دوکتــــور جـئــــــری
ساتاشما ادبیاتی
گؤروشلر : 0
تاريخ : جمعه 23 فروردین 1398 | یازار : دوکتور جئری
+0 به‌ین

بیرآز دا اوغرولارین فیکرینده اولون!

دوکتور جئری

کاتتا ایسلامین اوغلو، باغلاری ائششگین بئلینه چاتیب گئتمک ایسته‌ینده، حاجی محمدعلی آغا برزگر توزاناق سالاراق اؤزونو یونجالیغا یئتیردی. موتوردان آشاغی ائندی. دیشی باغیرساغینی کسیردی. بیر هفته ایدی، قان تر ایچینده تک باشینا یونجانی بیچیب، تاغالاییب، بوکموشدو. آنجاق باغلارین  قوروماسینی گؤزله‌یندن ، کیمسه گونده-گونده گلیب یونجالاری اوغورلاییردی. نئچه گون پوسقودا یاتدیغی ایشه یاراماسا دا، ایندی‌ آلدیغی بیر راپورت ایله اوغرونو سوچ اوسته یاخالامیشدی.

حاجی محمدعلی یومروغونو سیخاراق دیشی‌نین دبیندن چیخانی دئمک ایسته‌ینده، کاتتا ایسلامین اوغلو تئز اونو قاباقلادی:

-‌ حاجی محمدعلی آغا اوتانمیرسان؛  نییه به باغلاری کیچیک سالمیسان؟!



آچار سؤزلر : کئفلی ایسکندر, ایقتیصاد, ایختیلاس, اوغورلوق,

    بؤلوم: حیكایه و گولمه‌جه‌لر
گؤروشلر : 0
تاريخ : جمعه 16 فروردین 1398 | یازار : دوکتور جئری
+0 به‌ین

جهنّم گولمک یئری دیر!

دوکتور جئری

کئفلی ایسکندر ایله جنّت‌ده گزمکده ایدیک. بیردن قلئیچی مورتوض یادیما دوشدو. اوزونتو ایله دئدیم:

-‌ ایسکندر بگ گؤردون قلئیچی مورتوض اؤز الی‌له اؤزونو نه گونه سالدی. نه قدر بیله‌سینه دئدیک، دیوارین چاتیندان قونشونون آروادینا باخما، جومعه آخشاملاری مچیدده چاخیر ایچمه، دستمازسیز جاماعات نامازی قیلما، محرمکلیکده خالقدان ییغدیغین پوللاری سیم-سانجاق‌لا کوله ائله‌مه، آیاق اوسته ایشه‌مه، بی‌بی‌سی رادیوسونا قولاق آسما، دونیا مالیندان برک یاپیشما، روشوت وئرمه، آغازاده‌لرین یولونو گئتمه، دده‌لیگین جیبیندن پول اوغورلاما...

سونرا دریندن بیر سولوق آلاراق آرتیردیم:

-‌ قلئیچی مورتوض بیزیم کیمی شیخ آغانین سؤزلریندن چیخماسایدی، ایندی بورادا  بیزیم‌له کئفه باخیب جهنّمه گئتمزدی!

بو سؤزلریمدن کئفلی ایسکندر کؤورلدی:

-‌ دئییرم، بیزده قلئیچی اوچون یاخشی یولداش اولمادیق ها! بورایا گلندن بیرجه دؤنه بئله اولسون گئدیب اونون حالینی سوروشمامیشیق!

دانیشیق بو یئره چکینجه واختی ایتیرمه‌دن جنّتین ملک‌لریندن ایذین آلیب جهنّمه یوللاندیق. جهنّمده قورخونج بیر صحنه ایله قارشی قارشی‌یا گلدیک. قلئیچی مورتوضو خیرتدگه‌جن قوما قویلامیشدیلار. آنجاق بونونله بئله او، آرا وئرمه‌دن  قاققاناق چکه‌رک گولمکده ایدی!

شاشقین-شاشقین سوروشدوق:

-‌ جهنّمین اورتاسیندا، بؤیوک عذابین ایچینده اورکدن گولورسن‌می؟!!

قلئیچی مورتوض زولوقلا گولمه‌یینی ساخلادی:

-‌ شیخ آغا، آلتدان آیاغیمی قیدیقلاییر!

 



آچار سؤزلر : قلئیچی مورتوض, کئفلی ایسکندر,

    بؤلوم: حیكایه و گولمه‌جه‌لر
گؤروشلر : 0
تاريخ : شنبه 25 اسفند 1397 | یازار : دوکتور جئری
+0 به‌ین

 

قورخمایین، هامیمیزین یئری جنّت‌دیر!

دوکتور جئری

قیامت گونو ایدی. میزان-تره‌زی قورولوب عمل‌لر دارتیلماقدا ایدی.‌ اینسانلار صفده چوخ گؤزله‌مه‌سینلر دئیه، اوچ-اوچ حئساب-کیتاب ملگی‌‌نین قارشیسیندا چیخیردیلار. سیرا بیزه یئتیشدی. ملک تره‌زی‌یه تکان وئردی. پیس عمل‌لریمیز آغیرلیق باسینجا، گؤزونون قیراغی ایله ایکی مأمورا ایشاره ائله‌دی:

-‌ جهنّم‌لیک‌دیرلر، آپارین!

بو حؤکمدن قلئیچی مورتوضون رنگی قاچدی، کئفلی ایسکندرین دیزلری تیتره‌دی، منیم هوشوم باشیمدان چیخدی!

گؤزومو آچدیقدا گؤردوم؛ قلئیچی مورتوض اوزومه  سو چیله‌ییر. کئفلی ایسکندر ایسه چیلتیک چالاراق شن بیر ماهنی اوخویور. اویان-بویانا باخدیم. اؤزومو اولدوقجا گؤزل بیر یئرده گؤردوم. چاشقین-چاشقین سوروشدوم:

-‌ بیز هاراداییق؟!

-‌ جنّت‌ده‌ییک!.. سانیرام، مأمورلار ملگین سؤزونو ترسه ائشدیب بیزی جهنّم یئرینه جنّته گتیریبلر- دئیه قلئیچی مورتوض یانیت وئردی.

کئفلی ایسکندر ماهنی اوخوماغینی کسدی:

-‌ یوخ! ترسلیک اولماییب. منجه، ساتیراچی اولدوغوموزدان تانری دا بیزیمله ظارافات ائله‌مک ایسته‌میش!

یولداشلارین سؤزلری بئینیمه باتمادی. یئنه اویان-بویانا باخدیم. بیردن گؤزوم او یاخینلاردا گزن بیر گؤزتچی‌یه دوشدو. چاغیردیم:

-‌ آی قارداش!..آی قارداش!.. بورا جنّت‌دیرمی؟

گؤزتچی بیزه یاخینلاشدی:

-‌ سیز ده ایرانلی‌سینیزمی؟!

اوچوموز بیرگه سسلندیک:

-‌ هه! سیز هارادان بیلدینیز؟!

