دوکتــــور جـئــــــری
ساتاشما ادبیاتی
گؤروشلر : 0
تاريخ : جمعه 6 مرداد 1396 | یازار : دوکتور جئری
+0 به‌ین

یالانچیلار

دوکتور جئری

     اورمو گؤلونون چؤللشمه‌سی‌نین قاباغینی آلما یوللارینی آختارماق اوچون دؤولت طرفیندن بیر هئیت اورمو شهرینه گؤنده‌ریلیر. یولدا سوروجونون یوخلاماسی اوزوندن ماشین دره‌یه دیغیرلانیر. او یاخینلیقدا قویون یایان قلئیچی مورتوض بونو گؤرجک قضا یئرینه یئتیشب آداملاری بیر-بیر  ازیلمیش دؤولت ماشینیندان چیخارداراق قویلاماغا باشلاییر.

ائرته‌سی گون مأمورلار اولای یئرینه تؤکولوشوب  قلئیچی مورتوضو سورغو- سوالا توتورلار:

-  سن نییه بیزه خبر وئردمه‌دین؟!

- جیب تئلئفونوم ائوده قالمیشدی؛ منده قویونلاری اؤتوروب پاسگاه گله‌ بیلمزدیم!

- سن نییه اؤز باشینا آداملاری قویلادین؟

- اؤلولر آچیقلیقدا قالیب قورد-قوشا یئم اولماسینلار دئیه قویلادیم؛ هر نه اولسا بیز موسلمانیق اؤلونون یئرده قالماسی جایز دئییل.

- سن آرخایین ایدین هامیسی اؤلموشدو؟

- بعضی‌لری ایدیعا ائدیردیلر دیری‌‌دیرلر آنجاق سیزده یاخشی  بیلیرسیز بو سیاستچیلر نئجه آدامین گؤزونه دیک-دیک باخیب یالان دانیشیرلار!!



آچار سؤزلر : اورمو, اورمو گؤلو, سیاستچی, قلئیچی مورتوض, یالان,

گؤنده ر 100 درجه کلوب دات کام گؤنده ر     بؤلوم لر: حیكایه و گولمه‌جه‌لر
گؤروشلر : 0
تاريخ : چهارشنبه 18 اردیبهشت 1392 | یازار : دوکتور جئری
+0 به‌ین

رأی صاندیغی ایله اورمو گؤلونه سو آپاراجاقلار!

دوكتور جئری

اورمو گؤلونون قوروماسی اوزون سوره ایدی اونودولوب اوزه‌رینده تارتیشیلمیردی آنجاق جومهور باشقانی اورمو گزیسینده یئنه بو قونونو گونده‌مه گتیردی. احمدی‌نجات گؤلون قورماسی‌نین قارشیسینی آلماق اوچون چابالارین قات- قات آرتاجاغیندان دانیشاندا سوروشدولار:

- سایین باشقان! سككیز ایلدیر بو سؤزلری تكرارلاییرسینیز؛ نییه هله‌ بیر ایش گؤرولمه‌ییب؟!

جومهور باشقانی اوزونتو ایله باشینی ترپه‌ده‌رك دئدی:

- وئرمه‌سه معبود نئیله‌سین محمود! الیمدن گلدیگی قدر سككیز ایلدیر تانری‌یا یالواریرام اورمو گؤلونون اوزه‌رینه یاغمور- یاغیش یاغسین؛ یاغمیر!...

او سؤزلرینی اوستو اؤرتولو بئله سونلاندیردی:

بیزیمله اولاسانیز؛ آللاهین كؤمكلیگی ایله  قوراجاغیمیز گلن دؤولتده بو یالوار- یاخاری‌لارین اولوملو  سونوجونا تانیق اولاجاقسینیز!...



آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: ساتیریك یازیلار
گؤروشلر : 0
تاريخ : دوشنبه 17 مهر 1391 | یازار : دوکتور جئری
+0 به‌ین

اورمو گؤلو و حاجی لئی لك لر!

دوكتور جئری

قوناقلیق، اورمو گؤلونون قورماسی نین سؤزو صؤحبتی ایله قیزیشمیشدی. ائو یییه سی میللتین آیاغا قالخیب دؤولتی زورلایاراق گؤلونون قورماسی نین قارشیسینی آلماغی ساوونوردو آنجاق قوناقلار، میللتین بو ایشه قاریشماماسیندان یانا ایدیلار. اونلارین فیكرینجه، دؤولت واختیندا بو سورونون چؤزوم یولونو تاپیب خالقی نیگرانچیلیقدان قورتاراجاق ایدی. تارتیشمانین قیزغین یئرینده بیردن بالاجا یاشار دانیشیغی كسیب قوناغا دئدی:

- پرویز عمی سیزدن بیر شئی سوروشا بیلرم؟

قوناق گولومسه یرك:

- گول بالام سوروش گؤروم نه سورشوجاقسان؟!- دئدی.

