ریال-ین احوالاتی

دوكتور جئری

دولار ایله ریال

دولار ایله ریال بازاردا گؤروشورلر. دولار بیغ آلتی گوله رك ریالا ساتاشیر:

- ریال قارداش! آللاه یامانلیق وئرمه سین نییه رنگین سارالیب، اولمایا تیریق – میریغا دوشموسن؟

ریال دریندن بیر آه چكیب دئییر:

- دردیمی دئشمه دولار قارداش حالیم بتر یاماندی، بیر كیلو مینلیگیمه یاریم كیلو سوزو ( سبزی- گؤی) وئرمیرلر!

دَییش توققوش

قوزو قولتوغوندا بیر كندلی، داواخانایا گیریب نوسخه سینی دوكتورا وئریر. دوكتور نوسخه یه باخمادان گولومسه یه رك:

-عمی ! مال- داوار داواخاناسی ایكی توكان آشاغیدادیر یانلیش گلمیسیز- دئییر.

پرت اولان كندلی:

-نوسخه قوزونون نوسخه سی دئییل منیم نوسخه م دیر. بازارچیلارین ریالا جینس وئرمه دیكلری اوچون بو قوزونو گتیرمیشم داوالارلا دَییش توققوش ائله یم!

ریالین انگی

ریال یامان خسته لنمیشدی. یولداشلاری؛ دولار، یورو و لیره حالینی سوروشماغا گئدیرلر. ریال نفس وورا - وورا قویودان چیخان سسی ایله میزیلداییردی :

-دولار مین تومن اولاجاق؛ دولار مین تومن اولاجاق...

دولار ، الینی ریالین آلنینا قویوب سونرا اؤزونتو ایله دئییر:

-انگینی چكین ساییر باییر ائله ییر!

ریالی قورتارماغین یوللاری

مجلیسده ریالین دگری نین الدن وئرمه سی نین قاباغینی آلماق اوچون جلسه قورولموشدو. میللت وكیللری اؤنریلرینی سونماقدا ایدیلار.

بیرینجی میللت وكیلی : منجه، ریالی دوندوروجویا قویوب ایندیكی دگرینی دوندورمالی ییق.

ایكینجی  میللت وكیلی : یوخ ! بو اولاسی دئییل ، بیز گره ك دولارین دگری نین آرتماسی نین  قاباغینا شاتیر اوزاداق.

اوچونجو میللت وكیلی : قارداشلار! اؤنریلرینیزه سؤز اولا بیلمز آنجاق خاریجه دن دوندوروجو و شاتیر آلماق اوچون یئترینجه دولاریمیز یوخدور بونا گؤره  بو دورومدا هامیمیز باشیمیزی كهلیك كیمی قارا سوخساق یاخشی دیر.

بوتون میللت وكیللری هامیسی بیرلیكده : دوغرودور ! دوغرودور!....

مجلس باشقانی : اوی بیرلیگی ایله اوچونجو میللت وكیلی نین اؤنریسی اونایلانیر.