دوکتور جئری
ساتاشما ادبیاتی
گؤروش‌لر : 0
تاريخ : جمعه 5 شهریور 1400 | یازار : دوکتور جئری
+0 به‌ین

جان اوجوز، واکسن باها

اوستاد دفتری

     جاماعات ترس‌آوانین خسته‌خاناسی‌ قاباغیندا ایلان کیمی قیوریلیب آچیلیردی. هرکس واکسن وورماغا تله‌سیردی. دوکتور جئری خسته‌خانین گیریش قاپیسینی کسیب آدام‌لاری بیر-بیر ایچری اؤتوروردو.

واکسن وورما چوخ آغیر ایره‌لی‌له‌ییردی. آرا-سیرا صفین او باشیندا بیریسی، "ائی وای دده‌م الدن گئتدی" و یاخود "ائی وای ننه‌م الدن گئتدی" دئیه قیشقیر-باغیر سالاندا، دوکتور جئری ایسه صفین بو باشیندا نسه دئییب باشینا تاپداییردی.

***

     یئددی آی قاباق، دونیادا خورونا خسته‌لیگی‌نین واکسنی تاپیلینجا، ترس‌‌آوانین آغ‌ساققال‌لاری شیخ آغانین خیدمتینه یئتیشیب بو قونودا اونونلا دانیشماق ایسته‌دیلر. اؤنجه اهالی طرفیندن خبرییغان قلئیچی مورتوض سؤزه باشلادی:

-‌ آغا!.. خورونا خسته‌لیگی اوزوندن گونده ترس آوادا یوز اللی باش آدام اؤلور. بیلدیگینیز کیمی ایندی کافیر اؤلکه‌لرینده بو خسته‌لیگین واکسنی تاپیلیب. بو‌نا گؤره اهالی سیزدن ریجا ائدیر مسئول‌لارا بو واکسنین آلماغینی تاپشیراسینیز.

شیخ آغا اوزونو ترس‌آوانین ساغلیق ‌باخانی کاتتا ایسلاما چئویردی:

-‌ کاتتا! بو واکسنین فیأتی نئچه‌دیر؟

کاتتا ایسلام سایغی ایله باشینی اگیب دئدی:

-‌ آغا! هر واکسنین  قیمتی ییرمی دولار- بیزیم پول ایله بئش یوز مین تومن‌دیر..

بو یانیتدان شیخ آغا اوزولدو:

-‌ چوخ باهادیر! هله اوسته‌لیک تحریم‌لره گؤره الیمیز ده چوخ دالی‌دیر..

بیر آنلیغا هامی سوسدو. بیردن اوتاغین بوجاغیندا اوتوران دوکتور جئری آیاغا قالخدی:

-‌ حضرت آغا! سیز منه ایکی آی مؤهلت وئرسه‌نیز، من بو واکسنی دوزلدیب اوندان بیر قیمتله  یعنی اللی مین تومنله جاماعاتین ایختیارینا قویا بیله‌رم.

بو اؤنریدن شیخ آغانین قاش-قاباغی آچیلدی:

-‌ دوکتور! سیز بو واکسنی دوزلدیب جاماعاتا وورون؛ سیزین اللی مین تومن‌لریز منیم گؤزوم اوسته!

***

     منیم واکسن وورماغیما اوچ-دؤرد نفر قالمیشدی. بیردن صفین او باشیندا یئنه بیریسی هارای قوپاردی: ائی وای اوغلوم الدن گئتدی!

وای سسی یوکسلینجه تئز گؤزومو دوکتور جئری‌یه  تیکیب قولاغیمی قابارتدیم. دوکتور جئری ایکی الی ایله باشینا تاپداییب میریلدادی:

-‌ ائی وای  اللی مین تومنیم الدن گئتدی!

 



آچار سؤزلر : مسئوللار, تحریم‌لر, تحریم, یولسوزلوق, میلّت, دؤولت, ایقتیصاد, سیاست, قلئیچی مورتوض, پول,

    بؤلوم: حیكایه و گولمه‌جه‌لر
آرشیو
سون یازی‌لار
یولداش‌لار
سایغاج
ایندی بلاقدا : نفر
بوگونون گؤروشو : نفر
دونه‌نین گؤروشو : نفر
بوتون گؤروش‌لر : نفر
بو آیین گؤروشو : نفر
باخیش‌لار :
یازی‌لار :
یئنیلنمه چاغی :