دوکتــــور جـئــــــری
ساتاشما ادبیاتی
گؤروشلر : 0
تاريخ : شنبه 7 تیر 1393 | یازار : دوکتور جئری
+0 به‌ین

آذربایجان ائل‌ادبیاتیندان بیر ناغیل: یاغسادا، یاغماسادا

دوكتور جئری

      بیری‌نین وار ایدی، بیری‌نین یوْخ ایدی! بیر قادین وار ایدی. قادینین بیر اوْغلۇ ایكی قیزی وار ایدی. قیزلاری نئچه آی ایدی، اۇزاق‌ائلده ایكی قارداشا اره گئتمیشدیلر؛ بؤیۆگو اكینچی‌یه كیچیگی ‌ایسه كۆزه‌چی‌یه. بیر گۆن قادین اوْغلۇنۇ یانینا چاغیریب دئدی:

-‌  اوْغلۇم! ایندی آلتی آیدان چوخدور باجیلارین اۇزاق ائله اره گئدیبلر؛ بیز ایسه هله‌لیك اوْنلاردان بیر سالیق تۇتمامیشیق. سندن ایسته‌ییرم گئدیب سوْراقلاشاسان، گؤره‌سن؛ باجیلارین آغ‌گۆن اوْلۇبلارمی یا یوْخ؟

      اوْغلان ساغ الینی ساغ گۆزۆنۆن اۆسته قوْیۇب سوْر-سوْوقاتدان ایكی بۇخچا باغلاییب اۇزاق‌ائله یوْلا دۇشدۇ. آز گئتدی، چوْخ گئتدی، دره تپه دۆز گئتدی، سوْنۇندا اۇزاق ائله یئتیشدی. اؤنجه بؤیۆك باجی‌نین ائوینه گئتدی. باجیسی بیر دری، بیر سۇمۇك اوْلمۇشدۇ. اوْغلان كئف-احوالیندان سوْرۇشدۇ. باجیسی باشینی اۆزۆنتۆ ایله ترپه‌دیب دئدی:

-‌ آی قارداش نه كئفی.. نه احوالی؟.. اریم اكینچی‌دیر، یاغیش یاغاندا دئییر؛ گۆلۆر؛ دانیشیر. آللاه ائله‌مه‌‌میش یاغیش یاغمایاندا، اكینه‌جكلری قۇرۇیۇر، بۇ اۆزدن حیرصدن گلیب منی آتیر یۇمۇرۇق تپیگین آلتینا!...

اوْغلان  بؤیۆك باجیسی ایله ساغ‌اوْللاشیب كیچیك باجیسی‌گیله گئدیر. باجی‌نین رنگی سارالیب سوْلمۇشدۇ. احوالاتی سوْرۇشدۇقدا باجیسی گؤز یاشلارینی آخیدا- آخیدا دئییر:

-‌ اریم كۆزه‌چی‌دیر.. هاوا گۆنشلی اوْلاندا، دئییر؛ گۆلۆر؛ دانیشیر. آللاه ائله‌مه‌میش هاوا یاغیشلی اوْلاندا، كۆزه‌لری كوْرلانیر، بۇ اۆزدن  حیرصدن گلیب منی آتیر یۇمۇرۇق تپیگین آلتینا!..

  اوْغلان باجیلاری‌نین دۇرۇمۇنۇ اؤیره‌نیب آناسی‌نین یانینا قاییتدیقدا دئییر:

-‌ آناجان! یاغیش یاغسادا، یاغماسادا باجیلاریمین گۆنلری قارادیر!

اوْ گۆندن، اۇلۇسۇمۇز(میلّتیمیز) سؤز سؤزه گلنده دئیَر:

-‌  اؤلكه تحریملرده اوْلسادا، اوْلماسادا ....

-‌  نفتین بوْشكاسی یۆز دوْلار اولسادا، اوْلماسادا....

-‌‌‌  فیلانكس رئیس اوْلسادا، اوْلماسدا...

-‌  دؤولتین خزینه‌سی دوْلو اولسادا، اولماسادا...

........

بوْرادا باجیلارین ناغیلی سوْنا ائردی. گؤیدن اۆچ آلما دۆشسه‌ده، دۆشمه‌سه‌ده اۇلۇسۇمۇزۇن اؤیكۆسو  هله-هله سۆرمكده‌دیر...

 

 



آچار سؤزلر : ناغیل, آذربایجان,

    بؤلوم: حیكایه و گولمه‌جه‌لر
گؤروشلر : 0
تاريخ : سه شنبه 30 آبان 1391 | یازار : دوکتور جئری
+0 به‌ین

آذربایجانی جانباز!

دوكتور جئری

   دؤولتی گؤستریلرده وئریلن بیر شعار چوخ دوشوندوروجودور: آذربایجانی جانباز. گؤرونور ایران دؤولتچی لری تاریخ بویو، آذربایجانین باشینا نه لر گلدیگینیدن خبرسیز دئییل دیرلر. بللی دیر؛ اونلار، آذربایجانین توركمانچای وگلستان آنلاشمالاریندا  باشینین كسیلدیگیندن، دربند، بورچالی، گؤیچه، زنگه زور و... قولاقلاری نین اوزولدوگوندن، قاراباغدا گؤزونون اویولدوغوندان، پهلوی دؤنمیندن باشلایاراق بدنی نین شاققا- شاققا، بؤلوندوگوندن اورمو گؤلونده یارالارینا دوز باسیلدیغیندان، بو پارامپارچا و عضولرینی الدن وئرمیش اؤلكه یه جانباز لقبی وئرمیشلر. دؤولت آذربایجانین جانباز اولدوغونو بیلیر آنجاق گؤره سن میللتیمیزده آذربایجانین یوزده نئچه جانباز اولدوغونو بیلیرمی؟....

   قورخودان، هر زامان دؤولتی گؤستریلره قاتیلاراق خالقلا بیرگه آذربایجانی جانباز شعاری وئریرم. یوخ! ایشیمین الدن وئرمه سیندن قورخمورام(ایشیم دؤولتی دئییل). گؤزلره سوخولماقدا ایسته میرم(دؤولتی ایشلرده گؤزوم یوخدور). قورخورام بیر گون بو دؤولتی گؤستریلرده هامی بیردن سسلنسینلر : آذربایجان مفقود الاثر و یاخود آذربایجان شهید! ..قولاغیم سسده دیر. برك قورخورام....



آچار سؤزلر : آذربایجان,

    بؤلوم: ساتیریك یازیلار
گؤروشلر : 0
تاريخ : جمعه 25 شهریور 1390 | یازار : دوکتور جئری
+0 به‌ین

آذربایجان اوخوللاریندا توركجه اوخوناجاق!

 

جئری نیوز: اوخوللارین آچیلماسی عرفه سینده ایران رسمی لری آنایاسانین 15 نجی ماده سی نین یورولوگه كئچه جگینه توخوناراق بیلدیریب لر: " آنا دیللرینده  اوخوللاری اولان 100 مین ائرمنینی گؤز اؤنونه آلاراق اؤلكه ده یاشایان 30 میلیون توركون اؤز آنادیللرینده اؤیرتیم آلماماسی بیزیم اوچون اوتاندیریجی بیر دوروم دور  بو اوزدن بو ایلدن اعتبارن آذربایجانین بوتون اوخوللاریندا تورك دیلی اوخوتدورولاجاقدیر".

 

بو بیلدیریشین یایینلانماسی نین آردینجا، اؤفكه لنن آذربایجان تورك لری، "بیز شیرین – شكر فارس دیلینی بوراخیب تورك دیلینده اوخوماق ایسته میریك " دئیه چیغیر- باغیر سالاراق بوتون شهرلرده خیابانلارا تؤكولوبلر. وئریلن بیلگی لره گؤره پولیس شیددت ایشله ده رك گؤستریجی لری داغیتماغا چالیشیر....

 



آچار سؤزلر : تورکجه, آذربایجان,

    بؤلوم: ساتیریك یازیلار
گؤروشلر : 0
تاريخ : چهارشنبه 26 مرداد 1390 | یازار : دوکتور جئری
+0 به‌ین

یاریمچیق قالمیش آذربایجان تابلوسو

یازان : دوكتور جئری


 قوزئیی كؤلگه لی

كؤلگه نی یوخولو چكیرم

گونئیی گونشلی

گونشی بولتسو

بولوتو دومانلی چكیرم

قارانی سئومیرم

قاراباغی قیرمیزی چكیرم

اورمونون باختینی

تبریزین تاختینی

قارا چكه نمیرم

آغ چكیرم

سهند،

ساوالانین زیروه سی كیمی

ال قوشونو آل چكیرم

تورپاغی مفتیلی

سارالمیش بنیزلر قانیمی چكمیر

بابكین كؤینگی ایله سیلیرم 

كولباش داغلاری

كولرنگ اووالاری

خزل گئیمش باغلاری

نسیمی دیلیم

نئیله ییم

یام – یاشیل چكیرم.

اورمو گؤلونو چكه جكدیم

آمان تانریم

ماوی رنگیم قورویوب…

1390/1/13 

 

 



آچار سؤزلر : آذربایجان,

    بؤلوم: ساتیریك شئعیرلر
یارپاق لار: [1] [2]
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :