+0 به‌ین
آذربایجان اوخوللاریندا توركجه اوخوناجاق!
جئری نیوز: اوخوللارین آچیلماسی عرفه سینده ایران رسمی لری آنایاسانین 15 نجی ماده سی نین یورولوگه كئچه جگینه توخوناراق بیلدیریب لر: " آنا دیللرینده اوخوللاری اولان 100 مین ائرمنینی گؤز اؤنونه آلاراق اؤلكه ده یاشایان 30 میلیون توركون اؤز آنادیللرینده اؤیرتیم آلماماسی بیزیم اوچون اوتاندیریجی بیر دوروم دور بو اوزدن بو ایلدن اعتبارن آذربایجانین بوتون اوخوللاریندا تورك دیلی اوخوتدورولاجاقدیر".
بو بیلدیریشین یایینلانماسی نین آردینجا، اؤفكه لنن آذربایجان تورك لری، "بیز شیرین – شكر فارس دیلینی بوراخیب تورك دیلینده اوخوماق ایسته میریك " دئیه چیغیر- باغیر سالاراق بوتون شهرلرده خیابانلارا تؤكولوبلر. وئریلن بیلگی لره گؤره پولیس شیددت ایشله ده رك گؤستریجی لری داغیتماغا چالیشیر....
بؤلوم: ساتیریک یازیلار
+0 به‌ین
یاریمچیق قالمیش آذربایجان تابلوسو
یازان : دوكتور جئری
قوزئیی كؤلگه لی
كؤلگه نی یوخولو چكیرم
گونئیی گونشلی
گونشی بولتسو
بولوتو دومانلی چكیرم
قارانی سئومیرم
قاراباغی قیرمیزی چكیرم
اورمونون باختینی
تبریزین تاختینی
قارا چكه نمیرم
آغ چكیرم
سهند،
ساوالانین زیروه سی كیمی
ال قوشونو آل چكیرم
تورپاغی مفتیلی
سارالمیش بنیزلر قانیمی چكمیر
بابكین كؤینگی ایله سیلیرم
كولباش داغلاری
كولرنگ اووالاری
خزل گئیمش باغلاری
نسیمی دیلیم
نئیله ییم
یام – یاشیل چكیرم.
اورمو گؤلونو چكه جكدیم
آمان تانریم
ماوی رنگیم قورویوب…
1390/1/13
بؤلوم: ساتیریک شعرلر