گؤزتچی گولومسوندو:

-‌ بورا جهنّم‌دیر آنجاق بیلمیرم نییه هر یئنی گلن ایرانلی بورانی جنّت سانیر؟!



آچار سؤزلر : قلئیچی مورتوض, کئفلی ایسکندر, ایران,

    بؤلوم: حیكایه و گولمه‌جه‌لر
گؤروشلر : 0
تاريخ : جمعه 28 دی 1397 | یازار : دوکتور جئری
+0 به‌ین

قیمتلرده می کئفله‌نیب؟!

دوکتور جئری

قلئیچی مورتوض، قیرخ یاشلی سون بئشیک خالاسینی اره وئرمیشدی. گنجلر حیطده یاللی گئدیردیلر. بیز، بیر قیراقدا دایانیب گوندمده اولان  ایقتیصادی دوروما گؤره دارتیشماقدایدیق. اوستاد دفتری دئییردی:

-‌ اؤلکه ایقتیصادیاتیندان باش چیخارتماق اولمور؛ دولار باهالاشدیقدیجا جینسلرین قیمتی ثانیه‌دن ثانیه‌یه آرتیردیردی آنجاق ایندی دولارین اوجوزلاشدیغینا باخمایاراق جینسلرین قیمتی اؤز باهالیغیندا دایانیب؟!

بو قونودا هره اؤز دوشونجه‌سینی ایره‌لی سورمکده ایکن، قلئیچی‌ مورتوضون بؤیوک خالا اری- کئفلی ایسکندر حیط قاپیسیندان ایچری گیردی. دانیشیغین ‌آخیمینی دَییشدیریمک اوچون دئدیم:

- یولداشلار! ایسته‌ییرسیز ایسکندری کئفلندیریب بیرآز اگله‌نک؟

اوستاد دفتری ایله پروفئسور نصرالدین گوله-گوله،" هه..هه"دئینده قلئیچی مورتوض دیللندی:

-‌ یوخ اولماز! دده‌لیگیم شیخ آغا بیزه ایچکینی قاداغان ائدیب، بیلسه پیس اولار.

گولومسه‌یه‌رک دئدیم:

-‌ نیگران اولما...

ایسکندری قارشیلاییب اؤپوش-گؤروشدن سونرا دئدیم:

-‌ یولداشلار! بو قوتلو موناسیبته گؤره، سیزی بیر بارداق شرابا قوناق ائله‌مک ایسته‌ییرم، نه دئییرسیز؟!

هامی باشی ایله "یاخشی" دئینده ایسکندرین دوداغی قاچدی. ایچرییه گئچیب مطبخدن بئش بارداق گیله‌نار شربتی گتیردیم. بارداقلاری چاخناشدیب باشیمیزا چکدیکدن سونرا گؤزلریمیزی کئفلی ایسکندره تیکدیک. ایچکی همن ائتکیسینی گؤستردی. کئفلی ایسکندر دبرجه‌لنه-دبرجه‌لنه گئدیب یاللی باشی وظیفه‌سینی اوزه‌رینه گؤتوره رک عؤمروموزده گؤرمه‌دیگیمیز ادابازلیقلاری ایفا ائتمگه باشلادی. گولونج بیر بیچیمده، مندیلی الینده فیرلاداراق اگیلیب-دوروردو. هردن توخ ووروب یانینداکیلاری یئره سره‌‌له‌ییردی. گولمکدن قارنیمیزین اتلری آغریماقدایدی. بیردن ایسکندر اویناماغین بوشلاییب اورتالیغا گئچه‌رک کئفلی-کئفلی اوخوماغا باشلادی. هامی ماتدیم-ماتدیم یئرینده قورودو. ایسکندر اوخوماغیندا اؤلکه مسئوللاری تنقید آتشینه توتموشدو. من ایندییه‌دک بو  تنقیدلرینی  بی‌بی‌سی رادیوسوندان بئله ائشیتمه‌میشدیم! قلئیچی مورتوضون رنگ-روفو قاچدی. منه قاش-گؤز ائله‌دی، بیر ایشلر گؤروم. تئز ایسکندره یاناشیب قولومو بوینونا سالاراق قولاغینا پیچیلدادیم:

- ایسکندر! ایچدیگین شراب دئییلدی گیله‌نار شربت ایدی!

ایسکندر گؤزلرینی آخدیراق کئفلی-کئفلی فیسیلدادی:

-‌ بونو تئزراق دئییدین، من آرتیق کئفلنمیشم! 



آچار سؤزلر : مسئوللار, ایقتیصاد, کئفلی ایسکندر, قلئیچی مورتوض, باهالیق,

    بؤلوم: حیكایه و گولمه‌جه‌لر
گؤروشلر : 0
تاريخ : جمعه 9 آذر 1397 | یازار : دوکتور جئری
+0 به‌ین

سیرکه

دوکتور جئری

خیدیر کیشی گولش‌قاباق بیر اینسان ایدی. بازار آغزیندا مئیخاناسی وار ایدی. نیسیه عاراق وئردیگی اوچون مشتریلری اونون خاطیرینی چوخ ایسته‌یردیلر. اینقیلاب غلبه چالدیقدان سونرا، او مصادیره اولونموش دوکانی‌نین قاباغیندا کوپئن آلیش-وئریشی ائدیردی.

بیر گون، کومیته مأمورلاری خیدیرین ائوینه تؤکولوشوب اونو توتوقلادیلار. دئدی-قودولارا گؤره؛ خیدیر گیزلیجه عاراق چکیرمیش! قاپی-قونشونون گؤزو قاباغیندا، خیدیری قولو باغلی ماشینا میندیرنده، ایکی مامور زیققانا-زیققانا بؤیوک بیر کوپو ائودن ائشیگه چیخارتدیلار.  

*

کومیته‌ده، باشچی- برادر چراغعلی أیری-أیری کوپه باخاراق، "کؤپک اوغلو! ایسلام اؤلکه‌سینده عاراق-شراب ساتیرسان؟!" دئیه سیلله ایله خیدیرین قولاغی‌نین دیبینی قیزیشدیری. خیدیرین گؤزلری دولدو:

-قوربان! آند اولسون آللاها بو عاراق دئییل، سیرکه‌دیر!

بو سؤزدن برادر چراغعلی‌ یوموشانان کیمی اولدو. کوپون آغزینی آچیب اییله‌دی. آغزی-بورنونو بوزوشدوردو. بیر شئی آنلامامیشدی سانکی. مأمورلارا ایشمار ائله‌دی. مأمورلار دا بیر-بیر گلیب، اییله‌دیلر. اونلار دا کوپون عاراق یا سیرکه اولدوغونو بیلمه‌دیلر. هامی چاش-باش بیربیری‌نین اوزونه باخاندا، بیردن مأمورلارین بیری دئدی:

- نئجه‌دیر برادر ایسکندره دئیک گلسین، باخسین. هر نه اولسا او یاخشی بیلر؟!

برادر چراغعلی سوروشدو:

- هانسی برادر ایسکندر؟!

- شیخ آغانین دفترینده چالیشان حورّ ایسکندر دا!!

برادر چراغعلی گولومسوندو. باشی ایله راضیلیغینی بیلدیردی. شیخ آغانین دفترینه تئلئفون آچدیلار.

چوخ چکمه‌دی برادر ایسکندر اؤزونو کومیته‌یه یئتیردی. برادر چراغعلی احوالاتی اولدوغو کیمی دانیشدی. خیدیر آلتدان-‌آلتدان برادر ایسکندره باخدی. کومیته پالتاری ایچینده، کئفلی ایسکندری تانیدی. اورگی بیرآز ایشیقلاندی. کئفلی ایسکندر اینقیلاب قوپدوقدا، تؤوبه ائله‌ییب اینقیلابچیلارا قوشولاراق "حورّ" آیاماسینی قازانمیشدی.

برادر ایسکندر سو بارداغینی ماسانین اوستوندن گؤتوروب کوپدن دولدوراراق باشینا چکدی. بیر سوره گؤزلرینی تاوانا تیکدی."ائله بیل سیرکه‌دیر!"دئیه گئنه بارداغی کوپدن دولدوروب باشینا چکدی. اوچونجو بارداغی ووردوقدا، کسین فیکرینی آچیقلادی:

- سیرکه‌دیر!.. بتر ده ایتی سیرکه‌دیر!...عؤمرومده بئله بیر سیرکه ایچمه‌میشدیم!!  

خیدیر دریندن بیر سولوق آلدی. برادر چراغعلی باشینی آشاغی سالدی. ایکی مأمور کوپو گؤتوروب زیققانا-زیققانا ائشیگه چیخارتدیلار...

 



آچار سؤزلر : کئفلی ایسکندر,

    بؤلوم: حیكایه و گولمه‌جه‌لر
گؤروشلر : 0
تاريخ : پنجشنبه 17 آبان 1397 | یازار : دوکتور جئری
+0 به‌ین

آدام نئچه ایل یاشاسا یاخشیدیر؟!

دوکتور جئری

بو گون، کندیمیزین سئویملی اوغلو- حسن آغانین دونیادان کؤچمه‌سیندن سارسیلدیم. اؤنجه بو قارا خبره اینانماق ایسته‌میردیم؛ آخی، دونن قهوه‌خانا دئییب-گولوردو! آنجاق اؤزومو مزارلیغا چاتدیراندا، ننه، باجیلاری‌نین آغلاشما-چیغیرشما سسینی ائشیدنده، مئییت نامازیندا، شیخ آغانین آللاهو اکبر  صداسی یوکسلنده، بو آجی گئرچکی اینانماغا زورلاندیم. یاریم ساعات ایچینده حسن توپراغا تاپشیریلدی، سانکی نه دونیایا گلمیشدی، نه ده دونیادان گئده‌جکدی!..

حاییفلانا-حاییفلانا رحمتلیگین ائوینه قاییتدیق. اوزاقدان-یاخیندان باش ساغلیغی وئرمگه گلیردیلر. هامی دا چاش-باش! گون اورتا چاغی گلیب-گئدنلرین سایی آزالدی. ناهار واختی، تکجه بئش-اون نفر یاخین قوهوم- قونشو قالمیشدی. حسن آغانین گؤزله‌نیلمز، آیین-شایین اؤلومو سؤزو-صؤحبتی اینسانین نئچه ایل عؤمور سوروب یاشاماسینا گتیریب چیخارتدی. هره بیر سؤز دئییردی. سیرا کئفلی ایسکندر گلینجه یئرینده دیکله‌نیب:

- آدام نه گنج یاشلاردا دونیاسینی دگیشدیرمه‌لیدیر قوهوم-قونشو اوزلسون، نه ده چوخ عؤمور سورمه‌لیدیر هامی الیندن بیخیب بئزار اولسون!- دئیه باشی ایله شیخ آغانین گؤستردی:

- منجه، آدام ائله شیخ آغانین یاشیندا اؤلسه یاخشیدیر!

 

 

سونوش:

بو یازی‌‌نین شادلیغینی رحمتلیک حسن.ظ گؤزل روحونا تقدیم ائدیرم. یئری جنت اولسون

جومعه آخشامی1397.8.17



آچار سؤزلر : کئفلی ایسکندر,

    بؤلوم: حیكایه و گولمه‌جه‌لر
گؤروشلر : 0
تاريخ : شنبه 21 مهر 1397 | یازار : دوکتور جئری
+0 به‌ین

قیل کؤرپو

دوکتور جئری

قیام-قیامت اولموشدو. قیل کؤرپونون گیره‌جگی قالابالیق ایدی. کؤرپو ملگی‌نین گؤستریشی ایله جاماعات یاواش-یاواش کؤرپودن گئچمکده ایدی. کؤرپو اوستونده، کیمی‌لری‌نین آیاغی بودره‌ییب جهنمه دوشور، کیمی‌لری‌ ایسه گئچیب جنته آیاق باسیردیلار. سیرا، ترس‌آوا کندی‌نین بؤیوک باشلارینا چاتدی. باشدا کئفلی ایسکندر اولماقلا، دوکتور جئری، کل اوغلان، قلئیچی مورتوض دایانمیشدی. قلئیچی مورتوض، دده‌لیگی شیخ آغانین الیندن یاپیشمیشدی. کؤرپونون ملگی، رنگ-روفلاری قاچیمیش، دیریم-دیریم تیتره‌ین ترس آوالیلاری گؤزدن گئچیرنده سوروشدو:

- سیز ترس آوالی‌سیز؟!!

ترس آوالیلار، دیقّتله ملگین اوزونه باخدیلار. بیردن گؤزلری‌نین ایچی گولدو. کؤرپونون ملگی تانیش ایدی. کئفلی ایسکندر جوشقولاندی:

- اده سن...

ملک تئز بارماغینی دوداقلارینا باسدی:

- سوس‌س‌س...

کل اوغلان اوزونتو ایله سوروشدو:

- اؤزون بیلیرسن بیزیم اوزوموز قارا، کؤرپونو گئچمگه اومودوموز یوخدور. بیزه بیر یاردیم ائده بیلرسن؟!

کؤرپونون ملگی بیر آز دوشونجه‌یه دالدیقدان سونرا:

- کؤرپودن گئچنده، سیزی گوناها باتیرمیش نسنه‌نی آشاغی آتساز گئچه بیلرسیز!-دئیه یانیت وئردی.

