کئفلی کونفوسیوس

دوکتور جئری

     اؤلکه‌نین یوز ایل‌لیک گلیشمه- ایره‌لی‌لمه پروقرامینی حاضیرلاماق اوچون دؤولت طرفیندن داناباشلی دوکتور جئری، ترس آوالی قلئیچی مورتوض بیرده گرگرلی کئفلی ایسکندر  بؤیوک بیلگین کونفوسیوسون یانینا گؤندریلدی. مملکت باش بیلنلری، کونفوسیوس ایله چایلاشاندان سونرا بو قونودا یاردیمجی اولماسینی، یول- یؤندم گؤستریب اؤیود وئرمه‌سینی ایسته‌دیلر. بؤیوک بیلگین ساققالینی تومارلایا- تومارلایا دئدی:

-  مملکتینیزه یئدی آی ایچینده بؤیوک بیر ایش گؤرمک ایسته‌ییرسینیزسه بوغدا اکین.

- مملکتینیزه یئددی ایل ایچینده بؤیوک بیر ایش  گؤرمک ایسته‌ییرسینیزسه آغاج اکین.

- مملکتینیزه یئتمیش ایل ایچینده بؤیوک بیر ایش گؤرمک ایسته‌ییرسینیزسه اینسان تربیه ائله‌یین.

     دوکتور جئری آلقیشلاییجی باخیشلارلا کونفئسییوسو سوزه‌رک یولداشلارینا دؤنوب:

- بو آلتین اؤیودلری نوسخه ائله‌ییب دؤولتیمیزین حوضورونا چاتدیرمالی‌ییق- دئیه الینی جیبینه سوخدو:

- ائی واخ!.. گؤزلوگوم ائوده قالیب، اؤیودلری سن یاز، اوستاد مورتوض!!

قلئیچی مورتوض اویان- بویانین قورتدالایا-قورتدالایا فیسیلدادی:

- ائله بیل قلمیمی گتیرمه‌میشم!!

کئفلی ایسکندر بو دورومو گؤرونجه باشینی تؤولاییب دئدی:

- من یازارام!

دوکتور جئری برک-برک تاپشیردی:

- کئفلی- کئفلی یازمایاسان هااا!!...

***

ایکی گون سونرا کئفلی ایسکندرین یازقیسی باشقانین قاباغیندا ایدی:

مملکته ایچینه نئجه آفتافا گؤتورمک اولار:

- مملکته یئدی آی ایچینده آفتافا گؤتورمک ایسته‌ییرسینیز‌سه، بوغدا وارید ائله‌یین.

- مملکته یئددی ایل ایچینده آفتافا گؤتورمک ایسته‌ییرسینیزسه، اورمان-مئشه‌لری  آرادان آپارین.

-مملکته یئتمیش ایل ایچینده آفتافا گوتورمک ایسته‌ییرسینیزسه، مدرک ساتین.