+0 به‌ین
جهنمین سولطانی
دوکتور جئری
قیامت گونو ایدی. اسرافیل دودوگونو سولوق آلمادان چالیردی. قبیرلردن قالخان اینسانلار چاش-باش اویان-بویانا قاچیردیلار. توز-دومان گؤیه قالخمیشدی. جبرائیل ایله مکائیل دگنک‌لرینی گؤیده فیرلاداراق خالقی قویون سوروسو کیمی سورغو ملگینین داخماسی‌نین قاباغینا توپلاماغا چالیشردیلار. کئفلی ایسکندر برک-برک قولومدان یاپیشمیشدی. جاماعاتین دالغاسی بیزی بیر چؤپ کیمی سورغو ملگینین داخماسی‌نین قاپیسینا آپاردی. داخمادان هئیوره بیر یاراتیق چیخیب انسه‌میزدن یاپیشاراق بیزی ایچرییه تولازلادی. گؤزلریمیز قارانلیغا اؤیره‌نینجه اؤزوموزو سورغو ملگینین قارشیسیندا گؤردوک. اوزون ساققالی بیر کیشی ایدی. قالین بیر دفتری قاباغینا قویوب واراقلاییردی. تاواندان یئکه بیر تزه‌زی آسلانمیشدی. ملک گؤزومه تانیش کیمی گلدی. یاخشی دوشوندوکده اورگیم آچلیدی. دیرسگیمله کئفلی ایسکندرین بؤیروندن ووراراق پیچیلدادیم:
- بو کی بیزیم قلئیچی مورتوض‌دور!
کئفلی ایسکندر جیبیندن گؤزلوگونو چیخاردیب گؤزلرینه تاخاراق:
- اوغول قلئیچی مورتوض سنسن؟.. خالان سالام یئتیریردی..-دئدی.
سورغو ملگی باشینی دفتردن قووزاییب قیزغین-قیزغین بیزه باخدی:
- قلئیچی مورتوض داها کیمدیر؟ منیم آدیم غیظعلی ملک دیر.. بونلارا باخ ..یئتیشمه‌میش پارت‌بازلیق فیکرینده‌دیرلر!..
کئفلی ایسکندر باشینی آشاغی سالدی. تیر-تیر تیتره‌ییردی. سورغو ملگی اؤفکه ایله مؤحکم دفتری بوکدو. توز گؤیه قالخدی:
- ایکیزده جهنم‌لیک‌سیز!!
ال-آیاغا دوشدوم:
- غیظعلی آغا سنی بالالارین جانی.. او دفتره یاخشی باخ.. واللاه.. بیلاه بیز گوناه ائله‌مه‌میشیک!
قیشقیردی:
- نئجه یعنی گوناه ائله‌مه‌میسیز.. دده‌لیگیمه ... چاشدیم.. شیخ آغایا قارا یاخانلار ائله بیل سیز دئییلدیز؟!
سوچوموزو آنلایینجا چاره‌سیزلیکدن غیظعلی‌نین آیاق‌لارینا دوشوب یالوار-یاخارماغا باشلادیق. هاندان-گئجدن غیظعلی یوموشانان کیمی اولدو:
- آیاغا قالخین..
آیاغ قالخیب الیمیزین ترسی ایله گؤز یاشلاریمیزی سیلدیک.
- گؤرونور ائله‌دیگیز گوناه‌لاردان پئشمان اولموسوز.. بونا گؤره سیزه بیر درجه تخیف وئریرم. جهنمیزی اؤزوز سئچین...
بیزیم ایکی جوره جهنم‌میمیز وار: ایرانی جهنم، خاریجی جهنم. هانسینا ایسته‌سز گئده بیلرسیز.
کئفلی ایسکندر دیلی توتار-توماز سوروشدو:
- بونلارین فرقی ندیر؟
گولدو:
- ایرانی جهنمده گونده-گونده بوغازیزا قیر تؤکه‌جکلر آنجاق خاریجی جهنمده هفته‌ده بیر گون !
من تئز اورتایا آتلاندیم:
- من..من.. خاریجی جهنمه گئدیرم!
کئفلی ایسکندر بیرآز دوشونجه دالدیقدان سونرا دئدی:
- یوووخ.. منیم میلی عیرقیم وار..من ایرانی جهنمی ترجیح ائدیرم...
***
آلتی آی ایدی خاریجی جهنمده ایدیم. بو سوره‌ده، آخسامادان هر هفته‌باشی جهنّم‌ین مأمورلاری گلیب قاپی آغزیندا قیر سهمیه‌می دؤولتی قیمتله بوغازیما تؤکوردولر.
گونلرین بیر گونو بئینیمه ووردو، گئدیم کئفلی ایسکندری گؤروم. یاریم ساعاتا ایداری ایشلریم یئربه یئر اولدو دا من ایرانی جهنمه یوللاندیم. چوخلو آختاریشدان سونرا ائوینی تاپدیم. زنگی چالدیقدا قولو آچیق کؤینکله گلیب قاپینی اوزومه آچدی. اؤنجه بیله‌سینی تانیمادیم. قیافه‌سی بوسبوتون دگیشمیشدی؛ جانینا آغ ات گلیب، یاناق‌لاری قیزیل آلما کیمی یانیردی!
اؤپوشوب-گؤروشوب ایچرییه گئچدیکده شوخلوقجا دئدیم:
- ایسکندر بگ ائله بیل بورادا بیله‌نه چوخ دا پیس گئچمیر ها؟!
