قیزدان اوغلان یولداشینا مئساژ گلیر:

-” گئجه ائوده كیمسه یوخ گل بیزه “.

اوغلان گئجه بیر قوطو شیرنی ایله قیزگیله گئدیر. نه قدر قاپینی دؤیور كیمسه آچمیر.

1390/4/16