بچّه تهران

دوکتور جئری

دوزونو ایسته‌سه‌نیز یاشیم بو یاشا چاتیب هله من بیلمه‌‌میشم  فارس دیلینده تجزیه‌طلبی دئییلن سؤزونون گئرچک آنلامی نمنه‌دیر؟! تجزیه‌طلبی یاخود بؤلوجولوک بیر بوتونو بؤلمک یوخسا بؤلونموش‌ پارچالاری بیرلشدیرمک‌ ‌دیر؟! بو تجزیه طلبی دئییلن شئی یاخشی بیر شئی‌دیر یاخود پیس؟!

 اولا بیلر دئیه‌سینیز بو نه سورغودور؟ آدی اوستونده‌دیر، بؤلوجولوک بیر بوتونو نئچه یئره بؤلوب پارچالاماق‌‌دیر. اؤرنک اوچون ایرانین بو یوز ایل‌لیک تاریخینده آذربایجانی نئچه-نئچه اوستانا بؤلوشدورمه‌سی کیمی. دئییرم رحمت آتانیزا! بئله ایسه بو بؤلونموش اوستان‌لارین هامیسینا بیر یئرده گؤنئی آذربایجان دئینده نییه آداما ترسه-ترسه باخیب دئییرلر: تجزیه‌طلب؟!

تجزیه‌طلب‌لیگین یاخشی-پیسلیگینه گلینجه، گؤرونور بو سیاست تکجه حاکیمیت طرفیندن یورودولدوگونده  یاخشی بیر ائیلم‌دیر.

اؤرنگی گئچن هفته‌لرده آذربایجاندا یارادیلاجاق یئنی-یئنی شهر و اوستان‌لارین گوندمه گتیرمه‌ مسئله‌سی‌دیر:

بیلدیگینیز کیمی ،‌ بیز ترس آوایا باغلی اسلام‌آباد بخشینده یاشاییریق. گئچن هفته کؤکنی اسلام آباددان اولان ترس آوانین میلّت وکیلی جناب حؤکومتی بخشیمیزه گلمیشدی. جاماعات توپلاشینجا جناب حؤکومتی کورسونون اوستونه چیخیب دانیشماغا باشلادی:

-‌ اسلام آبادین حؤرمتلی اهالیسی! موشتولوغومو وئرین بو گون سیزه بیر گؤزل خبریم وار!

آغ ساققال‌لار گولومسه‌یه‌رک:

-‌ موشتولوغونوز گؤزوموز اوسته! بویورون نه خبر؟-‌ دئدیلر.

میلت وکیلی بیردن جوشدو:

-‌ اسلام آباد شهر اولدوووو...

گؤزله‌نیلمز خبردن جاماعات دویغولارینی آردیجیل چپیک چالماقلا گؤستردی.

جناب حؤکومتی الی ایله جاماعاتی ساکین اولماغا چاغیراراق آرتیردی:

-‌ چوخلاری دئییردیلر؛ ییرمی مین‌لیک بخشدن شهر اولماز، شهر اولماق اوچون گره‌ک بخشین جمعیتی یئتمیش میندن چوخ اولسون. آمما من بوتون موخالیفت‌لره باخمایاراق دئییردیم، من اسلام آبادی شهر ائله‌جگم و ائله‌دیم ده..

جاماعات گئنه چپیک چالدی.

-‌ اسلام آباد شهری‌نین مؤحترم اهالیسی! ایندیدن حاضیرلیقلی اولون چونکو ائله بو گوندن اعتباراً ایمکاناتین آغزی شهریمیزه ساری آچیلاجاقدیر..

جاماعات یئنه چپیک توتدوردو.

-‌ غیرتلی  اهالی! هله بو باشلانیشی‌دیر! اینشاالله سیزین حیمایتینیزله ایکینجی آددیمدا اسلام آبادی اوستان ائله‌جگم، من گؤزل اوستانیمیزین حاقینی اؤزگه‌لره اوستان‌لارا قاپدیرمایاغام...

بو موشتولوقدان گنج‌لر قول-قولا وئریب یاللی گئتمگه باشلادیلار.

گنج‌لرین جوشغوسوندان جناب حؤکومتی‌نین گؤزلری یاشاردی:

-‌ عزیزلریم! اسلام آبادین لیاقتی، شهر اولماقدان، اوستان اولماقدان داها چوخدور. نئچه واخت‌دیر مجلیسده، پایتاختین یئرینی دگیشدیرمه‌سی اوزه‌رینده مذاکیره‌لر گئدیر. من آیاغیم تهرانا چاتینجا بیر لایحه حاضیرلاییب مجلیسه تقدیم ائله‌یه‌جگم بیزیم گؤزل شهریمیز، ایمکاناتلی شهریمیز- اسلام آباد ایرانین پایتاختی اولسون.

عزیز همشهری‌لریم! سیزین نه‌یینیز تهرانلی‌لاردان اسکیک‌دیر. قوی اسلام آباد پایتاخت اولسون دا سیزه  ده دئسینلر: بچه تهران!