گولومسوندو:
- دوزونو ایسته‌سن هه!.. بورادا ائویم وار، ایشیم وار، بیمه‌م وار...
سؤزونو کسدیم:
- جزا نه جوردور؟.. گونده-گونده بوغازینا قیر تؤکورلر؟
یوخ دئیه باشینی ترپه‌ده‌رک آرتیردی :
- من ایرانی جهنمه گلمه‌میشدن ایکی گون قاباق، دئییرلر؛ قیر سولطانی آدلی بیر حاج آغانی بورایا گتیرمیشلر. آنلادیغیما گؤره او گلندن بورادا قیر تاپیلمیر!
بؤلوم: حیكایه و گولمه‌جه‌لر
+0 به‌ین
بیزده قارادریلی‌ییک!
دوکتور جئری
جومعه آخشامی ایدی. شیخ آغانین گؤروشونه گئتمگه حاضیرلاشماقدایدیم ائوین زنگ چالیندی. قاپینی آچدیقدا، یئریمده قورویوب قالدیم. آستانادا بیر قارادریلی کیشی دایانمیشدی. اؤز- اؤزومه دئدیم،" اولمایا بو قارادریلی ترامپ‌ین سویچو سیاست‌لریندن قاچاراق بیزه سیغیماق ایسته‌ییر؟!". کیشی منیم هوروت-هوروت باخدیغیمی گؤرونجه دیله گلدی:
- تئز اول، یولداشلار کوچه آغزیندا گؤزله‌ییرلر.. گئج قالمیشیق..
کیشی دانیشینجا اونو تانیدیم. بیزیم اوستاد دفتری ایدی. چاشقین- چاشقین سوروشدوم:
- اشی!.. نییه به اوزونو قارا بویامیسان؟!
آجی- آجی گولدو:
-مگر ائشیتمه‌میسن آمریکادا یاشانان اولایلارا گؤره دونن شیخ آغا چیخیشیندا ترامپ‌ین راسیستی و شئونیستی سیاست‌لرینی قینایاراق قارادریلی‌لره معنوی دستک وئریب.بو اوزدن بیزده اوزوموز قارا بویامیشیق بلکه آغا بیزی ده قارادریلی سانیب، آنادیلینده بیرجه مکتبی اولمایان قیرخ میلیون تورکون هارایینا چاتا...
تله‌سیک ایچرییه دؤنونجه اوستادی دفتری سسلندی:
- به هارا گئدیرسن؟ گئج اولدو..
- بیر دقیقه گؤزله، من ده اوزومو قارالاییم...
بؤلوم: آجی گولوش‌لر
+0 به‌ین
باشقا یول
دوکتور جئری
ایندی‌یه‌دک
اوستاد دفترینی بئله اؤفکه‌لی گؤرمه‌میشدیم. باغیر-باغیر باغیریردی:
- دوخسان نئچه ایلدیر کیملیگیمیزی دانیرسیز..
وارلیغیمیزی دانیرسیز.. آدیمیزی، دیلیمیزی، تاریخیمیزی دانیرسیز.. اعتراض ائله‌ینلره قارا
یاخیب سیرادان چیخاردیرسیز..آرتیق پیچاق سوموگوموزه دایانیب.. آییریلماقدان باشقا
بیزه آیری یول قالماییب...
اوستاد فرهیخته بیر بوجاغا قیسیلمیشدی. بدنی تیر-تیر تیتره‌ییردی...
اوستاد
فرهیخته، فارسی دیلی و ادبیاتی موعلیمی‌دیر. اصلیتی تهرانلی‌دیر آنجاق بیزیم شهرده
قالدیغیندان تورکجه‌نی سینیق-سالخاق اولاراق دانیشا بیلر. نئچه ایل بوندان قاباق
اونونلا شهرین ادبی درنگینده تانیش اولدوق. اؤلکه‌نین رسمی دیلی کیمی، اؤزونو بیزه
تحمیل ائده‌رک دوستوموز اولدو. او، یاخشی آدام‌دیر تکی بیر عیبی وار: ایراندا هرنه‌یی
فارس گؤرور!
گئچن
هفته یولداشلاری قوناق چاغیرمیشدیم. دئییب، گولوب، دانیشیردیق؛ هردن ده چئشیدلی قونولارا
گؤره فیکیر آلیش-وئریشی ائدیردیک. اوستاد دفتری ایله اوستاد فرهیخته بیر قیراغا چکیلیب
هر واختکی کیمی دارتیشیردیلار. گؤزومون اوجو ایله اونلارا باخدیم. اوستاد دفتری بتر بارماغینی
سیلکه‌له‌ییردی. بیرآز نیگران اولدوم. نیگرانچیلیغیم یئرسیز دئییلدی بیردن اوستاد
دفتری باغیر-باغیر باغیرماغا باشلادی...
***
اوستاد دفتری ایله اوستاد فرهیخته‌نی باریشدیرماق ایسته‌ییردیم.آخشام ائل باغیندا قرار قویموشدوم. اوستاد دفتری هله گلمه‌میشدی.
بیرآز اوستاد فرهیخته‌نی دانلادیم:
- أشی ال چکین بو سؤزلریزدن... فارس..فارس..فارس!
سیز بوتون ایرانی فارس گؤرورسوز! بئله ده ایش اولا بیلر؟ ایراندا تورک وار..عرب
وار..بلوچ وار..
اوستاد دفتری باشی ایله سؤزلریمی دوغرولادی.
پئشمانلیق گؤزلریندن اوخونوردو. نسه دئمک ایسته‌ییردیم اوستاد دفتری تاپلیب گلدی.
اوستاد فرهیخته آیاغا قالخیب اوستاد دفترینی قوجاقلایاراق دئدی:
- آه.. آذری برادریم منی عفو ائله...
اوستاد دفتری دارتینیب اؤزونو اوستاد فرهیخته‌نین
قوللاری‌نین آراسیندان چیخارداراق منه اؤفکه‌لندی:
- گؤردون!..ایندی گره‌ک حتماً بونلاردان آیریلاق!!
بؤلوم: حیكایه و گولمه‌جه‌لر
+0 به‌ین
ایسلام خطرده دئییل!
دوکتور جئری
آللاه حؤکومتدن راضی اولسون، گئنه مجلیس سئچکیلرینی علم ائله‌دی یوخسا لاپ داریخمادان پارتلایاجاق ایدیک! گئچن هفته‌یه‌دک ایشیمیز بو اولموشدو؛ مشه نیظامین قهوه‌خاسینا گئدیب سامانی چایلاریندان ایچه‌رک یازین گلمه‌سینی، شهرده فهله‌لیگین چیخماسینی گؤزله‌یک؛ آنجاق ایندی نئچه گوندور یولوموزو کندین مچیدینه اگمیشیک. ندنی ده مجلیس سئچکیلرینه آدای اولان نوماینده‌لرین، کندیمیزه تؤکولوشمه‌سی‌دیر. آللاه حؤکومت ایله آدایلارا اوزون عؤمور وئرسین، ایندی رنگلی چای ایله شیرنی قاباغیمیزدان اسکیک اولمور، آرا-سیرا ساندویج ده خالقین آراسیندا پایلاییرلار. هله آدایلارین بیری سؤز وئریب جومعه آخشامی گونو دده‌سی نین احسانینا مچیدده کاباب وئره‌جکدیر.
دونن آخشام ، مجلیس سئچکیلری آدایلاریندان ، جناب وکیل‌زاده ، باشلاریندا شیرنی خونو گؤتورن ییرمی بئش نفرین ائشلیگینده مچیده وارید اولدو. ترس‌آوالیلار دریندن جوشقولاندیلار. دوغرودان دا کندلیلر کاتتانین اوغلونون تویوندان، بو قدر خوْن گؤرمه‌میشدیلر. جناب وکیل‌زاده میکروفونون دالینا گئچیب قاباقکی مجلیس نوماینده‌سی‌نین پوخ-سودوگونو ائشیگه تؤکندن سونرا دئدی:
- حؤرمتلی ترس آوالیلار! بوگون اینتیخاباتدا شیرکت ائله‌مک بیر وظیفه‌یی شرعی‌دیر. بؤیوک دوشمن آمریکا جنگی گمیلرینی گتیریب بؤیروموزه دایاییب. ایسلام خطرده دیر...
جناب وکیل‌زاده‌نین سؤزلری‌نین بوراسیندا، جاماعاتین آراسیندان قلئیچی مورتوض آیاغا قالخیب بارماغی ایله مینبرین دیبینده اوتوران کاتتا ایسلامی گؤسته‌ره‌رک اعتراض ائله دی:
- ایسلام هئچ ده خطرده دئییل، ماشالله بئش یوز قویونو وار!
بؤلوم: حیكایه و گولمه‌جه‌لر
+0 به‌ین
قورخمایین، هامیمیزین یئری جنّت‌دیر!
دوکتور جئری
قیامت گونو ایدی. میزان-تره‌زی قورولوب عمل‌لر دارتیلماقدا ایدی. اینسانلار صفده چوخ گؤزله‌مه‌سینلر دئیه، اوچ-اوچ حئساب-کیتاب ملگینین قارشیسیندا چیخیردیلار. سیرا بیزه یئتیشدی. ملک تره‌زی‌یه تکان وئردی. پیس عمل‌لریمیز آغیرلیق باسینجا، گؤزونون قیراغی ایله ایکی مأمورا ایشاره ائله‌دی:
- جهنّم‌لیک‌دیرلر، آپارین!
بو حؤکمدن قلئیچی مورتوضون رنگی قاچدی، کئفلی ایسکندرین دیزلری تیتره‌دی، منیم هوشوم باشیمدان چیخدی!
گؤزومو آچدیقدا گؤردوم؛ قلئیچی مورتوض اوزومه سو چیله‌ییر. کئفلی ایسکندر ایسه چیلتیک چالاراق شن بیر ماهنی اوخویور. اویان-بویانا باخدیم. اؤزومو اولدوقجا گؤزل بیر یئرده گؤردوم. چاشقین-چاشقین سوروشدوم:
- بیز هاراداییق؟!
- جنّت‌ده‌ییک!.. سانیرام، مأمورلار ملگین سؤزونو ترسه ائشدیب بیزی جهنّم یئرینه جنّته گتیریبلر- دئیه قلئیچی مورتوض یانیت وئردی.
کئفلی ایسکندر ماهنی اوخوماغینی کسدی:
- یوخ! ترسلیک اولماییب. منجه، ساتیراچی اولدوغوموزدان تانری دا بیزیمله ظارافات ائله‌مک ایسته‌میش!
یولداشلارین سؤزلری بئینیمه باتمادی. یئنه اویان-بویانا باخدیم. بیردن گؤزوم او یاخینلاردا گزن بیر گؤزتچی‌یه دوشدو. چاغیردیم:
- آی قارداش!..آی قارداش!.. بورا جنّت‌دیرمی؟
گؤزتچی بیزه یاخینلاشدی:
- سیز ده ایرانلی‌سینیزمی؟!
اوچوموز بیرگه سسلندیک:
- هه! سیز هارادان بیلدینیز؟!
گؤزتچی گولومسوندو:
- بورا جهنّم‌دیر آنجاق بیلمیرم نییه هر یئنی گلن ایرانلی بورانی جنّت سانیر؟!
بؤلوم: حیكایه و گولمه‌جه‌لر
+0 به‌ین
کوپی برابر اصل
خوجالی فاجیعه‌سی‌نین 27.نجی ایل دؤنومونده،ائرمنیستانین باش ناظیری نیکول پاشینیان ایراندا، رسمی سفرده اولوب. ایران طرفی‌نین سؤزچوسو دانیشیقلار سیراسیندا،" ما با شما اشتراکات فراوانی داریم! " دئینده، ائرمنی طرفی گولومسه‌یه‌رک دئییب:
- شکسته نفسی نفرمایید، شما عین ما هستید!
*
وئریلن خبره گؤره گؤروشلرین سونوندا، ائرمنیستانین باش ناظیری درین تشکورلرینی بیلدیرمک اوچون تاریخی آغدام جامع مسجدی‌نین شکیل‌لرینی ایران طرفینه هدیه وئریب:
بؤلوم: آجی گولوش‌لر
+0 به‌ین
اینقیلاب گولمه‌جه‌لری
دوکتور جئری
فرقی ندیر؟
اینقیلابین قیرخینجی ایل دؤنومونده، موخبیر گؤستریجیلرین آراسیندا قوجا بیر کیشی‌یه یاخینلاشیب سوروشدو:
- حاجی عمی! سورشا بیله‌رم شاه زامانی ایله ایندی‌نین نه فرقی وار؟
قوجا الینده‌کی بایراغی یئله‌ده‌رک دئدی:
- چوخ فرقی وار! شاه زامانی بیر عیدده، بیر عیدده‌نین وار-یوخو تالاییب قانلارینی شوشه‌یه توتوردولار...
موخبیر قوجانین سؤزونو کسدی:
- هه.. اینقیلابدان سونرا نه جور اولوب؟!
- ایندی تام ترسینه‌دیر!
***
کیشی‌نین باشی آغرییردی!
اینقیلابین ایل دؤنومو موناسیبتینه خسته‌خانالاردا خالقا پولسوز خیدمت وئرنده بیر کیشی دوکتورون یانینا گئدیر.
- هاران ٱغریییر؟-دئیه دوکتور سوروشور.
کیشی بیر آز فیکبرله‌شیب دئییر:
- دوکتور دوزونو ایسته‌سن بیلمیرم گؤزوم آغرییر یا قولاغیم!
دوکتور چاش-باش قالینجا کیشی آچیقلاییر:
- قیرخ ایلدیر، مسئوللاردان ائشیتدیگیم باشقا، گؤردوگوم باشقا!
***
تلویزون ایله یخچال
ییرمی ایکی بهمن گؤستریسیندن قاییداندا اوستاد دفتری دئینمگه باشلادی:
- تلویزیون گونده دؤولتین بازاردا، اوجوزلو ات داغیتدیغی خبرینی وئریر آنجاق آلتی آیدان چوخدور بیزیم یخچالدا اتدن خبر یوخدور!
اوزونتو ایله باشیمی توولادیم:
- مگر سن یخچالی، تلویزیونون پریزینه تاخمامیسان؟!
***
کیم اینقیلاب ائله‌دی؟
تئیمور آغانین قهوه‌خاناسیندا یولداشلارلا چایلاشماقدایدیق. سؤز-صؤحبت باهالیغا چکیلدی.هامی اوی بیرلیگی ایله باشلادیلار حؤکومتی تنقید ائتمگه. آتماجایلا دئدیم:
- بو سؤزلر ندیر دئییرسیز، اینقیلاب ائله‌ین بوکیمی چتینلیکلره دوزمه‌لی‌دیر؟!
بو سؤز آغزیمدان چیخار-چیخاماز یولداشلار،" من اینقیلاب ائله‌مه‌میشم " دئیه باشلادیلار دارتیشماغا. سونوندا کاسا-کوزه‌نی اوستاد دفتری‌نین باشیندا سیندیریب دئدیلر:
- بو اینقیلاب ائله‌ییب!
اوستاد دفتری نسه دئمه‌ییب باشینی آشاغی سالینجا قولاغینا پیچیلدادیم:
- اوستاد دوغرو دئییرلر؟
اوستاد دفتری باشینی توولادی:
- یوخ بابا!.. منیم دیواریم آلچاق‌دیر. ائوده ده هر کیم اوسدورسا، آتار منیم بوینوما!
بؤلوم: حیكایه و گولمه‌جه‌لر
+0 به‌ین
آفساید
دوکتور جئری
ایرانین برجام آنلاشماسیندان ایسته‌دیگی سونوجلاری الده ائده بیلمه‌مه‌سی‌نین ندنلرینی آراشدیردیقدا، اؤلکه سیاستچیلری‌نین فوتبال اویونونون قایدا-قانونلاری ایله تانیش اولماماسی اورتایا چیخیر. سیاست، فوتبال یاریشی کیمی بیر اویوندور. ایران سیاستچیلری 5+1 دانیشقلارینا باشلایاندا اؤزلری بو قونویا ایشاره ائده‌رک وورغولامیشدیلار:بو اویون بیر-بیر (یاخود اوتدو- اوتدو) نتیجه‌سی ایله سونوجلاناجاقدیر. [فوتبالدا بونا تبانی دئیرلر، فیفانین بوندان خبری اولسا تاخیملاری آغیر جزالارا محکوم ائدیب دده‌لرینی یاندیرار!] آنجاق یاریش گونو، آنلاشیلان کیمی، 5+1 ایلک دقیقه‌ده ایلک گولو ووروب سانتیریفیوژلاری سیرادان چیخاردیب اتم رئاکتورونا سیمان باساندا، ایران ایسه 90-نجی دقیقه‌ده مساوی گولو ووروب میللت اورتالیغا تؤکولوشوب شنلیک ائله‌ینده، سیاستچیلر سئوینجلریندن بیر باخمادیلار، قیراق‌داور "ایرانین گولو آفسایددیر" دئیه بایراغینی گؤیه قالدیریب!
بؤلوم: ساتیریک یازیلار
+0 به‌ین
یارانه‌نین مؤعجوزه‌سی
دوکتور جئری
کئچن آی اگری-بوروق ایداره‌سی‌نین باشچیسی یوز میلیارد تومن گؤتوروب کانادایا قاچاندا پولیس بیلدیردی:
- آی چیخمامیش سانیقی توتوقلاییب عدالت الینه تاپشیراجاغیق!
بو قیزیقلی خبرین آردینجا، آی باشی موخبیرلر پولیس ایداره‌سینه توپلاشیب سانیق حاققیندا سوروشدولار.
پولیس باشقانی آچیقلادی:
- سؤز وئردیگیمیز کیمی، سانیقی توتوقلاییب تورمه‌یه باسدیق!
موخبیرلر شاشقین-شاشقین:
- بو بیر مؤعجوزه‌دیر؟! سیز نئجه بو ایشی باجاردینیز؟!..- دئیه سوروشدولار.
پولیس باشقانی باشی ایله موخبیرلرین سؤزونو اونایلادی:
- دوغرودور بو بیر مؤعجوزه دیر! یارانه‌نین مؤعجوزه‌سی!!
- یارانه‌نین مؤعجوزه‌سی؟!!!
باشقان گولومسه‌دی:
- ائله‌دیر!.. بیز قاباقدان بیلیردیک، ایرانلیلار هر شئیدن واز گئچسه‌‌لر ده قیرخ بئش مین بئش یوز تومن یارانه‌لریندن واز گئچمه‌یه‌جکلر. بو اوزدن پوسقودا یاتدیق؛ سانیق اوغرونجا اؤلکه‌یه قاییدیب یارانه‌سینی آلاندا، خودپردازین قاباغیندا بیله‌سینی یاخالادیق.
موخبیرلرین بیری دیللندی:
- بئله ایسه، نییه ایکی آی بوندان قاباق اوچ مین میلیارد تومن گؤتوروب قاچانی توتوقلامادینیز؟!
باشقان اوزونتو ایله یانیتدا دئدی:
- تاسفله؛ بللی اولمایان ندنلره گؤره، دؤولت اونون یارانه‌سینی کسمیشدی!
بؤلوم: حیكایه و گولمه‌جه‌لر
+0 به‌ین
ایران میللتی آج دئییل!
دوکتور جئری
شئیخ آغا گون اورتا چاغی مسجیده گئدنده، تلویزیونون موخبیری قاباغینی کسدی:
- حاج آغا سیزدن بیر سورغو سوروشا بیله‌رم؟
شئیخ آغا باشی ایله "هه" دئدی.
- آمریکانین جومهور باشقانی دونالد ترامپ دئییب: ایران میللتی آجدیر. سیزین بو سؤزه گؤره فیکریز ندیر؟
شئیخ آغا قاش-قاباغینی ساللادی:
- ترامپ آنلاماییب بئله دئییب. آمریکانین میللتی آجدیر! بیزیم میللت لاپدا توخدور. هئچ یانا گئتمیرم، من ائله اؤزومو دئییرم. دونن مشدی خوجاوئردی‌نین دده‌سی‌نین قیرخی ایدی. ناهار دویونجا قئیمه‌پیلوو یئدیک، هله بیر قاپلامادا دولدوروب ائوه آپاردیم. آخشامی دا بزاز حاجی محمدعلی‌نین قیزی‌نین کبین کسمه‌سی ایدی. یئددی چئشید پیشمیش حاضیرلانمیشدی. یئریز بوش تپه-تیخلام یئدیک. قاییداندا دا یئکه بیر قاپلاما قولتوغوما وئردیلر. بوگون سحر نامازینی قیلدیقدان سونرا دا بیر آللاه بنده‌سی مسجیدده یاغلی چؤرک پایلادی. چوخ یئمه‌لی ایدی، بئش دنه یئدیم، یئددی-سککیز دنه ده ائوه آپاردیم...
موخبیر شئیخ آغانین سؤزلرینی کسدی:
- حاج آغا سیز همیشه خئیرده-شرده اولوب بیر تورلو قارنیزی دویورورسوز آمما میللتین دورومو بئله دئییل آخی!!
شئیخ آغا قاققاناق چکیب گولدو:
-هاهاها... رحمتلیگین اوغلو سن نه فیکر ائله‌ییرسن..میللتین دورمو بیزدن ده یاخشیراقدیر؟!
موخبیر چاش-باش اولدو:
- سیز هارادان بونو دئییرسیز؟!!
بو کز شئیخ آغا سوروشدو:
- سن بیلیرسن سوغانین کیلوسو نئچه مین تومندیر؟
- چوخ باهادیر.. اوچ مین، اوچ مین بئش یوز تومن..
- سن بیلیرسن سوغان نییه بو قدر باهادیر؟!
- ...
- بیلمیرسن من دئییم؛ سوغان بونا گؤره باهادیر، میللت بوللوجا سوغان آلیب یئییرلر ایشتاهلاری آچیلیسن آرتیقراق یئیه بیلسینلر!
موخبیر پرت اولدو:
- حاج آغا! میللتین چوخو آیدا بیر کیلو ات آلیب یئیه بیلمیر، سیز دئییرسیز: سوغان یئییرلر ایشتاهلاری آچیلسین؟!!
شئیخ آغا اگری- اگری موخبیره باخدی:
- نییه یئیه بیلمه‌سینلر؟.. دؤولت اوجوز اتی تؤکوب بازارا.. یئیه‌نه مینت!
- بئله ایسه، حاج آغا سیز آیدا نئچه کیلو ات یئییرسیز؟!
شئیخ آغا قاشلارینی چاتیب بیر آز سال-چیخدان سونرا دئدی:
- قیرخ کیلو، قیرخ بئش کیلو!
موخبیر شاشیردی:
- شوخلوق ائله‌ییرسیز؟!!
شئیخ آغا "یوخ" دئمک ایسته‌ینده، بیر گنج موتورنو اونلارین یاخینلیغیندا ساخلاییب" حاج آغا! حاج آغا! دا...می یئیه‌سن" دئیه‌رک باسدی گازا.
شئیخ آغا گولومسه‌دی:
- ملاحیظه بویوردوز..ائله ایکی یوز اللی قیرام بو!!
بؤلوم: حیكایه و گولمه‌جه‌لر
+0 به‌ین
خسته خانا نییه چؤکدو؟
دوکتور جئری
ایران، ژاپون، روس شیرکت‌لری‌نین ایش‌بیرلیگی ایله تیکلن یئنی خسته‌خانا، اؤلکه‌ده باش وئرن زلزله‌ده چؤکونجه، دؤولت طرفیندن بو قونودا سوروملو اولانلار اولای یئرینه چاغیریلدی. تیکینتی‌نین نقشه‌سینی چکن ژاپون مهندیسی ییخیلمیش خسته‌خانایا یئتیشینجه الینی اورگی‌نین اوستونه قویوب، " ائی وای آبیریم گئتدی"دئیه یئره ییخیلیب اؤلدو. خسته‌خانانین تیکیلیش خرجینی عؤهده‌سینه گؤتورن روس مهندیسی ایسه، گؤزو اوچونتویا ساتاشینجا الینی اورگی‌نین اوستونه قویوب،"ائی وای سرمایه‌م الدن گئتدی" دئیه یئره ییخیلیب اؤلدو. سیرا خسته‌خانین تیکیش ایجراچیسی ایران مهندیسینه گلینجه، اللرینی گؤیه قووزاییب دئدی:
- آللاه چوخ شوکور!.. نه یاخشی من خسته‌خانین تیکیشینده سیمان ایشلتمه‌میشدیم، یوخسا ایندی بو مهندیسلر کیمی الیمی اورگیمین اوستونه قویوب، "ائی وای سیمانلاریم الدن گئتدی" دئیه یئره ییخیلیب اؤله‌جکدیم.
بؤلوم: حیكایه و گولمه‌جه‌لر
+0 به‌ین
گروگان
دوکتور جئری
آغیر تیخاج ایدی. نه ایره‌لی‌یه گئتمک اولوردو، نه‌ده گئری قاییتماغا یول وار ایدی. یوزلر ماشین یانا-یانا، دال-دالا حرکت‌سیز دایانمیشدی. سیقناللارین سسی گئت گئده اوجالماقدا ایدی..
"روز شعر و ادب زبان فارسی (روز شعر و ادب ایران-ی سابیق!)" گونو اوستاد شهریاری آغیرلاماق اوچون "بنیاد ادب و هنر آذربایجان (فرهنگستان زبان ترکی-ی سابیق!)"-ا قوناق چاغیریلمیشدیم. ایندیسه بیر ساعاتدان چوخ ایدی تیخاجدا اللریمی فرمانا تاپدایاراق گؤزله‌ییردیم. آرتیق گئج قالمیشدیم. تؤرن ایندی باشلامیش اولمالی‌ایدی. کیسمه یولون نییه کسیلدیگینی بیلمیردی. بیردن گؤزوم قارشی طرفدن- ماشینلارین آراسیندان گلن بیر گنج اوغلانا ایلیشدی. ماشینین شوشه‌سینی ائندیریب اونو سسله‌دیم. اوغلان یاخینلاشینجا قاباقدا نه اولدوغونو سوروشدوم. اوغلان تؤوشو‌یه-تؤوشو‌یه دئدی:
- تئروریست‌لر یولون باشیندا، "فرهنگستان زبان فارسی" باشقانینی گروگان توتوبلار. اونلار دئییرلر یوز میلیون وئرمه‌سه‌لر بنزین تؤکوب باشقانی یاندیراجاقلار!
جوشغولاندیم:
- اورتالاما هر ماشینا نه قدر یئتیشر؟!.. وئره‌ک ده یولو آچسینلار.. خالقین ایشی-گوجو وار!...
گنج اوغلان بارماقلاری ایله گؤستره‌رک یانیتلادی:
- ایکی لیتر !!
بؤلوم: حیكایه و گولمه‌جه‌لر
+0 به‌ین
ایران خالقلاری‌نین گله‌جگی...
دوکتور جئری
کئچن جومعه آخشامی حضرت عزرائیل، کولتورل سوی‌قیرما معروض قالان ایران خالقلاری‌نین ایللیک ییغینجاغینا قاتیلاراق سورغولاری بیر-بیر یانتیلادی.
ایلک سوروشان عرب خالقی‌نین آغ‌ساققالی اولدو:
- حضرت عزرائیل! بیز خوزستان خالقی گونده-گونده باشیمیزا اله‌نن توز-تورپاقدان هاچان قورتولاجاغیق؟
عزرائیل گولومسوندو:
- اللی ایل سونرا.
عرب آغ‌ساققالی‌نین گؤزلرینده یاش حلقه‌لندی:
- نه یازیق من او گونو گؤرمه‌یه‌جه‌یم!
ایکینجی سورغونو بلوچ خالقی‌نین آغ‌ساققالی سوروشدو:
- بیز بلوچستان خالقی یوخسوللوقدان، فقردن هاچان قورتولاجاغیق؟
عزرائیل یئنه گولومسوندو:
- یوز ایل سونرا.
بیر دامجی یاش بلوچ آغ‌ساققالی‌نین گؤزوندن آخدی:
- نه یازیق من او گونو گؤرمه‌یه‌جه‌یم!
اوچونجو سورغونو سوروشان، آذربایجان کیملیکچی چالیشقانلارینا منسوب اولان بیر گنج ایدی:
- ایراندا یاشایان تورکلرین هاچان آنادیللرینده مدرسه‌لری اولاجاق؟
عزرائیل دولوقساندی سونرا بیردن اؤکوتمه ووروب آغلاماغا باشلادی. هامی چاش-باش بیربیری‌نین اوزونه باخدی. عزرائیل ایچینی چکه-چکه سیزیلدادی:
- نه یازیق من او گونو گؤرمه‌یه‌جه‌یم!!
بؤلوم: حیكایه و گولمه‌جه‌لر
+0 به‌ین
قلئیچی مورتوضون قویونو
دوکتور جئری
امنیت شوراسی‌نین ایران علئیهینه اولان تحریم‌لری باشلایاندان، قلئیچی مورتوض ایشینی الدن وئریب یوخسوللوغا-داریشلیغا دوشموشدو. اؤنجه‌لر، کوچه-بازاردان کاغیذ-کارتوْن ییغماقلا ائوینی بیر تورلو گئچیندیره بیلیردی آنجاق سون آیلاردا اللر چوخالدیقدا گونده‌لیک چؤره‌ک پولونو بئله، چتینلیکله چیخاردا بیلیردی. اومودونو هر یئردن اوزَن مورتوض، بیر گون جاماعات نامازیندان سونرا اؤزونو مچیدین موللاسی حاج آغا نیظاما یاناشدیریب سیزیلدایا-سیزیلدایا آغیر دوروموندان دانیشاراق اوندان یاردیم دیله‌دی. حاج آغا الینی مورتوض چیگنینه قویوب آتاجاسینا دئدی:
- اوغلوم! گوناهلارین هامیسی اؤزونده دیر! سن نییه بوشو- بوشونا شهرین کوچه-بازاریندا واختینی سورتوب زیبیل قابیلاری آختاریرسان؟! نییه اؤز کندیمیزده "اقتصاد مقاومتی"-یه باشلامیرسان؟!...
قلئیچی مورتوض حاج آغانین سؤزلرینی کسدی:
- حاج آغا اقتصاد مقاومتی نمنه‌دیر؟؟
حاج آغا نیظام ساققالینی تومارلاییب سؤزلرینه آیدینلیق وئردی:
- اقتصاد مقاومتی یعنی آزاجیق بیر سرمایه ایله بؤیوک بیر ایشی باشلایاسان!
- نئجه یعنی آغا!.. هئچ باشا دوشمورم؟ بیرآز بونو ایچ ائله‌یه بیلرسن؟ آخی منیم ساوادیم کسمیر!!
- باخ! میثال اوچون: سن باشلانیشدا ائله‌یه بیلرسن مثلا بیر قویون آلسان...
- آلدیم!
- قویون بئش آلتی آی سونرا بیر بالا دوغوب اولاجاق ایکی!
- اولدو ایکی!
- آلتی آی سونرا سنین قویونون‌لا بالاسی گئنه هره‌سی بیر بالا دوغوب اولاجاقلار دؤرد.
- اولدولار دؤرد!
- ایکینجی ایل سنین دؤرد قویونون اولاجاق سککیز سونرا اون آلتی، سونرا اوتوز ایکی...
- بو حئسابلا اوچ- دؤرد ایچینده یوز قیرخ- یوز اللی باش قویونا صاحاب اولوب بؤیوک بیر چودار اولاجاغام!
موللا گولومسه‌دی:
- نئجه دئییرسن ائله‌دیر!.. گؤردون یوخسوللوغون داشینی آتماق نه قدر راحاتدیر. بونا دئیرلر:اقتصاد مقاومتی!
سئوینجیدن قلئیچی مورتوضون چیچکلری چاتلاماقدا ایدی. حاج آغانین اللینی برکدن سیخیب آیاغا قالخدی آنجاق تئز کور-پئشمان یئره اوتوردو:
- آغا!..آخی منیم بیرجه دنه قویون آلماغا بئله پولوم یوخدور!
حاج آغا گوله-گوله جیبندن بیر تیکه کاغیذ چیخاردیب اوزه‌رینده نسه یازیقدان سونرا قلئیچی مورتوضا اوزاتدی:
- گئت شیخ‌الاسلام قرض الحسنه مؤسسه‌سیندن آز بهره‌لی بیر وام گؤتور..
قلئیچی مورتوض آغانین الینی اؤپه‌رک کاغیذی آلیب مچیددن چیخدی.
***
قلئیچی مورتوض قرض الحسنه وامینا قیسیر بیر قویون آلدی. ترس آوا کندی‌نین یوخاری باشیندا شیخ آغانین یاخشی بیر قوچو وار ایدی. بو قوچ هر قویونا آتلانیردی ائکیز بالا دوغوردو. قلئیچی مورتوض بونو ائشیتجک سئویجیندن قاناد چیخارتدی سانکی. بو حئسابلا اوچ- دؤرد ایلین ایچینده اوچ – دؤرد یوز قویونو اولاجاقدی!
قلئیچی مورتوض قویونو ال آراباسینا میندیریب یولا دوشدو. شیخ آغانین ائوینه چاتیب کئف- احوالدان سونرا دئدی:
- آغا!.. سیزین قوچوزون تعریفینی ائشیتدیم. قویونومو گتیردیم خیدمتلرینه!!
شیخ آغا، قلئیچینی ایچرییه بویور ائده‌رک دئدی:
- اوغلوم مورتوض! دوستلوغوموز، قوهوملوغوموز قالسین اویاندا، قوچون آتلانماغینا اون مین تومن گره‌ک وئره‌سن ها!!
قلئیچی مورتوض الینی گؤزونون اوستونه باسینجا شیخ آغا سؤزو باشقا یئره چکدی:
- اوغلوم مورتوض! دوغوشدان مشدی خانیم نئیله‌ییر؟! اونودا گتیره‌ردین بیر آز بیزیم اوشاقلار ایله دانیشیب حؤوصله‌سی آچیلاردی دا!
قلئیچی‌نین رنگی قیزاردی:
- آنام دا سالام یئتیریر... اینشاالله سونرالار موزاحیم اولاریق!
بونلار دانیشدیقلاریندا قوچ ایشینی بیتیرمیشدی. قلئیچی مورتوض تکرار قویونو آربایا میندیریب یولا دوشَنده شیخ آغادان سوروشدو:
- آغا! من هارادان بیلیم قویون بوغاز اولوبدور؟.. اولماییبدیر؟!
- صاباح صوبح کومه گیرنده باخ قویون یاتمیشسا بوغازدیر، یوخ.. آیاق اوسته دورموشسا بوغاز دئییل!
*
ائرته‌سی گون، قلئیچی مورتوض تئز یوخودان اویانیب هیجانلا کومه ساری قاچدی. باخدی گؤردو: قویون آیاق اوسته دیر!
- واخ.. توتماییب!- دئیه قلئیچی الینی دیزینه تاپدادی. آروادی خوُیلو خانیم دئدی:
- اولماسا بیر یولدا آپار!
قلئیچی مورتوض یئنه قویونو آرابایا میندیریب یولا دوشدو. شیخ آغا قویونو قوچون یانینا اؤتورمه‌دن دئدی:
- اوغلوم مورتوض! دوستلوغوموز، قوهوملوغوموز قالسین اویاندا، بوکز قوچون آتلانماغینا گره‌ک ییرمی مین تومن وئره‌سن!!
قلئیچی مورتوض راضی اولدو.
ائرته‌سی گون، یئنه قلئیچی مورتوض تئزدن کومه گیردیکده گؤردو: قویون یئنه آیاق اوسته‌دیر! اؤفکه‌له‌نیب آغاج ایله قویون وورماق ایسته‌ینده آروادی خوُیلو خانیم آرا گئچیب:
- اینشاالله بو کز توتار!- دئیه قلئیچینی قانع ائله‌دی تکرار قویونو قوچون یانینا آپارسین.
قلئیچی یئنه قویونو آرابایا میندیریب آپاردی آنجاق بو سفر شیخ آغا،" اوغلوم مورتوض! دوستلوغوموز، قوهوملوغوموز قالسین اویاندا..." دئیه اوتوز مین تومن ایسته‌دی. چارا یوخ ایدی...
صاباح قلئیچی مورتوض اویاندیقدا اومودسوز- اومودسوز آروادینا دئدی:
- دور، گئت باخ گؤر قویون نه حالدادیر؟.. یاتیب یا آیاق اوسته‌دیر؟!!
خویلو خانیم گئدیب، باخیب گلدی:
- قویون نه یاتیب نه ده آیاق اوسته‌دیر؛ آرابایا مینیب سنی گؤزله‌ییر!!
بؤلوم: حیكایه و گولمه‌جه‌لر