عابباسین قوچو

دوکتور جئری

    سئچیم باشلامیشدی. مسجدین قاباغیندا اوزون بیر صف دوزلمیشدی. جاماعات آستا-آستا ایچری گئچیب رأی‌لرینی صاندیغا سالیب دئیه- گوله ائشیگه چیخیردیلار. چودار عابباس نیگران- نیگران سیجیللیسینی الینده سیخیردی. بیر آیاغینی گؤتورب بیرینی قویوردو. یئنه نؤوبتی چاتمیشدی! یئنه بیر باهانایلا نؤوبتینی بیر آیریسینا وئریب، گئدیب صفین دیبینده دایانماق ایسته‌ییردی آنجاق رأی آلان مأمور سیجیللیسینی الیندن دارتیب یانینداکی صندلین اوستونده اوتورتدوردو بیله‌سینی. تر شیر-شیر آلنیندان آخماغا باشلادی. مأمور سیجللینی آچیب بیر عابباسا بیر سیجیللی‌نین عکسینه باخاراق دئدی:

- حاج عابباس آغا!... بیر موشکولوز وار؟!.. بئش آلتی یولدور، گؤرورم نؤوبتیز چاتاندا رأی وئرمه‌دن گئدیب صفین دبینده دایانیرسیز!!

چودار عابباس الی‌نین ترسی ایله آلنین تری سیله‌رک دئدی:

- واللاه دوزونو ایسته‌سن قورخورام گئنه ده خالقین آغزیندا ضرب‌المثل اولام!

مأمور ماراقلاندی:

- نئجه یعنی ضرب المثل اولاسیز؟!

چودار عابباس اوزونتو ایله باشینی توولادی:

- گئچن ایل، اوشاقلارین داییسی کنددن زنگ ووروب، "قویونلاریمین قوچو یوخدور... منیم ایشیم وار گلنمیرم، مئیداندان بیر قوچلوق آل، گؤندر گلیسن سونرا حئسابلاشاریق"دئدی. منده مئیدان گونو یوز اؤیَجین ایچیندن قارا گوز، قارا آغیز، قارا دیز، اوجا بوی، اوزون ساچاقلی، شنه بورنوز، بیر قوچ سئچیب پولونو ایکی قات اؤده‌دیکدن سونرا کندده گؤندردیم. اوچ- دؤرد ساعاتدان سونرا تئلئفون زنگ ووردو. اوشاقلارین داییسی ایدی. حتمن "اللرین آغریماسین" دئمک ایسته‌ییردی. آنجاق  تئلئفون دالیندان قیشقیرتی سسی گلدی،"یئکه چودارسان، او نه قوچدور آلیب گؤندرمیسن؟!  هم منی، هم اؤزونو ائل- عالمین مسخره‌سی ائله‌دین!".‌ "نه اولوب؟ نه‌ اولوب؟" دئدیگیمده دایی گئنه قیشقیردی: "نه اولاجاق، قوچ تای داششاق‌دیر!".

چودار عابباس دریندن بیر آخ چکیب آرتیردی:

-او گوندن کندده مثل اولموشام، سؤز-سؤزه گلنده دئییرلر: عابباسین قوچو! بیله‌مه واسواسلیق گلیب، اوچ- دؤرد شئین آراسیندان بیرینی سئچه بیلمیرم! قورخورام!...

مامور، چودار عابباس ایله قایغیداشلیق ائتدی:

- دوز دئییرسن... هله نوماینده سئچمک لاپ چتین ایشدیر... هر نه اولسا  اونلاری گؤندریریک مجلیسده، گئدیب ایشیمیزی آشیرسینلار!... آللاه ائله‌مه‌میش نوماینده‌لر...- سؤزونو دَییشدیردی-... حاج عابباس آغا ایسته‌ییرسن بیر‌آز داها سال-چیخ ائله سونرا گل رأی وئر...نه دئییرسن؟!...

چودار عابباس باشی ایله مامورون سؤزلرینی دوغرولایاراق گئدیب صفین دیبینده دایاندی.