ائششگین حئسابی

دوکتور جئری

     ماشینی دره‌یه دیغیرلانیب شئیخ آغانین بؤیوک آغازاده‌سی‌‌‌ اؤلموشدو. ائو یاسا باتمیشدی؛ آغلاشما سسی بیر آن کسیلمیردی. شئیخ آغا باشینا تاپدایا-تاپدایا اوغلانلارینی یانینا چاغیردی:

- بالالاریم!.. رحمته گئتمیش قارداشیزا بیر ایش گؤرمه‌لی‌سیز قبیر عذابی چکمه‌سین!

اورتانجی اوغلو سیزیلدادی:

- آتا!.. قارداشیمیز نامازینی قیلاردی، اوروجونو توتاردی، خوُمس-زکاتینی وئرردی، زییارتینی گئدردی، ساققالینی قویاردی، او  نییه گره‌ک قبیر عذابی چکسین؟

شئیخ آغا باشینی آشاغی سالیب دیزینه تاپدادی:

- یادیزدادیر نفت دکلی یوخ اولدو.. بللی ده اولمادی اونو کیم اوغورلاییب؟!!

- هه..هه.. یادیمیزدادیر!

- اونو قارداشیز اوغورلامیشدی!

- یووو....!!!

- هله او یوز بیرمی اوچ میلیارد... اونوندا آشیرماسیندا قارداشیزین الی وار ایدی! آی بالالاریم..هانسی دئییم؟!!..

- آتا..ایندی دئییرسن نئیله‌یک قارداشیمیز قبیر عذابی چکمه‌یه؟!

شئیخ آغا بیر آز دوشوندو:

- بیر نفر تاپمالی‌سیز  بیرینجی گئجه‌، قبیرده قارداشسیزین یانینا اوزانیب نکیر-مونکرین جاوابینی وئره.

کیچیک اوغلان دیله گلدی:

- کنده، قلئچی مورتوض آدلی یوخسول بیر کیشی وار. ائششگ ایله گئدیب مئشه‌دن اودون گتیریب ساتار؛ سانیرام پول قارشیلیغیندا بو ایشه راضی اولا.

***

     شئیخ آغانین  اوغلانلاری قئلیچی مورتوضون قاپیسیندا ایدیلر:

- اشی..بیلیریک سن چتینلیکله گئچینیرسن، قاردا-بوراندا ائششک ایله گئدیب مئشه‌دن اودون گتیریب ساتیرسان. سن ایلک گئجه قبیرده بیزیم قارداشین یانیندا یاتسان، سنه بیر پئیکان وانئت آلیب سنی بو فلاکتدن قورتاراریق.

     قئلیچی مورتوض اؤز- اؤزونه،" یاخشی اولدو، ائششگی ساتیب ائوله‌نه‌رم، پئیکان-وانئتله اودون گتیریب  ائویمی گئچیندیره‌رم"-دئیه دوشونه‌رک راضیلیغینی بیلدیردی.

      قئلیچی مورتوضو اؤلونو یانینا اوزادیب بوغولماسین دئیه قبیرین آیاق طرفیندن بیر اویوق قوبدولار. پئیکان وانت فیکری ایله، آرواد فیکری ایله شیرین یوخویا جومان قلئیچی مورتوض گئجه‌نین بیر واختی تاققاتاق سسینه یئریندن داشلاندی. گؤردو؛ الی دگنکلی ایکی آدام بنزه‌مز قورخونج یاراتیق قبیرین آیاق طرفیندن ایچری گیردیلر. آنلادی؛‌ بونلار سورغو-سوالا گلن نکیر-مونکردیلر. اورگی گوپ-گوپ دؤیونمگه باشلادی. گلنلرین بیرینه او بیرینه دئدی:

- اده! نکیر هانسیندان باشلایاق؟

مونکر قاققاناق چکدی:

- اؤلن اؤلوب ائله بو دیریدن باشلایاق.

نکیر سوروشدو:

- کیشی دئ گؤروم نئچه یاشین وار؟ نه ایش گؤرورسن؟ اوروج-نامازین نئجه دیر؟..

قئلیچی مورتوض دیلی توتار-توتماز میزیلدادی:

- اللی یاشیم وار، ائششک ایله مئشه دن اودون گتیریب ساتارام، نامازا تزه باشلامیشام،نئچه گوندور، قورآن کیلاسینا گئدیرم، اینشاالله گلن رمضان اوروجدا توتاجاغام!

نکیر حیرصلندی:

- یئکه کیشی!...[قئلیچی مورتوض اوروج-نامازینا گؤره اویغون یئرینه آغاج سوجاقلاریندان قورخودو]... سن نییه ائششگین  آرپا یارانه‌سینی جیبینه قویوب قاباغینا سامان تؤکوردون؟!

- قوربان یانلیش عرضیزه چاتدیریبلار، باشیزا آند اولسون آرپا یارانه‌سی پولونا سامانی بئله  چتین‌لیک آلماق اولور!!

بو یانیت نکیری یوْشوُدونجا مونکر سوروشدو:

- مئشه‌یه گئدنده ائششک اودونسوز ایدی مینیب گئدیردین، گلنده، اودون یوکله‌یندن سونرا نییه مینیردین؟ ائششگه یازیغین گلمیردی؟!

قئلیچی مورتوض دیلی باغلانینجا مونکر قیشقیردی:

- اولان نکیر! وور بو کؤپک اوغلونو!!

    نکیر-مونکر دوشدولر قئلیچی مورتوضون جانینا سحره‌جن بیله‌سینی دؤیدولر. صوبح اولونجا، شئیخ آغایلا اوغلانلاری گلیب اونو قبیردن چکدیلر ائشیگه. گؤدولر بدنینده سالامات یئر قالماییب. شئیخ آغا قئلیچی مورتوضون باشینی دیزی‌نین اوستونه قویوب سوروشدو:

- اشی دئ گؤروم سنه نه اولوب؟ اوغلومون ایشی نئجه اولدو؟!

قئلیچی مورتوض زاریلتیسینی کسیب قیشقیردی:

- اولان من بیر ائششگین حئسابینی وئریب قورتارا بیلمه‌دیم، تون به تون دوشموش اوغلوزون حئساباتینی هارادان وئره‌یدیم؟!