سیز پول ایتیرمه‌ییب‌سینیز؟!

دوکتور جئری

    گون اورتا چاغی ائوه قاییتدیقدا، نه ائو سیل-سوپور اولموشدو نه‌ ده مطبخدن بیشمیش ایگی گلیردی. گازین اوستونده‌کی بوش قابلامانی یوخلایاندا حیات یولداشیم دیله گلدی:

- بو گون خدیجه خانیم قویمادی ایش-گوجومه یئتیشیم.

-  گئنه قایناناسینی پیسله‌مگه گلمیشدی؟!

-  یوووخ... سحر چؤرک آلماغا گئدنده کوچه‌دن بیر میقدار پول تاپدیم . قاپی - قونشویا تاپشیردیم کیمین پولو ایتیبسه گلسین نیشانینی وئرسین آلسین. ائو ایشلرینه تزه باشلامیشدیم قاپی چالیندی. خدیجه خانیم ایدی. کئف- احوالدان سونرا دئدی:

 - سحر یومورتا آلماق اوچون باققالا گئدنده بئش مین تومن پول ایتیریب.

دئدیم:

- خدیجه خانیم من تاپان پول بئش مین تومن دئییل.

یاریم ساعات سونرا گئنه خدیجه خانیم قاپینی چالدی:

- بایاق بیزیم جلال دئییردی کوچه‌ده اوینایاندا آلتی مین تومن پول سالیب ایتیریب.

دئدیم:- خدیجه خانیم ! تاپدیغیم پول آلتی مین دئییل!

بیر ساعات سونرا گئنه خدیجه خانیم گلدی:- قیزیم  یئددی مین تومن کیفیندن سالیب!

دئدیم: - یئددی مین ده دئییل!!

بیر ساعات اون دقیقه اولمامیش  گئنه خدیجه خانیم تاپیلدی:- أریم دئییر  سککیز مین پولو دوشوب جیبیندن.

دئدیم:- سککیز مین ده دئییل..

...

نه باشین آغریدیم  سحر ساعات سککیزدن ایندی‌یه‌جن- دیوارداکی ساعاتا باخدی؛ بیر یاریم ایدی- خدیجه خانیم گلیب بیر- بیر  بوتون ائل- طایفاسی‌نین بو کوچه‌دن گئچدیگینی،گئچرکن ده پول ایتیردیگینی ایدیعا ائدیب.

سؤزلر بورایا یئتینجه یئنه قاپی چالیندی. خدیجه خانیم ایدی!

حیات یولداشیم اؤفکه‌لندی:

- خدیجه خانیم بو کز هانسی قوهوموز بو کوچه ده پول ایتیریب؟!

- باجی نییه به حیرصله‌نیرسن؟.. دئییرم پولون یییه‌سی تاپیلماسا اونو وئر بیر موستحق آدام وار اونا وئریم!..

حیات یولداشیم قیزغین- قیزغین:

- باش اوسته!- دئییب قاپینی چیرپدی.

باشیمی توولایاراق:

- آللاه! نه آداملار تاپیلیر بو دونیادا؟!-  دئدیم.

- ...

یوموشاق- یوموشاق میزیلدادیم:

- دئییرم؛ عزیزیم! او پول ائله منیمکی‌دیر!.. سحر ایشه گئدنده جیبیمدن مندیلیمی چیخارتدیم بورنومو سیلیم حتما اوندا حبیمدن دوشوب.

حیات یولداشیم گؤزلرینی برلده- برلده:

- سنینکی دیرسه، نئچه دیر؟!- دئیه سوروشدو.

- اؤزون بیلیرسن من جیبیمین پولونون ساییسینی بیلمه‌رم.. نئچه اولسا ائله منیم دیر؛ وئر گلسین- دئدیم.

حیات یولداشیم کوف دئییب گؤیه چیخدی:

- أشی نییه یالان دانیشیرسان.. سحر چؤرکچی‌یه گئدنده جیبلرینی آختاردیم هئچ پول وار ایدی سالیب ایتیره‌سن؟.. چؤرگی ده نیسیه آلمیشام...

Siz pul itirməyibsiniz?!

Dr.Jery

    Günorta çağı evə qayıtdıqda, nə ev sil-süpür olmuşdu nə də mətbəxdən bişmiş iyi gəlirdi. Qazın üstündəki boş qablamanı yoxlayanda həyat yoldaşım dilə gəldi:

- Bu gün Xədicə xanım qoymadı iş-gücümə yetişim.

-  Genə qaynanasını pisləməyə gəlmişdi?!

- Yoox... səhər çörək almağa gedəndə küçədən bir miqdar pul tapdım. Qapı - qonşuya tapşırdım kimin pulu itibsə gəlsin nişanını versin alsın. Ev işlərinə təzə başlamışdım qapı çalındı. Xədicə xanım idi. Kef- əhvaldan sonra dedi:

- Səhər yumurta almaq üçün baqqala gedəndə beş min tümən pul itirib.

Dedim:

- Xədicə xanım mən tapan pul beş min tümən deyil.

    Yarım saat sonra genə Xədicə xanım qapını çaldı:

- Bayaq bizim cəlal  deyirdi küçədə oynayanda altı min tümən pul salıb itırib.

Dedim:- Xədicə xanım ! tapdığım pul altı min deyil!

    Bir saat sonra genə Xədicə xanım gəldi:- Qızım yeddi min tümən kifindən salıb!

Dedim: - yeddi min də deyil!!

    Bir saat on dəqiqə olmamış genə Xədicə xanım tapıldı:- Ərım deyir səkkiz min pulu düşüb cibindən.

Dedim:- səkkiz min də deyil..

...

    Nə başın ağrıdım səhər saat səkkizdən indiyəcən- divardaki saata baxdı; bir yarım idi- Xədicə xanım gəlib bir- bir bütün el- tayfasının bu küçədən geçdiyini,geçərkən də pul itirdiyini iddia edib.

    Sözlər buraya yetincə yenə qapı çalındı. Xədicə xanım idi!

Həyat yoldaşım öfkələndi:

- Xədicə xanım bu kəz hansı qohumuz bu küçə də pul itirib?!

- Bacı niyə bə hirslənirsən?.. deyirəm pulun yiyəsi tapılmasa onu ver bir müstəhəqq adam var, ona verim!..

    Həyat yoldaşım qızğın-qızğın:

- Baş üstə!- deyib qapını çırpdı.

Başımı tovlayaraq:

- Allah! nə adamlar tapılır bu dünyada?!- dedim.

- ...

    Yumuşaq- yumuşaq mızıldadım:

- Deyirəm; əzizim! o pul elə mənimkidir!.. səhər işə gedəndə cibimdən məndilimi çıxartdım burnumu silim hətmən onda cibimdən düşüb.

    Həyat yoldaşım gözlərini bərəldə- bərəldə:

- Səninkidirsə, neçədir?!- deyə soruşdu.

- Özün bilirsən mən cibimin pulunun sayısını bilmərəm.. Neçə olsa elə mənimdir; ver gəlsin- dedim.

    Həyat yoldaşım kuf deyib göyə çıxdı:

- Əşi niyə yalan danışırsan.. səhər çörəkçiyə gedəndə ciblərini axtardım heç pul var idi salıb itirəsən?.. Çörəyi də nisyə almışam...