هر ایش بیلن شیخ آغا (ایکینجی بؤلوم)

دوکتور جئری

گئچن هفته یازدیق:

مطبه گئدرکن قلئیچی مورتوضا توشا گلمیشدیم. او ائوی‌نین برباد حالدا اولدوغوندان دانیشیب صنعتچی آختاردیغینی سؤیله‌میشدی. من ده دئمیشدیم: نییه اوزاق یئره گئدیرسن! صنعتچی گؤز قاباغیندادیر: دده‌لیگین شیخ آغا!

اونون باجارمادیغی ایش یوخدور. او مملکنددیمیزدن باشقا، بوتون دونیا و سایر کهکشان‌لارین مسئله‌لرینی ده حل ائتمکده‌دیر...

ایندی ماجرانین قالانی:

    دونن ایشدن قاییدارکن کوچه‌ده قلئیچی مورتوضو گؤردوم. دوغروسو گؤزلریمه اینانا بیلمه‌دیم . سانکی اون ایل جاوانلاشمیشدی! قیرمیزی بیر پئنجک گئیمیشدی. کئف – احوالدان سونرا سوروشدوم:

-‌ائوی نئیله‌دین تعمیرات ائله‌یه بیلدین.

گؤزلری‌نین ایچی گولدو:

-‌ دوکتور! آللاه سنین دده‌نی رحمت ائله‌سین.. او گون سنی گؤرمه‌سیدیم بتر بورجا -خرجه باتاجاق ایدیم.  هه.. دده‌لیگیم گلدی بوتون موشکولاتی اورتادان قالدیردی!

الیمی چینینه قویوب گولوسه‌یه‌رک دئدیم:

-‌ آی شولوق!..حتماً دده‌لیگین ال آلتداکی‌لارینا امر ائله‌دی؛ گلیب ائوینی سهمانا سالدیلار هننننن؟!

 چوخ جیددی دئدی:

-‌ یوووخ.. دده‌لیگم ایکی کلمه ایله بیزیم بوتون موشکولاتیمیزی حل ائله‌دی!

چاش-باش قالدیم:

-‌ نئجه.. نئجه؟ ایکی کلمه ایله..

باشی ایله سؤزلریمی دوغرولادی:

-‌ هه! ایکی کلمه ایله. او گون سنین سؤزلرین عاغلیما باتدی. گئدیب دده‌لیگیمی گؤردوم. بوتون اولوب- بیتنلری بیله‌سینه دانیشدیم. آللاه دده‌لیگیمی منه چوخ گؤرمه‌سین. تئز آیاغا قالخیب دئدی دوش قاباغا. ائوه چاتینجا خوُیلو خانیم منی بیر قیراغا چکیب دئدی: من دئییرم گئت صنعتچی گتیر ائوی تعمیر ائله، سن گئدیرسن دده‌لیگین قوناق گتیریرسن؟ دئدیم: ائله دده‌لیگیم گلیب موشکولاتیمیزی حل ائله‌یه. بو واخت دده‌لیگیم آروادیمی اوتاغا چاغیردی. ایچری‌یه گیردیکده دده‌لیگیم منه دئدی ائشیگه گئت قاپینی دا دالینجا اؤرت. ائشیگه چیخیب قاپینی باغلادیم. آنجاق ماراقدان قولاغیمی قاپی‌یا دایادیم. ائشیتدیم دده‌لیگیم خویلو خانیما دئییر: باخ قیزیم منیم الیمده ایکی کلمه‌دیر ها! دئمه دئمه‌دیم.. بیرده ائشیتسم قلئیچی‌یه دئیه‌سن اورانی دوزلت، بورانی دوزلت. گلیب طلاق صیغه‌نی اوخویاجاغام ها! دئمه دئمه‌دیم. اوندا هئچ زات سنه یئتیشمز ها!.. دئمه دئمه‌دیم.. اوندا قالاجاقسان کوچه‌لرین قیراغیندا ها!.. دئمه دئمه‌دیم!..

او گوندن خویلو خانیم بوس-بوتون دگیشیب. من ائو گلنده قولونو سالیب بوینوما او اوزومو اؤپور، بو اوزومو اؤپور..

دئییرم دوکتور! کئشکه ائویمیز چوخ..چوخ قاباقلار خاراب اولایدی اوندا بیز دونیانین ان بختور عایله‌سی اولاردیق...