بالاجا یاشار بیر قوناغا بیر قوناغین ائشینه باخیب دئدی:

- سیزین نییه اوشاغیز یوخدو؟

قوناق یاپماجیق بیر گولوشله یانیتلادی:

- آخی حاجی لئی لك لر هله بیزه اوشاق گتیرمه ییب لر.

بالاجا یاشار بیج-بیج گولدو:

- عمی، حاجی لئی لك لره چوخدا بئل باغلامایین اؤزوزده بیر ایشلر گؤرمه لی سیز!



آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: حیكایه و گولمه‌جه‌لر
گؤروشلر : 0
تاريخ : پنجشنبه 4 خرداد 1391 | یازار : دوکتور جئری
+0 به‌ین

اورمو گؤلونون دردیندن اَتلنمك!

دوكتور جئری

بیر- ایكی گون ایدی پروفسور نصرالدین دن ایز- توز یوخ ایدی. 1.خورداد گؤستریسینده، سو ماشینلارینی اورمو گؤلونه آپاراجاغینی سؤیلـﻪمیشدی. اولمایا یئترینجه سو آپاریلدیغیندان، اورمو گؤلونون سویونا غرق اولوب زیغینا باتیب قالمیشدی او، دئدیم اؤز- اؤزومه. سالیغینی توتماق اوچون ائولرینه گئتدیم.قاپینی چالدیم. پروفسور اؤزو قاپینی آچدی. بیلـﻪسینی اؤنجه تانیمادیم دوغروسو. باشی آغا مچیدی نین گونبذیندن یئكه اولموشدو دئسَم یانیلمامیشام! "پروفسور نییه به بئله؟" دئیه سوروشدوم. گؤیرمیش دوداقلاری قاچدی. "اورمو گؤلونون دردیندن اَتلنمیشم"- دئدی. تپـﻪدن دیرناغادك بدنینه ات دؤشـﻪندیگینی آنلادیم. ایچرییه گئچمـﻪمی ایستـﻪدی. "یوخ، دینجلیگیزی پوزماق ایستـﻪمیرم" دئدیم. قاپی آغزینداكی سككیده اَیلشدیك. قونوشدوغوموز سوره ده نئچه سوموسوك پیشیك باشیمیزا ییغیشیب پروفسورون پیشته دئمـﻪلرینه باخمایاراق ماویلداماغا باشلادیلار. اولایلاردان سوروشدوم.سولوغونو دریب دئدی:

- او گون كوچه- پاجادا آرا- سیرا سو ماشینلاری دایانمیشدی. خالق یئنجه خیابانلارا آخیشماغا باشلامیشدی. سو سَپَن ماشینلارین بیرینه یاخینلاشیب سوروجو ایله دانیشماغا باشلادیغیمدا آرخادان بیری، "نه ایستـﻪییرسیز؟" دئیه سسلندی. دؤندوگومده قارا یاخا بیر مامورلا قارشیلاشدیم. یانیندا ایكی الی دگنكلی دایانمیشدی. اودقوندوم. "هئچ، ایستـﻪییردیم سوروجونو ماشینین سویو اورمو گؤلونه بوشالتماق اوچون بلدچیلیك ائلـﻪیم" دئدیم. مامور دوه نالبنده باخان كیمی منه باخیب قیشقراراق، " گؤروكن كنده نه بلدچی. سن ائله بیلیرسن بیز كوروقدا اورمو گؤلونو گؤرموروك؛ بو سولاری آیری ایشه گؤره گتیرمیشیك. تئز جهنم اول گئت بورادان!" دئدی. قانی سویوقلوقلا دئدیم:- "هارا گئدیم، گئدنده، هارای- داد سالیرسیز بئیینلر اؤلكــﻪدن قاچیر..."

دیشی- دیشینی كسن مامور بونو ائشیدجك یانینداكیلارا هیم وئردی. یئرین بوش الی دگنكلیلر دوشدولر جانیما،هایان گلدی وورماغا باشلادیلار. گؤزومو آچدیغیمیدا اؤزومو ائوده یورقان- دوشكده گؤردوم. حیات یولداشیم دؤولت خانیم دگنكلرین آجیسینی آلماق اوچون بدنیمه ات دؤشـﻪمیشدی. تانیشلار ساغ اولسونلار؛ منی او دورومدا گؤرونجه مامورلارین اوستونه یومولاراق منی قاچیردیب ائوه گتیرمگی باشارمیشدیلار. یوخسا بللی دئییلدی ایندی سسیم هانسی داشین آلتیندان گلیردی.

اؤزونتومو بیلدیرمك اوچون یالنیز باشیمی توولاماغا یئتیندیم. پروفسور بیردن گؤزلرینی گؤزلریمه تیكـﻪرك سوروشدو:

- دوغرودان سن اؤزون هارالاردا ایدین؟

- قوناقلیغا گئتمیشدیم!- دئدیم.

- قوناقلیغا؟! آدام بو چكیش- بكیشده هئچ قوناقلیغا گئدرمی؟

- گئتمیردیم؛ زور ایله آپاردیلار!

- هارایا؟!

- آدی یوخ ایداره سینه. آیین 31-ینده آدی یوخ قارداشلار گلیب منی ایكی گونلوك قوناق آپاردیلار. یوخسا ایندی منده سنینكی كیمی اَتلنمیشدیم. پروفسور دوزونو دئ هئچ عؤمرونده بو قدر اتی بیر یئرده گؤرموشدون مو؟ بللی دیر دؤولت خانیم خطیرینی چوخ ایسته ییر!

آیاغا قالخدیق. ایشده آیریلماق سیراسی گلمیشدی. اؤپوشوب گؤروشدوك. بیرآز اوزاقلاشاندان سونرا دؤنوب باخدیم. پروفسور نصرالدین گئتمیشدی آنجاق پیشیكلر هلــﻪده قاپی نین قاباغیندا ماویلداییردیلار...



آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: حیكایه و گولمه‌جه‌لر
گؤروشلر : 0
تاريخ : پنجشنبه 28 اردیبهشت 1391 | یازار : دوکتور جئری
+0 به‌ین

اورمو گؤلونده دؤولت- میللت ایش بیرلیگی!

دوكتور جئری

آذربایجان میللتی اورمو گؤلونون قوروماسی‍ نین قارشیسینی آلماق اوچون،  آرا- سیرا چئشیدلی   گؤستریلر دوزنلـﻪمیش، دؤولت ایسه هر دؤنه بو قونویا  ایییمسرلیكله یاناشیب چوخ ساییلی سو ماشینلاری گؤندەرەك خالقی دستكلـﻪمیش دورومدادیر. آنجاق بونلارلا بئله، بو گؤستریلرین گؤزه گلن اولوملو سونوجو اولمامیشدیر. ندَن؟!

-         ندَنی میللتین، یوردسئورلیك گؤرَولرینی سونونا قدر یئریه یئتیرمـﻪمـﻪسیندن ایرەلی گلیر. میللت، گؤستریلر بیتیریلدیكدن سونرا ائولرینه گئدیب گلن دیللنیشـﻪدك اورموگؤلونه "دوزلوجا قال" دئییر؛ائلـﻪجـﻪده دؤولتین سو ماشینلاری گتیردیكلری سولاری آیدینلیق اوچون گؤستریجیلرین اوستونه سپـﻪرك ایشلری نین دالیسجا گئدیب ایشی بیتمیش سانیر. بئلـﻪجه بو دؤولتی-میللتی گؤستریلرین هئچ بیر سونوجو اولمور!

بئله ایسه نه ائیله مَلی ؟

-         دؤولتین سو ماشینلاری، دؤولتین آداملاری كیمی، اورمو گؤلونون هارادا اولدوغونو بیلمیرلر. بو اوزدن یوردداشلار گؤستریلرده، آدی چكیلن ماشینلارین قاباغینا دوشـﻪرك اونلاری سولارینی بوشالتمالاری اوچون اورمو گؤلونه آپارمالی‍‍‍دیرلار. طبیعی دیر، آردیجیل و یایغین گؤستریلرله آپاریلان سویون اؤلچوسو آرتیب گؤل  سوسوزلوقدان قورتولاجاقدیر.

 



آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: ساتیریك یازیلار
گؤروشلر : 0
تاريخ : دوشنبه 28 فروردین 1391 | یازار : دوکتور جئری
+0 به‌ین

اورمو گؤلونون جانی قورتولدو!

دوكتور جئری

مجلسده ، میللت وكیل لری ، اورمو گؤلونون قورماسی نین قارشیسینی آلماق اوچون یوللار آراماقدادیرلار.

بیرینجی میللت وكیلی: منجه ، تانكئرلرله ، آراز چاییندان اورمو گؤلونه سو آپارمالی ییق.

مجلیس باشقانی : اوزگونم قارداش! تانكئرلریمیز گئجه- گوندوز نفت داشیماقدادیرلار بونا گؤره بو ایش اولاسی دئییل، هله اوسته لیك بودجه میزده یوخدور.

ایكینجی میللت وكیلی: تانكئرله آرازدان  اورمو گؤلونه سو آپارماق  چتیندیرسه، اورمو گؤلونو آرازین یانینا  آپاراق .

مجلیس باشقانی شاشقینلیقلا: نئجه؟

ایكینجی میللت وكیلی: اؤنجه اورمو گؤلونو تورپاقلا دولدوراق سونرا گئدیب آراز چایی نین قیراغیندا بیر آیری اورمو گؤلو قازاق، بونونلا تانكئره گره گیمیز اولمایاجاق!

مجلیس باشقانی : قارداش اؤنرینیزه سؤز اولا بیلمز آنجاق اؤلكه نین مركزی بؤلگه لرینده گئدن آوادانلیق ایشلری اوجوندان لودئر- بولدئزئریمیز یوخدور هله اوسته لیك بودجه میزده یوخدور.

اوچونجو میللت وكیلی: دؤولت آذربایجاندا، بودجه و تجهیزات باخیمیندان سیخینتی دا دیرسا اورمو گؤلونون سورونونو، ائكوسیستئمی بیربیرینه وورمادان، خریطه اوزرینده چؤزه بیله ریك!

مجلیس باشقانی ماراقلا: بیر آز آچیقلایا بیلرسینیز؟

اوچونجو میللت وكیلی: بو ایش اوچون جغرافیا قورومو خریطه ده ، اورمو گؤلو ایله لوت كویری آدلارینی تای دئییشیك ائله ملی دیر سونرا خزر دنیزیندن  راحاتلیقلا اورمو گؤلونه سو آپارماق اولار.

میللت وكیل لری هامیسی آیاغا قالخیب چپیك چالیرلار، مجلیس باشقانی دا چپیك چالیر سونرا اگیلیب میزین آلتیندان قیرمیزی روبانلی بیر كولونگ چیخاردیب اوچونجو میللت وكیلینه اوزداراق دئییر:

-  تئز بیر دربست تاكسی توتوب جومهورباشقانی نین ائوینه گئت؛ اونو خزر دنیزینه گؤتور بیزده دالدان گلیریك! بو پروژه نین كولونگو بوگون وورولمالی دیر!

سون خبر:

بیز ال آیاق ائدیب  بو  اولایی نئته وئرینجه، جومهورباشقانی كولونگو ووردو! موبارك دیر.

 

 



آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: حیكایه و گولمه‌جه‌لر
گؤروشلر : 0
تاريخ : دوشنبه 9 آبان 1390 | یازار : دوکتور جئری
+0 به‌ین

اوزو قارالار اورمو گؤلونون اوزونو  آغارتدیلار

 

 اورمو  گؤلون گونئی بؤلویونون یوزده یئتمیشی قورویوب دور. یایینلانان  یئنی خبرین آردینجا سورملولار  ، ایكی سئمیناردا  بو یوزده نی  یوزه یئتیرجكلرینه سؤز وئردی لر....

 

اورمو گؤلوندن سون  شكیل

 



آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: ساتیریك یازیلار
گؤروشلر : 0
تاريخ : جمعه 11 شهریور 1390 | یازار : دوکتور جئری
+0 به‌ین

اورمو گؤلونون آدالاری

یازان : دوكتور جئری

 

    بیلمیرم یادینیزدادیر یا یوخ ؟ بئش – آلتی ایل بوندان اؤنجه نی دئییرم. اورمو گؤلو هله بو آجیناجاقلی دوروما دوشمه میشدی. او ایللرده ، شیرین دیللی لر، اورمو گؤلو آدالاری نین  توركجه آدلارینی  دییشدیریب آرش ، اردشیر، ایران نژاد، پیشوا، برزو، سروش، مهرداد و ... كیمی فارسجا آدلار قویدولار. بو عاغلی دیلی- شیرین لر سئچدیكلری بو  آریانه آدلاری  " جغرافیای استان آذربایجان غربی " درس لیگینه  سوخوشدوراراق   اوشاقلاری چاش- باش سالماغا باشلادیلار. بایاق فیكرله شیردیم ، ایندیكی هامی ؛ كیمی لری خسته خانادا ، كیمی لری دوستاقخانادا، كیمی لری یئرین اوستونده ، كیمی لری یئرین آستیندا بو قونو ایله  اندیشه له نیرلر گؤره سن بو آغالار نه قاییریرلار؟ گؤره سن بونلاری ، قوراشدیریقلاری فارسجا آدلارین ایشلم دن دوشمه سی بئله قایغی لاندیرمیرمی؟ نییه لال اولوبلار؟ اونلارینكی  دیللری و عاغیلاری شیرین دیر؟ اولمایا اورمو گؤلوندن قالخاجاق دوز قاسیرغالارینا اصیل فارسجا آدلار سئچمكده دیرلر؟!

جزیره‌ای كوچك در دریاچه ارومیه



آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: ساتیریك یازیلار
گؤروشلر : 0
تاريخ : یکشنبه 6 شهریور 1390 | یازار : دوکتور جئری
+0 به‌ین

"یگان ویژه" اورمو گؤلونون یاردیمینا قوشدو...

یازان : دوكتور جئری


آذربایجان میللتی ، اورمو گؤلونون قورتماسینا اعتراض لارینی بیلدیرمك اوچون شهرلرده ، "گلین گئده ك آغلایاق ، اورمو گؤلون دولدوراق " دئیه خیابانلارا تؤكولدولر. بو گؤستریلردن احساسات آتینا مینن  یگان ویژه  قووه لری  ، گؤستریجی لرین آراسینا گؤز یاشاردیجی بومبالار آتماقلا خالقین آغلاماسینا سرعت باغیشلادیلار. وئریلن راپورت لار گؤره، بو آغلامالار سونوجوندا ، اورمو گؤلون سویو چوخالیب دؤولتین توپوغونا چیخماقدادیر....

گلن راپورت لارادك : آغلایا ، آغلایا



آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: ساتیریك یازیلار
گؤروشلر : 0
تاريخ : سه شنبه 25 مرداد 1390 | یازار : دوکتور جئری
+0 به‌ین

اورمو گؤلونون قبیرداشی

اورمو گؤلونون قوروماسی نین فایدالاری...

یازان : دوكتور جئری

       بو گونلر چئشیدلی سایتلاردا اورمو گؤلونون قوروماسیندان تؤرنه جك ضررلره گؤره یوزلرجه یازی یاییلماقدادیر. آنجاق یولداشلار! قلمداشلار! بیر آز ایگیمسر (نیك بین) اولون! نئجه دئییرلر تانری ایكی یومروغو بیر باشا وورماز . تانری دمیرقاپینی باغلایاندا آغاج قاپینی آچار.  نه اولور، ائولرینیزده اوتوروب رنگلی چایی آرمودی ایستكاندا ایچنده باشیمیزی پامبیقلا كسمك ایسته ین دوشمانلارلا آغیزآغیزا وئرمه یین. سیزدن ریجا ائدیرم كؤتومسرلیك(بدبینلیك) گؤزلوگونو گؤزلرینیزدن گؤتورون . یاخشی باخین . سیز ندن اورمو گؤلونون قورماسی نین فایدالارینی گؤرمك ایسته میرسینیز؟ اولمایا دیش اوغوزدان پارا آلیرسینیز؟


آردینی اوخو/Ardını oxu
آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: ساتیریك یازیلار
گؤروشلر : 0
تاريخ : دوشنبه 24 مرداد 1390 | یازار : دوکتور جئری
+0 به‌ین

یئتیم قالمیش اورمو گؤلو

یازان: دوكتورجئری

دوننین حیكایه سی :

بیر یئتیم اوشاق دیوارین دیبینده اوتوروب آغلاییردی.قولتوغوندا  بیر بوخچا تزه چؤرك اولان بیر كیشی اونا یاخینلاشیب:” بـــــالا نییه آغـــلاییرسان؟” دئیه سوروشور.اوشـاق ایچینی چـــكه رك: ” آجام ” دئییر. كیشی اوشاغین یانیندا چؤمبه لیب آغلاماغا باشلاییر...........................................


آردینی اوخو/Ardını oxu
آچار سؤزلر : اورمو,

گؤنده ر 100 درجه کلوب دات کام گؤنده ر     بؤلوم لر: ساتیریك یازیلار
یارپاق لار: [1]
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :