دوکتــــور جـئــــــری
ساتاشما ادبیاتی
گؤروشلر : 0
تاريخ : جمعه 15 اردیبهشت 1391 | یازار : دوکتور جئری
+0 به‌ین

حاجی لارین یارانه سی كسیله جك

یازان: دوكتور جئری

خیاباندا پروفسور نصرالدینی گؤردوم دئیینه- دئیینه گئدیردی. سسله دیم:

-         پروفسور، اوووی... پروفسور!

منی گؤرجك قاشلاری نین دویونو بیر آز آچیلدی. دئدیم:

-         اولان دئیینگه توتموسان نه باشینی آشاغی سالیب اویوده- اویوده گئدیردین؟

-         اووووه... دوكتور بیگ! نه یاخشی سنی گؤردوم آزقالا دردن پاتلایاجاقدیم.

ساتاشدیم:

-         نه دردی؟ گئنه كیمین دردینی سالمیسان قارنینا؟

پروفسور نصرالدین قولومدان یاپیشیب چكدی دیوارین كؤلگه سینه. الی نین دالی ایله آلنینین ترینی سیلیب دئدی:

-         ایبیش كیمی  میلیون میلیون آلیب ایش بیلمز میللت وكیل لری نین دردینی!

-         نئجه مگر؟

-         هئچ، اوچ دؤرد آیدیر یارانه لر مسله سینی سالیبلار هَوَنگه، بیلمیرلر كیمه یارانه وئرسینلر كیمینكینی كسسینلر... حاجی علی اصنافی تانییرسان؟

-         هه، یاخشی آدامدی، نئجه مگر اولمایا یارانه سینی كسیبلر؟

-         یوووو... حاجی علی نین توكانی نین قاباغیندا قنبرآلی آدلی بیر سیگارساتان وار بیزیم قونشودور.دونن گلمیشدی بیزه . دئییردی، پروفسور قوربانیم اولوم بیر ایش گؤر، ائویم ییخیلدی .

دئدیم: زاریما دئ گؤروم نه اولوبدو؟

دئدی: حاجی علی اصنافین پوخونا یاندیم.

دئدیم: نئجه ؟

دئدی: بیلدیگین كیمی من حاجی علی نین توكانی نین قاباغیندا سیگار ساتیرام، سحر چاغی یارانه لر ایداره سی نین ائس ائم ائسی كاریخیب حاجی علی نین عوضینه منیم موبایلیما گلیب.

سونرا چیخاردیب موبایلیندا منه گؤستردی: آغایی قنبرآلی، " تمكُن مالی"- نیز اولدوغو اوچون یارانه نیز كسیله جك ، اعتراضی نیز وارسا یارانه سایتینا موراجیعت ائدین.

دئدیم : قورخما گئدیب سایتدا اعتراض وئره رم .

دئدی: پروفسور، آتان رحمتده ، منده ائله بونا گؤره موزاحیم اولدوم آز قالیر باغیریم چاتلایا....

گوله گوله دئدیم:

-         هر ایشده یانلیشلیق اولار یازیق میللت وكیل لری نئیله سینلر؟ ایراندا كیسمه -منیم واریم وار- دئمز، كیمدن سورشسان دئیه جك من دیله نیرم.

پروفسور یئنه قاشلارینی چاتدی.

-         ائله منده بونا گؤره دئیرم مجلیسده اوتورانلار هئچ نه دن باش چیخارتمیرلار. آللاه قویسا ایچلرینده نئچه دنه ده دین آدامی وار!

دوغروسو لاپ شاشیردیم.

-         پروفسور من لاپ قاتدیم بونلارین بیر بیر ایله نه ایلیشكیسی وار بیلمیرم.

پروفسورون دوداغی قاچدی.

-         باخ دؤولت دوشوب اونون بونون دالینا ، یئتنه :- سنین تمكن مالین وار گل بو یارانه آلماقدان واز گئچ دئییر. حال بوكی ، تمكن مالی اولانلارین آدی اوستونده دیر!

-         كیمی دئییرسن ؟ آقازاده لری، رئیس رؤسانی ؟...

-         یوخ دئدیگین كیمی اونلار تمكن مالی لری اولدوقلارینی بویونلارینا آلمایاجاقلار، دئدیم كی، آدلاری اوستونده دیر!

-         واللاه منیم ده میللت وكیل لری كیمی عاغلیم بیر شئیه چاتمیر، اؤزون دئ.

پروفسور كؤكسونو آریتلاییب شست ایله دئدی:

-         حاجی لار

-         حاجی لار؟!!...

-         هه، حاجی لار. بیلدیگیمیز كیمی، دین و شرعیمیزده تكجه تمكن مالی لری اولانلار آللاهین ائوینه گئده بیلرلر. بو اوزدن اؤلكه ده اولان میلیونلار حاجی نین سورغو- سوال سیز یارانه لری كسیله بیلر. بونا گؤره یاخشی دئییل ائس ائم ائس گؤندرمكله خالقی راحات سیز ائتسینلر.

پروفسور نصرالدینین عاغلینا چپیك چالاراق  ائكله دیم:

-         دوز دئییرسن پروفسور، ائشیتدیگیمه گؤره ایندی نئچه میلیون تمكن مالی اولان آللاه ائوینه گئتمك اوچون آد یازدیراراق نؤبته ده دیر. اگر بو نؤبته ده كیلرین و قاباقكی حاجی لارین یارانه لرینی  كسیب بیزه وئرسه لر  بیزده آللاه ائوینه مشرف اولا بیله ریك!

پروفسور باشی ایله اونایلادی. بو قونو اوزه رینده بیرآز دوشوندوكدن سونرا دئدیم:

-         پروفسور، بو ایشین آمما بیر بؤیوك عیبی وار.

-         نه عیبی؟!

-         عیبی بودور كی، فیلیم لرده " حاجی، بیا كه  سیدو كشتند" دئینده كیمسه سئیییدین یاردیمینا قوشماییب اؤلوسو یئرده قالاجاق!...





    بؤلوم: حیكایه و گولمه‌جه‌لر
گؤروشلر : 0
تاريخ : سه شنبه 12 اردیبهشت 1391 | یازار : دوکتور جئری
+0 به‌ین

اوردیبئهئشتین اونو، اولوسال خیلج فارس گونودور. بو  گونو بیر سربستله قوتلاییریق.

خلیج هامی ایشییَكِ فارس

دوكتورجئری

منیم دیرلیگیم بیر سویا باغلی

سنین كیملیگین بیر سویا باغلی

گؤلوم قورودو

چیچگیم سولدو

بیر دوست ساناراق توتمادین یاسین

گؤلون قوروسا

 آخ، نه اولاجاق؟!...

ایشیییم خلیجه آدین باتماسین

منیم الیمدن بو گلیر آنجاق.





    بؤلوم: ساتیریك شئعیرلر
گؤروشلر : 0
تاريخ : شنبه 9 اردیبهشت 1391 | یازار : دوکتور جئری
+0 به‌ین

فهله گونو احوالاتی

یازان : دوكتور جئری

مایرام!

بیلدیگینیز كیمی، 1.مای دونیالیق فهله گونو، بایرامی دیر. زحمت چكن فهله لر! ساغ، سولا اویماییب باشینیز ایشینیزده اولسا گلن ایلده  بوگونه تای،  ال- آیاغینیزدان اؤپوب دئیه جه ییك:

مایرامینیز قوتلو اولسون!

 

فهله نین آلنینین تری

حاق وئرمز بیر حاجی یا دئدیلر:

-دینیمیزده فهله نین آلنینین تری سویومادان حاققینی وئر، دئمه ییب لرمی؟

- نییه دئییب لر!

- اوندایسا، نییه ایشلتدیگین فهله لرین حاققینی وئرمیرسن؟

-  فهله لرین آلنینین تری سویوماییب كی!  ایشده تر ایچینده ، بازارا چیخاندا تر ایچینده ، ائو-اوشاغی نین یانیندا تر ایچینده، حیط صاحابی نین یانیندا تر ایچینده؛ بو تئزلیكده ده بو ترلر سویومایاجاق من حاققلارینی وئریم!...

 

فهله گونو چاغیریشی

فهله گونو چاغیریش سیز (شوعارسیز) اولماز . ایشده بو ایلین چاغیریشی :

دونیا فهله لری گرنه شین!

 

بیلدیریش

فهله گونو موناسیبتینه گؤره ، اون مین دنه فیل نیشان بئل، دؤولتی قیمت له ، ایش آختارانلارین آراسیندا پایلاشاجاق. دوكتورا،  فوق لیسانس و لیسانس مدرك لری اولانلارین  باشقالارینا اوستونلوگو واردیر.  تبریز بلدیه سی





    بؤلوم: حیكایه و گولمه‌جه‌لر
گؤروشلر : 0
تاريخ : پنجشنبه 7 اردیبهشت 1391 | یازار : دوکتور جئری
+0 به‌ین

حباب آریایی در آرزو بلاق:  no-lie.arzublog.com


بلگفادا اولان "حباب آریایی" آدلی وئبلاقیم یاتمیشلارین مورگوسونو پوزماسین دئیه سوسدورولدو.باشیم ساغ اولسون!

دوشونمك یاساق!

دوكتور جئری

 كاغیذدا دوشوندوم

كیتابلاری  یاندیردیلار

تئاتردا دوشوندوم

پرده چكدیلر

فیلم لرده دوشوندوم

سینمالاری قاپاتدیلار

نوت لاردا دوشوندوم

ماهنی لاری  بوغدولار

رسیم لرده دوشوندوم

قارا یاخدیلار

هئیكل لرده دوشوندوم

بوت سیندیردیلار

بینالاردا دوشوندوم

موصللا اكدیلر، پاساژ یاپدیلار

اینتئرنت ده دوشوندوم

فیلتئر ائتدیلر

خیاباندا دوشوندوم

دوربین قویدولار...

ایندی

 توالئت لرده دوشونورم

باغلاسانیز

عوصیان ائده جه یم شهرین مركزینده





    بؤلوم: ساتیریك شئعیرلر
گؤروشلر : 0
تاريخ : دوشنبه 4 اردیبهشت 1391 | یازار : دوکتور جئری
+0 به‌ین

دوكتور جئری (داما زیلله) - نین قیسیر سؤزلری

میللت خورافه لر ایچینده چابالاماقدا، دوعا یازدیرمالی ییق.

اؤزگورلوگون قازانماسی قولای (راحات)، ساخلاماسی چتین دیر؛ زینجیره چكمك گرَك.

اویغار اینسانلار آرتیق قیزلارینی قویلامیرلار، سالدیریرلار.

اؤزلرینی اوستون سایانلار آلتین دیرلار.

اوچونجو دونیا اؤلكه لرینده، باشچیلارین اؤنجه رسیم لرینه سونرا ایسه اؤزلرینه آغاج تاخیب گؤیه قالدیرارلار.

اوچونجو دونیا اؤلكه لرینده، آنایاسالارین پوزماسی یازماسیندان چتین دیر.

باشچینی باشا چیخاردان میللت لر، یئنمه سینی تانریدان ایسته یرلر.

گؤزتله یین شهوت سیزی سیكینه سریمه سین.

اوتانمیرسان، سو ایچ.

شهریمیزی تمیز ساخلامایانلارین قاپیسینا سیچمالی ییق.

ایچكی ساغلیغا ضررلی دیرسه  دوستلارین یوخ، دوشمن لرین ساغلیغینا قالدیرمالی ییق.

یالانا اینانان ایله دئیه نین ایلگیسی، ائششك ایله اوغلو كیمی دیر.

سویو بولاشدیرمایین، ایلده بیركره یویونماق یئتر.

یالان دانیشمایان باشچی، آغ یالان دیر.

پالانسیز توربا اولماز یئیه سن.

آزاد ائله یه نین قولویام.

ائشیت! قادین، كیشی ائشیت!...ائشیدن یوخدورسا دئمیرم.

یامان دانیشانین دده سی نین سوموگونو سـ...

چوخلارینی آنالاری دوغمامیشلار، سیچمیشلار.

یوردونو كـَو یئره (كویره) چئویرنلری باغیشلاسان، تانری جنتده سنه اوتلو سولو باغلار باغیشلایاجاق،اوتلایاسان!

 

 

 





    بؤلوم: ساتیریك یازیلار
گؤروشلر : 0
تاريخ : دوشنبه 28 فروردین 1391 | یازار : دوکتور جئری
+0 به‌ین

اورمو گؤلونون جانی قورتولدو!

دوكتور جئری

مجلسده ، میللت وكیل لری ، اورمو گؤلونون قورماسی نین قارشیسینی آلماق اوچون یوللار آراماقدادیرلار.

بیرینجی میللت وكیلی: منجه ، تانكئرلرله ، آراز چاییندان اورمو گؤلونه سو آپارمالی ییق.

مجلیس باشقانی : اوزگونم قارداش! تانكئرلریمیز گئجه- گوندوز نفت داشیماقدادیرلار بونا گؤره بو ایش اولاسی دئییل، هله اوسته لیك بودجه میزده یوخدور.

ایكینجی میللت وكیلی: تانكئرله آرازدان  اورمو گؤلونه سو آپارماق  چتیندیرسه، اورمو گؤلونو آرازین یانینا  آپاراق .

مجلیس باشقانی شاشقینلیقلا: نئجه؟

ایكینجی میللت وكیلی: اؤنجه اورمو گؤلونو تورپاقلا دولدوراق سونرا گئدیب آراز چایی نین قیراغیندا بیر آیری اورمو گؤلو قازاق، بونونلا تانكئره گره گیمیز اولمایاجاق!

مجلیس باشقانی : قارداش اؤنرینیزه سؤز اولا بیلمز آنجاق اؤلكه نین مركزی بؤلگه لرینده گئدن آوادانلیق ایشلری اوجوندان لودئر- بولدئزئریمیز یوخدور هله اوسته لیك بودجه میزده یوخدور.

اوچونجو میللت وكیلی: دؤولت آذربایجاندا، بودجه و تجهیزات باخیمیندان سیخینتی دا دیرسا اورمو گؤلونون سورونونو، ائكوسیستئمی بیربیرینه وورمادان، خریطه اوزرینده چؤزه بیله ریك!

مجلیس باشقانی ماراقلا: بیر آز آچیقلایا بیلرسینیز؟

اوچونجو میللت وكیلی: بو ایش اوچون جغرافیا قورومو خریطه ده ، اورمو گؤلو ایله لوت كویری آدلارینی تای دئییشیك ائله ملی دیر سونرا خزر دنیزیندن  راحاتلیقلا اورمو گؤلونه سو آپارماق اولار.

میللت وكیل لری هامیسی آیاغا قالخیب چپیك چالیرلار، مجلیس باشقانی دا چپیك چالیر سونرا اگیلیب میزین آلتیندان قیرمیزی روبانلی بیر كولونگ چیخاردیب اوچونجو میللت وكیلینه اوزداراق دئییر:

-  تئز بیر دربست تاكسی توتوب جومهورباشقانی نین ائوینه گئت؛ اونو خزر دنیزینه گؤتور بیزده دالدان گلیریك! بو پروژه نین كولونگو بوگون وورولمالی دیر!

سون خبر:

بیز ال آیاق ائدیب  بو  اولایی نئته وئرینجه، جومهورباشقانی كولونگو ووردو! موبارك دیر.

 

 



آچار سؤزلر : اورمو,

    بؤلوم: حیكایه و گولمه‌جه‌لر
گؤروشلر : 0
تاريخ : جمعه 25 فروردین 1391 | یازار : دوکتور جئری
+0 به‌ین

حامام سویوندان فردوسی یه دك!

آی مَشَدی غضنفر، بونلار هامیسی سنین حامامی نین سویونون تاثیریندن دیر!- مَشَدی عباد

   سایغی دگر جومهورباشقانی، تاجیكیستاندا ایرانلی لار ییغینجاغیندا،  فردوسی نین اسلام دینینه اولان درین تاثیریندن دانیشاراق، "فردوسی اسلام مكتبینی قورتاراق بو آغیر یوكو، یوك گؤتورمزلرین سیرتیندان گؤتوروب ایرانلی لارین بئلینه یوكله میش، بو میللت ایسه اولدوقجا یاخشی بو یوكوملولوگون عؤهده سیندن گله بیلمیش دیر" دئمیش .

 بو سؤزلر سرت تپكی لرله قارشیلاشسادا دئمه لی ییك: ائورنده فردوسی نین تاثیریندن آماندا اولان بیر شئی تاپماماق مومكون دئییل . آشاغیدا گتیردیگیمیز بیر نئچه اؤرنك بونون آیدین قانیتی دیر. یاخشیسی بودور، تپكی چیلر جومهور باشقانینی قیناماق یئرینه گئدیب بو قونودا اوزمانلارلا فیكیر آلیش وئریشی ائتسینلر!

ایشده، فردوسی نین تاثیراتیندان اؤرنكلر:

 بیر تیكه حلال یارانه ائو اوشاغینیزین سوفراسینا آپاریرسیزسا فردوسی نین تاثیریندن دیر یوخسا ایشسیزلیك بونالیمی دونیانی چولقالاییب هامی آجیندان اؤلمكده دیر.

قار- یاغیش یاغیرسا؛ فردوسی نین تاثیریندن دیر یوخسا آفریقادا ایللر بویودور یاغینتی یوخدور.

اؤلكه دوشمن لری، سینیرلاریمیزا گؤز تیكمكدن چكینیرلرسه، فردوسی نین تاثیریندن دیر، آرش كمانگیری بیز تانیمیرساقدا اونلار تانیییرلار.

دونیادا، هامی  بیزی بارماغی ایله گؤستریب پیچی- پیچی دانیشیرسا، فردوسی نین تاثیریندن دیر؛ اونون یاشاتدیغی عجم دن شاشقیلیق دویورلار.

دونیادا بوقدر دوستوموز وارسا، فردوسی نین تاثیریندن دیر؛ شاهنامه اولان یئرده كیمدیر نفت- گازین اوزونه باخان.

دوشاب آلیریق موراببا چیخیرسا  فردوسی نین تاثیریندن دیر؛ فرانسادا كونسئرو آلیرلار ایچیندن قورباغا چیخیر.

رسمی دیلیمیز فارسی سا، فردوسی نین تاثیریندن دیر یوخسا بیربیریمیزله گؤروشنده لال اویون گتیره جك ایدیك.

اؤلكه ده هئیكل تراش لیق و سیمینت صنعتی گؤنو گوندن گلیشیرسه ، فردوسی نین تاثیریندن دیر؛ فردوسی نین هئیكلی كند- شهرلرین میئدانلارینی فتح ائتمكده دیر.

هامی گئری له ییركن، ایره لی له ییریك سه، فردوسی نین تاثیریندن دیر؛ رخشه مینمیشیك؟

آمریكا اؤلكه میزه سالدیرماقدان قورخورسا فردوسی نین تاثیریندن دیر؛ اسفندیارین سیرری كیمی، سیررینی بیلیریك.

كندلرده سامانلیق لار دانیشگاه آزاد ائدیلیب زبان و ادبیات فارسی لیسانس- دوكتوراسی وئریلیرسه، فردوسی نین تاثیریندن دیر؛ بو گونلر مدرك سیز آدامی توالئته بوراخمیرلار هارادا قالسین بعضی- بعضی یئرلره.

دوكتور جئری یازیرسا ، فردوسی نین تاثیریندن دیر یوخسا او گئدیب قاز اوتارمالی دیر هله هله!

 





    بؤلوم: ساتیریك یازیلار
گؤروشلر : 0
تاريخ : سه شنبه 22 فروردین 1391 | یازار : دوکتور جئری
+0 به‌ین

گوله گوله دوكتور!

اَت باهادیرمی ؟

 یئمه یین !

بیلین!   اَت، خرچنگ(سرطان) خسته لیك لری نین باشلیجا ندنی دیر.

تویوق باهادیرمی؟

یئمه یین!

بیلین !  تویوقلارین هورمونو اولدوغوندان بدنیزده چئشیدلی چاتیشمازلیقلار اؤزونو گؤستره جك .

گؤی گؤیرنتی باهادیرمی؟

یئمه یین!

بیلین! گؤی گؤیرنتیلر، شهرلرین آیاق سولاری (فاضلاب) ایله یئتیشدیریلیر بونا گؤره قیرلاغان (وبا) قورخوسو وار.

یئر- یئمیش باهادیرمی؟

یئمه یین!

بیلین ! یئر-یئمیشی كسیب  سویاركن بارماغینیزی كسسه نیز  قاقشال (كزاز) دان اؤله بیلرسینیز.

نور- نوخود باهادیرمی؟

یئمه یین!

بیلین!  بو اؤلدوروجو دنه لر گؤنده بوغازا دیغیرلاناراق یوزلر كیشینی بوغورلار.

دویو باهادیرمی؟

یئمه یین!

بیلین!  دویوده اولان آغی (سم) قارین- قورساغینیزی قیسسا سوره ده دارما داغین ائده جكدیر.

سود اورونلری باهادیرمی؟

یئمه یین!

بیلین! آغارانتی (لبنیات) اوره تیجیلری(تولید ائدنلری) اورونلرینه(محصوللارینه) واجیب اولمایان واجیبی لری قاتماقلا ساغلیغینیزی هده له ییرلر.

چؤره ك باهادیرمی؟

یئمه یین!

بیلین!  چؤره كچیلر خمیره قابارتما توزو (شیرین جوش) قاتماقلا آش قازانیزی (معده) دلیك دئشیك ائدیب اوزون سوره ده سیزی اؤلدوره جكلر.

اویاریلاریمیزا اویسانیز...

بیلین ! 

 ساغ - سلامت اؤله بیلرسینیز.

اونوتمایین!

دؤولت، گئجه گوندوز سیزین ساغلیغینیزی دوشونور؛  باهالیقلار ندن سیز دئییل!

دوكتورونوز :  دوكتورجئری

سیز ساغ من سلامت

17/1/1391





    بؤلوم: ساتیریك یازیلار
گؤروشلر : 0
تاريخ : سه شنبه 15 فروردین 1391 | یازار : دوکتور جئری
+0 به‌ین

مش اسماعیل نئجه پان توركیست اولدو؟

دوكتور جئری

مش اسماعیلی محلله ده هامی تانیر. سحر آلا قارانلیقدان ائودن چیخیب آخشام قاش  قارالاندا ائوینه قاییدار. اوزون ایللردیر، اسكیمیش یوك ماشینیلا بیرگه روزگارین ایستی- سویوغونو، چؤل - باییردا چكمكده دیر. ایندی اونو یالنیز تویلاردا توی بیگی ، یاسلاردا ایسه چای-سماور تزگاهی نین دولاندیریجیسی كیمی  گؤرمك اولور آنجاق كئچمیشده، یایی بیر نئچه سفر قاپی قونشونو ماشینینا دولدوروب اورمو گؤلونه آپاراردی. اورمو گؤلو مش اسماعیلین هر شئی ایدی. اوزمكدن دویمازدی . یورولاندا ایسه زیغ- چامورا قویلانیب شیرین خاطیره لریندن دانیشیب گولدورردی؛ هردنسه اوخویوب هامینی شنلندیره ردی.

مش اسماعیل بؤیوك-كیچیگین سئویملیسی دیر محلله ده . بونا گؤره اونون توتولما خبری هامینی  سارسیتدی. محلله یه ولوله دوشدو. دئییلنلره گؤره، مش اسماعیل  پان توركیست لیك اتیهامینا گؤره یاخالانیب آدی یوخ ایداره سینه آپاریلمیشدی. مش اسماعیلی ائشیگه چیخارتماق اوچون آغ ساققاللار سفربر اولدو. اولمایان- قالمایان یئرلره باش وورولدو. بو چابالامالار بیر آی سونرا سونوجلانیب مش اسماعیل    یوز الی میلیونلوق وثیقه ایله آزاد اولدو. بیر قوطو شیرینی باغلاییب شامدان سونرا آتاملا  گؤروشنه گئتدیك. ماراقدان ایچیم ایچیمی یئییردی. گؤره سن مش اسماعیلی نه اوچون توتموشدولار؟  بیلدیری می داغیدیب ؟ كیتاب- درگی می یاییب ؟ یووو..خ ، مش اسماعیل آدینی زورلا یازیر ! بو اولا بیلمز. كامیونچولوغودا تراختورچولوغونون گونوسودور! اولمایا اورمو گؤلونه گؤره بیر شئی دانیشیبدا الینه ایش وئریب؟ هه! بئله اولمالی دیر. آناسی نین قیرخیندا سؤز اورمو گؤلونون قوروماسیندا دوشنده او ، "اورمو گؤلونون قورماسی آنامین اؤلوموندن  منه آغیر گلیر " دئمیشدی. بو فیكرلره  مش اسماعیل ائوینه یئتیشدیك. اوتاق قوهوم- قونشو ایله دولو ایدی. ایچری گئچدیكده ، مش اسماعیل آیاغا قالخیب بیزایله اؤپوشوب گؤروشدو. ساتاشاراق:- مش اسماعیل، ماشاآللاه بتر كؤكلمیسشن!- دئدیم.

 قیققیلدایا- قیققیلدایا:- "یوخ بابا ، كؤكه لن یئرین آدی زیندان دیر؛ من گئدن یئرده آدام آریقلار، گؤمورسن تومان اگنیمدن دوشور!" دئدی. هامی گولوشدو.

شیرنیلر یئییلدی. چایلار ایچیلدی.  قوناقلارین بیری، " مش اسماعیل نئجه اولدو توتولدوز؟" دئینجه مش اسماعیلین آلنی قیریشلاندی. سیگاری نین كؤتویونو كول قابینا باساراق ،"هامینی برق توتاندا بیزیده جین چیراغی توتدو" دئیه سؤزه باشلادی مش اسماعیل: - او گون ناهار چاغی آریغین-یورغون ائوه گلیردیم خیاباندا آغیر تیخاج وار ایدی. ماشینلار یاواش- یاواش گئدیردیلر. قاباغیمداكی پرشیا ماشینی بیردن تورموزا باسینجا دالدان اونا توخوندوم. آشاغی آتلاندیم. ائله بیر شئی اولمامیشدی. پرشیاداكی لاردا ائندیلر. دؤرد گنج اوغلان ایدیلار. ساغ الیمی دوشومه قویوب بیر آز اگیله رك:- باغیشلایین تقصیر منده ایدی، خسارتیز نئچه اولسا حاضیرام وئریم- دئدیم. كئچی ساققاللی پرشیانین سوروجوسو حیرصلی – حیرصلی قیشقیردی:

-         ای بر پدرت لعنت افراسیاب!

" ائله بیل ،منی بیر آیریسی ایله یانلیش توتموش " دئدیم  اؤز- اؤزومه سونرا:

ببخشید آغا من افراسیاب نیستم  ایسمی من مش اسماعیل است.

 گئچی ساققال اوغلان سایمازیانا :

-         تورو نمی گم جد اعلایتونو می گم – دئدی سونرا دا بیر ایكی دنه كیفیر سؤز افراسیابین بؤیرونه دوگونله دی.

چاش- باش قالمیشدیم. اوغلانین نه دئدیگینی ایچ ائله یه بیلمیردیم. بیرآز دوشوندوم . بیردن هیندی فیلیم لرده كی كیمی قاییتدیم اوتوز- اوتوزبئش ایل قاباغا. شاه زامانی، اورمو رادیوسوندا شاكری آدلی بیریسی  هر آخشام شاهنامه نین ناغیللارینی دئیردی. بو ناغیللاری چوخ خوشلادیغیمدان هر گون اونلارا قولاق آساردیم. بیردن سانكی یاتمیش ایدیم ، اویاندیم. بو ناغیللاردا افراسیاب توركلرین شاهی، بؤیوگو  ایدی. بونو خاطیرلایینجا قانیم بئنیمه داشلاندی. گؤزلریمی یوموب آغزیمی آچدیم:

-         اولان روستمین آغزینی...

اونون آروادینی  ...

اونون دده سی نین سومویونو....

سهرابین قانینا ایشیییم، اونون نوشداروسونا سیچیم...

گنجلر یامانلاری ائشیدجك اوستومه یومولدولار.فیرلانان یومورق اولدو آتیلان تپیك. مامورلار اوزومه بیبرلی اسپری فیشقیراندا اؤزومه گلدیم. یولدان گئچنلر، دؤرد فارسین بیر یاشلی توركله ووروشدوغونوگؤرونجه ساواشا قاتیشاراق گنج لری دؤیوب پرشیانی دارما- داغین ائتمیشدیلر. بیزی پولیس ایداره سینه آپاردیلار.گتیرمزلیك دن پولیس ایداره سی نین رئیسی، روستم و گنج لرله همشهری چیخدی! نه باشیزی آغریدیم. پولیس ایداره سینده حلل اولا بیلن پرونده نی، "بو موضویا یئتیشمك بیزیم صلاحیبتیمیزده دئییل" دئیه آدی یوخ ایداره سینه گؤندردیلر....

مش اسماعیل  یئنه سیگار آلیشدیردی. قوناقلارین بیری دؤزمه ییب، " اورادا نه اولدو؟" دئیه سوروشدو. مش اسماعیل توستونو بورنون دلیكلریندن ائیشیگه بورولایاراق سؤزونون آردینی توتدو:

-         هئچ اورادا پوخو قویدوق سبده. مملكتده، توركلرله فارسلارین آراسینی وورماق ، ایغتیشاش سالماق گوناهینی، بیلدیگیز كیمی بوینوما قویدولار، خولاصه پان توركیست دئییلن شئیین كوت - شالوارینی اگنیمه بیچدیلر. یولداشلار ساغ اولسونلار اونلارین كؤمگی ایله ضامینه بوراخیلدیم. پرونده نی دادیگاها گؤنده ره جكلر. گؤره ك دادیگاه نه حوكم وئریر. هله هله گؤزله ملی ییك...

واخت گئچمیشدی. قوناقلار آیاغا قالخیب دیل-آغیز ائده رك مش اسماعیل لا ساغ اوللاشدیلار. هامیدان سونرا من چیخدیم . قاپی آغزیندا مش اسماعیل دان سوروشدوم:

-         مش اسماعیل بو آرادا گوناهلی كیمدیر؛ نییه باشیمیزا بو اویونلار گلیر؟

مش اسماعیل الینی چیگنیمه قویوب گولومسه یرك دئدی:

-         گوناهلارین هامیسی سازمانی میللین بوینونا دیر! چومچه قازانا دگنده بو كؤپك اوغلولار تئز بیر قطعنامه چیخاردیرلار آنجاق نئچه مین ایللیك ایران - توران ساواشینا بیرجه دنه  بئله اولسون قطعنامه صادیر ائله مه ییب لر هم بیزیم جانیمیز قورتولسون هم بو فارسلارین!

1391/1/14





    بؤلوم: حیكایه و گولمه‌جه‌لر
گؤروشلر : 0
تاريخ : پنجشنبه 3 فروردین 1391 | یازار : دوکتور جئری
+0 به‌ین

 بایرام  قوناقلاری

دوكتور جئری

 

دؤولتی پورتاغال!

اوشاقلاری نین هئچ یامان اؤیرنمه سینی ایسته مه ین بیر آنا، اوغلونو بازارا گؤندرمیش. بو سیرادا، بلدیه مامورلاری ایله ال آراباسی اوستونده آیین- اویون ساتانلارین آراسیندا توققوشما چیخیب رنگلی- رنگلی یامانلار آلیش وئریش اولموش.اوغول ائوه دؤنونجه آناسیندان سوروشموش:

-         آنا ...یك  نه دئمك دیر؟

آناسی :- پورتاغال اوغلوم پورتاغال !  - دئمیش.

بایرام اولموش.قوناقلارین باشی آچیلمیش. آنا اوغلونا :- اوغلوم دور قوناقلاریمیزا میوه توت – دئمیش. اوغلان ، میوه قابینی قوناقلارین قاباغیندا توتاراق:

-         دؤولتی ...یك لردن یئین ، همی شیرین همی  سولودورلار!

اخلاقی سونوج: بو  ایل "دؤولت قیمت لره نظارت ائده جك" وعده سیله میللته یاخشی پورتاغال ووردو!  

 

شور گؤز قوناق!

بایرام قوناغی گئدندن سونرا، آرواد حیرصله اریندن سوروشموش:

-         بو گلن كیم ایدی؟ آز قالیردی گؤزلری ایله آنامی یئسین؟

كیشی گولومسه یرك:

-         عتیقه چی دوستوم ایدی!- دئمیش

 

قیمت لره نظارت

بایرام قوناغی پوسته لره ال اوزادینجا، ائو یییه سی:

-         پوسته اوتوز مین اولدو، آللاه دؤولتدن راضی اولسون نظارتی اولماسایدی قیرخ مینه ده آلا بیلمزدیم- دئمیش.

قوناق پوسته لردن بیر سیخیم گؤتوره رك اونایلامیش:

-         هه ! آللاه دؤولتدن راضی اولسون ، اون مین وئردیم تاكسی منه بورایا گتیردی. نظارتی اولماسایدی اون بئش مینه ده گله بیلمزدیم.

 

امكلی وئرن بایراملیغین صیفرلرینی سایمازلار!

7 یاشلی نوه ، بایراملیق آلاركن بیر پولا بیر77 یاشلی بؤیوك باباسینا باخیب دئمیش:

-         بؤیوك بابا ، ائله بیل تورم دن خبریز یوخدور!

بؤیوك بابا  نوه سی نین باشینی تومارلایاراق :

-         اوغلوم، منیم خبریم وار ائله بیل دؤولتین خبری یوخدور!

 

ایبیشین بایرام گؤروشو

میللت وكیلی ایبیش بایرام گؤروشو اوچون داناباش كندینه گئدیب گئجه نی یولداشی قیبیش گیلده قالمالی اولور. گئجه یاریسی توالئته گئدملی اولان ایبیش، قاپی آغزینداكی كؤپكی گؤرونجه اوتاغا دؤنوب گولو تورپاغی ایله چیخارداراق گولدانین تركینه  سیچیر .

اون بئش گون سونرا ایبیش تهراندان قیبیشا تئلفون آچاراق حالینی سورشماق ایسته ییر. قیبیش حیرصلی-حیرصلی :

-         كئف احوالی بوراخ، دئ گؤروم هارا سیچمیسان،سن گئدندن، گونده ائوین بوتون اثاثلارینی ایئشیگه تؤكوب یویوب آرتیلاییریق گئنه پوخون ایگی كسیلمیر!

 

یئنی مودئل ار

ایبیشین باجیسی، هر ایل باشی ائوی نین بوتون اثاثلارینی دگیشدیریب یئنی موداسینی آلاردی. بایرامدان بایراما باجی گؤروشونه گئدن ایبیش بو كره یانیلیب قونشونون زنگینی باسیر. قاپی آچیلیب كوركن لری نین یئرینه غریبه بیر كیشی ائشیگه چیخیر. ایبیش بارماغینی دیشله یرك دئییر:

-         آمان آللاهیم ، باجیم بو ایل ارینی ده دگیشیب!  

 

بایرام قوناقلاری

اوشاق بایرام قوناغیندان سوروشور:

-         باغیشلایین سیز هاچان گئده جك سیز؟

-         نئجه مگر؟!

-         هئچ،  آنام دئییر قوناق گئدندن سونرا شامیمیزی یئیه جه ییك .

 



آچار سؤزلر : بایرام,

    بؤلوم: حیكایه و گولمه‌جه‌لر
گؤروشلر : 0
تاريخ : پنجشنبه 25 اسفند 1390 | یازار : دوکتور جئری
+0 به‌ین

كال یاز

دوكتور جئری

 

دام دیواری یام یاشیل بویاتدیرمالی یام

قوندارا یاز گولونو حیطین باغچاسینا اكمه لی یم

قوخو فیسقیرسام نه دوغال!

چیلتیك چالالی اوخویان بولبول لر وار

بیرینی آلمالی یام

بیر آغاج

بیر گونش

بیر حوووض

دیوارین اگینه سالمالی یام

بالیغی قیرمیزی..

 بیلیرم

توپ گوجونه یاز گله جك

بایرامی قارالتی لارلا قوجاقلاشمالی یام

داریخما سنده منیم اورمو گؤلوم!

گؤروشونه گؤزلوكله گله جگم

گؤیونو آلمالی یام...





    بؤلوم: ساتیریك شئعیرلر
گؤروشلر : 0
تاريخ : پنجشنبه 25 اسفند 1390 | یازار : دوکتور جئری
+0 به‌ین

بایراملیق

جیزما-قاراچی : دوكتور جئری

 

بایرام گلیر یاز گلیر

گئدیر چوخدور آز گلیر

فیشلر ائوده قالانیب

برق گئتمه میش گاز گلیر.

 

بایرام گلیر یاز گلیر

نغمه گلیر ساز گلیر

من تئللینی گؤزلورم

كئچل گئدیر داز گلیر.

 

قووالادی یاز قیشی

بیتدی سویوق قار  ایشی

گؤردوك بیزده بایرامی

اوزو قارا گاز فیشی

 

بایرام گلیر عار گلیر

سازلار سوسور تار گلیر

ایمداد دونو گئندیرسه

دونیا منه دار گلیر

 

بایرام گلیر  یالاندی

بورج بوغازا دایاندی

آلدیغیم یئر- یئمیشلر

اوچ ساییدا تالاندی

 

تدبیرلی اولاجاغام

بیر چانتا آلاجاغام

مشه بایرام گلمه دن

مشده قاچاجاغام

 

یاشی گؤزدن ساچام من

دردی كیمه آچام من

بو بایرامین الیندن

هارالارا قاچام  من

 

یاز گلدی گؤروشه لیم

دردلری بؤلوشه لیم

توركون  دیلی كسیلیب

گل یالنیز اؤپوشه لیم

1389/12/26





    بؤلوم: ساتیریك شئعیرلر
گؤروشلر : 0
تاريخ : دوشنبه 22 اسفند 1390 | یازار : دوکتور جئری
+0 به‌ین

آدم- ین گونده لیكلری

یازان : مارك تواین

كؤچورن : دوكتور جئری

 

  بیرینجی بؤلوم 

  اویاندیغیمدا یالقیز دئییلدیم آرتیق. اوزون ساچلی بیر یاراتیق تاپیلمیشدی یانیمدا. 

سود گونو

  او درین یوخویا  دالدیغیم سیرادا باشیما بیر اویونلار گلمیش اولمالی. كؤكسومون سول یانینداكی یارا ایزیندن آنلاییرام بونو. آغری – ماغری یوخدور آنجاق یئنی یاراتیغین داها ایلك اورتایا چیخیشییلا بئله  بیر یارا ایزی بوراخماسی، موتلو اولایلاری گؤزله مه جگیمی گؤستریر.

  دوز گونو

.............

آردیندا اوخویون


آردینی اوخو/Ardını oxu


    بؤلوم: حیكایه و گولمه‌جه‌لر
گؤروشلر : 0
تاريخ : پنجشنبه 18 اسفند 1390 | یازار : دوکتور جئری
+0 به‌ین

نه پیس نه یاخشی!

دوكتور جئری

 

كوچه ده گئدیردیم بیری آرخادان سسله دی.

-         دوكتور.. دوكتور!

دؤنونجه، اسكی قونشوموز پروفسور نصرالدینی گؤردوم. " آللاه ائله سین سحرین بو واختیندا بورج-مورج ایسته مه سین " – گئچدی اورگیمدن،

-          اوووه .. خوش گؤردوك نصرالدین بیگ! هارالاردان بئله؟- دئدیم.

-         واللاه دوزونو ایسته سن بیرینی آختاریدیم بیرآز دردله شم سنی گؤردوم- دئدی.

بیر قهوه خانایا گئچیب اَیلشدیك. پروفسور گؤزونو قاباغینداكی چایا زیلله یرك سؤزه باشلادی:

-         گئچنلرده یاز گلیر دئیه ائوین بوتون اسكیمیش اثاثلارینی ائشیگه تؤكوب تزه سینی آلدیم

دئدیم : نه یاخشی!

دئدی: یاخشی دا دئمك اولماز، چونكو آتامی دا قوجالار ائوینه گؤندریم.

دئدیم : نه پیس!

دئدی: پیس ده اولسا عوضینده تزه بیر آرواد آلدیم!

دئدیم: نه یاخشی!

دئدی: یاخشی ایدی آمما ننه سینی ده اؤزو ایله بیرگه ائویمه گتیردی.

دئدیم : نه پیس!

دئدی: پیس ده دئییلدی چونكو آیدا رحمتلیك اری نین بیر میلیون تومن حوقوقونو آلیردی.

دئدیم : نه یاخشی!

دئدی: یاخشیلیغی باشینا دگسین! قیتمیرین بیری ایدی قیران خرجله میردی!

دئدیم : نه پیس!

دئدی: پیس ده اولسا گئدیب آتامی قوجالار ائویندن چیخاردیب اونونلا ائولندی.

دئدیم : نه یاخشی!

دئدی : یاخشی اولدو آمما، ***الاماغا ائو تاپمایینجا گلیب منیم ائویمه یئرلشدیلر.

دئدیم : نه پیس!

دئدی: پیس اولسادا یئنه آتاملا بیرلیكده اولدوق.

دئدیم : نه یاخشی !

دئدی: یاخشی دا اولمادی ؛ آتاملا آروادیم یولا گئتمه ییب گونده داوا – دالاش ائدیردیلر. آروادیم دا آتامین اوزوندن كبینینی ایجرایا قویوب حیطیمی الیمدن چیخارداراق بیزی ائشیگه اؤتوردو.

دئدیم : نه پیس!

دئدی: پیس اولسادا  ، آللاه عوضینده سن كیمی یاخشی دوستلاری مندن اسیرگه مه ییب .

دئدیم : نه یاخشی!

دئدی: البتته یاخشی دیر دوكتور! ایجازه وئرسز ائو ***ایه ائده نه دك  آتام، آتامین آروادی  و من بیر نئچه گون سیزه قوناق اولاق !

ایسته دیم  دئیم،" نه پیس!"  دیلیم دیشیمه دولاشیب قند بوغازیما آتلاندی...





    بؤلوم: حیكایه و گولمه‌جه‌لر
گؤروشلر : 0
تاريخ : جمعه 12 اسفند 1390 | یازار : دوکتور جئری
+0 به‌ین

كؤپك اوغلولار ایبیشی مجلیسه گؤندردیلر!

دوكتور جئری

 

كؤپك اوغلولار ایبیشی مجلیسه گؤندردیلر!

صاندیقلار، داناباش كندی نین  والی لیگینه  توپلانیب رای لر ساییلماق اوزه ره ایدی. میللت وكیلی آدایلاری سیرا ایله اوتوروب جینقیرلارینی بئله چیخارتمیردیلار. سولوقلار سینه لرده گیزلنمیشدی. بیرینجی صاندیق آچیلدی. سایان بیرینجی رایی چیخاردیب آدایلارا  گؤسته ره رك اوخودو:

-         خودوش!

ایكینجی ، اوچونجو و دؤردونجو رای لرده اوخوندو:

-         خودوش!

ایبیشین رنگی قاچدی . دیل دوداغینی گمیرمگه باشلادی. آز قالا آرانی قاتاجاقدی. بئشینجی رای اوخوندو:

-         كؤپك اوغلو!

ایبیش صندلیندن دیكلنیب سئوینجله:

-         منی دئییر...- دئدی.

خودوش داشلاندی.

-         بو اولا بیلمز...

-         نئجه اولا بیلمز ، اولمایا سن كؤپك اوغلوسان؟!

خودوش، " یوخ " دئیه سوسدو. بو كز كؤپك اوغلولار سیرایا دوزولدو. ایبیشین چیچگی چاتلاماقدا ایدی. كؤپك اوغلولارین آراسیندا هردن آت اوغروسو ، فیریلداقچی، یالانچی، بویاقچی ، قیدی، اینك، كوچو- كوچو كیمی آدلار چیخسادا ایبیش آیاغا قالخیب  وار گوجو ایله حاققینی ساوونوردو.

ساییملار سونا ائردی. ایبیش رای لرین یوزده دوخسانینی باشاریلا قازانمیشدی. ایكی نفر خودوشون قولتوغونون آلتینا گیریب اونو ائشیگه چیخارتدیلار. او باییلمیشدی...

 

ایبیش مجلیس یولوندا

سئچكی لری قازانان ایبیش ، ساییملاردان سونرا اؤزونه دوموك اولوب چوخ آز گؤرونوب قونوشوردو.  چوخلو یالوار یاخارلاردان سونرا خبر آژانس لاریندان، تكجه جئری نیوزا بیر نئچه دقیقه واخت آییرا بیلدی.

جئری نیوز:- داناباش خالقی دئییر، ایبیشین ائششگی كؤرپودن گئچیب اونا گؤره كیمسه نی سایمیر. بو دوغرودور؟

ایبیش پچیلداییر:- یوخ!

جئری نیوز:- سیز دونننه دك قجله بئینی یئنلر كیمی گور- گور اؤتوردوز، ایندی نییه سسیز چیخمیر؟

ایبیش:- من بوتون فریادلاریمی ساخلامیشام مجلیسه گئدندن سونرا آمریكانین باشینا چكم . بونا گؤره ایندی دن سسده قناعت ائدیرم.

جئری نیوز: - سیز سئچكی لردن قاباق سؤز وئرمیشدیز سئچیلسز، گونده مجلیسده ایستیكبار جهانی نین آغزینا یومورق ووراسیز؛ ایندی سؤزوزون اوستونده سیز؟

ایبیش: - بیلدیر یوخ اینیشیل ، بیر توققوشمادا یوموروغوم خودوشون آغزینا دگیب  اوچ میلیون تومن دیه وئرمه لی اولدوم. بو اوزدن ایستیكباری جهانی نین آغزینا یوموروق آتمانین خرجی اولماسا من حاضیرام هر سحر آخشام بو ایشی گؤره م... آنجاق  خرجی اولسا سیز بونو منیم تبلیغاتی شوعارلاریمین حئسابینا قویون...

جئری نیوز: - سیز.....

ایبیش :- باغیشلایین ، واختیز قورتولدو؛ من گره ك ییغ- ییغیش ائله یم. دؤرد ایل سونرا گلیب سیزی گؤرمه سم حاققیزی حالال ائدین.

جئری نیوز:- حالال خوشوز اولسون!

 

ایمامزادا صاندیق!

موللانصرالدین والی لیگه گئدیب باشینی رای صاندیغینا دایایاراق یالوار- یاخارلا،" یا ایمامزادا صاحیبی" دئیه حاجت ایسته ییردی.

اورداكیلار:- موللا ، یانلیش گلیب سن؛ ایمامزاده بیر خیابان آشاغیدادیر!- دئدیلر.

موللا گؤزلری نین یاشینی قولو ایله سیله رك دئدی:

-         سیز یانیلیرسیز؛ گئرچك ایمامزادا بوراسی دیر!  بو بؤیوكلوكده مؤجوزه نی گؤرمورسوز؟ خودوشو سالمیشیق بورایا ایبیش چیخیب دی!

 

داناباشین فرماندارلاری!

ایبیش سئچكی لری قازانینجا ، ایكی نفر تبلیغاتچیسی دعاوا- دالاش ائده- ائده اونون قاپیسینا گئدیریلر.

ایكیسی بیردن : - آغایی ایبیش ! اؤزون دئمه دین چیخسان منی داناباشین فرمانداری ائده جكسن؟

ایبیش گولومسه یرك دئدی :

-         بو مسئله نی اؤزوز بیر جوره یولونا قویون ؛ او بیری فرماندارلاریم گلسه لر سیزه فرمانداری نین آبدارخاناسیندا دا یئر قالمایاجاق!





    بؤلوم: حیكایه و گولمه‌جه‌لر
یارپاق لار: [1] [..] [21] [22] [23] [24] [25] [..] [26]
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :