میلیاردئر اولماق ایسته‌ییرسینیزمی؟

دوكتور جئری

     اؤلكه‌میزده میلیاردئر اولماق باشقا اؤلكه‌لرده گؤره چوخ قوْلای‌دیر؛ نه اؤزل بیلیك-‌اردم ایسته‌ییر نه اولاغان‌اۆستو بارجاریق-‌ باشاری. دؤرد یؤنۆنۆزه ایتی باخسانیز  گۆنده نئچه-نئچه میلیادئرین گؤبه‌لك كیمی اورتایا پیرتلادیغینی گؤره‌جك‌سینیز. سیزده میلیاردئر اوْلماق ایسته‌ییرسینیزسه، ال، ال اۆستۆنه قوْیماییب سۇندۇغۇمۇز  یوْل گؤستریجی  اؤیكۆلره اؤزن گؤسترمكله  قیسا سۆره‌ ایچینده وارلی‌لارین سێراسینا قوْشۇلۇن.

ترقّی پیلّه‌لری

    پوْلیس بوْیلاندی. آلا-قارانلیقدا، كۆچه‌نین دیبینده گؤزو ایكی قارالتینی سئچدی. ال‌چیراغی‌نین ایشغینی كۆچه‌یه جالادی. ایكی كیشی، بیری نردویوانی دیوارا دایاییب بیریسی ایسه ‌ یۇخاری چیخماقدا ایدی. الینی تاپانچاسی‌نین اۆستۆنه قۇیۇب سسلندی:

هوْی‌ی‌ی... اوْرادا نه قاییرسینیز؟!

آشاغیداكی كیشی ‌سوْیۇق‌قانلی‌لیقلا:

-‌ هئچ!... اوْغلوم اگری‌بۇرۇق ایداره‌سینده ایشه آلینیب بیله‌سینه نئجه ترقّی پیلّه‌لرینی چیخاجاغینی اؤیره‌دیرم...-‌دئیه یانیت وئردی.

چیخار

بیر زنگین گنج‌‌‌دن سوْرۇشدۇلار:

-‌‌ قیسا سۆره ایچینده نئجه میلیادئر اوْلدۇنوز؟

زنگین گنج:

-‌‌ چیخاریم وار ایدی!...-‌ دئیه یانیت وئردی.

‌-‌ بیر آز آچیقلایا بیلرسینیزمی؟

-‌‌  ییرمی‌مین پولوم وار ایدی. بیر سبد آلما آلدیم، آلمالاری ساتیب قازانجی ایله ایكی سبد آلما آلدیم؛ ایكی سبدی، دؤرد سبد ائله‌‌‌‌دیم؛ دؤردو، سككیز... بیر آی سونرا...

-‌ بیر آی سونرا میلیادئر اوْلدونوز مۇ ؟!

-‌ هه!... بیر آی سونرا آتام  ایداره‌لرینده ایختیلاس ائله‌دی من زنگین اوْلدوم!

ال اۆستونده ال

 آغا رئیس، آخشام آروادینا دانیشیردی:

-‌ بوگۆن ایداره‌‌ده بیر اوْغرۇ ایشچی یاخالادیق.. شرف‌سیز منیم جیبیمدن ده پول اوْغۇرلامیشدی...

آرواد قایغین-قایغین‌:

-‌ نئچه اوْغۇرلامیشدی؟..- سوْرۇشدۇ.

رئیس اۆزۆنتو ایله فیسیلدادی:

-‌ بیلمیرم... مراجعه ائدن‌لرین بیریندن رۆشوت آلمیشدیم، هله سایمامیشدیم!

دؤولت پولونون بركتی وار!

قوْنشۇمۇز احمدآغا ساده بیر دؤولت ایشچیسی‌دیر، آیدا سككیز یوز مین آیلیق آلیر. تزه‌لیكده، ایكی‌یۆز میلیون وئریب بیر ماشین آلیب. شهرین یۇخاریسیندا بیر میلیاردلیق ائو آلدیغی دا سؤیله‌نیر. دۆنن یوْل اۆسته منی گؤتۆردۆ. دیلی‌‌‌‌‌نین آلتیندان سؤز چكمگه چالیشدیم.

-‌ احمد آغا بیر شئی سوْرۇشسام آجیغینیز گلمزمی؟

-‌ یوخ!

-‌ عمّه‌نیز اؤلۆب‌مۆ ؟

-‌‌‌‌ یوخ!

-‌ پول تاپیب‌سینیزمی؟

-‌  یوخ!

-‌ یوخ یئردن بیله‌نیزه پول یئتیشیب‌می؟

-‌  یوخ!

-‌  بئله ایسه، سؤرۆشماسی عاییب اولماسین، سككیز یۆز مین آیلیقلا نئجه بو ماشینی آلیب‌سینیز؟!

احمد آغا گۆلۆمسه‌دی:

-‌ دؤولتین وئردیگی آیلیق آز اولسادا پۇلۇنون بركتی وار.. نه قدر خرجله‌ییریك قۇرتۇلماق بیلمیر!...

سؤزلۆك

اؤزل : مخصوص

اؤزن: دقت، اعتنا

اؤیكۆ : حكایت

اؤیۆد: نصیحت

‌اردم: فضیلت

اولاغان‌اۆستو : فوق العاده

اۆزۆنتو: تاسف

بارجاریق: توانایی

بیلیك: دانش

چیخار: لیاقت، شایستگی

زنگین: دارا، متمول

سۆره: مدت

سۇنماق: تقدیم كردن

سوْیوق قانلی‌لیق: خونسردی، بی‌تفاوتی

سێرا: صف

قازانج: سود

قایغین: نگران

قوْشۇلماق: پیوستن

قوْلای : آسان

گنج: جوان

یؤن: جهت

یانیت: جواب