+0 به‌ین
اؤكوز خسرو نئجه آدام اولدو؟
دوكتور جئری
اؤكوز خسرو آدام اولموشدو. بو خبر هامی كیمی بیزی ده شاشیرمیشدی. اؤكوز خسرو محله نین اوز قاراسی باجاغی پوخلوسو ایدی. گلیب گئده نه ایجَشمه، سورتوشمه، پیچاق چكمه، كوچه پاجادا آنقیریب یامان دئمه آلیشقانلیغی؛ اوغورلوق، اویوشدورجو ماده لر ساتماق ایسه پئشه سی ایدی. ان كیچیك ایشی بیزیم بو اوستاد دفتری نین كیتابلارینی اوغورلاییب باطیله كاغیذ یئرینه خیرداناچیلارا ساتماسی ایدی. یازیق اوستاد دفتری چوخلو آختاریشدان سونرا كیتابلارینی تاپمیشدی؛ آنجاق كیتابلار قییما- قییما دوغرانمیشدی. پروفسور نصرالدینله بو قونودا دانیشیب خیاباندا دولاشیركن اؤكوز خسروولا قارشی قارشییا گلدیك. اؤكوز خسرو گئرچكدن دییشمیشدی، یئریشی، داورانیشی، تسبئحی حتی كؤینگی نین یاخاسی بئله!
یاواشجا پروفسور نصرالدینه دئدیم:
-پروفسور، قوی نئجه آدام اولدوغونو بیله سیندن سوروشوم یوخسا بوگئجه ماراقدان یاتانمایاجاغام.
پروفسور نصرالدین چیگنینی آتدی. بو- من بیلمیرم اؤزون بیلیرسن - دئمك ایدی.
قاباغا گئچیب سالام وئردیم. اؤكوز خسرو بیرآزجیق اوزومه باخیب بیردن منی تانیندی.
- سیز سیز؟!
- هه اؤزومم خسرو آغا!
نئچه ایل بوندان قاباق سوسری اولاییندا منله بیر نئچه یولداشی توتوقلاییب-سیزی دونقوزلوغا باساجاغیق- دئیه اؤكوز خسروون سئللولونا اؤتورموشدولر. منده یولداشلارا- بوراسی دونقوزلوقدور یوخسا اؤكوزلوك؟- دئییب گولوشموشدوك.
خسرو بوینومو قوجاقلادی؛ اؤپوشدوك. بیر آزجا اویان بویاندان دانیشدیقدان سونرا بیله سینه دئدیم:
- خسرو آغا بیر شئی سوروشسام اینجیمز سن كی؟
اؤكوزخسرو گولومسه ییب دئدی:
- یوخ اینجیمه رم سوروش؛ آنجاق سندن بیر خواهیشیم وار منه داها خسرو دئمه یه سن. آخی من آدیمی دییشدیریب صادیق قویموشام.
كؤنلومده دئدیم: پاه... اولان آدینی دا دییشیب بو اؤكوز!...
اؤكوز خسرووا :
- آغا صادیق ایسته ییرم سوروشوم نئجه اولدو اؤكوز خسرو آدام اولدو؟
اسكی اؤكوز خسرو گوله رك:
- سن نه فیكر ائله ییرسن دوكتور؟- دئدی.
- توبه ائله میشسن؟- دئدیم.
قاشلارینی گؤیه قالدیب آغیزیندان یوخ آنلامینی آنلادان بیر سس چیخارتدی:
- چیرت!
- دوستاغا باسیلدیغین اوچون آدام اولموشسان؟
- چیرت!
- كیرمانا سورگون ائدیلدیگین اوچون؟
- چیرت!
- قامچی یئدیگین اوچون؟
- چیرت!
-بوینونا آفتافا سالیب كوچه پاجادا دولاندیریلدیغین اوچون؟
- چیرت!
- تعهد وئردیگین اوچون؟
- چیرت!
- بیردن بیره متحول اولدوغون اوچون؟
- چیرت!
- گؤردوغون ایشلرین سونوندان، اعدامدان قورخدوغون اوچون؟
- چیرت!
- .....
اسكی اؤكوز خسرو دوشونجه یه دالدیغیمی گؤرونجه دئدی:
- دوكتور بیلمه دین، من جاماعات نامازینا گئج قالاجاغام ؛ ایجازه وئر اؤزوم دئییم.
سونرا ساغ الینی منیم و سول الینی پروفسور نصرالدینین چیگنینه قویوب دئدی:
- دوكتور مامور قارداشلار ائوه تؤكولوب ماهواره می ییغیشدیراندان بری آدام اولموشام!
الیمی آلنیما چالاراق:
- آه ه ... نئجه بو منیم آغلیما چاتمادی آغا خس.. صادیق!- دئدیم، سونرا ماراقلا- بئله ایسه آغا صادیق ایندی سیزین گلیریز هارادان دیر؛ آخی قاباقكیلار كیمی داهی چاققی- واق ائله یه بیلمزسیزكی؟...
اسكی اؤكوز گولومسوندو:
- واللاه دوغروسونو ایسته سز ایندی من دؤولت طرفیندن ایشه آلینمیشام!
- نه ایشی؟!
- بعضی لرینی اؤزوم كیمی آدام ائله یم!
اذان سسی میناره لردن یوكسلدی. ایشده آییریلماق سوره سی گلمیشدی. اسكی اؤكوز خسرو ال وئریب ساغ اوللاشاركن پروفسور نصرالدینه ::
- سیزی بیر یئرده گؤرموشم... سیز فیردوسی آغزیندا اگلشمیرسیز؟!
پروفسور نصرالدینین رنگی قاچدی.
بؤلوم: حیكایه و گولمه‌جه‌لر