+0 بهین
میللته کورلوق وئرمهیین!
دوکتور جئری
میللتین ایلکین احتیاجلارینین قیمتی، گونو-گوندن باهالاشینجا چؤرگین قیمتینین ده آرتاجاغی نئچه واخت ایدی دیللره دوشموشدو. بونو ائشیدن شیخ آغامیز تئز ایلگیلی مسئوللاری حوضورونا چاغیریب اوستلرینه قیشقیریب دانلادیقدان سونرا دئدی:
- میللته یاوان چؤرک طرفیندن کورلوق وئرمهیین، بیزیم گؤزوموز کور خاویار یئیهریک!
بؤلوم: حیكایه و گولمهجهلر
+0 بهین
یاغیش دوعاسی
دوکتور جئری
قوراقلیق ایللرینده شیخ آغا بیر مدرسهیه گئدهرک مودیرینه دئییر:
- اوشاقلارین اورگی پاکدیر، تمیزدیر. هرنه دوعا ائلهسهلر آللاه درگاهیندا قبول اولار. ایجازه وئرسهنیز اونلارلا بیرگه یاغیش دوعاسی اوخویاق بلکه آللاهی تبارک و تعالی رحمت قاپیلارینی اوزهریمیزه آچیب یاغیش یاغدیرا...
مدرسهنین مودیری گوجلوکله گولمهسینی قاباغینی آلیب دئییر:
- آغا! باغیشلایین ها.. اوشاقلارین دوعاسی قبول اولسایدی ایندی مدرسهده بیرجه موعلیم بئله دیری قالمامیشدی!
بؤلوم: حیكایه و گولمهجهلر
+0 بهین
یاغیش نامازی
قوراقلیق ایللرینده، بیر کندده یاغیش نامازینا چیخارلار. بیر بکتاشی ده اونلارین آردینجا گئدر. جاماعاتین آرخاسیجا گئدرکن بیر آغاج بوداغی تاپیب باشینی دیک توتاراق اؤز تارلاسینا باتیریب،
- " آللاه! بوراسی بیزیم تارلامیزدیر. هئچ اولماسا یاخشی بیر یاغیش یاغدیر دا، سوواریلسین " ، - دئیر.
یاغیش نامازی بیتینجه هامی ائوه قاییدیر و ائله او آخشام گوجلو بیر یاغیش و دولو یاغماغا باشلار. بکتاشی سحر اؤز تارلاسینا باش چکمهیه گئدر. بس نه گؤرسه یاخشیدیر؟ دولو، تارلاسینداکی بوتون محصوللاری محو ائدیب اونلاری تورپاغا قاتمیشدی. بکتاشی بونو گؤرونجه باشینی گؤیه قالدیرارق آللاها بئله خطاب ائدر:
" آللاهیم گوناه سنده دئییل، سنه تارلانی گؤسترن قورومساقدادیر " .
بؤلوم: حیكایه و گولمهجهلر
+0 بهین
شیخ آغانین اینگی
دوکتور جئری
شیخ آغانین قارتالمیش بیر اینگی وار ایدی. پول احتیاجی اوزوندن اونو بازارا آپاریب ساتماق ایستهییر. موشتریلر گلیب اینگین آغزینی آچیب دیشلرینه باخیب قوجالدیغینی گؤرونجه آلماقدان واز گئچیب اوزاقلاشیردیلار. شیخ آغا بیر- ایکی هفته حئیوانی بازارا آپار-گتیر ائلهیندن سونرا، اینک موشتری گؤرنده اؤزو آغزینی آچیب دیشلرینی گؤستریردی!
بؤلوم: حیكایه و گولمهجهلر
+0 بهین
سیاست ندیر؟
علی اوچونجو صینیفده اوخویان عاغیللی بیر اوغلاندیر. بیر گون موعلیمی علیدن" سیاست "-ین نه اولدوغونو سوروشور. علی فیکیرلشیر، آما جاواب تاپا بیلمیر. ائوه گئدیب کیتابلارا باخیر، آما هئچ نه باشا دوشه بیلمیر. آتاسیندان سوروشماق قرارینا گلیر.
– آتا، سیاست ندیر؟
آتا دوشونور. بونو علییه اویغون بیر شکیلده ایضاح ائتمهیه چالیشیر.
– بو ائوین پولونو کیم گتیریر، اوغلوم؟
" سن... "
" من کاپیتالیست رئژیمم. بس پولو آلیب یئمک، ایچکی و گئییم کیمی احتیاجلاریمیزی کیم تأمین ائدیر؟ "
" آنام... "
" بو حؤکومتدیر. "
بس سیزین کیچیک قارداشینیزا کیم باخیر؟
" دایهم... "
" بئلهلیکله دایهن ایشچی، قارداشین گلهجک، سن ایسه میللتسن" .
علی آتاسینین دئدیکلرینی قئیده آلدیقدان سونرا گئدیب یاتیر.
*
گئجه یاریسی علی غریبه سسلره اویانیر. بیردن قارداشینین آغلادیغینی گؤرور. یانینا گئدنده آلتینی باتیردیغینی آنلاییر. درحال آناسینی اویاتماغا چالیشیر. آنجاق نه ائتسه ده، آناسی آیاغا قالخمیر. بو واخت او، قوناق اوتاغیندان گلن سسلرله ماراقلانیر و قوناق اوتاغینا کئچیر.
آتاسینی و دایهسینی اویغونسوز بیر وضعیتده گؤرونجه علینین آغزیندان بو سؤزلر عینا تؤکولور:
-کاپیتالیست رئژیمی ایشچیلری ایستیثمار ائدیر، حؤکومت یوخودادیر، گلهجک پوخ ایچیندهدیر، میللت نه ائده بیلر؟...
بؤلوم: حیكایه و گولمهجهلر
+0 بهین
مسئوللار یالانچی دئییللر!
دوکتور جئری
دونن اوستاد دفترینی ائل باغیندا گؤردوم. اوتوراجاقدا أیلشمیش هردن اللرینی گؤیه قالدیریب اؤز-اؤزونه نسه دئییر، هردنسه ده یاخاسینی ایکی بارماغی ایله آرالاییب دؤشونه توپوروردو. یاواش- یاواش بیلهسینه یاخینلاشدیقدا ائشیتدیم دئیینیر:
- استغفرالله... استغفرالله...آللاه منی باغیشلا... تؤوبه... تؤوبه... توف توف..
اهمالجا الیمی آرخادان چیگنینه قویدوم. دیسکینن کیمی اولدو.
- اشی نولوب؟ نییه اؤز-اؤزونه دانیشیرسان؟!
آیاغا قالخیب اؤپوش-گؤروشدن سونرا دئدی:
- آا بگ بیلمیرسنکی نه بؤیوک گوناها باتمیشام؟
چاشقینلیقلا،’’ نه گوناهی؟!‘‘ دئیه سوروشدوم.
اوستاد بیر ایکی کره یاخاسینا توف توف ائلهیندن سونرا آچیقلادی:
- من ایندییهدک بئله دوشونوردوم؛ مسئوللارین هامیسی یالانچیدیرلار و اؤلکهنی یالان-پالان، فیریلداقلا ایداره ائدیرلر. آنجاق نئچه گوندور اؤیرنمیشم بتر یانیلمیشام..
دوداقلاریمی بوزدوم:
- هله یانیلدیغینی هارادان آنلادین؟
ماییل- ماییل گؤزومون ایچینه باخدی:
- آنلاماغی چتین بیر ایش دئییل. گؤرمورسنمی؛ مسئوللار دئینده فیلان ساعاتدا برقلر کسیلهجک تام واختیندا برقلر کسیلیر. دئیینده فیلان ساعاتدا سولار کسیلهجک دیقهسی کئچمهدن سولار کسیلیر. دئینده اینترنت کسیلهجک....
داها اوستاد دفترینین سسینی ائشیتمیردیم اللریمی گؤیه قالدیریب دئدیم:
- آللاه منی ده باغیشلا!!
بؤلوم: حیكایه و گولمهجهلر
+0 بهین
لوطفن سؤزو کسین!
دوکتور جئری
کئچنلرده تورکیهدن اورهان آدلی بیر قوناغیمیز گلمیشدی. بئش-آلتی گون اونو اویان –بویاندا گزدیردیکدن سونرا بیلهسیندن سوروشدوم:
- سیز ایرانلیلاری نئجه گؤردونوز؟
اورهان گولومسهییب دئدی:
- واللاه ایرانلیلار چوخ یاخشی بیراینسانلاردیر آنجاق تأسوفله اونلارین چوخ پیس بیر عادتلری وار.
چاشقینلیقلا سوروشدوم:
- نه پیس عادتی؟!!
اورهان باشینی آشاغی سالاراق جاواب وئردی:
- دانیشاندا تئز-تئز بیربیرلرینین سؤزونو کسیرلر و ...
اورهانین سؤزونون اورتاسینا آتلاندیم:
- قارداش! بورادا گرهک تئز دانیشانین سؤزونو کسیب سؤزونو دئیهسن یوخسا طرف ساعاتلارجا و یا بلکهده ایللرجه دانیشیب سنه دانیشماق و یا فیکرینی بیلدیرمک ماجالی وئرمهیهجک!
بؤلوم: ساتیریک یازیلار
+0 بهین
+0 بهین
سیزین تقلیدیز کیمهدیر؟
دوکتور جئری
گئنه برقلر کسلیب ایشچیلر تزگاهلارین باشیندا کیمی مورگولهییر، کیمی ایسه موبایللاری ایله دوموک اولماقدا ایدی. بیردن اوستاباشی برکدن اللرینی بیربینه چالیب ایشچیلرین دیقتینی اؤزنه چکدی:
- عزیز ایشچیلر سیزدن بیر سورغو سوروشاجاغام.
ایشچیلر ماراقلا گؤزلرینی اوستاباشینین آغزینا تیکدیلر.
- سیزین تقلیدیز کیمهدیر؟!
بو سورغودان ایشچیلر چاش-باش قالینجا اوستاباشی قاققاناق چکیب گولهرک اسکی بیر خاطیرهسیندن دانیشماغا باشلادی:
اینقیلابین ایلک گونلرینده، خالق کوچه-بازاردا عومومی یئرلرده قارشیلاشاندا، ”سیزین تقلیدیز کیمهدیر؟‘‘ دئیه بیربیرلرینی سورغو-سوالا چکیردیلر. بو آرادا کیمی ایمام، کیمی آیت الله شریتمداری، کیمی ایسه آیت الله خویی دئیه جاواب وئرینجه - یوخ سنین تقلیدین نییه فیلانکسه دیر ده بهمان کسه دئییل- دئیه دارتیشما باشلانیردی.
بیرگون چؤرکخانادا نؤوبتده دایانمیشدیق. چؤرکخانانین صاحیبی پولاد آدلی اخلاقدان کاسیب بیر آغا ایدی. ایکی دنه چؤرک وئرینجه موشترینین ددهسینی یاندیراردی. گئنه او گون موشتریلرین آراسیندا ”سیزین تقلیدیز کیمهدیر؟‘‘ دارتیشماسی باشلانیب هره بیر سؤز دئییب هاللا-کوی سالیردی. دارتیشمانین قیزغین چاغیندا بلدیه ایدارهسیندن امکلی اولان، یئتمیش-سکسن یاشلی اصلان آغا لؤهلویه- لؤهلویه ایچری گیردی. موشتریلری یاش احترامی اوچون اونا اوتوراجاقدا یئر وئردیلر. اصلان آغا بیرآز نفسینی آلینجا اوزومو اونا توتوب دئدیم: ”اصلان آغا سیزین تقلیدیز کیمهدیر؟‘‘. اصلان آغا دریندن بیر سولوق آلیب گؤز آلتی بیر پولاد آغایا بیر منه باخیب دئدی: ” واللاه منیم تقلیدیم پولاد آغایادیر!‘‘. هامی بو جاوابدان گولوشونجه اصلان آغا آرتیردی:” اگر پولادآغا منه ایکی چؤرک وئرسه آرواد قاپینی اوزومه آچاجاق وئرمهسه من کوچهده قالاجاغام‘‘.
اوستاباشینین سؤزلری بورایا یئتینجه گئنه اوزونو ایشچیلره توتوب دئدی:
- ایندی سیزدن سورشا بیلرم سیزین تقلیدیز کیمهدیر؟!
بؤلوم: حیكایه و گولمهجهلر
+0 بهین
باجارمایاندا..
دوکتور جئری
کئچنلرده تئیمورآغانین قهوه خاناسیندا اویان- بویاندان دانیشاندا سؤز- صؤحبت خالقی فلاکته سوروکلهین بعضی سؤزده میلت طرفیندن سئچیلمیش ایشبیلن مسئوللاردان دوشدو. سکسن یاشلاریندا اولان مشدی عباد ایلگینج بیر خاطیرهسیندن دانیشماغا باشلادی:
تزه سربازچیلیقدان قایتمیشدیم. سئودیگیم قیز ایله ائولنمک اوچون ایشه یاپیشب سحردن آخشاماجان چؤلده- باییردا چالیشیردیم. بیرگون ناهار واختی ائوه قاییداندا آنام تاپشیردی: آخشام تئز ائوه گل، گئجه باجین ملاحته ائلچی گلهجک. بو خبردن اولدوقجا چاشیردیم. اؤز-اؤزومه دئدیم: گؤرهسن بو بدبخت کیمدیر ملاحته ائلچی گلیر؟! ملاحت جامالدان چیرکین، اخلاقدان دا بیرآز کاسیب ایدی! هله اوستهلیک بیزیم ده ائله وار-کاریمیز یوخ ایدی، بیری مال-دؤولت اوچون اونونلا ائولنمک ایستهیه! ماراقلا آنامدان سوروشدوم: هله بو بختور کیمدیر؟!! آنام گوله-گوله دئدی: سربازچیلیق یولداشین خیراله! اؤز-اؤزومه دئدیم: یقین بو گدهنی ایت قاپیب باجیما ائلچی گلیر! آخشام اولدو. ائلچیلر گلیب قیسا بیر دانیشیقدان سونرا ملاحتی خیرالهنین بئلینه یوکلهدیک! کبین کسمهدن بئش-اون گون سونرا آنام منی بیر یانا چکیب دئدی: اوغلوم عباد! بو جامال - کامال کی باجیندا وار قورخورام اوچ-دؤرد آیین ایچینده قاپیمیزا گئری قاییدا. دئدیم: بس دئییرسن نئیلهملیییک؟ آنام دئدی: بیز گرهک بو ائولیلیگین تملینی برکیدک (بو گونکو دئییشله یعنی گرهک موقاویم سازی ائلهیک). دئدیم: بو نه جور اولا بیلر؟. آنام دئدی: آهااا.. یعنی بیز ده گرهک خیرالهنین باجیسینی سنه آلاق. ائله بیل بیر قازان ایستی سو تپهمه تؤکدولر. خیرالهنین باجیسی مارال جامالادا، کامالدا باجیم ملاحتدن هئچ بیر اسکیکلیگی یوخ ایدی! اؤکوتمه وورا-وورا دئدیم: آمما من حاجی عوضین قیزی جئیرانی ایستهییرم! آنام اوز-گؤزونو تورشادیب باغیردی: پوخون یئ اوتور یئرینده. من کیمی دئییرسم او اولاجاق. ایکی گون سونرا آنام اؤز باشینا بئش-اون نفر قوهوم-قارداشدان گؤتوروب مارالا ائلچی گئتدی. بو دوگون ده چوخ تئز باش توتوب مارالی دا منیم بویوما بیچدیلر. بو ائولیلیکلردن ایللر گئچدی آنجاق حیاتدا نه من خوشبخت اولدوم نه ده خیراله. یئددی ایل سونرا، چوخلو دعوا-دالاشلار نتیجهسینده خیراله باجیم ملاحتی بوشادی. بوشانما دفتریندن ائشیگه چیخاندا خیرالهنی بیر قیراغا چکیب اوستونه قیشقیردیم: آخی کؤپک اوغلو کؤپک! سنکی ائولنمگین باجارمیردین منی نییه بدبخت ائلهدین؟!
بؤلوم: حیكایه و گولمهجهلر
+0 بهین
من ایدارهدن چؤپ آپارمامیشام
دوکتور جئری
جناب غنیاوغلو ییرمی نئچه ایلدیر اگری-بوروق
ایدارهسینده دئدیگینه گؤره صداقتله چالیشماقدادیر. دونن دوستلارلا تئیمور آغانین قهوهخاناسیندا اوتوروب
اویان-بویاندان دانیشاندا سؤز بعضی ایدارهلرده اولان یولسوزلوقلاردان دوشدو. جناب غنیاوغلو
دؤشونو قاباغا وئریب دئدی:
- آند اولسون آللاهین واحدانیتینه من ایندییهدک
ایدارهمیزدن چؤپ آپارمامیشام!
من اگری-اگری اوزونه باخینجا آغزینی قولاغیما یاخینلاشدیریب
پیچیلدادی:
- رحمتلیگین اوغلو ایدارهمیزده اونجا ماشینلار،
تزگاهلار اولونجا مگر من ائششگ بئینی یئمیشم چؤپ آپارام!
بؤلوم: حیكایه و گولمهجهلر
+0 بهین
ناموس و امنیت
دوکتور جئری
مشدی خوجاوئردی گونده سحر تئزدن ائودن چیخیب آخشام گون باتینجایا قدر زمیلرینده ایشلهیر. اونون مولکو ترس آوا ایله داناباش کندینی بیربیرینه قووشدوران اوزون دره آدلی بیر وادینین قیراغیندا یئرلشیب. آروادی توکزبانی، آللاهین هر گونو بیر سوفره باغلاییب گون اورتا چاغی اوزون درهدن گئچهرک ارینه ناهار آپارار. توکزبانی هر ناهار گتیردیگینده اری مشدی خوجاوئردی باشینی توولاییب دئیر:
- آی آرواد ! آخی سن نییه گونده - گونده ناهار گتیریرسن؟ بوراسی ایزسیز-بوجاقسیز بیریئردیر، آللاه ائلهمهمیشی گلنده بیر یارامازی قارشینا چیخیب ناموسونا توخاناراق آبیریمیزی آپارار آخی!
هر سفرینده ده توکزبانی دوداغینی بوزوب دئیر:
- آی کیشی نه دئییرسن؟ ایندی قدیمکیلر دئییل. اول آللاه ایسلامی حؤکومتیمیزین کؤلگهسینده مملکندین هریئرده امنیت برقراردیر. داها کیمسه بو غلطلردن دارتا بیلمز..
***
گونلرین بیر گونونده مشدی خوجا وئردی آروادینی بو ناهار گتیرمهلر سئوداسیندان واز گئچیرتمک اوچون بیر نخشه چکدی. اوز-گؤزونو بیر یایلیقلا باغلاییب دره ایچینده آروادینی قارشیلادی. توکز اویان-بویانا باخیب قاچماق یولو آختاریرکن مشدی خوجاوئردی اونا یاخینلاشیب اتگینی قالدیریب باشینا گئچیرتدی.
بیرآزدان یازیق آرواد اوزونو ییغیشدیریب تومانینی بئلینه چکینجه دئدی:
- خارابا قالاسان اوزون دره! بیرگون اولمادی سندن ساغ-سالامات گئچمیش اولوم!
بؤلوم: حیكایه و گولمهجهلر
+0 بهین
کؤپوک
دوکتور جئری
دونن آخشام اوستاد دفتریگیل بیزه قوناق گلمیشدیلر. سوفره آچلیب یئر-یئمک دوزولونجه اوستادین بالاجا نوهسی یاشار هیجانلا قیشقیردی:
- جان بالا جان نوشابه! دده منه نوشابه تؤک.
اوستاد دفتری سئوگیله الینی نوهسینین باشینا چکیب دئدی:
- گول بالام! دوکتور دئییب نوشابه سنه ضررلیدیر. ایچمهسن یاخشیدیر. باخ آیران وار قوی اوندان بوشالدیم.
یاشار دوداغینی بوزوب کوسن کیمی اولدو. دورومو بئله گؤرونجه ال آتیب نوشابهنی سوفرهنین اورتاسیندان گؤتوروب پیسیلتی ایله قاپاغینی آچیب، ”بابام بوگونلوک نوشابه ایچمکله بیر شئی اولماز“ دئیه یاشارا سسلندیم:
- بالا لیوانینی توت..
یاشار سئوینجک لیوانینی قالدیردی. نوشابهنی گازلی-گازلی بوشالدینجا گوله-گوله قیشقیردی:
- عمی بسدیر.. عمی بسدیر.. لیوان داشدی!
یاشار هیجانلا کؤپوکلو لیوانی قاباغینا قویوب اونو سئیر ائتمگه باشلادی. بیرآزدان کؤپوکلر یاتیشیب لیوانین دیبینده ایکی بارماقدان آز نوشابه قالینجا اوشاق چاشقینلیقلا منه باخیب دئدی:
- عمی!!
یاشارین بو طعنهلی ”عمی“ دئمهسینه هامی برکدن گولوشونجه اوستاد دفتری اوزونو منه توتوب دئدی:
- قارداش سنین بو نوشابه بوشالتماغین لاپ دوکتور پزشکیانین نئچه ایللردن سونرا میلتی سئچکیلر صحنهسینه چکمهسینه بنزهدی. جوشقو-هیجانلار یاتیشینجا میلت گؤردو گئنه هئچ زاد یوخ!
بؤلوم: حیكایه و گولمهجهلر
+0 بهین
کسکین دیل
دوکتور جئری
اوغلانی اون بیرینجی صینیفه یازدیردیقدان ایکی-
اوچ گون سونرا مدرسهدن زنگ ووروب آتالارین گرکلی بیر تعهدنامهنی ایمضالایاجاقلارینی
سؤیلهدیلر.
مدرسهیه گئتدیکده مودیر تعهدنامهنی بیلمه
اوزاداراق اوخویوب ایمضالامامی ایستهدی. تعهدنامهده اؤیرنجیلرین اویغون پالتار
گئیمهلری، یاخشی داورانمالاری،باشی آشاغی اولمالاری، یاخشی درس اوخومالاری
و واختیندا گلیب گئتمهلری تؤوصیه اولوندوقدان
سونرا مدرسهیه پیچاق، آنادیلی وموبایل گتیرمهلرینه ده قاداغا قویولموشدور! آنادیلینین آدی پیچاقلا
برابر چکیلدیگینده تزه آنلادیم نییه
آنادیلیمیزه دئییرلر: کسکین دیل!
بؤلوم: حیكایه و گولمهجهلر
+0 بهین
مرگ بر اوستورالیا
دوکتور جئری
بیز اسکیدن بری بئش واخت نامازیمیزی شیخ آغانین پئشنامازلیغی ایله کندیمیز- ترس آوانین جامع مچیدینده قیلاریق. شرق-غربده آد-شؤهرت قازانمیش مؤعتبر شیخ آغامیز عادت اولاراق نامازلارین سونوندا دویونلمیش یوموروغونو گؤیه قالدیراراق، "مرگ بر آمریکا" ، "مرگ بر ایسرائیل"، مرگ بر اینگلیس" دئیه جهانی ایستیکبارین دا پایینی وئرمیش اولار.
ایندی نئچه گوندور؛ شیخ آغا "مرگ بر" دئدیگی اؤلکهلرین سیراسینا بیر یئنیسینی ده آرتیریب نامازین سونوندا نیفرتله "مرگ بر اوستورالیا" دئیه قیشقیریر. دونن ناماز بیتدیکدن سونرا، دیرسگیمله یانیمدا اوتوران شیخ آغانین اوغوللوغو- قلئیچی مورتوضو دورتدوم:
- آغا مورتوض! آمریکا، ایسرائیل، اینگلیسه مرگ بر دئمکلرین سببینی آنلاماق چتین دئییل آنجاق بیلمیرم بو اوستورالیا نه سوچ ایشلهییب ددهلیگین شیخ آغا نئچه گوندور اونو دا قاتیب قاریشدیریر؟!
قلئیچی مورتوض دریندن بیر آخ چکیب دئدی:
- ددهلیگیم آنلاشیلماز بیر توطئه نتیجهسینده نئچه واختدیر سویوقلوق ائلهییب دستمازینی ساخلایا بیلمیر. اونون ظنینجه بیر ایشده اوستورالیانین الی وار!
بؤلوم: حیكایه و گولمهجهلر