باشدا، کئفلی ایسکندر چاغیر شوشه‌سینی جهنّمین آلاولاری ایچینه آتاراق قیل کؤرپودن گئچدی. آردیجا، دوکتور جئری جراحلیق کیفینی آشاغییا تولازلادی. سونرا کل اوغلان، شئعیر دفترینی بوراخدی. بو اوچو جنته‌ده بیر-بیرینی قوجاقلاییب سئوینجدن آغلاشارکن، قلئیچی مورتوض گوله-گوله بونلارا یاخینلاشدی. هامی شاشیردی. کل اوغلان اؤزونو ساخلایا بیلمه‌دی:

- اولان! سن مین بیر گوناه ایشله‌میسن، نفت دکلی اوغورلامیسان، میلیارد-میلیارد پول آشیرمیسان، تون-تون قیزیل اویان-بویان ائله‌میسن، قاچاقچیلیق یاپمیسان ، سیم-سانجاق ایشینده اولموسان،  عاراق-شاراب ساتمیسان، عفت ائوی آچمیسان،خالقین بترینی باشینا چئویرمیسن، سن نئجه کؤرپونو گئچه بیلدین؟!!

قلئیچی مورتوض قاققاناق چکیب گولدو:

- من دده‌لیگیمی آشاغییا ایته‌له‌دیم!



آچار سؤزلر : قلئیچی مورتوض, کئفلی ایسکندر, اوغورلوق, ایختیلاس,

    بؤلوم: حیكایه و گولمه‌جه‌لر
گؤروشلر : 0
تاريخ : شنبه 3 شهریور 1397 | یازار : دوکتور جئری
+0 به‌ین

مسئوللار اولماسایدی...

دوکتور جئری

قیرخ گونه یاخین ایدی خویلو خانیم، قلئیچی مورتوضو تحریمات ائله‌ییب اوزونه باخمیردی. قلئیچی مورتوض اؤنجه‌لری، اؤزونو بیر شئی اولمامیش کیمی گؤسترمگه چالیشسادا، گونو-گوندن آرتان ایچ فیشارین سونوجوندا، خالاسی اری- کئفلی ایسکندری آراچیلیق ائله‌مگه قوناق چاغیردی. کئفلی ایسکندر ار-آروادی اوز-اوزه اوتورتدوروب درد-چورلاریندان سوروشاندا، خویلو خانیم چادیراسی‌نین اوجونو دییشینده توتاراق اؤفکه‌لی-اؤفکه‌لی دئدی:

- ایسکندر قارداش! ائوه خرجلیک وئرمیر. دئینده بونو آل- اونو آل؛ بو قولاغیندان آلیب او بیری قولاغیندان اؤتورور...

کئفلی ایسکندر أیری-أیری قلئیچی‌ مورتوضون اوزونه باخدی:

- دوغرو دئییر؟!

قلئیچی مورتوض باشینی آشاغی سالدی:

- گلیریم آزدیر خالا اری.. من نئجه ائله‌ییم؟!!

کئفلی ایسکندر یاواشجا سوروشدو:

- گلیرین نئچه‌دیر؟

- یارانه‌لی-مارانه‌لی بیر میلیون تومن.

- بیرررر میلیون تومنننن!..  سن بو پوللا ائوی گئچیندیره بیلمیرسن؟!!!

- ....

- حتما مدیریت ائله‌مه باجارمیرسان!

- مدیریت ائله‌مه؟!!

- هه مدیریت ائله‌مه! سن گره‌ک بیله‌سن آیدا بیر میلیونو  نئجه خرجله‌‌یه‌سن.

- بئله ایسه،  منیم یئریمه مدیریت ائله گؤره‌ک بو پولو نئجه خرجله‌یک گؤرسون؟!

کئفلی ایسکندر جیبیندن کیچیک بیر چؤرتکه چیخاردیب شاققاشاقلا حئسابلاماغا باشلادی. آرا-سیرا قلئیچی‌ مورتوضدان  سورغو دا سوروشوردو.

 - اوغلوم مورتوض آیدا نئچه ائو کرایه‌سی وئریرسن؟

- اوچ یوز مین تومن.

- باخ اوغلوم! سن گره‌ک گونده  اون مین تومن ائو کرایه‌سی اوچون قیراغا قویاسان.

- یاخشی!

- دؤرد باش عاییله‌سیز. هر بیریز گونده اوچ دنه سنگک چؤره‌گی یئسز، ائله‌یر اون ایکی سنگک. آیری دئییشله، سن گره‌ک گونده اون ایکی مین تومن چؤر‌ه‌‌ک اوچون قیراغا قویاسان. طبیعی‌دیر سنگگی یاوان یئمک اولماز، پنیر لازیم‌دیر. پگاه پنیرلری‌نین قوطوسو بئش مین تومن دیر، یعنی سن گره‌ک گونده بئش مین تومن، پنیر اوچون قیراغا قویاسان. قند-چای اوچون ده، گونده ایکی مین تومن قیراغا قویسان گؤره‌ر. قالدی؛ برق، گاز، سو و تئلئفون پولو. گونده اوچ مین تومن ده بونلارا قیراغا قویمالیسان. بونلارین هامیسینی توپلاسان نئچه ائلر؟!

قلئیچی مورتوض بارماغیندا حئسابلاماغا باشلایینجا کئفلی ایسکندر اؤزو جاواب وئردی:

- ائله‌یر اوتوز ایکی مین تومن. آیدا ائله‌یر دوققوز یوز آلتمیش مین تومن.

قلئیچی مورتوض باشی ایله کئفلی ایسکندرین سؤزلرینی دوغرولادی.

- قالار بورادا سنین قیرخ مین تومنین. اودا یئتیشر ائوین خانیمینا. هر نه اولسا خانیملارین اؤزلرینه مخصوص خرجلری وار!

سؤز بورایا چاتاندا، خویلو خانیم گولومسه‌ییب چادیرا‌نین اوجو آغزیندان دوشدو.

آخشام باشی قلئیچی مورتوض کئفلی ایسکندرین الینی برک-برک سیخیب یولا سالاندا دئدی:

- خالا اری آللاه سندن راضی اولسون! سن اولماسایدین من نئجه ائله‌یه‌جکدیم؟!



آچار سؤزلر : پول, مسئوللار, ایقتیصاد, پول, کئفلی ایسکندر, قلئیچی مورتوض, تحریم‌لر,

    بؤلوم: حیكایه و گولمه‌جه‌لر
گؤروشلر : 0
تاريخ : شنبه 13 مرداد 1397 | یازار : دوکتور جئری
+0 به‌ین

...قیللی الینه دوشموشوک!

دوکتور جئری

ایندی، هر کیم گونده‌لیک چؤرگینی کوچه باشینداکی چؤرکخانادان آلیر. آنجاق اسکیلرده بئله دئییلدی. او زامانلار، خالق اؤزو بوغدا اکیب، اؤزو بچیب، اؤزو دؤیوب، اؤزو ساووروب، اؤزو اویودوب، اؤزو چؤرک یاپاردی. پاییزی، بوغدا چواللاری دگیرماندا سیرایا دوزولنده،  قولو گوجلولر، هامیدان قاباق بوغدالارینی دارتاردیلار؛ السیز-آیاقسیزلار  ایسه یئددی گئجه، یئددی گوندوز سیرالاردا گؤزله‌ملی اولوردولار.

ترس آوا کندی‌نین قولو گوجلولریندن بیری ده قلئیچی مورتوض ایدی. او، دگیرمانا گیرنده، هره‌نی بیریانا ایته‌له‌یه‌رک قاباغا گئچردی. دگیرمانچی دا  قورخوسوندان جینقیرینی چیخارتماییب قولوچوماق قلئیچی‌نین بوغدالارینی دگیرمانین بوغازینا بوشالداردی...

هر ایل، قلئیچی مورتوض دگیرماندان قاییداندا، خالاسی اری کئفلی ایسکندر اونو بیر قیراغا چکیب،" اوغول! خالقا اذیت ائله‌مه، بو ایشلردن ال چک!" دئیه اؤیود وئرردی. قلئیچی مورتوض بو سؤزلره قاققاناق چکیب گولنده، کئفلی ایسکندر اؤفکه‌نیب دئیردی: "اوغول! سن هله  گؤتو قیللی الینه دوشمه‌میسن!!".

 

او ایل یئنه قلئیچی مورتوض بوغدا چواللارینی ائششگین بئلینه چاتیب دگیرمانا یوللاندی. ایچری گیرجک یئنه هره‌نی بیر یانا ایته‌له‌یه‌رک قاباغا گئچدی. بیردن، داشین دلیندان اوجا بوی، ساری باش، گؤی گؤز بیر اوغلان ائشیگه چیخدی. گئن بیر شالوارجیق گئیمیشدی. او، دگیرمانچی‌نین اوغلو- دلی توراب ایدی. دگیرمانچی خسته‌لنیب او گون ایشه گلمه‌میشدی. دلی توراب، قلئیچی مورتوضون قاباغا گئچدیگینی گؤرموشدو سانکی. بارماغی ایله سیرانین دیبینی گؤستره‌رک قشقیردی:

- گئچ سیرایا!!

قلئیچی مورتوض گولومسوندو:

- ائله بیل منی تانیمادین، ترس آوانین شیخ آغاسی منیم دده‌لیگمدیر!!

دلی توراب سایمازجاسینا یئنه باغیردی:

- کیم اولورسان اول، گئچ سیرایا!!

قلئیچی مورتوض قیزیب الی ایله دلی تورابی دالی‌یا ایته‌له‌ینده، او قلئیچی‌نین یاخاسیندا یاپیشیب چووال تایی کیمی قووزایب یئره قویاراق ساغ دیزینی دؤشونه باسدی. نفس قلئیچی مورتوضون سینه‌سینده گیزله‌ننده، بیردن آلتدان گؤزو دلی تورابین یان-یؤوره‌سینه دوشدو...

یئددی گئجه، یئددی گوندوز سونرا، قلئیچی مورتوض اویودولموش اونلارلا  ائوه قاییداندا، یولدا خالاسی اری کئفلی ایسکندر قاباغینا چیخدی:

- اوغول! نیگرانچیلیقدان اؤلدوک، بیر هفته‌نی هارالاردایدین؟

قلئیچی مورتوض باشینی آشاغی سالدی:

- هئچ!.. گؤتو قیللی الینه دوشموشدوم!!!



آچار سؤزلر : قلئیچی مورتوض, کئفلی ایسکندر,

    بؤلوم: حیكایه و گولمه‌جه‌لر
گؤروشلر : 0
تاريخ : شنبه 2 تیر 1397 | یازار : دوکتور جئری
+0 به‌ین

دگرلی سؤزلر!!

دوکتور جئری

     جومعه آخشاملاری، شهریمیزده سعدی ادبی درنگی‌نین ییغینجاقلاری اولور. بو هفته اوستاد دفتری دیل و ادبیات حاققیندا دانیشاجاقدی. بیرآز گئجیکمیشدیک. قوشوقچو کل اوغلان ماشینی اوستادین قاپیسیندا ساخلاییب بئش-آلتی یول سیقینال چالدی. هاندان-گئجدن اوستاد دفتری ایله اوغلو، میرزه دفتری ائشیگه چیخدیلار. اوستاد دفتری باشینی باغلامیشدی، بتر ده اوسکوروردو. باشی ایله بیزیله سالاملاشاندان سونرا دئدی:

- قلمداشلار!..تأسفله من بوگون خسته‌لنمیشم، درنگه گله‌بیلمه‌یه‌جگم. منیم یئریمه اوغلوم میرزه دانیشاجاق..

میرزه دفتری ماشیندا اوتوراندا، اوستاد دفتری برک-برک تاپشیردی:

- اوغلوم میرزه!.. دیقتلی اول، دگرلی دانیشاسان، گؤرنلر- ائشیدنلر دانیشغیندان فیض‌یاب اولسونلار!

     ماشین یولا دوشنده گؤزومون قیراغی ایله آرخا قولتوقدا اگلمیش میرزه دفتری‌یه باخدیم. جوشقولو گؤرونوردو. بیرآز دا رنگی قاچمیشدی. گولومسه‌یه‌رک سوروشدوم:

- آغا میرزه! دانیشیغا بیر شئی‌لر حاضیرلامیسان؟!

جلد الینی جیبینه سوخوب بیر تیکه کاغیذ چیخارتدی:

- دانیشغیمین موهوم نوکته‌لرینی یازمیشام. آنجاق بیر آز استرس‌یم وار، ایلک دفعه‌دیر جمع قاباغیندا دانیشیرام، قورخورام اؤزومو ایتیرَم دوکتور!..

میرزه دفتری‌نین یانیندا اوتورموش کئفلی ایسکندر :

- قورخما اوغلوم! استرسین داواسی منده دیر!- دئیه جیبیندن بالاجا بیر شوشه چیخاردیب میرزه‌یه وئره‌رک آرتیردی:

- استرس گلنده بو داوادان بیر-ایکی خورتو ایچرسن!!

*

   درنک قیو-قیو قیویلداییردی. یئریمیزده اوتورونجا درنگین باشقانی اوستاد فرهیخته، کل اوغلانی چاغیردی. کل اوغلان، قوشوغونو گورولتولو آلقیشلار ایچینده اوخویاندان سونرا، سیرا اوستاد دفتری‌نین اوغلونا یئتیشدی. میرزه دفتری میکروفونون آرخاسینا گئچینجه، شوشه ایله کاغیذی جیبیندن چیخاردیب ماسانین اوستونه قویدو. بیر-ایکی یول میکروفونون باشینا تاپداییب پوفله‌دی:

- کم گوی و گزیده گوی چون دُررر...

میرزه دفتری‌ ایکینجی دیزه‌نی اوخویا بیلمدی. سسی تیتره‌ییب دوداقلاری اسمگه باشلادی. بوغازی توتولدو. ماسانین اوستوندن شوشه‌نی گؤتورب ایکی-اوچ خورتو ایچدی. داوا همن ائتکیسینی گؤستردی:

- کم گوی و گزیده گوی چون دُر

   از اندکِ تو جهان شود پُر

میرزه دفتری داوانین مؤعجوزه‌سینی سئزینجه شوشه‌نی گؤتوروب اوچ-دؤرد خورتو داها ایچدی:

- استخوانگان ترکیزه دارینه، همایه کناره‌ای سپردیس بندازه. نورخان هم‌سانه آکنده. رازمان زیمابه پوشن...

 دانیشیقدان هامی چاش-باش اولدور. کیمی دوداغین بوزدو؛  کیمی  ایسه باشینی توولادی. میرزه دفتری شوشه‌نی یئنه باشینا چکدی:

 دفترک درصدانه دمابان گلشنه. استوانک پروندان آب زن. رشته‌مان دولا پاگن.  چینی‌جا فن‌ورز آموزانه...

ساغیمدا اوتوران کل اوغلانین قولاغینا پیچیلدادیم:

- بونا نه اولدو؛ نییه تارتان-پارتان دانیشیر ؟!!

سولومدا اوتوران کئفلی ایسکندر بیج-بیج گولدو.

میرزه دفتری آنلاشیلماز سؤزلری سایا-سایا بیردن درین بیر سولوق آلیب سوسدو. دیک-دیک دینله‌ییجی‌لرین اوزنه باخدی. گؤزلری قیپ-قیرمیزی اولموشدو. کیمسه‌دن سس چیخمیردی. میرزه دفتری سوسغونلوغو گؤرونجه بیردن سسینی آتدی باشینا:

- آنلامازلار نییه به آلقیشلامیرسیز؟! یاریم ساعاتدیر سیزه قیزیل خیردالاییرام، اوچ-دؤرد یوز میلیون تومنلیق سؤز دانیشمیشام نییه به هوروت-هوروت باخیرسیز؟ آلقیشلایین دااا..

اوستاد فرهیخته او باشدان قیشقیردی:

- بو ساچما-ساپانلار ندیر دانیشیرسان، اوتان.. کَس سسینی!!

بو هایدان میرزه دفتری بیرآز یوشودو؛ یوموشاق-یوموشاق آچیقلادی:

- فرهنگستان زبان فارسی ایلده 15 میلیارد تومن بودجه آلیب اوچ-دؤرد یوز دنه سؤزجوک دوزلدیر، هئچ بیلیرسیز بو سؤزلرین بیری دؤولته نئچه‌یه باخیر؟! 12 میلیون تومنه!! من بورادا یاریم ساعاتدیر بو دگرلی - باهالی سؤزلری  ساییرام، سیز ایسه هوروت-هوروت  باخیب هئچ آلقیشلامیرسیز دااا...

 

سؤزجوکلر:

آلقیش: تشویق

ائتکی : تأثیر

جوشقو: هیجان

خورتو :جرعه

درنک: انجمن

دیزه: مصراع

سئزمک: حس ائله‌مک

سولوق: نفس

قوشوق: شعر

قوشوقچو: شاعیر

قولتوق: مُبل، صندلی

ماسا: میز

های: ندا

یوشوماق: آرام اولماق



آچار سؤزلر : کئفلی ایسکندر, دیل, فارسی, دؤولت,

    بؤلوم: حیكایه و گولمه‌جه‌لر
گؤروشلر : 0
تاريخ : جمعه 18 خرداد 1397 | یازار : دوکتور جئری
+0 به‌ین

دومبا گؤز

دوکتور جئری

   اوستاد دفتری، کئفلی ایسکندر، قلئیچی مورتوض، کل اوغلان قبیریستانلیق طرفیندن گلیردیلر. اوست باشلاری توز-تورپاق ایچینده ایدی. ماراقلاندیق. یاخینلاشینجا سوروشدوم:

- خئیر اولا یولداشلار، هارادان بئله؟!

اوستاد دفتری الی‌نین دالی ایله آلنینین ترینی سیله-سیله دئدی:

- دومبا گؤزو  قویلاماقدان گلیریک!

یانیمدا دوران اوستاد فرهیخته ایکی الینی باشینا تاپدادی:

- ائی وای ائویمیز ییخیلدی! فرهنگستان زبان فارسی‌نین رئیسی اؤلدومو؟!!

قوشوقچو کل اوغلان باشی ایله "هه!" دئدی.

شاشقین-شاشقین سوروشدوم:

- هله بو  صیر-صوفت ندیر؟! باشدان آیاغا توزا، تورپاغا بورونموشسوز!!

یانیت وئرن اولمادی؛ اوستاد دفتری گؤیه باخدی. کئفلی ایسکندر گولدو. کل اوغلان باشینی قاشادی.

قلئیچی مورتوضا دؤندوم. اوزو جیرماقلانمیشدی! آرغین-یورغون فیسیلدادی:

- آدام کیمی باسدیرماغا قویموردو کی!!



آچار سؤزلر : دیل, قلئیچی مورتوض, کئفلی ایسکندر, فارسی, شئونیست,

    بؤلوم: حیكایه و گولمه‌جه‌لر
گؤروشلر : 0
تاريخ : شنبه 5 خرداد 1397 | یازار : دوکتور جئری
+0 به‌ین

ایسلام اؤلکه‌سینده هر شئیین بیر یولو وار!

دوکتور جئری

سووئت‌لر بیرلیگی چؤکمگه باشلایاندا، اوتایلی بو تایلی آذربایجانلیلار آرازین ایکی ساحیلینه توپلاشیب ووصال ماهنیلارینی سس-سسه وئریب اوخویاندا، بیزیم قلئیچی مورتوض اؤزونو چایا ووروب اوتایا گئچدی. چوخلو آختاریشلاردان سونرا،  ایللر اوزونو، آیری دوشموش خاللی-تئللی خالاسینی تاپدی. گؤز یاشلاری آخیشیب داشاندا، خالا-بالا ساریشیب قوْووشاندا، قاپی-قونشو "ایسلام اؤلکه‌سیندن بیری گلیب" دئیه خبردار اولوب خالانین ائوینه دولوشدولار. سالام-صالاوات ایله قلئیچی مورتوضو یئنی آچیلمیش مچیدلرینه گؤتوروب، قاداغا قویولموش دینلری حاققیندا سورغو-سوالا باشلادیلار. آلنی مؤهور گؤرمه‌میش قلئیچی مورتوض چتین دورومدا قالمیشدی. دده‌لیگی شیخ آغانین آبیری گئتمه‌سین دئیه ناچارلیقدان یالاندان-دوغرودان بیر شئیلر قوشوشدوروب سورغولاری بیر تورلو جاوابلاندیرماغا چالیشدی. سیرا خالاسی ارینه یئتیشدی. شانسدان اوتایلی خالاسی‌ اری‌نین آدی، بو تایداکی خالاسی‌ اری‌نین آدی کیمی کئفلی ایسکندر ایدی! کئفلی ایسکندر بتر ایچن ایدی. اؤزونه بیر چیخیش یولو آختاریردی. ادب-ارکانلا گلیب قلئیچی مورتوض قاباغیندا اوتوروب سوروشدو:

- بورادا دئییرلر؛ چاخیر ایچنین نامازی آللاه درگاهیندا قبول اولماز. منده ایچمگی ترگیده بیلمیرم.  بونون بیر  چیخیش یولو وارمی؟!

قلئیچی مورتوض باش بارماغینی گیژگاهینا قویوب بیرآز فیکیرلشندن سونرا جاواب وئردی:

- ایسلام اؤلکه‌سینده هر شئیین بیر یولو وار. سن ائله‌یه بیلرسن سرخوشلوق باشیندان چیخاندا تؤوبه ائله‌ییب نامازینی قیلاسان، نامازدان سونرا گئنه ایچه بیلرسن!!

کئفلی ایسکندر سایغی ایله الینی دوشونه باسیب،" منه دئییردیلر ایچمه، دوزونو سیز دئییرسیز، شوکورلر اولسون کی یولو وار ایمیش!"دئینده، قلئیچی مورتوض آرتیردی:

- هله بو بیر شئی دئییل کی! من اوتایداکی خالام ارینی ایکی کره ده مکّه‌یه گؤندرمیشم!



آچار سؤزلر : کئفلی ایسکندر, قلئیچی مورتوض, آذربایجان, کیملیک,

    بؤلوم: حیكایه و گولمه‌جه‌لر
گؤروشلر : 0
تاريخ : شنبه 8 اردیبهشت 1397 | یازار : دوکتور جئری
+0 به‌ین

سیزه امنیت لازیم دئییل می؟!

دوکتور جئری

     دونن کئفلی ایسکندردن ائشیتدیم، قلئیچی مورتوضو آروادی ائودن ائشیگه اؤتوروب. سالیغینی توتدوقدا آنلادیم گئدیب حاجی نیظامین کؤهنه‌ حامامی‌نین تولانبارخاناسیندا قالیر. تلم-تلَسیک اؤزمو اورایا یئتیردیم. جیریلتی ایله قاپینی آچیب ایچری گیردیم. مورتوض ال-قولتوق دیوارین دیبینده اوتورموشدو. اوست-باشی قاپ‌قارا ایدی. منی گؤرجک آیاغا قالخدی.

- مورتوض بگ بورادا نه قاییریرسان؟- دئیه سوروشدوم. دولوخساندی؛ دینمه‌دی. قوجاغیمی آچیب اؤپوشمک ایسته‌دیگیمده باشینی چیگنیمه قویوب هؤنکور- هؤنکور آغلادی:

- خویلو خانیم منی ائودن ائشیگه اؤتوروب!

- نه اولوب اولمایا گئنه بیله‌سی ایله دالاشمیشسان؟!

باشینی توولادی:

- یوو.. گئچن هفته آخشام ائوه دؤننده، خویلو خانیم دئدی: "پول وئر گئدیم چؤرک آلیم." دئدیم:" پولوم یوخدور، هله ایش تاپمامیشام."  خویلو خانیم دا حیرصله‌نیب سسینی آتدی باشینا:- "دئینده پول وئر چای-چؤرک آلیم، دئییرسن پولوم یوخدور هله ایش تاپمامیشام. دئیینده گازی، برقی، کسیبلر پول وئر قبضیلری وئریم، دئییرسن پولوم یوخدور هله ایش تاپمامیشام، دئیینده پول وئر اوشاقلارا پار-پالتار آلیم دئییرسن پولوم یوخدور هله ایش تاپمامیشام، دئینده اوشاق مریض‌دیر پول وئر دوکتورا آپاریم دئییرسن پولوم یوخدور هله ایش تاپمامیشام. دئیینده، بؤیوک اوغلان نئچه واختدیر آخشاملاری گئج ائوه دؤنور، بورنونون سویونو ساخلایا بیلمیر، سایمیرسان. دئیینده، قیزیمیز مشقه دوشوب یولداشلاری ایله گئتسین خلیج همیشگی فارسین قیراغینداکی اؤلکه‌لرده ادامه‌یی تحصیل وئرسین، چگینلرینی سیلکه‌له‌ییرسن..." سونرا اللرینی بئلینه ووراراق قیشقیردی: "دئیه بیلرسن سن بو ائوده نه‌یه گره‌کسن؟!".

خویلو خانیمی بیرآز یوشوتماق ایسته‌دیم: "بیلیرسن آرواد! من اولماسام قونشوموز دونبا‌گؤز عوض گئجه دیواردان آشیب ناموسونا توخانار! یا اونون مؤهتاد اوغلو  گلیب باشیزی کسیب مال-دؤولتیمیزی آپارار!."

 مورتوضون سؤزلرینی کسدیم:

- خانیمین نه دئدی؟

- هئچ نه دئمه‌دی. سوپورگه‌نی گؤتورب منی ائوده ائشیگه اؤتوردو.

اوزونتو ایله دئدیم:

- ایندی نئجه اولاجاق؟!

- دئییرم، ایجازه وئرسن گلیب بیر نئچه گون سیزده قالیم گؤرک سونرا نه اولور!

- یوخ!.. یوخ!.. اولماز قارداش. بیلرسن آرواد منی ده ائوه بوراخمیر. قاپینی تپکله‌مه‌ینجه اوزومه آچمیر!

 شاشیردی:

- یانی قاپینی تپیکله‌ینده قورخوب اوزونه آچیر؟!!

آجی - آجی گولومسه‌دیم:

- یوخ بابا!.. آرواد قولتوغوم دولودور دئیه قاپینی اوزومه آچاندا تئز ایچری‌یه سوخولورام!



آچار سؤزلر : پول, ایشسیزلیک, ایش, قلئیچی مورتوض, کئفلی ایسکندر,

    بؤلوم: حیكایه و گولمه‌جه‌لر
گؤروشلر : 0
تاريخ : شنبه 5 اسفند 1396 | یازار : دوکتور جئری
+0 به‌ین

سیزین گوناهینیز نمنه‌دیر؟

دوکتور جئری

     قیام-قیامت اولموشدو. اینسانلار دؤرد-دؤرد گلیب سورغولانیردیلار. نؤوبت دوکتور جئری، قلئیچی مورتوض، شیئخ آغا و کئفلی ایسکندره گلینجه سورغو ملگی دئدی:

- اؤز دیلیزله دونیادا ایشله‌دیگیز ان بؤیوک گوناهی سؤیله‌سه‌ز، گوناهیز باخیشلانیب جننته گئده‌جکسیز.

دوکتور جئری باشینی آشاغی سالدی:

- من بیر کره عمل ائله‌ینده اونوتدوم قایچی خسته‌نین قارنیندا قالدی.

سورغو ملگی بارماغی ایله یان طرفده‌کی بیر تشت سویو گؤستره‌رک:

- گئت، کؤوثر سویوندا اللرینی یو گوناهین تمیزلنسین- دئدی.

دوکتور جئری اللرینی سودا یویاندا جنتین قاپیسی اوزونه آچیلدی.

سیرا قلئیچی مورتوضا گلدی. قیزارا-قیزارا دئدی:

- من دیوارین چاتیندان قونشونون آروادینا باخاردیم!

سورغو ملگی گولومسه‌دی:

- گئت کؤوثر سویوندا گؤزلرینی یو، گوناهدان آرین.

قئلیچی مورتوض گؤزلرینی تشتده یویاندا، کئفلی ایسکندر ایله شئیخ آغا پیچیلداشاراق سیرادا یئرلرینی دگیشدیردیلر. بو سورغو ملگی‌نین گؤزوندن یایینمادی. قیزغین-قیزغین:

- سیز نییه یئرلریزی دگیشدیز؟- دئیه قیشقیردی.

کئفلی ایسکندر اوتانا-اوتانا فیسیلدادی:

- منیم گوناهیم چاخیر ایچمکدیر. ایجازه وئرسه‌نیز من اوّل آغزیمی یویوم گئچیم، آخی شئیخ آغانین گوناهی مملکتین ایچیه سیچماقدیر!



آچار سؤزلر : قلئیچی مورتوض, کئفلی ایسکندر,

    بؤلوم: حیكایه و گولمه‌جه‌لر
گؤروشلر : 0
تاريخ : جمعه 5 آبان 1396 | یازار : دوکتور جئری
+0 به‌ین

اوستان-ین یئنی موُدیرلری‌نین تجروبه‌لری نه قدردیر؟

دوکتور جئری

   بو ایل حاجی ایسکندرین باغی یاخشی بار وئرمیشدی. آغاجلار پتیراق کیمی آلما گتیریب بوداقلاری سینماقدایدی. درمه واختی یئتیشینده، او سئوینه-سئوینه قلئیچی مورتوضون یانینا گئدیب آلمالارین درمه‌سی اوچون یئش-اون نفر یاخشی آلمادَرَن ایسته‌دی. قلئیچی مورتوض، ایشچی دللالی دیر؛ اوزاقدان-یاخیندان گلن ایشچیلره ایش تاپیب یوزده‌سینی(درصدینی) آلار. قئلیچی مورتوض، حاجی ایسکندرین قولوندان یاپیشاراق اونو اوزون بوْی، ائنلی کورک، قوللو-بیلکلی، چاتماقاش بیر کیشی‌نین یانینا آپاریب دئدی:

- آختاردیغین آدام ائله مشه نوروزعلی‌دیر، عاییله‌سی ایله بیزیم شهره ایشله‌مک اوچون قوناق گلیبلر. چوخ ایشله‌ین آدامدیرلار، یئددی-سککیز گونه سنین باغین دریب قورتارارلار.

حاجی ایسکندر، نوروزعلی‌نی آشاغیدان یوخارییا سوزه‌رک سوروشدو:

- مشدی!..اینشاالله سیزین تجروبه‌نیز وار، باجاریرسیز دا نئجه آلما دره‌سیز؟!

مشه نوروز علی گولومسه‌دی:

- حاجی! بونلار نه سؤزدور؟!.. بیز اؤزوموز ائله باغچی‌ییق. گتیرمزلیکدن بو ایل باغ-باغاتیمیزی شاختا ووردو. بیزده الیمیزی اونون-بونون قاباغینا آچمایاق دئیه گلمیشیک بورادان بئش-اوچ تومن پول آپاراق.

قلئیچی مورتوض، نوروز علی‌نین سؤزونو کسدی:

- دوز دئییر حاجی... نوروز علی‌نین قوْزلی کندینده اوچ-دؤرد هیکتار باغ-باغاتی وار.

حاجی ایسکندر قوْزلی کندی‌نین آدینی ایندییه‌دک ائشیتمه‌میشدی. اوزاق دوشموش، اوجقار بیر کند اولمالی‌ ایدی. وئریله‌جک موزد اوستونده آنلاشدیقدان سونرا حاجی ایسکندر، مشه نوروز ایله عاییله‌سینی وانئته میندیریب باغا آپاردی. ماشینی کوْلانین قاباغیندا ساخلایینجا نوروزعلی‌نین آروادی، اوچ اوغلو ایله دؤرد قیزی یئره آتلانیب یوک-یاپیتلارینی کوْلایا چکمه‌یه باشلایاندا حاجی ایسکندر نوروزعلی‌یه دئدی:

-  کولانین دولابیندا پیشیرمگه هرنه ایسته‌سه‌‌نیز وار، اوجاقدا قاپی آغزیندادیر. من گئدیرم کارخانادان سله‌لری گتیرم. ایکی-اوچ گون چکر..سیز صاباحدان ایشه باشلایا بیلرسیز.

نوروز علی الینی گؤزونون اوستونه باساراق حاجی ایسکندر آرخایین ائله‌ییب یولا سالدی.

***

    ایکی گون سونرا، حاجی ایسکندر باغا قاییداندا گؤزلرینه اینانا بیلمه‌دی. درمه ایشی بیتمک اوز‌ره ایدی! آلمالار دریلیب باغین بیر نئچه یئرینده قوببالانمیشدی! بیلدیر، باغی اوْن گونده درمیشدیلر!! حاجی ایسکندر اوجا آددیملار آلما قوببالاری‌نین بیرینه یاخینلاشدی؛ آلمالارین بیر نئچه‌سینی گؤتورب باخیب یئره آتدی. سونرا توْواراق ایکینجی قوببانین باشینا قاچدی، یئنه بیر- ایکی آلمانی یوْخلادی.  اوچونجو قوبباییا چاتاندا رنگ-روفو ساپ‌ساری اولدو. دیزه کؤچوب یئره ییخیلدی. آلمالارین هامیسی ازیلمیش، بوزولموش، یارالانمیشدی!!

اوزاقدان بو گؤرونتو گؤرن نوروز علی آروادینا دئدی:

- حاجی ایسکندر ایشیمیزه باییلدی!

تئز اؤزلرینی حاجی ایسکندرین باشی اوستونه یئتیردیلر. آغزیندان کؤپوک گلمکده ایدی. نوروزعلینی گؤرونجه سیزیلدادی:

- آلمالارین باشینا نه اوْیون گتیریب‌سیز؟!..

 نوروز علی شاشیردی:

- نه اوْیونو حاجی؟.. درمیشیشک دا!!

حاجی ایسکندر اینگیلده‌دی:

- نئجه دردیز؟!

نوروز علی دوْشونو قاباغا وئردی:

- قاباقجا آغاجلاری سیلکه‌له‌دیک سونرا آغاج باشیندا قالان آلمالاری چیرپیب یئره تؤکدوک!.. بیز کندیمیزده جویزلری ده ائله بئله دره‌ریک!..



آچار سؤزلر : قلئیچی مورتوض, کئفلی ایسکندر, ایشسیزلیک, ایقتیصاد, ایش,

    بؤلوم: حیكایه و گولمه‌جه‌لر
یارپاق لار: [1] [2]
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :