دوکتــــور جـئــــــری
ساتاشما ادبیاتی
گؤروشلر : 0
تاريخ : شنبه 5 آذر 1390 | یازار : دوکتور جئری
+0 به‌ین

محرم لیک  احوالاتی

دوکتور جئری

 

شبئه

ایبیش مسجیدین پنجره سیندن ایچری باخیر. قیبیش ماراقلا سوروشور :

- نه خبردی؟

- شبئه وئریرلر.

قیبش - گئچ اویانا منده  باخیم - دئیه پنجره یه دیرماشیر.

- بونلار کی سینه وورورلار!

- غش ائله ینلری گؤرمورسن می؟

 

اوخلانما

موللا مونبر باشیندا سیزلایا – سیزلایا اوخویوردو:

-چراغلاری گئچیردین بو گئجه اوخلانان علی اکبرین شام غریبانی دیر.

چراغلار سؤنونجه کیمیسه مولانین تپه سینه بیر باشماق تایی تولازلاییر.

موللا اؤکوتمه وورا-وورا :

-چیراغلاری یاندیرین ، علی اکبری اوخلایان  کؤپک اوغلو منی ده اوخلادی.

 

شام غریبان شامی

شام غریبان گئجه سی موللا تَلَسیک ائوه گلیب آروادینا :

-تئز اول شامی گتیر یئیَک مسجده گئده جگم – دئییر.

شام پیشیرمه ین آرواد شاشقینلیقلا سوروشور:

-آ موللا دونن مسجیده دئمه دینمی شام غریبان گئجه سی شام یئمزلر؟

کؤپورموش موللا قیشقیریر:

-پخمه نین قیزی من اونو خالقا دئدیم نه سنه !

 

جذبه

ایبیش دسته ده هامیدان بتر سینه ووروب اؤزونو اؤلدوروردو. یولداشی قیبیش اونا یاخینلاشیب قولاغینا پیچیلدادی:

-اولان ایبیش دونن سن دئییلدینمی قونشونون تویوغونو اوغورلاییب کسدین یئدین؟

ایبیش قوللارینی گؤیه قالدیرارق :

-دینمه اوغلان ! وورورام ، وورورام جذب اولا بدنه .

 

کورون احسانی

محرم لیکده، امام احسانی وئرنلرین بعضی لری گؤزل - گؤیچک آختاریر؛بعضی لری ایسه مقام منصب لی اولانلاری. بو آرادا سببی آنلاشیلمایان ندنلره گؤره بیر کوردا کئچللره احسان وئریردی. او قاپی آغیزیندا دایانیب الینی گلنلرین  باشینا سورته رک تکجه کئچللری ایچری بوراخیردی. بو احوالاتی گؤرن ایبیش ، کورا حوققا وورماق ایسته ییر. او، شالوارینی سیییره رک قاباغیندا دونبالیر.

کور الینی سورته رک ایچریده کیلره سسله نیر:

-بونا ایکی پای وئرین قمه ده ووروب...

 

امام یولوندا !!

امامین قاتیلی:

-یولداش! امامی اؤلدورمکدن ایت کیمی پئشمانام. بؤیوک – کیچک قارغیش ائله ییر منه .  بو ایل امامی اؤلدورمه یه جگم.

نوحه خوان :

-قوربانیم اولوم رحم ائله . منی دولاندیر بالالاری نین باشینا. ایکی اوغلوم دانیشگاهی آزاد اوخویور. حَیَط – ماشینیمی تزه له ییب خیرتداغاجان بورجا باتمیشمام ؛ محرم لیک اولماسا بدبخت اولارام ؛ نولور واز گئچ بو ایشدن ....

امامین قاتیلی:

-یوخ  منیم سؤزوم بیردیر ؛ توبه ائدیرم ؛ داها امامی اؤلدورمه یه جگم....

نوحه خوان قاتیلین آیاقلارینا ساریلاراق آغلاییر.

....

 بیریسی نوحه خوانین اوزونه سو چیله یَرک دئییر:

-یازیق اوچ گوندور آرا وئرمه دن امام عشقینه اوخویور. آیاقدان دوشه جگینی بیلیردیم ، باخین بایغین – بایغین بئله امامین احوالاتینا آغلاییر ...

 

زینجیر وورماق

یول پولیسی قیبیشین ماشینی ساخلادیب – زینجیر وورمادیغیز اوچون گئده بیلمه سیز- دئییر.

ایبیش تئز قبیشین یاردیمینا قوشور :

-زینجیر یئرینه سینه وورروق نولاجاق کی جنابی سروان ...

 

قوربانلیق...

ایبیش خالقین قویونلارینی اوغورلاییب دسته قاباغیندا قوربان کسه رک اتینی پایلاییردی. قیبیش بونون  ندنینی سوروشور.

ایبیش:

-بو ایشین ثاوابی اوغورلوق گوناهیمی یویور آپاریر . آرادا ایسه منه کله-پاچا قالیر.

 

مرثیه

تزه مرثیه خوان مرثیه سینی بیتیردیکدن سونرا ایبیشین  یانینا گئدیب اونا:

-ائشیتمیشم ایندییه دک هئچ مرثیه خوان سنی آغلادا بیلمه میشدی بوگون آغلادیغینی گؤرونجه ایشیمه ایناندیم..

ایبیش مرثیه  خوانا ترس – ترس باخاراق :

-مرثیه یه آغلامیردیم    اتگینه تؤکولن او دیلسیز پوللارا آغلاییردیم....

 

سو فیشی

قبیش ایبیشی دالغین  گؤردوکده سوروشدو:

-اَاَااا گمی لرین باتیب؟!

- یوخ ، یزید ایله سو ایداره سی نین بنزه ییشینه فیکیرله شیردیم.

5/9/1390

 



آچار سؤزلر : محرم, محرم‌لیک,

    بؤلوم: حیكایه و گولمه‌جه‌لر
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :